(vovworld) – ປີນີ້, ປະຊາຊົນຢູ່ຕາແສງ ໝີແຄ໋ງ, ນະຄອນເກິ່ນເທີ ໄດ້ຕ້ອນຮັບບຸນປີໃໝ່ ປີມະເມຍດ້ວຍຄວາມເບີກບານມ່ວນຊື່ນຫຼາຍຢ່າງ, ໃນນັ້ນມີເລື່ອງໄດ້ຮັບການຮັບຮອງວ່າແມ່ນຕາແສງຊົນນະບົດໃໝ່. ພິເສດ, ບຸນປີໃໝ່ປະຈຳຊາດປີນີ້, ກອງບັນຊາການທະຫານນະຄອນເກິ່ນເທີ ໄດ້ຈັດຕັ້ງການເຄື່ອນໄຫວຕ້ອນຮັບບຸນປີໃໝ່ພ້ອມກັບປະຊາຊົນຢູ່ຕາແສງ, ເພື່ອໃຫ້ທະຫານ ແລະ ປະຊາຊົນໄດ້ຕ້ອນຮັບບຸນປີໃໝ່ດ້ວຍຄວາມອົບອຸ່ນ, ເຂັ້ມຄົ້ນໄປດ້ວຍມູນເຊື້ອຂອງເຂດບ້ານນາພາກໃຕ້..
ທະຫານ ແລະ ປະຊາຊົນຕາແສງໝີແຄ໋ງຮ່ວມກັນຕ້ອນຮັບບຸນປີໃໝ່
(ພາບອິນເຕີແນດ)
ໃນໄລຍະຕໍ່ຕ້ານ ຕ້ານອາເມລິກາ, ຕາແສງໝີແຄ໋ງ, ເມືອງຟອງດ່ຽນ ແມ່ນສະຖານທີ່ເຕົ້າໂຮມທະຫານບົນເສັ້ນທາງເຄື່ອນທັບ. ມີຫຼາຍຄອບຄົວຢູ່ໝີແຄ໋ງ ມີ 3, 4 ລຸ້ນຄົນເປັນທະຫານລຸງໂຮ່. ດັ່ງນັ້ນໝີແຄ໋ງ ຈຶ່ງໄດ້ຮັບມະຍົດວ່າແມ່ນຕາແສງວິລະຊົນ. ທະຫານມາແຫ່ງນີ້, ແມ່ນກັບມາຄອບຄົວແຫ່ງສາມັກຄີລະຫວ່າງທະຫານ ແລະ ປະຊາຊົນ, ເຊິ່ງໄດ້ຮັບການສ້າງຂຶ້ນດ້ວຍເລືອດເນື້ອ, ດ້ວຍຄວາມປາຖະໜາໄດ້ຮັບສັນຕິພາບ ແລະ ພັດທະນານັບແຕ່ໄລຍະສົງຄາມຫຍຸ້ງຍາກ, ລຳບາກ ແລະ ດຸເດືອດທີ່ສຸດ. ເອື້ອຍ ຟ້າມຢ້ຽວລິງ, ປະທານສະມາຄົມແມ່ຍິງຕາແສງໝີແຄ໋ງ, ແບ່ງປັນວ່າ:
“ຂ້າພະເຈົ້າກໍ່ແມ່ນລູກຂອງທະຫານ ແລະ ມີຄວາມເອກອ້າງທະນົງໃຈທີ່ໄດ້ດຳລົງຊີວິດໃນດິນແດນວິລະຊົນ, ທີ່ເຂັ້ມຄົ້ນໄປດ້ວຍຄວາມສະໜິດຕິດພັນລະຫວ່າງທະຫານ ແລະ ປະຊາຊົນ, ເຊິ່ງມີມາແຕ່ໄລຍະສົງຄາມ. ໂດຍສືບທອດມູນເຊື້ອອັນດີງາມນັ້ນ, ປະຈຸບັນ, ທະຫານໄດ້ຊ່ວຍປະຊາຊົນຜູ້ທຸກຍາກກໍ່ສ້າງເຮືອນແຫ່ງມະຫາສາມັກຄີ ແລະ ພ້ອມກັບປະຊາຊົນຕ້ອນຮັບບຸນປີໃໝ່, ອັນໄດ້ສ້າງບັນຍາກາດຟົດຟື້ນມ່ວນຊື່ນໃນໂອກາດຕົ້ນລະດູບານໃໝ່“.
