(vovworld) - ມາຮອດປະຈຸບັນ, ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຢູ່ຫວຽດນາມ ໄດ້ຮັບຄວາມເຫັນດີເຫັນພ້ອມຈາກທົ່ວສັງຄົມ. ບັນດາຜົນງານ ແລະ ບັດຮຽນທີ່ບັນລຸໄດ້ໃນການກໍ່ສ້າງຊົນນະບົດໃໝ່ໃນໄລຍະຜ່ານມາ ແມ່ນປະຖົມປັດໃຈທີ່ສຳຄັນ ເພື່ອໃຫ້ລັດຖະບານວາງຈຸດໝາຍກໍ່ສ້າງຊົນນະບົດໃໝ່ໃນໄລຍະຈະມາເຖິງຕາມທິດມີປະສິດທິຜົນ ແລະ ໝັ້ນຄົງ.
ພາບປະກອບ
ພາຍຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ໂຄງການກໍ່ສ້າງໄດ້ເກືອບ 5000 ຮູບແບບຜະລິດ, ປະກອບສ່ວນຍົກສູງປະສິດທິຜົນການຜະລິດຂຶ້ນແຕ່ 20 – 30%. ຜົນງານທີ່ເຫັນໄດ້ຊັດໃນການຜັນຂະຫຍາຍບັນດາມາດຖານກໍ່ສ້າງຊົນນະບົດໃໝ່ຢູ່ທ້ອງຖີ່ນຕ່າງໆ ນັ້ນແມ່ນການທ້ອນໂຮມເນື້ອທີ່ດິນນາເຂົ້າ, ຕິດພັນກັບການວາງແຜນກຳນົດເຂດຜະລິດສິນຄ້າຢູ່ທຸກແຂວງໃນເຂດທົ່ງພຽງແມ່ນ້ຳແດງ ແລະ ກໍ່ສ້າງຮູບແບບ “ທົ່ງນາແບບຢ່າງຂະໜາດໃຫຍ່”, “ຫັນການຜະລິດກະສີກຳດ້ວຍກົນຈັກ” ຢູ່ເຂດທົ່ງພຽງແມ່ນ້ຳຂອງ. ມາຮອດປະຈຸບັນ, ຢູ່ 11 ຕາແສງທີ່ສູນກາງຄັດເລືອກເປັນແຫ່ງປະຕິບດທົດລອງນັ້ນ, ໄດ້ບັນລຸແຕ່ 15 – 18 ມາດຖານໃນການກໍ່ສ້າງຊນນະບົດໃໝ່. ບັນດາທ້ອງຖີ່ນທີ່ບັນລຸໄດ້ຫຼາຍມາດຖານຄື: ຮ່າໂນ້ຍ, ກວາງນິງ, ຫາຍຝ່ອງ, ບັກຢາງ, ລາວກາຍ, ອຽນບ໋າຍ, ຮຶງອຽນ… ນອກນັ້ນຍັງມີ 950 ຕາແສງຢູ່ບັນດາແຂວງໃນເຂດທົ່ງພຽງແມ່ນ້ຳແດງ, ເຂດທິດເໜືອຂອງພາກກາງບັນລຸໄດ້ແຕ່ 10 ມາດຖານຂຶ້ນໄປ (ກວມປະມານ 18%).
