ລາບັ່ງ ແມ່ນຕາແສງໜຶ່ງຢູ່ເຂດພູດອຍ, ເສດຖະກິດຕົ້ນຕໍ່ແມ່ນອິງໃສ່ຕົ້ນຊາ, ນັບແຕ່ໄດ້ຮັບການເລືອກເຟັ້ນເປັນຕາແສງທີ່ເປັນແບບຢ່າງກ່ຽວກັບການກໍ່ສ້າງຊົນນະບົດໃໝ່ຂອງເມືອງ ດ້າຍຕື່, ຕາແສງລາບັ່ງ ໄດ້ກຳນົດທິດພັດທະນາເສດຖະກິດ, ຍົກສູງຊີວິດການເປັນຢູ່ ແລະ ລາຍຮັບຂອງປະຊາຊົນເປັນຕົ້ນຕໍ່, ຈາກນັ້ນຊຸກຍູ້, ໜູນຊ່ວຍການສ້າງບັນດາມາດຕະຖານອື່ນໆ. ຈາກແຜນນະໂຍບາຍນີ້, ທາງຕາແສງໄດ້ສ້າງຕັ້ງບັນດາສະຫະກອນຊາ, ເປີດຊຸດເຝິກອົບຮົມກ່ຽວກັບການຜະລິດຊາສະອາດ, ການນຳໃຊ້ອຸປະກອນເຕັກນິກ, ປຸງແຕ່ງຊາໃຫ້ບັນລຸຄຸນນະພາບສູງ ພ້ອມກັບການປ່ຽນໃໝ່ແນວພັນຊາ ກໍ່ຄືຊອກຫາສົ້ນອອກໃຫ້ຜະລິດຕະພັນຊາ. ດັ່ງນັ້ນສະມັດຕະພາບ, ຄຸນນະພາບຊາຂອງລາບັ່ງ ໄດ້ເພີ່ມຂຶ້ນ. ກ່ອນນີ້, ຊາລາບັ່ງ ຂາຍໄດ້ພຽງ 80.000-150.000 ດົ່ງ/ກິໂລກຼາມເທົ່ານັ້ນ, ແຕ່ປະຈຸບັນ, ລາຄາໄດ້ເພີ່ມຂຶ້ນແຕ່ 250.000-800.000 ດົ່ງ/ກິໂລກຼາມ. ລາຍຮັບຂອງແຕ່ລະຄອບຄົວແມ່ນແຕ່ 300-400 ລ້ານດົ່ງ/ປີ/ເຮັກຕາ, ເພີ່ມຂຶ້ນທົບ 3-4 ເທົ່າ ເມື່ອທຽບໃສ່ກ່ອນນັ້ນ. ເອື້ອຍ Dang Thi Huyen, ຊາວຕາແສງລາບັ່ງ, ໃຫ້ຮູ້ວ່າ:
”ພວກຂ້າພະເຈົ້າໄດ້ໄປເຝິກອົບຮົມກ່ຽວກັບການນຳໃຊ້ວິທີການປູກ ແລະ ບົວລະບັດຕົ້ນຊາຢ່າງມີປະສິດທິຜົນ ເພື່ອຂາຍໄດ້ລາຄ່າສູງ. ປະຈຸບັນ, ຄອບຄົວຂ້າພະເຈົ້າໄດ້ກໍ່ສ້າງເຮືອນໃໝ່, ປະກອບເຄື່ອງໄຟຟ້າຄື: ຕີວີ, ຕູ້ເຢັນ, ແອເຢັນ ແລະ ໃຫ້ລູກຫຼານໄປຮຽນ ຢູ່ໃນບ້ານຄອບຄົວໃດກໍ່ມີຊີວິດດີພໍສົມຄວນ,ບໍ່ມີຄອບຄົວໃດທຸກຍາກອີກ”.
