(vovworld) - ໂຄງການກໍ່ສ້າງຊົນນະບົດໃໝ່ຢູ່ຫວຽດນາມ ມີການເຂົ້າຮ່ວມຂອງຫຼາຍກຳລັງ, ໃນນັ້ນມີສະມາຊິກຊາວໜຸ່ມ, ຊາວໜຸ່ມ. ໃນ 3 ປີມານີ້, ດ້ວຍຂະບວນການ “ໄວໜຸ່ມຮ່ວມແຮງຮ່ວມໃຈກໍ່ສ້າງຊົນນະບົດໃໝ່“, ຊາວໜຸ່ມທົ່ວປະເທດໄດ້ຮັບຜິດຊອບຫຼາຍກິດຈະກຳ, ວຽກງານລະອຽດ ແລະ ນັບມື້ນັບເສີມຂະຫຍາຍປະສິດທິຜົນໃນການປ່ຽນໃໝ໋ໂສມໜ້າຊົນນະບົດຫວຽດນາມ.
(ພາບປະກອບ)
ປີ 2012 ພາຍຫຼັງສູນກາງຊາວໜຸ່ມກອມມູນິດ ໂຮ່ຈີມິນ ເລືອກເຟັ້ນ ບານກວາ ເປັນຕາແສງໄດ້ຮັບການໜູນຊ່ວຍກໍ່ສ້າງຊົນນະບົດໃໝ່, ຄະນະບໍລິຫານງານຊາວໜຸ່ມຕາແສງ ບານກວາ, ເມືອງ ບາດຊາດ, ແຂວງ ລາວກາຍ, ໄດ້ໂຄສະນາບັ້ນຂົນຂວາຍນີ້ເຖິງແຕ່ລະໜ່ວຍຊາວໜຸ່ມ ແລະ ລະດົມສະມາຊິກຊາວໜຸ່ມເປັນຈຳນວນຫຼວງຫຼາຍເຂົ້າຮ່ວມ. ມີວຽກງານແທດຈິງຫຼາຍຢ່າງໄດ້ມອບໃຫ້ຊາວໜຸ່ມເຊັ່ນ: ອອກແຮງງານຊ່ວຍເຫຼືອບັນດາຄອບຄົວທີ່ທຸກຍາກ, ຄອບຄົວນະໂຍບາຍ, ກໍ່ສ້າງທາງຄົມມະນາຄົມລະຫວ່າງບ້ານ, ຊ່ວຍປະຊາຊົນກໍ່ສ້າງບັນດາກິດຈະກຳອະນາໄມສິ່ງແວດລ້ອມ, ປູກປ່າໄດ້ 10 ເຮັກຕາ, ຂຸດລອກຄອງເໝືອງ, ບຸລະນະສຸສານນັກຮົບທີ່ເສຍສະຫຼະຊີວິດເພື່ອຊາດ… ພ້ອມນັ້ນ, ບັນດາການເຄື່ອນໄຫວມະນຸດສະທຳ, ກຸສົນ, ຕອບບຸນແທນຄຸນກໍ່ໄດ້ຮັບການປະຕິບັດເປັນປະຈຳ. ເລຂາຄະນະຊາວໜຸ່ມກອມມູນິດ ໂຮ່ຈີມິນ ຕາແສງ ບານກວາ, ຫງວຽນຕ໋ຽນແອງ, ໃຫ້ຮູ້ວ່າ:
“ພາຍຫຼັງ 3 ປີແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ພວກຂ້າພະເຈົ້າໄດ້ເປັນເຈົ້າການໂຄສະນາໃຫ້ຊາວໜຸ່ມວຽກງານຕ່າງໆ. ຜ່ານນັ້ນພວກຂ້າພະເຈົ້າໄດ້ຊ່ວຍໃຫ້ພະນັກງານ, ພໍ່ແມ່ປະຊາຊົນເຂົ້າໃຈໄດ້ຜົນປະໂຫຍດຂອງການເຂົ້າຮ່ວມກໍ່ສ້າງຊົນນະບົດໃໝ່. ປະຈຸບັນ, ຕາແສງພວກຂ້າພະເຈົ້າບັນລຸໄດ້ 17/19 ມາດຖານກ່ຽວກັບການກໍ່ສ້າງຊົນນະບົດໃໝ່ແລ້ວ“.
