ປະຊາຊົນເຂົ້າຮ່ວມການກໍ່ສ້າງທາງຄົມມະນາຄົມຢ່າງສຸດຈິດສຸດໃຈ
ສຽງກົນຈັກປົນເບຕົງ, ສຽງຮຽກເອີ້ນກັນອຶກກະທຶກຄຶກຄົມໄປທົ່ວທັງບ້ານ, ຜູ້ລະວຽກ, … ເຖິງວ່າຕິດຄາກັບວຽກງານກໍ່ຕາມ, ແຕ່ຊາວຕາແສງດົງຖໍ້ ຍັງຄົງເບິກບານມ່ວນຊື່ນ ເພາະວ່າບໍ່ດົນປານໃດ, ບັນດາບ້ານໃນຕາແສງຈະມີທາງເບຕົງສາຍໃໝ່ທີ່ຮາບພຽງ, ກວ້າງຂວາງ, ແທນໃຫ້ທາງດິນທີ່ຄັບແຄບເຄີຍເປັນຕົມໃນຍາມຝົນຕົກ.
ເມື່ອມີແຈ້ງການກ່ຽວກັບການກໍ່ສ້າງເສັ້ນທາງຄົມມະນາຄົມຕາມມາດຖານຊົນນະບົດໃໝ່, ປະຊາຊົນຕາແສງດົງຖໍ້ ຜູ້ໃດກໍ່ຮູ້ສຶກເບີກບານມ່ວນຊື່ນ. ບັນດາສະມາຊິກໃນຄອບຄົວກໍ່ລະດົມກັນເຂົ້າຮ່ວມຢ່າງຕັ້ງໜ້າ. ບໍ່ພຽງແຕ່ປະກອບກຳລັງແຮງງານເທົ່ານັ້ນ, ຫຼາຍຄອບຄົວຍັງປະກອບທີ່ດິນ, ບໍລິຈາກເງິນເພື່ອກໍ່ສ້າງທາງຄົມມະນາຄົມໃນຕາແສງອີກດ້ວຍ. ຄອບຄົວອ້າຍ ຫງວຽນເທ໋ຟ໋ອງ, ອ້າຍເຈິ່ນວັນທວາ, ໃນບ້ານເຈິ່ນຟູ໋ ໄດ້ປະກອບທີ່ດິນກວ່າ 50 ຕາລາງແມັດ, ສ່ວນບັນດາຄອບຄົວອື່ນໆກໍ່ປະກອບທີ່ດິນແຕ່ 15 – 25 ຕາລາງແມັດ ພ້ອມກັບແຮງງານ, ຫຼືຄອບຄົວອ້າຍ ຫງວຽນວັນຮູຍ, ໃນບ້ານລາມເຊີນ ໄດ້ບໍລິຈາກເງິນ 480 ລ້ານດົ່ງເພື່ອເຮັດທາງ. ທ່ານ ຫງວຽນງອກຮ່ວາຊາວບ້ານດົງຖໍ້, ໃຫ້ຮູ້ວ່າ:
“ມາດຖານກໍ່ສ້າງຊົນນະບົດໃໝ່ ເຮັດໃຫ້ໂສມໜ້າ, ທາງຄົມມະນາຄົມຊົນນະບົດກວ້າງຂວາງ, ສວຍງາມກວ່າ. ປະຊາຊົນສ່ວນຫຼາຍແມ່ນສະໜັບສະໜູນ ແລະ ຕັ້ງໜ້າເຂົ້າຮ່ວມການເຮັດທາງຕາມມາດຖານກໍ່ສ້າງຊົນນະບົດໃໝ່. ແຕ່ລະຄອບຄົວປະກອບ 500.000 ດົ່ງ, ແລະ ແຮງງານປະມານ 20 – 30 ວັນ”.
