(vovworld) - ໂດຍແມ່ນຕາແສງຢູ່ເມືອງ ເດີນເຢືອງ, ແຂວງ ເລິມດົ່ງ, ດ້າຣ່ອນ ມີດິນຟ້າອາກາດເໝາະສົມກັບການປູກຕົ້ນໄມ້ເຂດອຸ່ນ ແລະ ເຂດຮ້ອນຫຼາຍຊະນິດ ກໍ່ຄື ພັດທະນາການລ້ຽງສັດ. ດ້ວຍທ່າສະດວກນັ້ນ, ດ້າຣ່ອນ ໄດ້ຍູ້ແຮງການພັດທະນາຮູບແບບຜະລິດກະສິກຳດ້ວຍການນຳໃຊ້ເຕັກໂນໂລຢີສູງ, ປະກອບສ່ວນປະຕິບັດສຳເລັດບັນດາຄາດໝາຍໃນການກໍ່ສ້າງຊົນນະບົດໃໝ່.
ພາບປະກອບ
ກ່ອນນີ້ 10 ກວ່າປີ, ດ້າຣ່ອນ ແມ່ນຕາແສງຫຍຸ້ງຍາກເປັນພິເສດຂອງແຂວງ ເລິມດົ່ງ. ແຕ່ພາຍຫຼັງມານະພະຍາຍາມປະຕິບັດແຜນນະໂຍບາຍ “ຫຼຸດຜ່ອນຄວາມທຸກຍາກຢ່າງໄວ ແລະ ໝັ້ນຄົງ“ ໄລຍະໜຶ່ງ, ໂດຍສະເພາະ, ນັບແຕ່ຜັນຂະຫຍາຍໂຄງການກໍ່ສ້າງຊົນນະບົດໃໝ່ແຕ່ປີ 2012, ດ້າຣ່ອນ ພ້ອມກັບບັນດາຕາແສງ, ເທດສະບານອື່ນໆໃນເມືອງ ໄດ້ວາງຮູບແບບຜະລິດກະສິກຳຕ່າງໆເທື່ອລະກ້າວ. ພິເສດແມ່ນບັນດາຮູບແບບນຳໃຊ້ອຸດສາຫະກຳສູງເຂົ້າໃນການຜະລິດກະສິກຳ, ຈາກນັ້ນຍົກສູງຊີວິດການເປັນຢູ່ຂອງຊາວກະສິກອນຂຶ້ນ. ເພື່ອປະຕິບັດຄາດໝາຍດັ່ງກ່າວ, ດ້າຣ່ອນ ໄດ້ເປັນເຈົ້າການສົມທົບກັບສະມາຄົມຊາວກະສິກອນຂອງແຂວງ ລົງທຶນພັດທະນາບັນດາຮູບແບບປູກຜັກປອດສານພິດ, ປູກຜັກ, ຕົ້ນໄມ້ກິນໝາກ, ປູກດອກລີລີ, ດອກກຸຫຼາບ, ກໍ່ສ້າງເຮືອນແກ້ວ, ກໍ່ສ້າງລະບົບຫົດນ້ຳປະຢັດ, ຈາກນັ້ນຍົກສູງມູນຄ່າຜະລິດໃນເນື້ອທີ່ປູກຝັງແຕ່ລະເຮັກຕາຂຶ້ນ. ພ້ອມກັບການສ້າງບັນດາຮູບແບບປູກສະເພາະ, ທາງຕາແສງຍັງສົ່ງເສີມບັນດາຄອບຄົວຊາວກະສິກອນຍູ້ແຮງຮູບແບບລ້ຽງງົວນົມ, ຍ້ອນເຫດນັ້ນການຜະລິດກະສິກຳທ້ອງຖີ່ນໄດ້ຮັບການຫັນປ່ຽນເທື່ອລະກ້າວ, ນຳມາເຊິ່ງປະສິດທິຜົນຢ່າງແທດຈິງ. ບັນດາຮູບແບບນີ້ເສີມຂະຫຍາຍປະສິດທິຜົນ ບໍ່ພຽງແຕ່ຊ່ວຍໃຫ້ຫຼາຍຄອບຄົວຊາວກະສິກອນຫຼຸດພົ້ນອອກຈາກຄວາມທຸກຍາກ, ອຶດຫີວເທົ່ານັ້ນ, ຫາກຍັງບືນຕົວຂຶ້ນສ້າງຄວາມຮັ່ງມີ, ມີຊີວິດທາງດ້ານວັດຖຸ ແລະ ຈິດໃຈດີກວ່າອີກດ້ວຍ. ປະຈຸບັນ, ທົ່ວຕາແສງມີງົວນົມປະມານ 1.800 ໂຕ. ແຕ່ລະວັນສະໜອງນຳ້ນົມສົດໃຫ້ບໍລິສັດຕ່າງໆດ້ວຍມູນຄ່ານັບຮ້ອຍລ້ານດົ່ງ, ໃນຂະນະທີ່ບັນດາຄອບຄົວປູກຜັກໃນເຮືອນແກ້ວສາມາດສ້າງລາຍຮັບໄດ້ແຕ່ 400 – 500 ລ້ານດົ່ງ/ປີນັ້ນ, ການປູກດອກໄມ້ພັດສ້າງລາຍຮັບໄດ້ແຕ່ 1-1,5 ຕື້ດົ່ງ/ເຮັກຕາ. ທ່ານ ເລວັນເກືອງ, ຊາວກະສິກອນປູກດອກໄມ້ຢູ່ຕາແສງ ດ້າຣ່ອນ, ໃຫ້ຮູ້ວ່າ:
“ໃນຊຸມປີມໍ່ໆມານີ້, ມີຫຼາຍຄອບຄົວເລີ່ມພັດທະນາການປູກດອກໄມ້, ແຕ່ແຫຼ່ງທຶນໃນເບື້ອງຕົ້ນຍັງຈຳກັດຢູ່, ຖ້າລັດເອົາໃຈໃສ່ມີນະໂຍບາຍໜູນຊ່ວຍ ທຶນ, ຈະມີຫຼາຍຄອບຄົວຊາວກະສິກອນສາມາດພັດທະນາການຜະລິດໄດ້ຫຼາຍກວ່າອີກ“.
ພ້ອມກັບການສ້າງບັນດາຮູບແບບຜະລິດໃໝ່, ຕາແສງຍັງຈັດຕັ້ງຊຸດອົບຮົມດ້ານວິທະຍາສາດ, ເຕັກນິກປູກຝັງ ແລະ ລ້ຽງສັດໃຫ້ຊາວກະສິກອນໄດ້ 60 ຊຸດ. ເລື່ອງຍູ້ໄວການນຳໃຊ້ເຕັກໂນໂລຢີຂໍ້ມູນຂ່າວສານ, ເຕັກໂນໂລຢີສູງເຂົ້າໃນກນຜະລິດກະສິກຳ, ບໍ່ພຽງແຕ່ນຳມາເຊິ່ງມູນຄ່າກຳໄລສູງເທົ່ານັ້ນ, ຫາກຍັງເໝາະສົມກັບແຜນນະໂຍບາຍຂອງລັດອີກດ້ວຍ, ເພື່ອແນໃສ່ຍູ້ໄວການສ້າງໂຄງປະກອບຄືນໃໝ່ໃນຂະແໜງກະສິກຳ, ຫັນກະສິກຳເປັນທັນສະໄໝ, ກໍ່ສ້າງພື້ນຖານກະສິກຳຂຽວ, ພັດທະນາແບບຍືນຍົງ, ຊຸກຍູ້ບັນດາວິສາຫະກິດກະສິກຳຍົກສູງຄວາມສາມາດແກ່ງແຍ້ງ. ທ່ານ ຫງວຽນແທ່ງຮຶງ, ລັດຖະມົນຕີຊ່ວຍວ່າການກະຊວງຖະແຫຼງຂ່າວ ແລະ ສື່ສານ, ໃຫ້ຮູ້ວ່າ:
“ເຕັກໂນໂລຢີຂໍ້ມູນຂ່າວສານ, ເຕັກໂນໂລຢີສູງ ແມ່ນການເລືອກເຟັ້ນ, ມີຄວາມສາມາດບົ່ມຊ້ອນໃຫຍ່ໃນການໜູນຊ່ວຍຍຸດທະສາດສ້າງໂຄງປະກອບຂະແໜງກະສິກຳຄືນໃໝ່. ເລື່ອງນຳໃຊ້ເຕັກໂນໂລຢີຂໍ້ມູນຂ່າວສານ, ເຕັກໂນໂລຢີສູງໃນຂະແໜງກະສິກຳແບ່ງປັນບົດຮຽນ, ໜູນຊ່ວຍວຽກງານເກັບກ່ຽວ, ຍົກສູງຄຸນນະພາບ ແລະ ຜະລິດຕະພັນກະເສດ, ນຳຜະລິດຕະພັນກະເສດສຳພັດກັບຕະຫຼາດຢ່າງໄວ ແລະ ຍົກສູງປະສິດທິຜົນການຜະລິດກະສິກຳ“.