ຢູ່ແຂວງ ບາກລຽວ, ເລຂາຄະນະຊາວໜຸ່ມກອມມູນິດແຂວງ ບາກລຽວ, ເອື້ອຍ ເຈືອງຮົ່ງຈາງ ໃຫ້ຮູ້ວ່າ: 3 ປີຜ່ານມາ, ຂະບວນການ “ໄວໜຸ່ມຮ່ວມແຮງຮ່ວມໃຈກໍ່ສ້າງຊົນນະບົດໃໝ່“ ຂອງແຂວງ ບາກລຽວ ບັນລຸໄດ້ຜົນງານຕັ້ງໜ້າຫຼາຍຢ່າງ. ນັ້ນບໍ່ພຽງແຕ່ແມ່ນບັນດາກິດຈະກຳ, ຮູບແບບລະອຽດເທົ່ານັ້ນ, ຫາກສິ່ງສຳຄັນກວ່ານັ້ນແມ່ນ, ທີ່ຕັ້ງ, ບົດບາດຂອງຊາວໜຸ່ມໄດ້ຮັບການຢັ້ງຢືນໃນພາລະກິດພັດທະນາເສດຖະກິດສັງຄົມຢູ່ທ້ອງຖີ່ນ:
“ພວກຂ້າພະເຈົ້າເອົາໃຈໃສ່ເປັນພິເສດເຖິງບັນຫາຄົມມະນາຄົມຊົນນະບົດ ແລະ ໜູນຊ່ວຍບາງກິດຈະກຳຕື່ມອີກໃນການກໍ່ສ້າງຊົນນະບົດໃໝ່. ຕົວຢ່າງຄື: ຫໍວັດທະນະທຳບ້ານໄດ້ຮັບການກໍ່ສ້າງສຳເລັດແລ້ວ, ແຕ່ບໍ່ມີພື້ນຖານດ້ານວັດຖຸ, ດັ່ງນັ້ນຄະນະຊາວໜຸ່ມໄດ້ຮຽກຮ້ອງກຸ່ມວິສາຫະກິດສູນກາງອຸປະຖຳຄອມພິວເຕີໃຫ້. ຜ່ານນັ້ນຊາວໜຸ່ມ ແລະ ປະຊາຊົນສາມາດເຂົ້າອິນເຕີແນດເພື່ອຮຳ່ຮຽນບັນດາຮູບແບບທີ່ດີ, ວິທີເຮັດທີ່ມີປະສິດທິຜົນໃນການກໍ່ສ້າງຊົນນະບົດໃໝ່“.
ພາຍຫຼັງ 3 ປີແຫ່ງການຜັນຂະຫຍາຍບັ້ນຂົນຂວາຍ “ໄວໜຸ່ມຮ່ວມແຮງຮ່ວມໃຈກໍ່ສ້າງຊົນນະບົດໃໝ່“, ໄວໜຸ່ມໃນທົ່ວປະເທດກໍ່ສ້າງທາງຄົມມະນາຄົມຊົນນະບົດໄດ້ເກືອບ 11.000 ກມ, ຫໍວັດທະນະທຳກວ່າ 2.820 ແຫ່ງ, ເຮືອນແຫ່ງສາຍຈິດມິດໃຈ 5.255 ແຫ່ງ ກໍ່ຄືຊ່ວຍຊາວໜຸ່ມຊົນນະບົດ 30.000 ກວ່າຄົນກູ້ຢືມທຶນທຳການຜະລິດ; ຊ່ວຍໃຫ້ຄຳປຶກສາ, ແນະນຳວຽກເຮັດງານທຳໃຫ້ຊາວໜຸ່ມ 2,6 ລ້ານຄົນ, ສອນວິຊາຊີບໃຫ້ 350.000 ກວ່າຄົນ, ແກ້ໄຂວຽກເຮັດງານທຳໃຫ້ສະມາຊິກຊາວໜຸ່ມໄດ້ 420.000 ກວ່າຄົນ. ເອື້ອຍ ຟານທິຟຸກ, ເລຂາຄະນະຊາວໜຸ່ມຕາແສງ ກິມລອງ, ເມືອງ ເຈົາດຶກ ແຂວງ ບ່າເຣ້ຍ ວຸ້ງເຕົ່າ, ຖືວ່າ: ຊາວໜຸ່ມປາຖະໜາຢາກເຂົ້າຮ່ວມການກໍ່ສ້າງຊົນນະບົດໃໝ່ຜ່ານການພັດທະນາເສດຖະກິດຢູ່ທ້ອງຖີ່ນ, ເພີ່ມຂະແໜງອາຊີບ, ການບໍລິການ, ເຮັດເສດຖະກິດຟາມ…
“ບັນດາຮູບແບບຫັນປ່ຽນວິທະຍາສາດເຕັກນິກແມ່ນມີຄວາມຈຳເປັນໃຫ້ພວກເພື່ອນ ແລະ ເຂດຊົນນະບົດໃນປະຈຸບັນ. ຫວັງວ່າສູນກາງ, ທ້ອງຖີ່ນຈະມີບັນດາຮູບແບບໃໝ່ ແລະ ຖ່າຍທອດວິທະຍາສາດເຕັກນິກ ເພື່ອໃຫ້ພວກເພື່ອນໜຸ່ມມີຄວາມຮູ້ພື້ນຖານ, ປະກອບສ່ວນແກ້ໄຂວຽກເຮັດງານທຳໃຫ້ພວກເພື່ອນໜຸ່ມຢູ່ທ້ອງຖີ່ນ“.
