(vovworld) - ພາຍຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່. ຢູ່ 5 ແຂວງໃນເຂດໄຕງວຽນ ໄດ້ມີ 11 ຕາແສງບັນລຸ 19 ມາດຖານກໍ່ສ້າງຊົນນະບົດໃໝ່. ຜ່ານບົດຮຽນແຫ່ງການກໍ່ສ້າງຊົນນະບົດໃໝ່ຂອງບັນດາຕາແສງໄດ້ຮັບຜົນສຳເລັດກໍ່ເຫັນວ່າ: ການລະດົມກຳລັງແຮງຈາກປະຊາຊົນມີບົດບາດສຳຄັນທີ່ສຸດ. ນີ້ແມ່ນເນື້ອໃນຕົ້ນຕໍໃນບົດຂຽນຂອງ ດິ່ງຕ໋ວນ, ນັກຂ່າວວິທະຍຸກະຈາຍສຽງຫວຽດນາມ,
ພະນັກງານກວດກາເສັ້ນທາງຄົມມະນາຄົມຊົນນະບົດທີ່ຫາກໍ່ສຳເລັດ
(ພາບ: ຟານແອງຢຸງ))
ໃນບັນດາມາດຖານກ່ຽວກັບການກໍ່ສ້າງຊົນນະບົດໃໝ່, ການພັດທະນາ, ບຸລະນະສ້ອມແປງລະບົບຄົມມະນາຄົມຊົນນະບົດແມ່ນວຽກງານຫຍຸ້ງຍາກທີ່ສຸດ, ຍ້ອນຕ້ອງການເງິນຫຼາຍ. ແຕ່ຢູ່ຕາແສງ Ea O, ເມືອງ Ea Kar, ແຂວງດັກລັກ, ທາງຄົມມະນາຄົມຊົນນະບົດໄດ້ຮັບການພັດທະນາຢ່າງວ່ອງໄວ. ພາຍຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ທາງຕາແສງໄດ້ລະດົມທຸກແຫຼ່ງກຳລັງເພື່ອກໍ່ສ້າງສຳເລັດຂົວຖາວອນ 2 ແຫ່ງ, ທາງປູຢາງ ຫຼື ທາງເບຕົງລະຫວ່າງບ້ານ, ຕາແສງໄດ້ 90 ກມ, ດ້ວຍມູນຄ່າກໍ່ສ້າງເກືອບ 70 ຕື້ດົ່ງ. 500 ກວ່າຄອບຄົວໃນຕາແສງໄດ້ບໍລິຈາກເງິນ, ແຮງງານ ແລະ ປະກອບທີ່ດິນ 160.000 ຕາລາງແມດດ້ວຍຄວາມສະມັກໃຈ… ເພື່ອກໍ່ສ້າງສຳເລັດທາງຄົມມະນາຄົມ.ຕາມທ່ານ ຫງວຽນມິງຈ່ວຽນ, ປະທານຄະນະກຳມະການປະຊາຊົນ ຕາແສງ Ea O ແລ້ວ, ດ້ວຍການສະໜັບສະໜູນຂອງປະຊາຊົນ, ການກໍ່ສ້າງຊົນນະບົດໃໝ່ອາດຈະປະຕິບັດສຳເລັດໃນປີ 2015. ທ່ານ ຫງວຽນມິງຈ່ວຽນ, ແບ່ງປັນວ່າ:
”ຕ້ອງຮັບຮູ້ບຸນຄຸນຂອງປະຊາຊົນຢ່າງທັນການ. ຕົວຢ່າງຄື: ເມື່ອກໍ່ສ້າງທາງຄົມມະນາຄົມ, ພວກຂ້າພະເຈົ້າໄດ້ລະດົມແຕ່ລະຄອບຄົວ. ວັດແທກທີ່ດິນ ແລະ ຈຳນວນຕົ້ນໄມ້ທີ່ເຂົາເຈົ້າໄດ້ອຸທິດສ່ວນ, ແລ້ວຄິດໄລ່ເປັນມູນຄ່າ. ເມື່ອຕ້ອງບຸກເບີກເນື້ອທີ່ດິນຢ່າງກວ້າງຂວາງ, ພວກຂ້າພະເຈົ້າກໍ່ແຈ້ງບັນດາວຽກດີຄົນເດັ່ນທາງວິທະຍຸ, ຫຼັງຈາກນັ້ນຈະຍ້ອງຍໍຢ່າງທັນການ”.
