(vovworld) – ບາວທັ໋ງ ແມ່ນເມືອງໜຶ່ງທີ່ຕັ້ງຢູ່ໃຈກາງແຂວງລາວກາຍ (ຫ່າງຈາກນະຄອນຫຼວງຮ່າໂນ້ຍ ໄປທາງທິດເໜືອປະມານ 400 ກມ. ໃນ 2 ກວ່າປີທີ່ຜ່ານມາ, ຂະບວນການກໍ່ສ້າງຊົນນະບົດໃໝ່ຢູ່ບາວທັ໋ງ ໄດ້ຮັບການສະໜັບສະໜູນ ແລະ ປະຕິບັດຈາກປະຊາຊົນ… ບັນລຸໄດ້ສິ່ງດັ່ງກ່າວ ແມ່ນຍ້ອນທາງເມືອງປະຕິບັດລະບຽບການປະຊາທິປະໄຕ, ດັ່ງນັ້ນຈຶ່ງລະດົມແຫຼ່ງກຳລັງຈາກປະຊາຊົນທີ່ເຂົ້າຮ່ວມການກໍ່ສ້າງຊົນນະບົດໃໝ່. ປະຊາຊົນເມືອງບາວທັ໋ງຮັບຮູ້ໄດ້ບົດບາດຂອງຕົນໃນການກໍ່ສ້າງຊົນນະບົດໃໝ່ໄດ້. ດັ່ງນັ້ນເຂົາເຈົ້າໄດ້ສະຫງວນທີ່ດິນນັບແສນຕາລາງແມັດ ແລະ ແຮງງານນັບໝື່ນວັນໃຫ້ແກ່ຂະບວນການນີ້.
ທຸກຄົນໃນເມືອງບາວທັ໋ງ ເຂົ້າຮ່ວມໂຄງການກໍ່ສ້າງຊົນນະບົດໃໝ່
(ພາບ: ອິນເຕີແນດ)
ເສັ້ນທາງຍາວເກືອບ 5 ກມ ຢູ່ບ້ານລ່າງກ້າວ, ຕາແສງຊວນກວາງ, ຫາກໍ່ໄດ້ຮັບການກໍ່ສ້າງສຳເລັດໃນຄວາມເບີກບານມ່ວນຊື່ນຂອງຊາວທ້ອງຖີ່ນ. ລວມຍອດເງິນກໍ່ສ້າງເສັ້ນທາງນີ້ແມ່ນເກືອບ 3 ຕື້ດົ່ງ, ໃນນັ້ນລັດໜູນຊ່ວຍ 1,4 ຕຶ້ດົ່ງ, ສ່ວນຍັງເຫຼືອໂດຍປະຊາຊົນປະກອບເອງ. ເພື່ອກໍ່ສ້າງເສັ້ນທາງດັ່ງກ່າວ, ແຕ່ລະຄອບຄົວໃນບ້ານໄດ້ປະກອບ 29 ວັນແຮງງານ ແລະ ເງິນສົດ ດ້ວຍຄວາມສະໝັກໃຈ. ເຮັດໄດ້ສິ່ງດັ່ງກ່າວ, ອຳນາດການປົກຄອງເມືອງ, ຕາແສງ ແລະ ບ້ານ ຕ້ອງສ້າງຄວາມເຫັນດີເຫັນພ້ອມໃນໝູ່ປະຊາຊົນ ກໍ່ຄືຖືການປະຕິບັດລະບຽບການປະຊາທິປະໄຕເປັນສຳຄັນ. ພ້ອມກັບຕາແສງຊວນກວາງ, ຕາແສງຊວນຟູ໋ ແລະ ຫຼາຍຕາແສງໃນເມືອງ ກໍ່ພວມປະຕິບັດລະບຽບການປະຊາທິປະໄຕໃນການກໍ່ສ້າງຊົນນະບົດໃໝ່. ຢູ່ຕາແສງຟູ໋ຍ້ວນ, ປະຊາຊົນຫຼາຍຄົນບໍ່ພຽງແຕ່ປະກອບແຮງງານ ແລະ ເງິນສົດເທົ່ານັ້ນ, ຫາກຍັງປະກອບທີ່ດິນນັບແສນຕາລາງແມັດໃຫ້ແກ່ຂະບວນການກໍ່ສ້າງຊົນນະບົດໃໝ່. ຕົວຢ່າງຄືຄອບຄົວທ່ານ ກິມວັນອຽດ, ເຈິ່ນວັນຫາຍ, ຫງວຽນວັນເຍິດ ແລະ ຄອບຄົວອື່ນໆອີກ ໄດ້ປະກອບທີ່ດິນແຕ່ 500 – 900 ຕາລາງແມດ ເພື່ອກໍ່ສ້າງທາງຄົມມະນາຄົມ ແລະ ຫໍວັດທະນະທຳບ້ານ. ທ່ານ ເຈິ່ນກວາງເຈືອງ, ປະທານຄະນະກຳມະການປະຊາຊົນຕາແສງຟູ໋ຍ້ວນ, ເມືອງບາວທັ໋ງ, ຖືວ່າ:
“ນັບແຕ່ສ້າງຕັ້ງ ຄະນະຊີ້ນຳແບ່ງໜ້າທີ່, ບັນດາຂະແໜງການ, ອົງການຈັດຕັ້ງມະຫາຊົນ, ລ້ວນແຕ່ເຂົ້າຮ່ວມ ແລະ ຜັນຂະຫຍາຍວຽກງານເຖິງໝູ່ມະຫາຊົນ. ວຽກງານໃດປະຊາຊົນກໍ່ຮູ້ໝົດ ແລະ ເຂົາເຈົ້າແມ່ນຜູ້ທີ່ໄດ້ຊົມໃຊ້ຜົນປະໂຫຍດຈາກການກໍ່ສ້າງຊົນນະບົດໃໝ່“.
ປະຊາຊົນປະກອບແຮງງານ 1.400 ວັນເພື່ອກໍ່ສ້າງທາງຄົມມະນາຄົມ
(ພາບ: ອິນເຕີແນດ)
ນອກນັ້ນ, ໃນຂະບວນການກໍ່ສ້າງຊົນນະບົດໃໝ່ຢູ່ເມືອງບາວທັ໋ງ ຍັງມີການຮ່ວມແຮງຂອງຄະນະຊາວໜຸ່ມ, ສະຫະພັນແມ່ຍິງ, ສະມາຄົມຜູ້ອາຍຸສູງ. ອ້າຍ ຫງວຽນເທ໋ແອງ, ເລຂາຄະນະຊາວໜຸ່ມຕາແສງຟູ໋ຍ້ວນ, ເມືອງບາວທັ໋ງ, ແຂວງລາວກາຍ, ໃຫ້ຮູ້ວ່າ:
“ທາງຕາແສງຈັດຕັ້ງຂະບວນການສະມາຊິກຊາວໜຸ່ມສະໝັກໃຈເຂົ້າຮ່ວມການກໍ່ສ້າງທາງຄົມມະນາຄົມຊົນນະບົດ. ເພື່ອປະຕິບັດມາດຖານ 17 ກ່ຽວກັບສິ່ງແວດລ້ອມ, ພວກຂ້າພະເຈົ້າໄດ້ລະດົມສະມາຊິກຊາວໜຸ່ມໃນຕາແສງຂຸດຂຸມບັນຈຸຂີ້ເຫຍື່ອ. ສະມາຊິກຊາວໜຸ່ມຂຸດກ່ອນ, ຫຼັງຈາກນັ້ນຈະຊ່ວຍບັນດາຄອບຄົວໃນຕາແສງຂຸດຂູມບັນຈຸຂີ້ເຫຍື່ອ“.