ກ່ຽວກັບບັນຫານີ້, ທ່ານເລຂາຄະນະຊາວໜຸ່ມສູນກາງ ຫງວຽນແອງຕ໋ວນ, ຖືວ່າ: ການກໍ່ສ້າງຊົນນະບົດໃໝ່ ບໍ່ພຽງແຕ່ເພື່ອຈຸດປະສົງປ່ຽນໃໝ່ໂສມໜ້າຊົນນະບົດເທົ່ານັ້ນ, ຫາກສິ່ງສຳຄັນກວ່າ ແມ່ນຍົກສູງຊີວິດການເປັນຢູ່, ລາຍຮັບຂອງປະຊາຊົນ. ຍ້ອນເຫດນັ້ນ, ຊາວໜຸ່ມຄວນຍູ້ແຮງການພັດທະນາການຜະລິດ, ກໍ່ສ້າງ ແລະ ຂະຫຍາຍບັນດາຮູບແບບເສດຖະກິດ, ຊ່ວຍປະຊາຊົນສ້າງຄວາມຮັ່ງມີຢູ່ບ້ານເກີດຂອງຕົນ.
“ປະຈຸບັນ, ການພັດທະນາເສດຖະກິດຊົນນະບົດແມ່ນໜ້າທີ່ຈຸດສຸມ. ນີ້ກໍ່ແມ່ນຂອດຮັບປະກັນໃຫ້ແກ່ການປະຕິບັດບັນດາມາດຖານອື່ນໆເພື່ອກໍ່ສ້າງຊົນນະບົດໃໝ່ຢ່າງໝັ້ນຄົງ. ເມື່ອເສດຖະກິດພັດທະນາ, ພວກເຮົາຈະມີເງື່ອນໄຂລົງທຶນໃຫ້ໂຄງລ່າງ, ວັດທະນະທຳ, ການສຶກສາ, ແກ້ໄຂວຽກເຮັດງານທຳຢູ່ກັບທີ່. ພວກຂ້າພະເຈົ້າຖືວ່າ, ຄວນເພີ່ມທະວີການນຳໃຊ້ພຸມປັນຍາ, ວິທະຍາສາດເຕັກນິກໃນການເຄື່ອນໄຫວອາສາສະໝັກຂອງຊາວໜຸ່ມໃນການເຂົ້າຮ່ວມກໍ່ສ້າງຊົນນະບົດໃໝ່“.
“ບ່ອນໃດມີຄວາມຕ້ອງການ, ບໍ່ນັ້ນມີຊາວໜຸ່ມ; ບ່ອນໃດປະສົບຄວາມຫຍຸ້ງຍາກ, ບ່ອນນັ້ນມີຊາວໜຸ່ມ“. ຄຳຂວັນນີ້ອີກເທື່ອໜຶ່ງໄດ້ຮັບການພິສູດຜ່ານການເຂົ້າຮ່ວມຢ່າງສຸດຈິດສຸດໃຈ, ມີປະສິດທິຜົນຂອງໄວໜຸ່ມໃນທົ່ວປະເທດ, ເມື່ອນັບມື້ນັບມີຫຼາຍກິດຈະກຳທີ່ໃສ່ຊື່ຊາວໜຸ່ມໄດ້ຮັບການສ້າງຂຶ້ນ, ປະກອບສ່ວນຢ່າງຕັ້ງໜ້າເຂົ້າໃນການປ່ຽນໃໝ່ໂສມໜ້າບ້ານເກີດເມືອງນອນ, ຍົກສູງຊີວິດການເປັນຢູ່ຂອງປະຊາຊົນຢູ່ເຂດຊົນນະບົດ, ເຂດພູດອຍ.