(vovworl) - ສຳຫຼັບຊາວນະຄອນ, ນ້ຳປະປາແມ່ນສິ່ງທີ່ຄຸ້ນເຄີຍແລ້ວ, ແຕ່ຢູ່ເຂດຊົນນະບົດ, ແຫ່ງບໍ່ທັນມີລະບົບນ້ຳປະປາ, ປະຊາຊົນຈະນຳໃຊ້ແຫຼ່ງນ້ຳໃດໃນຊີວິດປະຈຳວັນ? ນ້ຳບາດານ ແລະ ນ້ຳຝົນແມ່ນການເລືອກເຟັ້ນຂອງຊາວຕາແສງຊອງເຟື້ອງ, ເຊິ່ງແມ່ນຕາແສງຊົນນະບົດຢູ່ຊານນະຄອນຮ່າໂນ້ຍ. ແຕ່ແຫຼ່ງນ້ຳນີ້ສາມາດຕອບສະໜອງຄວາມຕ້ອງການໃນຊີວິດຂອງເຂົາເຈົ້າຫຼືບໍ? ແລະ ສິ່ງສຳຄັນກວ່າ, ແມ່ນມັນຈະຮັບປະກັນດ້ານຫຼັກອະນາໄມຫຼືບໍ່? ກ່ຽວກັບບັນຫານີ້, ເຊີນທ່ານຮັບຟັງບົດຂອງນັກຂ່າວວິທະຍຸກະຈາຍສຽງຫວຽດນາມທີ່ມີຫົວຂໍ້ວ່າ ” ນ້ຳສະອາດ ແລະ ຈຸດໝາຍກໍ່ສ້າງຊົນນະບົດໃໝ່”
ພາບປະກອບ (google.com.vn)
ພວກເຮົາມາຢ້ຽມຢາມຕາແສງຊອງເຟື້ອງ, ເຊິ່ງແມ່ນຕາແສງກະສີກຳທີ່ຫ່າງຈາກໃຈກາງນະຄອນຫຼວງຮ່າໂນ້ຍປະມານ 20 ກມ. ໃນຍາມຕົ້ນລະດູຮ້ອນ, ແສງແດດກ້າ, ເຮັດໃຫ້ອາກາດຮ້ອນເອົ້າຫຼາຍ. ແຕ່ຄວາມຮ້ອນເອົ້ານັ້ນພັດບັນເທົາລົງເມື່ອພວກເຮົາພົບເຫັນສະນ້ຳໃສເຢັນຢູ່ໃນບ້ານ. ແຕ່ປະຈຸບັນ, ສະນ້ຳແຫ່ງນີ້ພຽງແຕ່ຊ່ວຍປັບອາກາດໃຫ້ປະຊາຊົນໃນໝູ່ບ້ານເທົ່ານັ້ນ, ຫາກບໍ່ແມ່ນແຫຼ່ງສະໜອງນ້ຳໃຊ້ຕົ້ນຕໍ່ຄືໃນເມື່ອກ່ອນອີກ, ເພາະວ່າປະຊາຊົນດ່ານເຟື້ອງ ໄດ້ຊອກຫາແຫຼ່ງນ້ຳອື່ນໃຫ້ແກ່ຕົນແລ້ວ.
