(vovworld) - ນະຄອນ ເຊີນລາ, ແຂວງເຊີນລາ, ໄດ້ເລືອກເຟັ້ນຕາແສງ ຈ່ຽງຊົມ ເປັນແຫ່ງຜັນຂະຫຍາຍທົດລອງໂຄງການກໍ່ສ້າງຊົນນະບົດໃໝ່. ດ້ວຍຄວາມເປັນເຈົ້າການໃນການສ້າງແຜນການ ແລະ ຜັນຂະຫຍາຍການກໍ່ສ້າງຊົນນະບົດໃໝ່, ມາຮອດປະຈຸບັນ, ໂສມໜ້າຂອງຕາແສງໄດ້ມີການປ່ຽນແປງຫຼາຍຢ່າງ. ບົດຂຽນ “ຕາແສງຈ່ຽງຊົມ ກໍ່ສ້າງຊົນນະບົດໃໝ່” ຂອງນັກຂ່າວວິທະຍຸກະຈາຍສຽງຫວຽດນາມ, ໄດ້ແນະນຳການປ່ຽນໃໝ່ຢູ່ຕາແສງນີ້, ເຊີນທ່ານຮັບຟັງ.
ພາບ: ອິນເຕີແນດ
ຕາແສງຈ່ຽງຊົມ, ຕັ້ງຢູ່ແຄມນະຄອນເຊີນລາ (ຫ່າງຈາກນະຄອນຫຼວງຮ່າໂນ້ຍ ປະມານ 300 ກມ), ມີ 1.300 ກວ່າຄອບຄົວ, ແລະ ພົນລະເມືອງປະມານ 5,300 ຄົນ. ນີ້ແມ່ນແຫ່ງດຳລົງຊີວິດຂອງຊາວເຜົ່າໄທເປັນຕົ້ນຕໍ. ປີ 2010, ນະຄອນເຊີນລາ ໄດ້ເລືອກເຟັ້ນຕາແສງຈ່ຽງຊົມ ເປັນແຫ່ງປະຕິບັດທົດລອງໂຄງການກໍ່ສ້າງຊົນນະບົດໃໝ່. ພາຍຫຼັງແຜນການໄດ້ຮັບການຜັນຂະຫຍາຍ, ທາງຕາແສງໄດ້ສ້າງຕັ້ງຄະນະຊີ້ນຳວຽກງານກໍ່ສ້າງຊົນນະບົດໃໝ່ ແລະ ດຳເນີນການຕີລາຄາສະພາບຕົວຈິງຢູ່ໃນເຂດ; ພ້ອມທັງວາງແຜນກຳນົດເພື່ອຍື່ນສະເໜີຕໍ່ຂັ້ນເທິງອະນຸມັດຜ່ານ. ນັບແຕ່ຜັນຂະຫຍາຍໂຄງການກໍ່ສ້າງຊົນນະບົດໃໝ່, ໂສມໜ້າຂອງຕາແສງໄດ້ມີການປ່ຽນແປງພໍສົມຄວນ. ເສັ້ນທາງຄົມມະນາຄົມໄດ້ຮັບການເປີດກວ້າງ, ຍົກລະດັບເພື່ອໄປມາຢ່າງສະດວກສະບາຍ. ມີຫຼາຍຄອບຄົວພວມປ່ຽນໃໝ່ວິທີການຜະລິດເທື່ອລະກ້າວ, ນຳເອົາຕົ້ນໄມ້ ແລະ ສັດທີ່ມີມູນຄ່າເສດຖະກິດສູງເຂົ້າໃນການຜະລິດຕາມທິດຜະລິດເປັນສິນຄ້າ. ມີຮູບແບບຈຳນວນໜຶ່ງໄດ້ຊ່ວຍຍົກສູງຊີວິດການເປັນຢູ່ຂອງຊາວກະສີກອນ, ນຳມາເຊິ່ງແຫຼ່ງລາຍຮັບສູງພໍສົມຄວນຄື: ປູກດອກໄມ້, ລ້ຽງປາ, ລ້ຽງໝູດ້ວຍຂອບຂະໜາດໃຫຍ່... ທາງຕາແສງວາງຄາດໝາຍສູ້ຊົນຫຼຸດຜ່ອນອັດຕາສ່ວນຜູ້ເຮັດວຽກງານກະສີກຳໃຫ້ລົງເຫຼືອພຽງ 77%. ທ່ານ ຫຼໍ່ວັນລວນ, ຮອງປະທານຄະນະກຳມະການປະຊາຊົນຕາແສງຈ່ຽງຊົມ, ຮອງຫົວໜ້າຄະນະຊີ້ນຳການກໍ່ສ້າງຊົນນະບົດໃໝ່ຂອງຕາແສງ, ໃຫ້ຮູ້ວ່າ:
“ຕ້ອງເປັນເຈົ້າການຜັນຂະຫຍາຍແຜນການ. ດັ່ງນັ້ນຄະນະຊີ້ນຳຕາແສງ ໄດ້ເຫັນດີເປັນເອກະພາບຕໍ່ຂໍ້ຕົກລົງນີ້ໂດຍໄວ, ເພາະວ່າທຸກຄົນຕ່າງກໍ່ກຳນົດໄດ້ວ່າ ນີ້ແມ່ນກາລະໂອກາດເພື່ອໃຫ້ປະຊາຊົນປ່ຽນໃໝ່ຊີວິດການເປັນຢູ່”.
