ໜຶ່ງໃນບັນດາປັດໄຈສຳຄັນຊ່ວຍໃຫ້ຕາແສງເຕີນເຫງັຍ, ເມືອງ ກາວແຫຼງ, ແຂວງ ດົ່ງທາບ ກາຍເປັນຕາແສງທຳອິດຂອງເມືອງນີ້ບັນລຸມາດຖານຊົນນະບົດໃໝ່, ນັ້ນແມ່ນການຫັນປ່ຽນຜົນລະປູກ. ສິ່ງດັ່ງກ່າວໄດ້ນຳມາເຊິ່ງປະສິດທິຜົນດ້ານເສດຖະກິດໃຫ້ແກ່ປະຊາຊົນ. ນັກຂ່າວ ກວິ່ງມາຍ ມີບົດຂຽນ: ຕາແສງ ເຕີນເຫງັຍ, ແຂວງ ດົ່ງທາບ ຫັນປ່ຽນຜົນລະປູກ ສ້າງປະສິດທິຜົນໃນການກໍ່ສ້າງຊົນນະບົດໃໝ່.
ທົ່ງນາປູກໝາກງາ ນຳມາປະສິດທິຜົນສູງ
(ພາບປະກອບ)
ທ້າຍປີ 2015, ຕາແສງ ເຕີນເຫງັຍ ໄດ້ຮັບການຮັບຮອງວ່າແມ່ນໜຶ່ງໃນ 4 ຕາແສງທຳອິດບັນລຸມາດຖານຊົນນະບົດໃໝ່ຂອງເມືອງ ກາວແຫຼງ, ແຂວງ ດົ່ງທາບ. ຕາແສງ ເຕີນເຫງັຍ ນຳມາດຕະຖານຫັນປ່ຽນໂຄງປະກອບເສດຖະກິດ, ຍົກສູງລາຍຮັບສະເລ່ຍຕໍ່ຫົວຄົນຈາກ 29 ລ້ານດົ່ງ/ຄົນ/ປີ ໃນປະຈຸບັນ, ຂຶ້ນເຖິງ 36 ລ້ານດົ່ງ/ຄົນ/ປີ ໃນປີ 2020. ເພື່ອບັນລຸໄດ້ຈຸດໝາຍດັ່ງກ່າວ, ຕາແສງໄດ້ປຸກລະດົມຂະບວນການຫັນປ່ຽນທີ່ດິນປູກເຂົ້າ, ມາປູກພືດຕາມລະດູ, ແມ່ນຕົ້ນແມ່ນໝາກງາ ແລະ ສາລີ.
ດ້ວຍທິດຫັນປ່ຽນການຜະລິດຜົນລະປູກ ໂດຍອຳນາດການປົກຄອງຕາແສງ ເຕີນເຫງັຍ ປຸກລະດົມ, ບັນດາຂະແໜງການ, ອົງການຈັດຕັ້ງມະຫາຊົນຂອງຕາແສງໄດ້ສ້າງ ແລະ ຜັນຂະຫຍາຍຫຼາຍຂະບວນການເພື່ອແນໃສ່ປຸກລະດົມທົ່ວປວງຊົນປະກອບກຳລັງ, ເຫື່ອແຮງ ສ້າງໂສມໜ້າໃໝ່ໃຫ້ແກ່ບ້ານເກີດເມືອງນອນ. ໃນນັ້ນ, ສະມາຄົມຊາວກະສິກອນຕາແສງ, ດ້ວຍຂະບວນການ “ສະມາຊິກສະມາຄົມຊາວກະສິກອນ ສາມັກຄີ, ຊ່ວຍເຫຼືອກັນພັດທະນາເສດຖະກິດ, ລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ”, ດຶງດູດສະມາຊິກສະມາຄົມຊາວກະສິກອນຕອບສະໜອງເປັນຈຳນວນຫຼວງຫຼາຍ. ທ່ານ ກາວວັນເລ່ີຍ, ປະທານ ສະມາຄົມຊາວກະສິກອນຕາແສງ ເຕີນເຫງັຍ ໃຫ້ຮູ້ວ່າ: ຜ່ານບັນດາຮູບແບບ “ໜ່ວຍຮ່ວມທຶນ”, “ໜ່ວຍປະຢັດ”… ນັບແຕ່ຕົ້ນປີມາຮອດປະຈຸບັນ, ສະມາຄົມຊາວກະສິກອນຕາແສງ ເຕີນເຫງັຍ ຊ່ວຍເຫຼືອກັນສ້ອມແປງເຮືອນຢູ່, ຂົນຂວາຍປະຊາຊົນສະໜັບສະໜູນຄອບຄົວທຸກຍາກຊື້ບັດປະກັນສຸຂະພາບ:
“ຮອດຈຸດເວລານີ້, ມີສະມາຊິກພັກຮ່ວມທຶນເກືອບ 30 ໜ່ວຍ. ຄະນະກຳມະການປະຊາຊົນຕາແສງຂົນຂວາຍພະນັກງານສະມາຊິກພັກໃຫ້ຄອບຄົວທຸກຍາກກູ້ຢືມທຶນເພື່ອປຸກສ້າງເຮືອນ ບັນລຸມາດຖານທີ່ໄດ້ກຳນົດ. ຈຳນວນໜ່ວຍພັກເຂົ້າຮ່ວມການສະໜັບສະໜູນເງິນໄດ້ 73 ລ້ານດົ່ງ, ໃນນັ້ນສະໜອງເງິນໃຫ້ຄອບຄົວໃກ້ຕົກຢູ່ມາດຕະຖານຄອບຄົວທຸກຍາກກູ້ຢຶມທຶນຊື້ບັດປະກັນສຸຂະພາບ”
