(vovworld) - ແຂວງບັກນິງ ໄດ້ເຊັນອະນຸມັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໄລຍະ 2010 – 2015 ຢູ່ 100 ຕາແສງ. ດ້ວຍຈຸດໝາຍເຖິງປີ 2015, ທົ່ວແຂວງຈະມີ 50% ຈຳນວນຕາແສງບັນລຸມາດຕະຖານຊົນນະບົດໃໝ່, ສູງກວ່າທົບ 2 ເທົ່າ ເມື່ອທຽບໃສ່ຈຸດໝາຍລວມຂອງທົ່ວປະເທດ, ບັກນິງ ພວມຮິບເຮັ່ງຜັນຂະຫຍາຍແຜນການກໍ່ສ້າງຊົນນະບົດໃໝ່ ແລະ ຖືວ່ານີ້ແມ່ນໜ້າທີ່ຈຸດສຸມຂອງທັງລະບົບການເມືອງ ແລະ ປະຊາຊົນ. ສິ່ງທີ່ໜ້າຮັບຮູ້ນັ້ນແມ່ນ ຈຸດເລີ່ມຕົ້ນຂອງບັນດາຕາແສງປະຕິບັດໂຄງການແມ່ນສູງພໍສົມຄວນ, ມີບາງຕາແສງບັນລຸໄດ້18/19 ມາດຕະຖານຂອງໂຄງການແລ້ວ.
ການກໍ່ສ້າງຊົນນະບົດໃໝ່ຢູ່ບັກນິງ
(ພາບ: bacninh.gov.vn)
ມາຢ້ຽມຢາມ ດ້າຍດົ່ງແທ່ງ, ເມືອງ ທ້ວນແທ່ງ, ແຂວງ ບັກນິງ, ພວກເຮົາຮູ້ສຶກຄືວ່ານີ້ທັງແມ່ນເຂດຕົວເມືອງ, ທັງແມ່ນເຂດຊົນນະບົດຂອງພາກເໜືອ. ບັນດາເຮືອນຕຶກຫຼາຍຊັ້ນທີ່ໃຫຍ່ໂຕໂອໂຖງ ແລະ ສວຍງາມ, ທາງຄົມມະນາຄົມລະຫວ່າງບ້ານໄດ້ຮັບການກໍ່ສ້າງດ້ວຍເບຕົງທີ່ກວ້າງເຖິງ 14 ແມັດ, ສະພາບແວດລ້ອມສະອາດສວຍງາມ, ບັນດາປູຊະນີຍະສະຖານໃນຕາແສງລ້ວນແຕ່ໄດ້ຮັບການບຸລະນະຮັກສາໄວ້. ພິເສດ, ການຜະລິດຢູ່ທີ່ນີ້ໄດ້ຮັບການພັດທະນາພໍສົມຄວນ. ບັນດາອາຊີບຫັດຖະກຳໄດ້ຮັບການເສີມຂະຫຍາຍ, ທົ່ງນາກໍ່ຖືກວາງແຜນກຳນົດຢ່າງມີວິທະຍາສາດ, ທາງຄົມມະນາຄົມເຊື່ອມຕໍ່ລະຫວ່າງບ້ານຕາແສງກັບທົ່ງນາຖືກກໍ່ສ້າງແບບຖາວອນ, ຄົບຊຸດ. ເອື້ອຍ Nguyen Thi Nhi, ຢູ່ບ້ານ 8, ຕາແສງ ດ້າຍດົ່ງແທ່ງ, ໃຫ້ຮູ້ວ່າ, ນັບແຕ່ຕາແສງມີໂຄງການກໍ່ສ້າງຊົນນະບົດໃໝ່, ຊາວບ້ານພາກພູມໃຈທີ່ສຸດ, ເພາະວ່າທຸກຄົນຕ່າງກໍ່ຮູ້ບັນດາຜົນປະໂຫຍດຂອງໂຄງການ. ເອື້ອຍ Nhi ແບ່ງປັນວ່າ:
”ຂ້າພະເຈົ້າເຫັນວ່າ, ຢູ່ບັນດາຕາແສງເລີ່ມຜັນຂະຫຍາຍໂຄງການ ກໍ່ສ້າງຊົນນະບົດໃໝ່ໄດ້ປະຕິບັດຢ່າງຂ້ຽວຂາດ ແລະ ຄົບຊຸດ. ມີຂະບວນການຊົນນະບົດໃໝ່ແມ່ນດີທີ່ສຸດ, ທຸກຄົນໄດ້ແນະນຳໃຫ້ກັນວິທີທຳມາຫາກິນ, ທຳການຜະລິດ ພັດທະນາ, ປະຈຸບັນຢູ່ທີ່ນີ້ເຮືອນຫຼັງໃດກໍ່ສວຍງາມ, ຖະໜົນຫົນທາງກໍ່ລ້ວນແຕ່ໄດ້ຮັບການກໍ່ສ້າງດ້ວຍເບຕົງງາມທີ່ສຸດ”.