ອ້າຍ ບູ່ຍແອງຕ໋ວນ ຢູ່ບ້ານທາບເທື້ອງ, ຕາແສງຊອງເຟື້ອງ ພວມລ້າງຜັກເພື່ອກະກຽມໃຫ້ຄາບອາຫານຕອນທ່ຽງ. ກະແສນ້ຳໃສເຢັນທີ່ໄຫຼອອກຈາກກອ໋ກນ້ຳນັ້ນ ແມ່ນເອົາມາຈາກແຫຼ່ງນ້ຳບາດານ, ເຊິ່ງຄອບຄົວອ້າຍໄດ້ເຈາະກ່ອນນີ້ນັບສິບປີແລ້ວ. ນ້ຳບາດານພາຍຫຼັງກັ່ນຕອງຢ່າງລະອຽດຈະຖືກສູບຂຶ້ນອ່າງເກັບນ້ຳທີ່ຕັ້ງເທິງດາດຟ້າ. ແຫຼ່ງນ້ຳຫຼາຍພໍສົມຄວນ ແລະ ພໍໃຊ້ໃນຊີວິດປະຈຳວັນຂອງຄອບຄົວ. ແຕ່ອ້າຍ Tuan ຍັງກໍ່ສ້າງອ່າງເກັບນ້ຳໃຫຍ່ຕື່ມອີກອັນໜຶ່ງເພື່ອບັນຈຸນ້ຳ. ອ້າຍໃຫ້ຮູ້ວ່າ:
”ນ້ຳສະອາດຂອງລັດບໍ່ທັນມາຮອດແຫ່ງນີ້. ພວກເຮົານຳໃຊ້ນ້ຳບາດານ ແລະ ນ້ຳຝົນເປັນຕົ້ນ. ແຕ່ນ້ຳເພື່ອກິນດື່ມພຽງແຕ່ໃຊ້ນ້ຳຝົນເທົ່ານັ້ນ, ຍ້ອນນ້ຳຝົນດີກວ່າ, ຍາມໃດແຫ້ງແລ້ງບໍ່ມີນ້ຳໃຊ້, ພວກເຮົາຈຶ່ງນຳໃຊ້ນ້ຳບາດານ. ປະຈຸບັນນ້ຳຝົນຍັງມີຫຼາຍຢູ່”
ເພື່ອເຈາະນ້ຳບາດານແຫ່ງໜຶ່ງຕ້ອງເສຍເງິນປະມານ 3 ລ້ານດົ່ງ, ລາຄາບໍ່ສູງປານໃດເມື່ອທຽບໃສ່ລາຍຮັບຂອງປະຊາຊົນຢູ່ແຫ່ງນີ້, ດັ່ງນັ້ນນ້ຳບາດານຈຶ່ງປະກົດມີໃນທຸກຄອບຄົວຢູ່ຊອງເຟື້ອງ. ແຫຼ່ງນ້ຳຍາມໃດກໍ່ມີຢູ່ແລ້ວ, ແຕ່ເຂົາເຈົ້າຍັງຮັບຮູ້ໄດ້ວ່າ, ແຫຼ່ງນ້ຳທຳມະຊາດນີ້ບາງເທື່ອຈະຖືກບົກແຫ້ງໄປ. ປະລິມານນ້ຳຝົນກໍ່ນັບມື້ນັບໜ້ອຍລົງ. ດັ່ງນັ້ນ, ລຸ້ນໜຸ່ມຄືນ້ອງ Bui Thi Huong ໄດ້ມີສະຕິປະຢັດໃນການນຳໃຊ້ນ້ຳ.
”ນ້ຳແມ່ນແຫຼ່ງຊັບພະຍາກອນທີ່ລ້ຳຄ່າ, ພວກເຮົາຕ້ອງປະຢັດໃນການນຳໃຊ້ນ້ຳ, ຖ້າບໍ່ປະຢັດນ້ຳຈະບົກແຫ້ງໄປ. ພໍ່ແມ່ກໍ່ຕັກເຕືອນພວກນ້ອງນຳໃຊ້ນ້ຳໂດຍຈຳກັດ ແລະປະຢັດ”
ເມື່ອທຽບໃສ່ໝູ່ບ້ານອື່ນໆໃນເຂດບ້ານນາ, ຊາວຕາແສງຊອງເຟື້ອງ ບໍ່ເປັນຫ່ວງກັບເລື່ອງຂາດນ້ຳໃຊ້. ແຕ່ສິ່ງສຳຄັນນັ້ນແມ່ນ ແຫຼ່ງນ້ຳທີ່ເຂົາເຈົ້າພວມນຳໃຊ້ນັ້ນ ຈະຮັບປະກັນຫຼັກອະນາໄມຫຼືບໍ, ສິ່ງດັ່ງກ່າວບໍ່ພຽງແຕ່ມີຄວາມໝາຍສຳຫຼັບຄຸນນະພາບຊີວິດຂອງປະຊາຊົນໃນຕາແສງເທົ່ານັ້ນ, ຫາກປະຈຸບັນ, ຊອງເຟື້ອງ ຍັງແມ່ນໜຶ່ງໃນ 3 ຕາແສງກະສີກຳຂອງນະຄອນຫຼວງທີ່ໄດ້ຮັບການຄັດເລືອກເພື່ອປະຕິບັດທົດລອງຮູບແບບກໍ່ສ້າງຊົນນະບົດໃໝ່. ທ່ານ Nguyen Minh Chau, ພະນັກງານວັດທະນະທຳຕາແສງ, ໃຫ້ຮູ້ວ່າ, ການສະໜອງນ້ຳສະອາດ ແລະ ຮັບປະກັນອະນາໄມໃຫ້ແກ່ປະຊາຊົນ ແມ່ນໜຶ່ງໃນບັນດາຈຸດໝາຍທີ່ສຳຄັນ ເພື່ອກໍ່ສ້າງຊົນນະບົດໃໝ່. ຍ້ອນເຫດນັ້ນ, ອຳນາດການປົກຄອງຕາແສງຈຶ່ງມີຄວາມເອົາໃຈໃສ່ທີ່ສຸດເຖິງບັນຫາຮັບປະກັນຄຸນນະພາບແຫຼ່ງນ້ຳ.