ປະຈຸບັນ, ນັກທ່ອງທ່ຽວຈາກທຸກສາລະທິດມາເກິ່ນເທີ, ເຄີຍໄປຢ້ຽມຢາມບ້ານທ່ອງທ່ຽວໝີແຄ໋ງ, ຢ້ຽມຢາມສວນມອນຫ້າເຈົາ, ກາກາວ, ໝາກລຳໃຍຟອງດ່ຽນ ແລະ ພັກຜ່ອນຢູ່ເຮືອນຂອງປະຊາຊົນ. ເພື່ອຕອບສະໜອງຄວາມຕ້ອງການພັດທະນາເສດຖະກິດ ແລະ ເສີມຂະຫຍາຍທ່າແຮງດ້ານທ່ອງທ່ຽວ, ຕາແສງໝີແຄ໋ງ ໄດ້ຍົກສູງຄຸນນະພາບບັນດາມາດຖານທີ່ບັນລຸໄດ້ໃນການກໍ່ສ້າງຊົນນະບົດໃໝ່ຢ່າງບໍ່ຢຸດຢັ້ງ, ສ້າງສິ່ງແວດລ້ອມທີ່ສະອາດ, ສວຍງາມ, ສະຫງົບສຸກ, ທັງຍົກສູງລະດັບຄອງຊີບຂອງປະຊາຊົນ, ທັງດຶງດູດນັກທ່ອງທ່ຽວມາຢາມ.
ບຸນປີໃໝ່ປີນີ້, ທະຫານພ້ອມກັບທາງນະຄອນ ລະດົມທຶນ, ກຳລັງເຫື່ອແຮງເພື່ອຊ່ວຍຕາແສງໝີແຄ໋ງ ກໍ່ສ້າງເຮືອນໃໝ່ຕື່ມອີກ 39 ຫຼັງໃຫ້ແກ່ປະຊາຊົນທີ່ທຸກຍາກ, ຂຸດຄອງເໝືອງ, ຄູນຄັນຄູ, ກໍ່ສ້າງເຕົາກຳຈັດຂີ້ເຫຍື່ອໃຫ້ສຸກສາລາຕາແສງ… ດັ່ງນັ້ນໂສມໜ້າຂອງຕາແສງໄດ້ມີການປ່ຽນໃໝ່ ແລະ ມີຫຼາຍຄອບຄົວທີ່ທຸກຍາກໄດ້ຕ້ອນຮັບບຸນປີໃໝ່ໃນພວາມເບີກບານມ່ວນຊື່ນຢ່າງແທ້ຈິງ. ບຸນປີໃໝ່ນີ້, ດ້ວຍການຊ່ວຍເຫຼືອຂອງທະຫານ ແລະ ປະຊາຊົນໃນທ້ອງຖີ່ນ, ຄອບຄົວເອື້ອຍ ເລທິງາ, ເຊິ່ງແມ່ນຄອບຄົວທີ່ທຸກຍາກ ໄດ້ມີເຮືອນຫຼັງໃໝ່.
“ຂໍຂອບອົກຂອບໃຈອຳນາດການປົກຄອງທ້ອງຖີ່ນ ແລະ ທະຫານໄດ້ກໍ່ສ້າງເຮືອນຫຼັງໃໝ່ໃຫ້ຄອບຄົວຂ້າພະເຈົ້າ. ທັງຄອບຄົວຂ້າພະເຈົ້າຜູ້ໃດກໍ່ພາກພູມໃຈຈົນນອນບໍ່ລັບ. ບຸນປີໃໝ່ນີ້ມີເຮືອນຫຼັງໃໝ່, ມີບ່ອນບູຊາພໍ່ແມ່ຢ່າງຮຽບຮ້ອຍ, ຂ້າພະເຈົ້າດີໃຈຫຼາຍ“.