ປະຈຸບັນ, ລາບັ່ງ ມີໝູ່ບ້ານອາຊີບປຸງແຕ່ຊາທີ່ເປັນມູນເຊື້ອ 10 ແຫ່ງ ແລະ ປະຊາຊົນຢູ່ແຫ່ງນີ້ໄດ້ຫັນປ່ຽນການຜະລິດຈາກແບບກະແຈກກະຈາຍ, ບໍ່ມີຈຸດສຸມໄປສູ່ຮູບແບບການຜະລິດຊາດ້ວຍຄູນນະພາບສູງ. ທົ່ວຕາແສງມີ 3800 ຄົນ, ໃນນັ້ນ 70% ຂອງຈຳນວນແຮງງານແມ່ນເຮັດອາຊີບປູກຊາ. ລາຍຮັບສະເລ່ຍໃສ່ຫົວຄົນຂອງລາບັ່ງ ໃນປີກາຍບັນລຸ 20 ລ້ານດົ່ງຕໍ່ປີ. ເອື້ອຍ Nguyen Thi Hai, ຫົວໜ້າສະຫະກອນຊາລາບັ່ງ, ເວົ້າວ່າ:
”ປະຈຸບັນ, ຜູ້ອອກແຮງງານທີ່ໄປເຮັດວຽກຢູ່ບ່ອນອື່ນໆບໍ່ໄດ້ຮັບຜົນເຂົາເຈົ້າໄດ້ກັບເມືອລົງທຶນເຂົ້າໃນການປູກຊາ. ບັນດາຄອບຄົວທີ່ປູກຊາພິເສດແມ່ນມີລາຍຮັບສູງທີ່ສຸດ. ສຳຫຼັບພໍ່ແມ່ປະຊາຊົນເມື່ອໄດ້ຮັບການໜູນຊ່ວຍຄືແນວນີ້ ແລະ ມີການລົງທຶນຫຼາຍ, ປະສິດທິຜົນຂອງຮູບແບບນີ້ຈະໄດ້ຮັບການຍົກສູງຂຶ້ນຫຼາຍທີ່ສຸດ”.
ລາຍຮັບຈາກຕົ້ນຊາເພີ່ມຂຶ້ນສູງ, ຊີວິດຂອງປະຊາຊົນເປັນປົກກະຕິ, ຕາແສງລາບັ່ງ ຍິ່ງມີເງື່ອນໄຂເພື່ອປະຕິບັດມາດຕະຖານອື່ນໆໃນການກໍ່ສ້າງຊົນນະບົດໃໝ່ໃຫ້ສຳເລັດ. ທາງຕາແສງໄດ້ນຳໃຊ້ແຫຼ່ງທຶນຕ່າງໆຢ່າງມີປະສິດທິຜົນ ເພື່ອກໍ່ສ້າງລະບົບພື້ນຖານໂຄງລ່າງຊົນນະບົດຄື: ຄົມມະນາຄົມ, ຊົນລະປະທານ, ໂຮງຮຽນ, ສຸກສາລາ, ຕະຫຼາດ, ຫໍວັດທະນະທຳ... ພາຍຫຼັງ 2 ປີ ແຫ່ງການປະຕິບັດໂຄງການກໍ່ສ້າງຊົນນະບົດໃໝ່, ລາບັ່ງ ໄດ້ປະຕິບັດສຳເລັດ 12/19 ມາດຕະຖານ. ເລຂາຄະນະພັກຕາແສງລາບັ່ງ Nguyen Xuan Nang, ໃຫ້ຮູ້ວ່າ:
”ເມື່ອປູກຊາຕິດພັນກັບການກໍ່ສ້າງຊົນນະບົດໃໝ່, ຈະສ້າງກຳລັງແຮງສັງລວມ ເພື່ອເພີ່ມລາຍຮັບໃຫ້ແກ່ປະຊາຊົນຂຶ້ນຕື່ມ. ພໍ່ແມ່ປະຊາຊົນສະໜັບສະໜູນການກໍ່ສ້າງຊົນນະບົດໃໝ່ ແລະ ພັດທະນາເສດຖະກິດທີ່ສຸດ. ຊ້ຳບໍ່ໜຳເຂົາເຈົ້າຍັງສະຫງວນທີ່ດິນເພື່ອກໍ່ສ້າງບັນດາກິດຈະກຳຄົມມະນາຄົມ. ມີບາງບ້ານ, ປະຊາຊົນໄດ້ບໍລິຈາກເງິນເພື່ອຊື້ທີ່ດິນກໍ່ສ້າງຫໍວັດທະນະທຳ. ປະຊາຊົນຍັງໃຫ້ຄຳໝັ້ນສັນຍາປະຕິບັດບັນດາກິດຈະກຳອະນາໄມສິ່ງແວດລ້ອມ. ຄາດໝາຍຂອງພວກຂ້າພະເຈົ້າແມ່ນປະຕິບັດສຳເລັດກ່ອນປີ 2015”.