ອາດເວົ້າໄດ້ວ່າ, ບັນດາຜົນງານທີ່ບັນລຸໄດ້ນັ້ນສະແດງໃຫ້ເຫັນວ່າ ໂຄງການໄດ້ກາຍເປັນຂະບວນການຢ່າງເລິກເຊິ່ງ ແລະ ກວ້າງຂວາງໃນທົ່ວປະເທດ, ອັນໄດ້ດຶງດູດທັງລະບົບການເມືອງຈາກສູນກາງລົງຮອດຂັ້ນທ້ອງຖີ່ນເຂົ້າຮ່ວມ ແລະ ໄດ້ຮັບການສະໜັບສະໜູນຢ່າງສຸດຈິດສຸດໃຈຈາກຊາວກະສີກອນໃນທົ່ວປະເທດ. ໃນເບື້ອງຕົ້ນ, ໂຄງການສາມາດກໍ່ສ້າງບາງຮູບແບບກໍ່ສ້າງຊົນນະບົດໃໝ່ ດ້ວຍວິທີການທີ່ມີຫົວຄິດປະດິດສ້າງ ແລະ ຖອດຖອນໄດ້ບາງບົດຮຽນທີ່ດີ. ທ່ານ ໂຮ່ຊວນຮຸ່ງ, ທີ່ປຶກສາຄະນະຊີ້ນຳແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຖືວ່າ:
“ເຖິງວ່າແຜນນະໂຍບາຍຈະຖືກຕ້ອງ, ແຕ່ບໍ່ເຮັດໃຫ້ປະຊາຊົນເຂົ້າໃຈໄດ້, ບໍ່ຫັນພາລະກິດນັ້ນເປັນຂອງເຂົາເຈົ້າ ມັນຈະບໍ່ໄດ້ຮັບຜົນ. ເຖິງວ່າເວລາປະຕິບັດບໍ່ຍາວປານໃດ, ແຕ່ບັນດາຜົນງານໃນເບື້ອງຕົ້ນໄດ້ສະແດງໃຫ້ເຫັນວ່າ ຕ້ອງອີງບົນຫຼັກການ, ກ່ອນອື່ນໝົດແຜນນະໂຍບາຍຕ້ອງຖືກຕ້ອງ, ທີສອງແມ່ນຕ້ອງເຮັດຫຼາຍເພື່ອປະຕິບັດແຜນນະໂຍບາຍນັ້ນ, ເພື່ອໃຫ້ປະຊາຊົນເຫັນໄດ້ວ່າ ເຮັດຄືແນວນັ້ນແມ່ນເພື່ອໃຫ້ເຂົາເຈົ້າ”.
ພາບປະກອບ
ຕາມບົດລາຍງານຂອງຄະນະຊີ້ນຳແຫ່ງຊາດກ່ຽວກັບການກໍ່ສ້າງຊົນນະບົດໃໝ່ແລ້ວ, ໃນຈຳນວນ 19 ມາດຖານກ່ຽວກັບການກໍ່ສ້າງຊົນນະບົດໃໝ່ນັ້ນ, ມາດຖານວາງແຜນກຳນົດແມ່ນມາດຖານສຳຄັນທີ່ສຸດ. ເພາະວ່າມາດຖານນີ້ໄດ້ຮັບການສ້າງສຳເລັດແລ້ວ, ຈະສ້າງເງື່ອນໄຂໃຫ້ແກ່ການຜັນຂະຫຍາຍບັນດາມາດຖານອື່ນໆ. ເຖິງຢ່າງໃດກໍ່ຕາມ, ພາຍຫຼັງ 3 ປີ ແຫ່ງການຜັນຂະຍາຍການກໍ່ສ້າງຊົນນະບົດໃໝ່, ອັດຕາສ່ວນຕາແສງປະຕິບັດສຳເລັດມາດຖານນີ້ບັນລຸພຽງ 68% ເທົ່ານັ້ນ, ໃນນັ້ນມາດຖານວາງອອກແມ່ນຕ້ອງສຳເລັດ 100% ໃນປີ 2012. ທ່ານ ກາວດຶກຟາດ, ລັດຖະມົນຕີກະຊວງກະສີກຳ ແລະ ພັດທະນາຊົນນະບົດ, ຮອງຫົວໜ້າຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໃຫ້ຮູ້ວ່າ:
“ນີ້ແມ່ນສິ່ງທີ່ຍັງຄົງຄ້າງຂອງໂຄງການ. ມີບາງແຫ່ງປະຕິບັດໂຄງການບໍ່ທັນເຄັ່ງຄັດ. ຄວາມສາມາດສ້າງແຜນກຳນົດຢູ່ທ້ອງຖີ່ນຕ່າງໆກໍ່ຄືອົງການໃຫ້ຄຳປຶກສາຍັງຕ່ຳເມື່ອທຽບໃສ່ໜ້າທີ່. ເຖິງຢ່າງໃດກໍ່ຕາມ, ການວາງແຜນກຳນົດຢູ່ເກືອບ 10 000 ຕາແສງໃນພາບດຽວ ແມ່ນວຽກງານປະຕິບັດຍາກ. ດັ່ງນັ້ນໃນປີ 2013, ພວກຂ້າພະເຈົ້າຈະສືບຕໍ່ຊີ້ນຳ ແລະ ໜູນຊ່ວຍທ້ອງຖີ່ນຕ່າງປະຕິບັດວຽກງານນີ້ໃຫ້ສຳເລັດ”.