ພາບ: ອິນເຕີແນດ
ມາຮອດປະຈຸບັນ, ຕາແສງຈ່ຽງຊົື່ບັນລຸໄດ້ 4/19 ມາດຖານກ່ຽວກັບການກໍ່ສ້າງຊົນນະບົດໃໝ່. ນັ້ນແມ່ນ: ຫຼຸດຜ່ອນອັດຕາສ່ວນຄອບຄົວທີ່ທຸກຍາກ, ສ້າງຮູບການຈັດຕັ້ງການຜະລິດ; ຍົກສູງຊີວິດທາງດ້ານວັດທະນະທຳ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ. ມີບາງມາດຖານບັນລຸໄດ້ກວ່າ 50% ຕາມແຜນການແລ້ວຄື: ຊົນລະປະທານ, ໄຟຟ້າ, ສາທາລະນະສຸກ, ການສຶກສາ, ໄປສະນີ, ລະບົບຈັດຕັ້ງການເມືອງ, ສັງຄົມ. ໃນບັນດາມາດຖານທີ່ຍັງເຫຼືອ, ເພື່ອໃຫ້ເໝາະສົມກັບເງື່ອນໄຂຂອງພໍ່ແມ່ປະຊາຊົນ, ທາງຕາແສງໄດ້ຕົກລົງເລືອກເອົາມາດຖານກ່ຽວກັບການກໍ່ສ້າງທາງຄົມມະນາຄົມທີ່ເຊື່ອມຕໍ່ລະຫວ່າງບ້ານ, ຕາແສງ ເພື່ອປະຕິບັດກ່ອນ. ພິເສດແມ່ນຍູ້ແຮງການໂຄສະນາເພື່ອໃຫ້ປະຊາຊົນເຂົ້າໃຈກ່ຽວກັບຄວາມໝາຍຂອງໂຄງການ, ຈາກນັ້ນເຂົາເຈົ້າຈະຕັ້ງໜ້າເຂົ້າຮ່ວມ. ທ່ານ ຕ່ອງວັນຝ໋ອງ, ຫົວໜ້າບ້ານຫຸມ, ຕາແສງຈ່ຽງຊົມ, ໃຫ້ຮູ້ວ່າ:
“ພວກຂ້າພະເຈົ້າໄດ້ຈັດຕັ້ງການປະຊຸມໃນໝູ່ບ້ານຫຼາຍຄັ້ງ ເພື່ອຜັນຂະຫຍາຍໂຄງການກໍ່ສ້າງຊົນນະບົດໃໝ່ໃຫ້ດີ. ໃນການປະຊຸມແຕ່ລະຄັ້ງ, ພວກຂ້າພະເຈົ້າລ້ວນແຕ່ລະດົມຄະນະພັກ, ອຳນາດການປົກຄອງທຸກຂັ້ນ ແລະ ອົງການຈັດຕັ້ງມະຫາຊົນ ກໍ່ຄືປະຊາຊົນໃນບ້ານເຂົ້າຮ່ວມ. ພວກຂ້າພະເຈົ້າກຳນົດວ່າ, ທຸກຄອບຄົວເຂົ້າຮ່ວມການກໍ່ສ້າງເສັ້ນທາງໃຫ້ກວ້າງຂວາງ, ສວຍງາມກວ່າ, ເພື່ອອຳນວຍຄວາມສະດວກໃຫ້ແກ່ການໄປມາຂອງປະຊາຊົນ”.