ສະມາຊິກຊາວໜຸ່ມຂຸດຂຸມບັນຈຸຂີ້ເຫຍື່ອ
(ພາບ: ອິນເຕີແນດ)
ປະຈຸບັນ, ສະມາຄົມແມ່ຍິງເມືອງບາວທັ໋ງພວມຂະຫຍາຍຮູບແບບ “ເຮືອນ, ສວນສະອາດ“, ສະມາຄົມຊາວກະສີກອນປະຕິບັດຂະບວນການ “ໂຄສະນາເຮັດອະນາໄມສິ່ງແວດລ້ອມ“, ຄະນະຂົນຂວາຍປະຊາຊົນປະຕິບັດຂະບວນການ “ຂົນຂວາຍປະຊາຊົນເກັ່ງ“. ຈຸດທີ່ພົ້ນເດັ່ນໜຶ່ງອີກຂອງ ບາວທັ໋ງ, ນັ້ນແມ່ນໄດ້ສ້າງ 100 ກວ່າໜ່ວຍໂຄສະນາ ແລະ ຂົນຂວາຍປະຊາຊົນຢູ່ບ້ານຕ່າງໆ, ໃນນັ້ນມີການເຂົ້າຮ່ວມຂອງເຈົ້າກົກເຈົ້າເຫຼົ່າ, ເຊິ່ງແມ່ນບັນດາຜູ້ທີ່ມີອິດທິພົນຊື່ສຽງໃນເຂດຊຸມຊົນ. ຍ້ອນເຫດນັ້ນຈຶ່ງເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນໄດ້. ທ່ານ ດັ້ງຟີເວິນ, ເລຂາຄະນະພັກເມືອງ ບາວທັ໋ງ, ແຂວງລາວກາຍ, ໃຫ້ຮູ້ວ່າ:
“ນີ້ແມ່ນລາຍການຈຸດສຸມທີ່ມີການເຂົ້າຮ່ວມຂອງພະນັກງານສະມາຊິກພັກ ແລະ ປະຊາຊົນ. ເພາະວ່າກໍ່ສ້າງຊົນນະບົດໃໝ່ ແມ່ນເຮັດໃຫ້ຊີວິດຂອງປະຊາຊົນໄດ້ດີກວ່າ. ດັ່ງນັ້ນວຽກງານທຳອິດແມ່ນຕ້ອງເຮັດໃຫ້ປະຊາຊົນເຂົ້າໃຈໄດ້ບົດບາດຂອງຕົນໃນການກໍ່ສ້າງຊົນນະບົດໃໝ່, ຈາກນັ້ນສ້າງຄວາມເຫັນດີເຫັນພ້ອມໃນໝູ່ປະຊາຊົນ, ປຸກລຸກກຳລັງພາຍໃນຂອງປະຊາຊົນ ເພື່ອປຸກລະດົມຂະບວນການທົ່ວປວງຊົນເຂົ້າຮ່ວມການກໍ່ສ້າງຊົນນະບົດໃໝ່“.
ມາຮອດປະຈຸບັນ, ເມືອງບາວທັ໋ງ ປູກເຂົ້າທີ່ມີຄຸນນະພາບສູງໄດ້ກວ່າ 300 ເຮັກຕາ, ປູກຊາບັນລຸຄູນນະພາບສູງໄດ້ 20 ເຮັກຕາ, ສ້າງຟາມລ້ຽງສັດແບບທັນສະໄໝ ບໍ່ກໍ່ມົນລະພິດເຖິງສິ່ງແວດລ້ອມ. ປະຈຸບັນເມືອງບາວທັ໋ງ ມີ 150 ຮູບແບບລ້ຽງສັດດ້ວຍຂອບຂະໜາດໃຫຍ່, ລ້ຽງງົວຄວາຍໄດ້ 15.600 ໂຕ ແລະ ໝູ 140.000 ໂຕ.
ຍ້ອນມີຄວາມເປີດເຜີຍ, ປະຊາທິປະໄຕໃນການກໍ່ສ້າງຊົນນະບົດໃໝ່, ດັ່ງນັ້ນເມືອງບາວທັ໋ງ ຈຶ່ງເສີມຂະຫຍາຍສະຕິ, ຄວາມຮັບຜິດຊອບຂອງປະຊາຊົນໃນຂະບວນການກໍ່ສ້າງຊົນນະບົດໃໝ່ໄດ້. ນີ້ກໍ່ແມ່ນບົດຮຽນອັນລ້ຳຄ່າທີ່ສາມາດຂະຫຍາຍອອກຢ່າງກວ້າງຂວາງຢູ່ທ້ອງຖີ່ນອື່ນໆ.