ທ່ານນາງ Nguyen Thi Nguyen, ຮອງປະທານຄະນະກຳມະການປະຊາຊົນເມືອງດ້າຍຕື່ ຖືວ່າ, ຜົນສຳເລັດໃນເບື້ອງຕົ້ນໃນການກໍ່ສ້າງຊົນນະບົດໃໝ່ຢູ່ລາບັ່ງ ກ່ອນອື່ນໝົດແມ່ນຍ້ອນຕາແສງກຳນົດວິທີເຮັດຢ່າງຖືກຕ້ອງ ແລະ ມີທິດທາງປະຕິບັດຢ່າງລະອຽດ:
”ຢາກປະສົບຜົນສຳເລັດໃນການກໍ່ສ້າງຊົນນະບົດໃໝ່, ກ່ອນອື່ນໝົດອຳນາດການປົກຄອງ ແລະ ປະຊາຊົນຕ້ອງຮ່ວມຈິດຈ່ວມໃຈ. ການນຳຕ້ອງຊາບຊືມກ່ອນ, ຫຼັງຈາກນັ້ນຈະໂຄສະນາ, ອະທິບາຍເພື່ອໃຫ້ເຂົາເຈົ້າເຫັນໄດ້ວ່າ, ໂຄງການຊົນນະບົດໃໝ່ກ້າວເຂົ້າສູ່ຊີວິດຈະຊ່ວຍໃຫ້ເຂົາເຈົ້າສ້າງລາຍຮັບຕື່ມອີກ ແລະ ຮັບປະກັນຊີວິດໃຫ້ແກ່ເຂົາເຈົ້າ”.
ນຳໃຊ້ທ່າແຮງຂອງທ້ອງຖີ່ນ, ຖືການພັດທະນາ ແລະ ຍົກສູງຄຸນຄ່າ ຕົ້ນຊາເປັນພື້ນຖານ, ລາບັ່ງ ໄດ້ມີທິດທາງເດີນຢ່າງຖືກຕ້ອງເພື່ອເພີ່ມລາຍຮັບໃຫ້ແກ່ປະຊາຊົນ - ນີ້ແມ່ນມາດຕະຖານຍາກທີ່ສຸດໃນການກໍ່ສ້າງຊົນນະບົດໃໝ່, ພັດທະນາເສດຖະກິດສັງຄົມຂອງທ້ອງຖີ່ນ, ສ້າງຄວາມເຊື່ອໝັ້ນໃຫ້ແກ່ປະຊາຊົນ. ນີ້ແມ່ນເງື່ອນໄຂສຳຄັນເພື່ອໃຫ້ລາບັ່ງ ປະຕິບັດບັນດາມາດຕະຖານຢ່າງມີໄຊ, ສູ້ຊົນປະຕິບັດສຳເລັດໂຄງການກໍ່ສ້າງຊົນນະບົດໃໝ່ໃນປີ 2015.