ທະຫານ ແລະ ປະຊາຊົນຮ່ວມກັນຫໍ່ເຂົ້າຕົ້ມຕ້ອນຮັບບຸນປີໃໝ່
(ພາບອິນເຕີແນດ)
ບຸນປີໃໝ່ແຫ່ງຄວາມສາມັກຄີລະຫວ່າງທະຫານ ແລະ ປະຊາຊົນຢູ່ ໝີແຄ໋ງ, ບໍ່ພຽງແຕ່ສ້າງຄວາມເບີກບານມ່ວນຊື່ນໃຫ້ແກ່ບັນດາຄອບຄົວທີ່ທຸກຍາກເທົ່ານັ້ນ, ຫາກຜ່ານການເຄື່ອນໄຫວແທດຈິງຫຼາຍຢ່າງ ໄດ້ປະກອບສ່ວນສຶກສາມູນເຊື້ອປະຕິວັດໃຫ້ແກ່ລຸ້ນໜຸ່ມອີກດ້ວຍ. ໃນບັນຍາກາດແຫ່ງຄວາມອົບອຸ່ນ, ເຕັມໄປດ້ວຍສາຍຈິດມິດໃຈລະຫວ່າງທະຫານ ແລະ ປະຊາຊົນ. ມີນັກຮົບໜຸ່ມຫຼາຍຄົນກໍ່ດີໃຈທີ່ສຸດເມື່ອໄດ້ຕ້ອນຮັບບຸນປີໃໝ່ພ້ອມກັບປະຊາຊົນເປັນເທື່ອທຳອິດ. ນັກຮົບ ຟ້າມຈີ໋ຫາຍ, ແບ່ງປັນວ່າ:
“ເປັນຄັ້ງທຳອິດໄດ້ຕ້ອນຮັບບຸນປີໃໝ່ພ້ອມກັບປະຊາຊົນ, ຂ້າພະເຈົ້າຮູ້ສືກພາກພູມໃຈທີ່ສຸດ. ເມື່ອໄດ້ພົບປະ, ຊ່ວຍເຫຼືອປະຊາຊົນໃນການສ້ອມແປງທາງຄົມມະນາຄົມ, ຄູນຄັນຄູ. ປະຊາຊົນຕາແສງໝີແຄ໋ງ, ເມືອງຟອງດ່ຽນຮັກແພງທະຫານພວກຂ້າພະເຈົ້າຫຼາຍ. “
ເພື່ອນ ຫງວຽນຍືງອກ, ຊາວໜຸ່ມບ້ານ ໝີເຟືອກ, ຕາແສງໝີແຄ໋ງ, ໃຫ້ຮູ້ວ່າ:
“ປີນີ້ທະຫານ ແລະ ປະຊາຊົນພ້ອມກັນຕ້ອນຮັບບຸນປີໃໝ່ ດ້ວຍການເຄື່ອນໄຫວຫຼາຍຢ່າງ, ດັ່ງນັ້ນພວກຂ້າພະເຈົ້າພາກພູມໃຈທີ່ສຸດ. ທະຫານໄດ້ຊ່ວຍປະຊາຊົນປຸກສ້າງເຮືອນຢູ່, ກໍ່ສ້າງທາງຄົມມະນາຄົມຊົນນະບົດ ເພື່ອສ້າງຄວາມສະດວກໃຫ້ການໄປມາຂອງປະຊາຊົນ. ດັ່ງນັ້ນເມື່ອໄດ້ຕ້ອນຮັບບຸນປີໃໝ່ພ້ອມກັບທະຫານ, ປະຊາຊົນດີໃຈຫຼາຍ“.
ໂດຍແມ່ນທ້ອງຖີ່ນໜຶ່ງດຽວຢູ່ເຂດທົ່ງພຽງແມ່ນຳ້ຂອງທີ່ຈັດຕັ້ງ ແລະ ຮັກສາການເຄື່ອນໄຫວຕ້ອນຮັບບຸນປີໃໝ່ຮ່ວມກັນລະຫວ່າງທະຫານ ແລະ ປະຊາຊົນມາຫຼາຍປີແລ້ວນັ້ນ. ແຕ່ລະເທື່ອ, ເມື່ອບຸນປີໃໝ່ວຽນມາ, ຕາແສງໝີແຄ໋ງ, ເຊິ່ງແມ່ນຖານທີ່ໝັ້ນປະຕິວັດຂອງນະຄອນກໍ່ຟົດຟື້ນມ່ວນຊື່ນ, ເຕັມໄປດ້ວຍຄວາມສະໜິດຕິດພັນລະຫວ່າງທະຫານ ແລະ ປະຊາຊົນ. ຕາມນັ້ນແລ້ວ, ຮູບພາບ “ອ້າຍທະຫານລຸງໂຮ່“ ນັບມື້ນັບດີງາມກວ່າໃນຈິດໃຈຂອງປະຊາຊົນເກິນເທີ, ອັນໄດ້ປະກອບສ່ວນສ້າງຄວາມເຊື່ອໝັ້ນ ແລະ ເຕົ້າໂຮມກຳລັງແຮງຂອງປະຊາຊົນ ເພື່ອພ້ອມກັນກໍ່ສ້າງບ້ານເກີດເມືອງນອນໃຫ້ນັບມື້ນັບສວຍງາມ ແລະ ຮັ່ງມີ.