ພາບ: ອິນເຕີແນດ
ປະຈຸບັນ, ທົ່ວຕາແສງຈ່ຽງຊົມ ສາມາດຍົກລະດັບທາງໃນຮ່ອມບ້ານໄດ້ 7 ກມ, ທາງຕົ້ນຕໍ່ໃນບ້ານໄດ້ເກືອບ 3 ກມ. ຊາວບ້ານດີໃຈທີ່ສຸດເພາະວ່າ ນັບແຕ່ນີ້ໄດ້ມີທາງໄປມາຢ່າງສະດວກສະບາຍ. ຜ່ານການໂຄສະນາ, ຂົນຂວາຍ, ຊາວບ້ານຈ່ຽງຊົມ ລ້ວນແຕ່ຮັບຮູ້ໄດ້ວ່າ, ຕ້ອງກຳໄດ້ກາລະໂອກາດ, ຮ່ວມແຮງຮ່ວມໃຈກໍ່ສ້າງຊົນນະບົດໃໝ່. ດັ່ງນັ້ນຫຼາຍຄອບຄົວໄດ້ເປັນເຈົ້າການຍົກລະດັບເຮືອນຢູ່ຂອງຕົນ, ຂູດຄອງເໝືອງ, ມອບດິນເຮັດທາງດ້ວຍຄວາມສະໝັກໃຈ ແນໃສ່ຮັບປະກັນບັນດາຄາດໝາຍໃນໂຄງການ. ຕົວຢ່າງຄືໝູ່ບ້ານສັງ ມີ 15 ຄອບຄົວມອບດິນ, ດ້ວຍເນື້ອທີ່ທັງໝົດແມ່ນ 165 ຕາລາງແມດ; ໝູ່ບ້ານຫຸມ ມີ 35 ຄອບຄົວມອບດິນ, ດ້ວຍເນື້ອທີ່ທັງໝົດ 1.200 ຕາລາງແມດ. ປ້າ ຫຼໍ່ທິຮ່ວານ, ຊາວບ້ານ ສັງ, ໃຫ້ຮູ້ວ່າ:
“ໂດຍໄດ້ຮັບການໂຄສະນາ ແລະ ຂົນຂວາຍ, ພວກຂ້າພະເຈົ້າເຂົ້າໃຈໄດ້ວ່າ ການກໍ່ສ້າງຊົນນະບົດໃໝ່ແມ່ນວຽກງານທີ່ດີໃຫ້ແກ່ຊີວິດຂອງປະຊາຊົນ. ດັ່ງນັ້ນພວກຂ້າພະເຈົ້າຈຶ່ງພ້ອມແລ້ວທີ່ຈະເຂົ້າຮ່ວມ. ສະເພາະຄອບຄົວຂ້າພະເຈົ້າໄດ້ຕັດຕົ້ນໝາກລຳໃຍ 12 ຕົ້ນ ແລະ ໄມ້ໄຜ່ 18 ພຸ່ມ ເພື່ອມອບດິນໃຫ້ແກ່ການກໍ່ສ້າງທາງ. ປະຈຸບັນ, ເຫັນວ່າໃນໝູ່ບ້ານມີເສັ້ນທາງໄປມາຢ່າງກວ້າງຂວາງ, ສວຍງາມ, ພວກຂ້າພະເຈົ້າດີໃຈຫຼາຍ”.
ຜົນງານໃນເບື້ອງຕົ້ນແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ຕາແສງ ຈ່ຽງຊົມ ແມ່ນໜ້າຈົດຈຳ. ພໍ່ແມ່ປະຊາຊົນໃນໝູ່ບ້ານ ໄດ້ເປັນເຈົ້າການໃນການເສີມຂະຫຍາຍແຫຼ່ງກຳລັງພາຍໃນ ເພື່ອຜັນຂະຫຍາຍການກໍ່ສ້າງຂະບວນການນີ້. ແຕ່ເພື່ອບັນລຸໄດ້ 19 ມາດຖານກ່ຽວກັບຊົນນະບົດໃໝ່, ຕ້ອງຜ່ານໄລຍະທາງອັນຍາວນານໃນຕໍ່ໜ້າ... ແຕ່ທຸກສິ່ງທຸກຢ່າງທີ່ເຂົາເຈົ້າບັນລຸໄດ້ໃນປະຈຸບັນ ຈະແມ່ນພື້ນຖານ ແລະ ກຳລັງໜູນ ເພື່ອໃຫ້ຕາແສງຈ່ຽງຊົມ ປະຕິບັດສຳເລັດການກໍ່ສ້າງຊົນນະບົດໃໝ່ຕາມແຜນການທີ່ໄດ້ວາງອອກ.