ພ້ອມກັບການສົ່ງເສີມບັນດາຮູບແບບຜະລິດກະສິກຳແບບໃໝ່, ອຳນາດການປົກຄອງຕາແສງກໍ່ໄດ້ສົມທົບກັບປະຊາຊົນບ້ານ, ບັນດາອົງການຈັດຕັ້ງການເມືອງ, ສັງຄົມ ໂຄສະນາ, ຂົນຂວາຍ ເພື່ອໃຫ້ປະຊາຊົນມີສະຕິຕື່ນຕົວ, ສະໝັກໃຈເຂົ້າຮ່ວມການກໍ່ສ້າງຊົນນະບົດໃໝ່ ດ້ວຍບັນດາວຽກງານລະອຽດຄື: ຫັນປ່ຽນໂຄງປະກອບຜົນລະປູກ, ສັດລ້ຽງຕາມກຳນົດທິດຂອງຕາແສງ, ປະກອບກຳລັງເຫື່ອແຮງ, ເງິນທຶນ, ບໍລິຈາກທີ່ດິນ ເພື່ອກໍ່ສ້າງບັນດາກິດຈະກຳສະຫວັດດີການຄື: ໄຟຟ້າ, ທາງ, ໂຮງຮຽນ, ສຸກສາລາ, ຍົກລະດັບ, ສ້ອມແປງເຮືອນຢູ່, ທາງບ້ານ, ຮ່ອມທາງດ້ວຍທຶນປະກອບ ຕາມທິດນຳ “ປະຊາຊົນເຮັດເອງ, ລັດໜູນຊ່ວຍ“. ດ້ວຍວິທີເຮັດຄືດັ່ງກ່າວ, ດ້າຣ່ອນ ໄດ້ກໍ່ສ້າງສຳເລັດລະບົບໂຮງຮຽນ, ສຸກສາລາ. ພິເສດ,ລະບົບທາງຄົມມະນາຄົມຊົນນະບົດໄດ້ຮັບການປູຢາງເຖິງແຕ່ລະບ້ານ, ຕອບສະໜອງຄວາມຕ້ອງການຈໍລະຈອນສິນຄ້າ ແລະ ການໄປມາຂອງປະຊາຊົນ.
ດ້ວຍທິດທາງ ແລະ ວິທີເຮັດຢ່າງຕັ້ງໜ້ານັ້ນ. ມາຮອດປະຈຸບັນ, , ຕາແສງ ດ້າຣ່ອນ ແມ່ນໜຶ່ງໃນບັນດາຕາແສງທີ່ດີເດັ່ນຢູ່ເມືອງ ເດີນເຢືອງ ແລະ ແຂວງ ເລິມດົ່ງ ໄດ້ສຳເລັດບັນດາມາດຖານກໍ່ສ້າງຊົນນະບົດໃໝ່ໂດຍໄວ. ສິ່ງສຳຄັນກວ່ານັ້ນແມ່ນຊີວິດຂອງປະຊາຊົນໃນຕາແສງໄດ້ມີການປ່ຽນແປງພໍສົມຄວນ. ຖ້າຫາກວ່າປີ 2000 ອັດຕາສ່ວນຄອບຄົວທຸກຍາກຢູ່ ດ້າຮ່ອນແມ່ນ 50% ຮອດປີ 2015, ອັດຕາສ່ວນຜູ້ທຸກຍາກຍັງເຫຼືອພຽງ 5% ເທົ່ານັ້ນ. ຜົນງານແຫ່ງການພັດທະນາກະສິກຳຢູ່ ດ້າຣ່ອນ ແມ່ນຮູບແບບ ເພື່ອໃຫ້ຫຼາຍທ້ອງຖີ່ນອື່ນໆປະຕິບັດຕາມ.