ພາບປະກອບ
ມາຮອດປະຈຸບັນ, ທົ່ວຕາແສງ ເຕີນເຫງັຍ ມີກ່ວາ 1.600 ຄອບຄົວຊາວກະສິກອນໄດ້ຫັນເນື້ອທີ່ດິນປູກເຂົ້າປະມານ 120 ເຮັກຕາ ມາປູກໝາກງາ, ສາລີ. ທ່ານ ເລຈູງດົງ, ຕາແສງ ເຕີນເຫງັຍ, ໃຫ້ຮູ້ວ່າ: ພະນັກງານຕາແສງຍາມໃດກໍ່ເປັນແບບຢ່າງໃນການກໍ່ສ້າງຊົນນະບົດໃໝ່:
“ນັບແຕ່ຕົ້ນປີ 2016, ຕາແສງໄດ້ດຳເນີນການຫັນປ່ຽນຜົນລະປູກ, ສັດລ້ຽງ. ໃນການເຊັນສັນຍາຈຳໜ່າຍຜະລິດຕະພັນ ພະນັກງານເປັນຜູ້ເຮັດກ່ອນ. ຈາກນັ້ນ, ໄດ້ສ້າງເງື່ອນໄຂໃຫ້ປະຊາຊົນມີຄວາມເຊື່ອໝັ້ນ. ໃນເບື້ອງຕົ້ນ, ປະຊາຊົນຍັງຄິດລະແວງສົງໄສແຕ່ຍ້ອນມີການກະທົບຈາກພະນັກງານ, ສະມາຊິກພັກ ແລະ ເຂົາເຈົ້າໄດ້ປະຕິບັດກ່ອນ, ດັ່ງນັ້ນຮູບແບບນີ້ຈຶ່ງບັນລຸໄດ້ຜົນສຳເລັດ”
ໂດຍແມ່ນຕາແສງຜະລິດກະສິກຳເປັນຕົ້ນ, ລາຍຮັບຕົ້ນຕໍຂອງປະຊາຊົນຕາແສງ ເຕີນເຫງັຍ ລ້ວນແຕ່ມາຈາກການຜະລິດກະສິກຳ. ດັ່ງນັ້ນ, ການຫັນປ່ຽນຈາກການປູກເຂົ້າ ມາປູກພືດ ໄດ້ກາຍເປັນຈຸດໝາຍຕົ້ນຕໍໃນການສ້າງໂຄງປະກອບຜະລິດກະສິກຳຄືນໃໝ່. ປະຈຸບັນ, ເນື້ອທີ່ດິນຫັນປ່ຽນຈາກການປູກເຂົ້າ ມາປູກພືດໃນທົ່ວຕາແສງ ໄດ້ນຳມາໃຫ້ໝາກຜົນ, ສ້າງປະຖົມປັດໄຈເພື່ອໃຫ້ທ້ອງຖິ່ນສືບຕໍ່ພັດທະນາ. ທ່ານນາງ ເຈີ່ນທິແທງຖາວ, ປະທານຄະນະກຳມະການປະຊາຊົນຕາແສງ ເຕີນເຫງັຍ, ເຊື່ອໝັ້ນວ່າ: ການຫັນປ່ຽນການຜະລິດຂອງທ້ອງຖ່ິ່ນຈະປະສິດທິຜົນສຳເລັດ:
“ໃນປີຜ່ານມາ, ຕາແສງໄດ້ຍູ້ແຮງການປະຕິບັດແຜນຮ່າງຫັນປ່ຽນໂຄງປະກອບກະສິກຳ, ໃນນັ້ນຫັນປ່ຽນຜົນລະປູກ ແລະ ສັດລ້ຽງເປັນຕົ້ນ. ໄປຄຽງຄູ່ກັນນັ້ນ, ທ້ອງຖິ່ນໄດ້ປະຕິບັດແຜນຮ່າງປູກເຂົ້າເປັນ 3 ລະດູການ, ນອກນັ້ນຍັງປູກພືດ ເພື່ອໃຫ້ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ. ເນື້ອທີ່ດິນປູກພືດກໍ່ບັນລຸປະສິດທິຜົນ ແລະ ລາຍຮັບຂອງປະຊາຊົນກໍ່ໄດ້ຍົກສູງຂຶ້ນ. ປະຊາຊົນມີຄວາມເບີກບານມ່ວນຊື່ນເມື່ອເກັບກຽວໝາກງາ, ໝາກເພັດ, ສາລີ. ດ້ວຍລາຄາໝັ້ນທ່ຽງ, ດັ່ງນັ້ນປະຊາຊົນມີຄວາມເຫັນດີເຫັນພ້ອມກັບແຜນນະໂຍບາຍຫັນປ່ຽນໂຄງປະກອບການຜະລິດຫຼາຍ.”
ແຜນນະໂຍບາຍຫັນປ່ຽນຜົນລະປູກ, ຈາກການປູກເຂົ້າ ມາປູກພືດ, ໃນເບື້ອງຕົ້ນໄດ້ເປັນປົກກະຕິ ແລະ ກ້າວເຂົ້າສູ່ຊີວິດ. ນັ້ນກໍ່ແມ່ນບັນດາປັດໄຈປະກອບສ່ວນເຂົ້າໃນຜົນສຳເລັດໃນການປະຕິບັດໂຄງການກໍ່ສ້າງຊົນນະບົດໃໝ່ຢູ່ຕາແສງ ເຕີນເຫງັຍ.