(ຕາແສງຂອງເມືອງເມື່ອງເຄືອງ)
(vovworld) - ເມື່ອງເຄືອງ, ແຂວງລາວກາຍ ແມ່ນໜຶ່ງໃນຈຳນວນ 6 ເມືອງທຸກຍາກທີ່ສຸດຂອງຫວຽດນາມ. ຍ້ອນຢູ່ເຂດພູສູງ, ພູມມີປະເທດທຸລະກັນດານ, ດັ່ງນັ້ນເມື່ອຜັນຂະຫຍາຍໂຄງການກໍ່ສ້າງຊົນນະບົດໃໝ່, ປະຊາຊົນບັນດາເຜົ່າເມືອງເມື່ອງເຄືອງ ຈຶ່ງຢາກສຸມໃສ່ມາດຖານທີ 2, ແມ່ນກໍ່ສ້າງທາງຄົມມະນາຄົມຊົນນະບົດ. ປະຈຸບັນ, ທາງຄົມມະນາຄົມໃໝ່ທີ່ກວ້າງໃຫຍ່ຫຼາຍສາຍພວມໄດ້ຮັບການກໍ່ສ້າງໃຫ້ສຳເລັດເທື່ອລະກ້າວ ບໍ່ພຽງແຕ່ຢູ່ເມືອງເມື່ອງເຄືອງ ເທົ່ານັ້ນ, ຫາກຍັງຢູ່ທຸກຕາແສງ, ໝູ່ບ້ານໃນເຂດພູສູງແຂວງລາວກາຍອີກດ້ວຍ.
ເສັ້ນທາງໃນບ້ານສິນຈາຍ ຫາກໍ່ໄດ້ຮັບການກໍ່ສ້າງ, ເຖິງວ່າໜ້າທາງບໍ່ຮາບພຽງປານໃດ ແຕ່ເມື່ອທຽບໃສ່ກ່ອນນີ້ 1 ກວ່າປີ, ແມ່ນໄດ້ມີການປ່ຽນແປງຫຼາຍແລ້ວ. ປະຈຸບັນ, ຄອບຄົວໃດທີ່ມີເງື່ອນໄຂດ້ານເສດຖະກິດກໍ່ສາມາດຊື້ລົດຈັກໄປມາຢ່າງສະດວກສະບາຍໄດ້. ເອື້ອຍ ຟ້າມທິຍຸງ, ໃຫ້ຮູ້ວ່າ:
“ກ່ອນນີ້ທາງຄົມມະນາຄົມຊົນນະບົດຄັບແຄບຫຼາຍ, ພຽງແຕ່ພໍດີໃຫ້ໜຶ່ງຄົນໄປມາເທົ່ານັ້ນ. ໃນມື້ໜຶ່ງພຽງແຕ່ແບກເຂົ້າເປືອກ ຫຼືສາລີໄດ້ 3 ຖ່ຽວເທົ່ານັ້ນ. ປະຈຸບັນມີທາງໃໝ່ແລ້ວ, ແຕ່ລະມື້ສາມາດຂົນສົ່ງເຂົ້າ ແລະ ສາລີນັບສິບຖົງ ດ້ວຍລົດໃຫຍ່, ລົດຈັກໄດ້ ”.
ໃນຄວາມເບີກບານມ່ວນຊື່ນ, ເອື້ອຍ ຟ້າມທິຍຸງ ໄດ້ເລົ່າຄືນກ່ຽວກັບຊຸມມື້ທຳອິດ, ເມື່ອບ້ານ ສິນຈາຍ ຜັນຂະຫຍາຍໂຄງການກໍ່ສ້າງຊົນນະບົດໃໝ່. ເວລານັ້ນພາຍຫຼັງຮັບຟັງການແນະນຳຈາກພະນັກງານ, ປະຊາຊົນສ່ວນຫຼາຍຮັບຮູ້ໄດ້ຜົນປະໂຫຍດເມື່ອມີເສັ້ນທາງໃໝ່, ດັ່ງນັ້ນແຕ່ລະຄົນ, ແຕ່ລະຄອບຄົວຈຶ່ງປະກອບ-ຊັບສິນ ເງິນທອງ ແລະ ເຫື່ອແຮງ ເພື່ອກໍ່ສ້າງທາງໃນບ້ານ.
“ປະຊາຊົນປະກອບເຫື່ອແຮງ, ທີ່ດິນ ແລະ ຕົ້ນໄມ້ດ້ວຍຄວາມພາກພູມໃຈ, ແຕ່ລະຄອບຄົວປະກອບເງິນ 560.000 ດົ່ງເພື່ອເຊົ່າກົນຈັກເຮັດທາງ. ຊ້ຳບໍ່ໜຳ, ມີຕົ້ນໄມ້ລ້ຳຄ່າບາງປະເພດໃນສວນໃກ້ຈະຮອດຍາມເກັບກ່ຽວແລ້ວ, ແຕ່ເຂົາເຈົ້າກໍ່ຕັດອອກເພື່ອປະກອບທີ່ດິນສ່ວນໜຶ່ງຂອງຕົນໃຫ້ແກ່ການເຮັດທາງ”.