ພາບປະກອບ (google.com.vn)
”ທາງຕາແສງໄດ້ລົງທຶນພື້ນຖານດ້ານວັດຖຸຄື: ລະບົບບຳບັດນ້ຳເສຍ, ອ່າງເກັບນ້ຳ… ທາງອຳນາດການປົກຄອງຍັງສົມທົບກັບພະນັກງານສາທາ ລະນະສຸກ ເພື່ອດຳເນີນການກວດກາຄຸນນະພາບແຫຼ່ງນ້ຳ, ໜູນຊ່ວຍການຂ້າເຊື້ອ, ຮັບປະກັນໃຫ້ປະຊາຊົນໄດ້ນຳໃຊ້ນ້ຳສະອາດ”
ເຖິງວ່າແຫຼ່ງນ້ຳໃນປະຈຸບັນແມ່ນພໍໃຊ້ ແລະ ຮັບປະກັນດ້ານຫຼັກອະນາໄມແລ້ວກໍ່ຕາມ, ແຕ່ປະຊາຊົນຕາແສງຊອງເຟື້ອງ ຍັງຄົງຫວັງວ່າ ຈະມີນ້ຳປະປາຂອງລັດເພື່ອໃຊ້ໂດຍໄວ. ນັ້ນບໍ່ພຽງແຕ່ແມ່ນຄວາມມຸ້ງຫວັງຂອງເຂົາເຈົ້າເທົ່ານັ້ນ, ຫາກຍັງແມ່ນຄວາມມຸ້ງຫວັງຂອງອຳນາດການປົກຄອງຕາແສງອີກດ້ວຍ. ທ່ານ Minh, ເລຂາຄະນະພັກຕາແສງ, ເວົ້າວ່າ:
”ໂຄງການນ້ຳສະອາດແມ່ນຄວາມມຸ້ງຫວັງຂອງຄະນະພັກ ແລະ ປະຊາຊົນຕາແສງຊອງເຟື້ອງ. ຂ້າພະເຈົ້າຫວັງວ່າຈະມີນ້ຳປະປານຳໃຊ້ຍິ່ງໄວກໍ່ຍິ່ງດີ”
ຄວາມມຸ້ງຫວັງຂອງທ່ານ Minh ອາດຈະປະກົດຜົນເປັນຈິງໃນບໍ່ຊ້ານີ້, ເພາະວ່າ, ທໍ່ນ້ຳປະປາທີ່ສະໜອງນ້ຳໃຫ້ທົ່ວເມືອງດານເຟື້ອງ ແລະ ນະຄອນຮ່າໂນ້ຍ ໃນປະຈຸບັນ ພວມແລ່ນຜ່ານຕາແສງຊອງເຟື້ອງ. ເມື່ອແຕ່ລະຕາແສງ, ແຕ່ລະບ້ານ, ແຕ່ລະຄອບຄົວມີນ້ຳປະປາໃຊ້ແລ້ວ, ໂສມໜ້າເຂດຊົນນະບົດໃໝ່ຢູ່ຕາແສງຊອງເຟື້ອງຈະສົມບູນແບບກວ່າ. ແລະຮອດເວລານັ້ນ, ບັນດາອ່າງເກັບນ້ຳພຽງແຕ່ໃຊ້ສະເພາະໃຫ້ແກ່ການຊົງນ້ຳຊາເພື່ອບັນເທົາຄວາມຮ້ອນເອົ້າໃນລະດູຮ້ອນເທົ່ານັ້ນ.