ຍ້ອນມີຄວາມຊຳນານໃນການລະດົມມະຫາຊົນເຂົ້າຮ່ວມ, ຢູ່ບັນດາຕາແສງກວາງດ່ຽນ (ເມືອງ Krong Ana), Ea Tul (ເມືອງ Chu M Gar) , Ea Nuoi (ເມືອງບ້ານດົນ)… ນັບຮ້ອຍຄອບຄົວຢູ່ທີ່ນີ້ໄດ້ສະໝັກໃຈຍົກຍ້າຍ, ສະຫງວນທີ່ດິນ, ບໍລິຈາກເງິນ, ປະກອບເຫື່ອແຮງ ເພື່ອກໍ່ສ້າງກິດຈະກຳສະຫວັດດີການ ແລະ ທາງຄົມມະນາຄົມ. ຜ່ານນັ້ນຍູ້ແຮງຄວາມຄືບໜ້າໃນການກໍ່ສ້າງຊົນນະບົດໃໝ່ຢູ່ທ້ອງຖີ່ນ. ທ່ານ ຫງວຽນໂລກ, ຢູ່ບ້ານ 1, ຕາແສງກວາງດ່ຽນ, ຜູ້ທີ່ໄດ້ອຸທິດທີ່ດິນເກືອບ 600 ຕາລາງແມດ, ພ້ອມທັງຂົນຂວາຍນັບສິບໆຄອບຄົວອື່ນໃນບ້ານຕັ້ງໜ້າປະກອບສ່ວນເຂົ້າໃນການກໍ່ສ້າງຊົນນະບົດໃໝ່, ໃຫ້ຮູ້ວ່າ:
”ຄອບຄົວຂ້າພະເຈົ້າທຸກຄົນລ້ວນແຕ່ເຫັນດີປະກອບສ່ວນ, ເພາະວ່ານີ້ແມ່ນສິດຜົນປະໂຫຍດຂອງຊາວກະສີກອນ. ກ່ອນນີ້ເມື່ອຝົນຕົກທາງກໍ່ເປັນຕົມການໄປມາຍາກຫຼາຍ… ເມື່ອມີທາງປູຢາງແລ້ວການໄປມາສະດວກສະບາຍກວ່າ ”.
ດ້ວຍການສະໜັບສະໜູນຂອງທົ່ວປວງຊົນ, ເລື່ອງຜັນຂະຫຍາຍການກໍ່ສ້າງຊົນນະບົດໃໝ່ ໄດ້ຮັບການປະຕິບັດຢ່າງສະດວກສະບາຍ. ພັນໂທ ຫງວຽນມິງແມ້ງ, ຫົວໜ້າການເມືອງກອງພົນນ້ອຍ 198, ຫົວໜ່ວຍທີ່ເຂົ້າຮ່ວມການຊ່ວຍເຫຼືອປະຊາຊົນຢູ່ 3 ຕາແສງໃນແຂວງດັກລັກ ກໍ່ສ້າງຊົນນະບົດໃໝ່, ໃຫ້ຮູ້ວ່າ: ທຳອິດແມ່ນຕ້ອງຊ່ວຍປະຊາຊົນເຂົ້າໃຈກ່ຽວກັບຊົນນະບົດໃໝ່, ແລະ ໂຄສະນາແນວທາງນະໂຍບາຍຂອງລັດກ່ຽວກັບວຽກງານກໍ່ສ້າງຊົນນະບົດໃໝ່. ພິເສດ, ພະນັກງານຕ້ອງໃກ້ຊິດຕິດແທດກັບປະຊາຊົນ, ເພື່ອໃຫ້ປະຊາຊົນຮູ້ອາລົມຈິດ ແລະ ຄວາມຮັບຜິດຊອບຂອງພະນັກງານ.
”ພວກຂ້າພະເຈົ້າໄປມາຊ່ວຍເຫຼືອປະຊາຊົນ, ກໍ່ສ້າງທາງຄົມມະ ນາຄົມ, ຂູດຄອງເໝືອງ, ຊົນລະປະທານ… ສ້າງຄວາມໃກ້ຊິດສະໜິດຕິດພັນລະຫວ່າງນັກຮົບກັບປະຊາຊົນ. ເພື່ອຈຸດໝາຍ ກໍ່ສ້າງຊົນນະບົດໃໝ່ໃຫ້ສຳເລັດ”.
ຜ່ານ 3 ປີແຫ່ງການກໍ່ສ້າງຊົນນະບົດໃໝ່, ບັນດາຄອບຄົວຢູ່ດັກລັກ ໄດ້ອຸທິດທີ່ດິນ, ປະກອບເຫື່ອແຮງ, ບໍລິຈາກເງິນ ລວມມູນຄ່າກວ່າ 750 ຕື້ດົ່ງ, ປະກອບສ່ວນຍູ້ໄວຄວາມຄືບໜ້າໃນການປະຕິບັດໂຄງການກໍ່ສ້າງຊົນນະບົດໃໝ່. ມາຮອດປະຈຸບັນໄດ້ມີ 1/5 ຕາແສງໃນແຂວງບັນລຸໄດ້ແຕ່ 10-15 ມາດຖານ. ຄາດວ່າໃນປີນີ້, ແຂວງດັກລັກ ຈະມີ 2 ຕາແສງປະຕິບັດສຳເລັດ 19 ມາດຖານກໍ່ສ້າງຊົນນະບົດໃໝ່ ແລະ ຮອດປີ 2015, ທົ່ວແຂວງຈະມີຕື່ມ 30 ຕາແສງບັນລຸມາດຖານ. ນອກຈາກການລົງທຶນຢ່າງເໝາະສົມ, ການຊີ້ນຳຢ່າງທັນການ, ບັນດາບົດຮຽນທີ່ຖອດຖອນມາໄດ້ໃນການລະດົມກຳລັງແຮງຈາກປະຊາຊົນໃນ 3 ປີຜ່ານມາ ແມ່ນສິ່ງທີ່ສຳຄັນຊ່ວຍໃຫ້ດັກລັກ ປະຕິບັດສຳເລັດຈຸດໝາຍທີ່ໄດ້ວາງອອກ.