ພາຍຫຼັງມີແຜນນະໂຍບາຍກໍ່ສ້າງທາງຄົມມະນາຄົມຕາມມາດຖານຊົນນະບົດໃໝ່, ອຳນາດການປົກຄອງບັນດາບ້ານໃນຕາແສງດົງຖໍ້ ໄດ້ສ້າງຕັ້ງຄະນະກໍ່ສ້າງ ໂດຍປະຊາຊົນເປັນຜູ້ບໍລິຫານວຽກງານໂດຍກົງ. ວຽກງານນີ້ໄດ້ສ້າງຄວາມເຫັນດີເຫັນພ້ອມໃນໝູ່ປະຊາຊົນດົງຖໍ້. ທ່ານ ດັ້ງວັນທັ໋ງ, ເລຂາໜ່ວຍພັກ, ຫົວໜ້າຄະນະວຽກງານແນວໂຮມບ້ານລາມເຊີນ, ໃຫ້ຮູ້ວ່າ:
“ໂດຍແມ່ນບ້ານກະສີກຳ, ປະຊາຊົນສ່ວນຫຼາຍແມ່ນຜູ້ເຖົ້າຜູ້ແກ່ ດັ່ງນັ້ນການປະກອບກໍ່ຖືກຈຳກັດເມື່ອທຽບໃສ່ບ້ານອື່ນ. ແຕ່ຍ້ອນໜ່ວຍພັກ ແລະ ຄະນະຮັບຜິດຊອບວຽກງານແນວໂຮມໄດ້ຮູ້ໝູນໃຊ້ກຳລັງປະຊາຊົນ, ພິເສດແມ່ນລູກຫຼານປະຊາຊົນຜູ້ທີເຮັດວຽກໃກຈາກຄອບຄົວ ແລະ ໄດ້ຮັບຜົນດີ. ທຸກຄົນຕ່າງກໍ່ສະໜັບສະໜູນຢ່າງສຸດຈິດສຸດໃຈ”
ເສັ້ນທາງກວ້າງຂວາງ, ສະອາດໄດ້ຮັບການກໍ່ສ້າງສຳເລັດ
ເພື່ອບັນລຸໄດ້ຜົນງານດັ່ງກ່າວ, ທ່ານ ຮ່າຊວນຮຶງ, ຮອງເລຂາຄະນະພັກຕາແສງດົງຖໍ້, ນະຄອນທ້າຍບິ່ນ, ໃຫ້ຮູ້ວ່າ: ນອກຈາກການໂຄສະນາກ່ຽວກັບໂຄງການກໍ່ສ້າງຊົນນະບົດໃໝ່ແລ້ວ, ທາງຕາແສງດົງຖໍ້ ຍັງຈັດການປະຊຸມຕ່າງໆ ເພື່ອຮັບເອົາຄຳເຫັນຂອງປະຊາຊົນ ແລະ ມອບໃຫ້ບ້ານເປັນເຈົ້າການປະຕິບັດ, ໄລ່ລຽງ ແລະ ຕັດສິນບ້ວງເງິນປະກອບ, ຄຸ້ມຄອງ, ຕິດຕາມກວດກາການປະຕິບັດ. ມາຮອດປະຈຸບັນ, ຕາແສງດົງຖໍ້ ບັນລຸໄດ້ 15/19 ມາດຖານກໍ່ສ້າງຊົນນະບົດໃໝ່. ໃນປີນີ້, ຕາແສງສູ້ຊົນບັນລຸໃຫ້ໄດ້ 2 ມາດຖານອີກ ນັ້ນແມ່ນຮັບປະກັນອະນາໄມສິ່ງແວດລ້ອມ ແລະ ຫຼຸດຜ່ອນອັດຕາສ່ວນຄອບຄົວທີ່ທຸກຍາກ. ທ່ານ ຮ່າຊວນຮຶງ, ໃຫ້ຮູ້ວ່າ:
“ພວກຂ້າພະເຈົ້າຄິດວ່າ, ໃນຂະນະຜັນຂະຫຍາຍການກໍ່ສ້າງຊົນນະບົດໃໝ່, ຖ້າລັດປະກອບ 1, ປະຊາຊົນຕ້ອງປະກອບ 3. ບົນພື້ນຖານນັ້ນຈຶ່ງຮັບປະກັນການກໍ່ສ້າງຊົນນະບົດໃໝ່ໄດ້. ທີສອງແມ່ນເມື່ອກໍ່ສ້າງກິດຈະກຳຕ່າງໆພວກຂ້າພະເຈົ້າກໍ່ ປະຕິບັດກົດລະບຽບປະຊາທິປະໄຕ. ສິ່ງດັ່ງກ່າວໄດ້ຮັບການສະໜັບສະໜູນຈາກປະຊາຊົນ. ຄຽງຂ້າງນັ້ນພະນັກງານກໍ່ເປັນເຈົ້າການແກ້ໄຂຄວາມຫຍຸ້ງຍາກ, ຂໍ້ຕິດຂັດຂອງພໍ່ແມ່ປະຊາຊົນ. ດັ່ງນັ້ນບັນດາເສັ້ນທາງໃນຕາແສງລ້ວນແຕ່ໄດ້ຮັບການກໍ່ສ້າງໂດຍພື້ນຖານ. ພວກຂ້າພະເຈົ້າພະຍາຍາມເຖິງປີ 2014 ຈະຮັບປະກັນທາງຄົມມະນາຄົມໄປມາໃຫ້ປະຊາຊົນຢ່າງສະດວກສະບາຍ“.
ປະຊາຊົນຕາແສງດົງຖໍ້ ພວມສູ້ຊົນເຖິງປີ 2015 ຈະປະຕິບັດສຳເລັດໂຄງການກໍ່ສ້າງຊົນນະບົດໃໝ່. ໄລຍະຈະມາເຖິງ, ການນຳ ແລະ ປະຊາຊົນຕາແສງດົງຖໍ້ ຈະເພີ່ມວຽກງານໂຄສະນາ; ຜັນຂະຫຍາຍການວາງແຜນເຂດຜະລິດສິນຄ້າ, ເພີ່ມເນື້ອທີ່ປູກຕົ້ນໄມ້ລະດູໜາມ, ພັດທະນາການຜະລິດກະສີກຳ, ຍົກສູງລາຍຮັບໃຫ້ແກ່ຜູ້ອອກແຮງງານ.
ບັນດາຜົນງານເຊິ່ງຕາແສງດົງຖໍ້ ບັນລຸໄດ້ ສະແດງໃຫ້ເຫັນວ່າ ຄວາມເຫັນດີເຫັນພ້ອມ, ການສະໜັບສະໜູນຂອງປະຊາຊົນ ແມ່ນປັດໃຈສຳຄັນ, ຕັດສິນຜົນສຳເລັດຂອງຂະບວນການກໍ່ສ້າງຊົນນະບົດໃໝ່ຢູ່ທ້ອງຖີ່ນ