ພາບປະກອບ
ໜຶ່ງໃນບັນດາບັນຫາເຊິ່ງຄະນະຊີ້ນຳແຫ່ງຊາດກ່ຽວກັບການກໍ່ສ້າງຊົນນະບົດໃໝ່ມີຄວາມເອົາໃຈໃສ່ໃນປະຈຸບັນ, ນັ້ນແມ່ນຕ້ອງປັບປຸງ, ດັດແກ້ບັນດາມາດຖານກ່ຽວກັບການກໍ່ສ້າງຊົນນະບົດໃໝ່ໃຫ້ເໝາະສົມກັບສະພາບຕົວຈິງຂອງແຕ່ລະທ້ອງຖີ່ນ. ເພາະວ່າແຕ່ລະທ້ອງຖີ່ນມີຈຸດພິເສດສະເພາະ ແລະ ເງື່ອນໄຂທຳມະຊາດ, ເສດຖະກິດ ສັງຄົມຢູ່ແຕ່ລະເຂດກໍ່ແຕກຕ່າງກັນ, ມີບາງມາດຖານວາງອອກໃນລະດັບສູງໂພດ, ດັ່ງນັ້ນຄວນປັບປຸງຄືນໃຫ້ເໝາະສົມກັບບັນດາເຂດຊົນນະບົດໃນປະຈະບັນ, ພິເສດແມ່ນມາດຖານລາຍຮັບ, ອັດຕາຄອບຄົວທີ່ທຸກຍາກ, ໂຄງປະກອບແຮງງານຊົນນະບົດ, ການປະກອບສ່ວນຂອງຊາວກະສີກອນ, ວິສາຫະກິດໃນການກໍ່ສ້າງໂຄງລ່າງຊົນນະບົດ. ເພື່ອຮັບປະກັນລັກສະນະເປັນໄປຂອງມາດຖານ ຄະນະຊີນຳແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ໄດ້ມອບໃຫ້ບັນດາກະຊວງ, ຂະແໜງການທີ່ກ່ຽວຂ້ອງຄົ້ນຄ້ວາ, ເພີ່ມເຕີມ, ເຮັດສຳເລັດຄຳນິຍາມ, ເນື້ອໃນ, ຂອບເຂດ, ຄິດໄລ່ບັນດາມາດຖານຢ່າງມີວິທະຍາສາດ ແລະ ໄກ້ສິດກັບສະພາບຕົວຈິງ. ດ້ວຍບັນດາລັດຖະນະໂຍບາຍຂອງລັດຖະບານ ແລະການສົມທົບຂອງກະຊວງ, ຂະແໜງການຕ່າງໆຢູ່ຂັ້ນສູນກາງ, ກໍ່ຄືອຳນາດການປົກຄອງທຸກຂັ້ນນັ້ນ, ການກໍ່ສ້າງຊົນນະບົດໃໝ່ຢູ່ຫວຽດນາມພວມຫັນທິດຢ່າງມີປະສິດທິຜົນ ແລະ ໝັ້ນຄົງ ປະກອບສ່ວນເຂົ້າໃນກິດຈະການຫັນເປັນອຸດສາຫະກຳ ແລະ ທັນສະໄໝ ເພື່ອຈຸດໝາຍປະຊາຊົນຮັ່ງມີ, ປະເທດຊາດເຂັ້ມແຂງ ແລະ ເຊື່ອມໂຍງເຂົ້າກັບເສດຖະກິດໂລກຂອງຫວຽດນາມ.