ເສັ້ນທາງໃນບ້ານສິນຈາຍ ຍາວເກືອບ 1ກມ, ກວ້າງ 3 ມ, ຖືກກໍ່ສ້າງຂ້າມໄຮ່ນາຂອງປະຊາຊົນເກືອບສິບຄອບຄົວ, ແຕ່ບໍ່ມີຄອບຄົວໃດສະແດງຄວາມເສຍດາຍ, ຫຼືຈົ່ມວ່າເທື່ອ. ຄອບຄົວເອື້ອຍ ຫຼໍ່ທິລຽນ ໄດ້ສະຫງວນທີ່ດິນເກືອບ 400 ຕາລາງແມດເພື່ອເຮັດທາງ. ເມື່ອຖືກຖາມວ່າ: ເອື້ອຍເສຍດາຍບໍ? ເອື້ອຍລຽນ ຕອບວ່າ:
“ບໍ່,ບໍ່ເສຍດາຍດອກ, ເພາະວ່າມີເສັ້ນທາງແລ້ວ, ການໄປມາຂອງປະຊາຊົນ, ໃນນັ້ນມີຂ້າພະເຈົ້າກໍ່ສະດວກສະບາຍກວ່າ ”.
ເສັ້ນທາງໃໝ່ຢູ່ບ້ານສິນຈາຍ ພວມໄດ້ຮັບການກໍ່ສ້າງໃກ້ຈະສຳເລັດແລ້ວ, ປະຊາຊົນໃນບ້ານພາກພູມໃຈຫຼາຍ, ເພາະຄິດວ່າ: ເສັ້ນທາງນີ້ຈະຊ່ວຍໃຫ້ພໍ່ແມ່ປະຊາຊົນໃນບ້ານສິນຈາຍ ຫຼຸດພົ້ນອອກຈາກຄວາມທຸກຍາກ, ລຳບາກ.
ການກໍ່ສ້າງຊົນນະບົດໃໝ່ແມ່ນໜຶ່ງໃນບັນດາໂຄງການເຊິ່ງ ອຳນາດການປົກຄອງທຸກຂັ້ນ, ກໍ່ຄືອົງການຈັດຕັ້ງມະຫາຊົນຢູ່ເມືອງເມື່ອງເຄືອງ ມີຄວາມເອົາໃຈໃສ່ເປັນພິເສດ ແລະ ຜັນຂະຫຍາຍຢ່າງລະອຽດ. ຄະນະຊີ້ນຳການກໍ່ສ້າງຊົນນະບົດໃໝ່ຈາກຂັ້ນເມືອງຕະຫຼອດຮອດຂັ້ນຕາແສງ ໄດ້ຮັບການສ້າງຕັ້ງ ແລະ ໄດ້ປັບປຸງ, ປະກາດໃຊ້ລະບຽບການເຄື່ອນໄຫວຢ່າງລະອຽດ. ເມື່ອງເຄືອງ ໄດ້ກໍ່ສ້າງແຜນການແຂ່ງຂັນໃນທົ່ວເມືອງ ກ່ຽວກັບການກໍ່ສ້າງຊົນນະບົດໃໝ່ ແລະ ໃຫ້ບັນດາຕາແສງຈົດທະບຽນປະຕິບັດສຳເລັດມາດຖານຕ່າງໆຕາມແຕ່ລະໄລຍະ, ແຕ່ລະປີ. ທ່ານ ຫງວຽນແມ້ງແທ່ນ, ຫົວໜ້າຫ້ອງກະສີກຳເມືອງເມື່ອງເຄືອງ, ໃຫ້ຮູ້ວ່າ:
“ຄະນະຊີ້ນຳອີງໃສ່ 19 ມາດຖານຂອງຂໍ້ຕົກລົງ 491, ເພື່ອແບ່ງງານໃຫ້ບັນດາອົງການ, ຂະແໜງການທີ່ກ່ຽວຂ້ອງ, ຖ້ານຫາກກ່ຽວຂ້ອງເຖິງມາດຖານໃດຕ້ອງຮັບຜິດຊອບມາດຖານນັ້ນ. ເມືອງສ້າງຕັ້ງໜ່ວຍປະສານງານ ເພື່ອຊ່ວຍຫົວໜ້າຕິດຕາມ, ສັງລວມ, ແນະນຳການປະຕິບັດຢູ່ຂັ້ນຮາກຖານ. ສ່ວນຫ້ອງການກະສີກຳຕ້ອງຮັບພິດຊອບມາດຖານກ່ຽວກັບການຫັນປ່ຽນໂຄງປະກອບເສດຖະກິດ, ຍົກສູງລາຍຮັບໃຫ້ແກ່ຊາວກະສີກອນ. ທັງແມ່ນຫົວໜ່ວຍທີ່ຄະນະຊີ້ນຳມອບໜ້າທີ່ປະຈຳການສັງລວມ”
ມາຢ້ຽມຢາມບັນດາບ້ານຕາແສງຂອງເມືອງເມື່ອງເຄືອງ ໃນຕົ້ນປີ 2013, ພວກເຮົາຈະເຫັນປະຊາຊົນຊາວເຜົ່ານຸ່ງ, ໄຢ໋, ໂບ໋ອີ, ປາຢີ້… ຫ້າວຫັນກໍ່ສ້າງທາງຄົມມະນາຄົມຊົນນະບົດ. ເລື່ອງປະຕິບັດສຳເລັດບັນດາມາດຖານຕົ້ນຕໍ່ຂອງໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຢູ່ເມືອງເມື່ອງເຄືອງ, ແຂວງ ລາວກາຍ ແມ່ນວຽກງານອັນຈຳເປັນ ເພື່ອປະກອບສ່ວນປັບປຸງຊີວິດການເປັນຢູ່ຂອງປະຊາຊົນບັນດາເຜົ່າຢູ່ເຂດພູດອຍ, ເຂດຊາຍແດນຂອງປະເທດໃຫ້ນັບມື້ນັບດີຂື້ນ.