ການກໍ່ສ້າງຊົນນະບົດໃໝ່ຢູ່ບັກນິງ
(ພາບ: bacninh.gov.vn)
ບົນພື້ນຖານຕີລາຄາຄວາມຈິງແລ້ວ, ແລະ ໝາກຜົນແຫ່ງການກວດກາ 100% ຈຳນວນຕາແສງຕາມມາດຕະຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ປະຈຸບັນ, ບັກນິງມີ 63 ຕາແສງ ບັນລຸແຕ່ 5-9 ມາດຕະຖານ, 28 ຕາແສງ ບັນລຸແຕ່ 10-14 ມາດຕະຖານ, 2 ຕາແສງບັນລຸແຕ່ 15-18 ມາດຕະຖານ… ທ່ານ Nguyen Van Xuyen, ຫົວໜ້າກົມພັດທະນາຊົນນະບົດສາຂາແຂວງ ບັກນິງ, ສະມາຊິກໃນຄະນະຊີ້ນຳການກໍ່ສ້າງຊົນນະບົດໃໝ່ແຂວງ ບັກນິງ,ໃຫ້ຮູ້ວ່າ: ບັກນິງ ໄດ້ສ້າງແຜນຮ່າງກໍ່ສ້າງຊົນນະບົດໃໝ່ຕາມໂຄງການຈຸດໝາຍແຫ່ງຊາດເຖິງປີ 2015 ດ້ວຍ 100 ຕາແສງໃນບໍລິເວນແລ້ວ.
ທ່ານຍັງໃຫ້ຮູ້ຕື່ມອີກວ່າ, ແຂວງບັກນິງ ຈະເດັດດຽວປະຕິບັດຈຸດໝາຍກໍ່ສ້າງຊົນນະບົດໃໝ່ໃຫ້ພັດທະນາຢ່າງຮອບດ້ານ, ໝັ້ນຄົງ, ພື້ນຖານໂຄງລ່າງໄດ້ຮັບການກໍ່ສ້າງຢ່າງຄົບຊຸດ, ທັນສະໄໝ, ຊີວິດທາງດ້ານວັດຖຸຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ. ໃນໄລຍະຈະມາເຖິງ, ບັກນິງ ຈະວາງແຜນກຳນົດພັດທະນາບັນດາຂະແໜງອາຊີບ ແລະ ໝູ່ບ້ານຜະລິດອຸດສາຫະກຳ, ອຸດສາຫະກຳ ຫັດຖະກຳນ້ອຍຕິດພັນກັບການກໍ່ສ້າງຊົນນະບົດໃໝ່. ຕາມນັ້ນ, ທາງແຂວງຈະຮັກສາ ແລະ ພັດທະນາບັນດາຂະແໜງອາຊີບຜະລິດຫັດຖະກຳທີ່ບໍ່ກໍ່ມົນລະພິດສິ່ງແວດລ້ອມ. ນອກນັ້ນກໍ່ກຳນົດການພັດທະນາອຸດສາຫະກຳຮັບໃຊ້ກະສີກຳຕ້ອງຕິດພັນກັບການແກ້ໄຂວຽກເຮັດງານທຳໃຫ້ແກ່ຜູ້ອອກແຮງງານຢູ່ເຂດຊົນນະບົດ; ພ້ອມທັງສ້າງບັນດາກຸ່ມອຸດສາຫະກຳ, ດຶງດູດບັນດາວິສາຫະກິດຂະໜາດກາງເຂົ້າລົງທຶນໃນແຂວງ. ທ່ານ Nguyen Van Xuyen, ສະມາຊິກໃນຄະນະຊີ້ນຳການກໍ່ສ້າງຊົນນະບົດໃໝ່ແຂວງ ບັກນິງ,ໃຫ້ຮູ້ວ່າ:
”ເຖິງປີ 2015 ຕ້ອງກໍ່ສ້າງຊົນນະບົດໃໝ່ໃຫ້ໄດ້ຢູ່ 50 ຕາແສງ, ເທົ່າກັບ 50% ແລະ ຮອດປີ 2020 ຕ້ອງບັນລຸໃຫ້ໄດ້ 80%. ປະຈຸບັນ, ຜ່ານການສຳຫຼວດກໍ່ເຫັນວ່າ ບໍ່ທັນມີຕາແສງໃດບັນລຸມາດຕະຖານຢ່າງຄົບຖ້ວນ, ແຕ່ຈຳຈວນຕາແສງບັນລຸໄດ້ຫຼາຍມາດຕະຖານນັ້ນແມ່ນກວມອັນຕາສ່ວນຫຼາຍ. ບັກນິງ ແມ່ນແຂວງໃນເຂດທົ່ງພຽງ ພື້ນຖານດ້ານວັດຖຸ, ເສດຖະກິດພັດທະນາ ແລະ ໃນຊຸມປີຜ່ານມາ ບັນດາມາດຕະຖານດ້ານພື້ນຖານໂຄງລ່າງໄດ້ຮັບການກໍ່ສ້າງໂດຍພື້ນຖານແລ້ວ, ແຕ່ຕາມແຜນກຳນົດ ແລະ ມາດຕະຖານຂອງໂຄງການ ແມ່ນຕ້ອງມີການປັບປຸງຄືນໃໝ່ເທົ່ານັ້ນ. ”
ການກໍ່ສ້າງຊົນນະບົດໃໝ່ຢູ່ບັກນິງ
(ພາບ: bacninh.gov.vn)
ທ່ານ Tran Van Tuy , ປະທານຄະນະກຳມະການປະຊາຊົນແຂວງ ບັກນິງ, ຫົວໜ້າຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໃຫ້ຮູ້ວ່າ: ແຂວງບັກນິງ ຈະເອົາໃຈໃສ່ເປັນພິເສດເຖິງການເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງແຕ່ລະທ້ອງຖີ່ນ ກ່ຽວກັບການຜະລິດບັນດາຜະລິດຕະພັນທີ່ເປັນມູນເຊື້ອ, ບັນດາຂະແໜງຫັດຖະກຳ ສິລະປະ, ປຸງແຕ່ທັນຍາຫານ, ສະບຽງອາຫານ, ແກ້ໄຂວຽກເຮັດງານທຳໃຫ້ແກ່ຜູ້ອອກແຮງງານ, ເພີ່ມລາຍຮັບໃຫ້ແກ່ປະຊາຊົນ.
ດ້ວຍເງື່ອນໄຂພື້ນຖານດ້ານວັດຖຸ, ພື້ນຖານໂຄງລ່າງ ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາທີ່ດີນັ້ນ, ຄາດວ່າ, ໂຄງການກໍ່ສ້າງຊົນນະບົດໃໝ່ຢູ່ບັກນິງ ຈະປະຕິບັກສຳເລັດຈຸດໝາຍກ່ອນກຳນົດເວລາທີ່ໄດ້ວາງອອກ.