(vovworld) - ພາຍຫຼັງ 3 ປີແຫ່ງການຜັນຂະຫຍາຍ, ໂສມໜ້າຂອງບັນດາຕາແສງທີ່ໄດ້ຮັບການເລືອກເຟັ້ນປະຕິບັດທົດລອງການກໍ່ສ້າງຊົນນະບົດໃໝ່ໃນບໍລິເວນນະຄອນໂຮ່ຈີມິນ ໄດ້ມີການປ່ຽນແປງຢ່າງຈະແຈ້ງ. ມີຫຼາຍຮູບແບບຜະລິດຢ່າງມີປະສິດທິຜົນໄດ້ຮັບການຜັນຂະຫຍາຍ, ລາຍຮັບຂອງປະຊາຊົນໄດ້ຮັບການຍົກສູງຂຶ້ນ, ພື້ນຖານໂຄງລ່າງນັບມື້ນັບພັດທະນາ.
ລະບົບຊົນລະປະທານ
(ພາບ: ອິນເຕີແນດ)
ປີ 2010, ນະຄອນໂຮ່ຈີມິນໄດ້ເລືອກເຟັ້ນ 5 ຕາແສງຄື: ເຍີນດຶກ (ຍ່າແບ່); ຊວນເທີ໋ຍເທື້ອງ (ຮອກມົນ); ທ໋າຍມີ້ (ກູຈີ); ເຕີນຍຶດ (ບິ່ງແຈ້ງ) ແລະ ຫຼີເຍີຍ (ເກີ່ນເຢີ່) ເພື່ອປະຕິບັດທົດລອງໂຄງການກໍ່ສ້າງຊົນນະບົດໃໝ່. ນອກນັ້ນຍັງມີຕາແສງເຕີນທົງໂຫ້ຍ (ກູຈີ) ໂດຍຄະນະຊີ້ນຳສູນກາງເລືອກເຟັ້ນປະຕິບັດນັ້ນ, ໝາຍຄວາມວ່າໃນໄລຍະດຽວກັນ, ນະຄອນ ໂຮ່ຈີມິນ ໄດ້ຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ 6 ຕາແສງ.
ຕາແສງຫຼີເຍີນ ຢູ່ເຂດຫ່າງໄກຊອກຫຼີກຂອງນະຄອນໂຮ່ຈີມິນ, ຫ່າງຈາກເມືອງເກິ່ນເຢີ່ 70 ກມ, ແມ່ນຕາແສງທຳອິດທີ່ນະຄອນເລືອກເຟັ້ນປະຕິບັດທົດລອງໂຄງການກໍ່ສ້າງຊົນນະບົດໃໝ່. ເພື່ອປະຕິບັດ 19 ມາດຖານແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່, ຕາແສງໄດ້ຜັນຂະຫຍາຍການກໍ່ສ້າງຊົນນະບົດໃໝ່ຕາມແຕ່ລະໄລຍະ. ທຳອິດແມ່ນລົງທຶນກໍ່ສ້າງພື້ນຖານໂຄງລ່າງ, ຍົກລະດັບບັນດາສາຍທາງຄົມມະນາຄົມ. ເພື່ອເປີດກວ້າງ, ຍົກລະດັບທາງຄົມມະນາຄົມ, 984 ຄອບຄົວໃນຕາແສງຫຼີເຍີນ ໄດ້ສະໝັກໃຈສະຫງວນທີ່ດິນ 250.000 ຕາລາງແມັດ ດ້ວຍມູນຄ່າກວ່າ 20 ຕື້ດົ່ງ. ທັງຕາແສງມີ 7000 ກວ່າຄອບຄົວສະຫງວນທີ່ດິນເພື່ອເປີດທາງທາງຄົມມະນາຄົມ, ກໍ່ສ້າງໂຮງຮຽນ, ສຸກສາລາ... ດ້ວຍເນື້ອທີ່ທັງໝົດ 725.800 ຕາລາງແມັດ, ລວມມູນຄ່າກວ່າ 615 ຕື້ດົ່ງ. ບັນດາກິດຈະກຳນີ້ໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ, ສັງຄົມຂອງທ້ອງຖີ່ນ. ທ່ານ ຫງວຽນວັນເຊີນ, ປະທານເມືອງເກິ່ນເຢີ່, ແບ່ງປັນວ່າ:
“ພວກຂ້າພະເຈົ້າສະເໜີແບ່ງວິວັດແຫ່ງການປະຕິບັດແຜນຮ່າງກໍ່ສ້າງຊົນນະບົດໃໝ່ເປັນ 2 ໄລຍະ. ໄລຍະທີໜຶ່ງແມ່ນປະຕິບັດເຖິງປີ 2015 ດ້ວຍຈຸດໝາຍກໍ່ສ້າງບັນດາຕາແສງໃຫ້ບັນລຸມາດຖານກ່ຽວກັບການກໍ່ສ້າງຊົນນະບົດໃໝ່ ທີ່ເໝາະສົມກັບຄວາມຮຽກຮ້ອງຕ້ອງການພັດທະນາຂອງນະຄອນ. ໄລຍະຕໍ່ໄປແມ່ນຫຼັງປີ 2015 ເຖິງປີ 2020, , ນີ້ແມ່ນໄລຍະປັບປຸງ, ຍົກສູງຄຸນນະພາບການກໍ່ສ້າງຊົນນະບົດໃໝ່, ພັດທະນາເສດຖະກິດຢ່າງຂະຫຍັນຂັນເຄື່ອນ ແລະ ເມືອງເກິ່ນເຢີ່ ພວມກ້າວເຂົ້າສູ່ໄລຍະກາຍເປັນໃຈກາງທ່ອງທ່ຽວຊີວະພາບຂອງທັງປະເທດ ແລະ ສາກົນ“.
ປະຊາຊົນຮ່ວມແຮງຮ່ວມໃຈເພື່ອກໍ່ສ້າງທາງ
(ພາບ: ອິນເຕີແນດ) ມີບາງຕາແສງຢູ່ຊານນະຄອນໂຮ່ຈີມິນ ມີເງື່ອນໄຂສະດວກໃນການປະຕິບັດໂຄງການກໍ່ສ້າງຊົນນະບົດໃໝ່. ຕົວຢ່າງຄືຕາແສງຊວນເທີ໋ຍເທື້ອງ, ເມືອງຮອກມົນ, ກ່ອນທີ່ຜັນຂະຫຍາຍໂຄງການ, ທາງຕາແສງໄດ້ມີລະບົບຊົນລະປະທານດີພໍສົມຄວນ, ມີສະຫະກອນກະສີກຳ - ການບໍລິການທີ່ພວມເຄື່ອນໄຫວ, ມີຕາໜ່າງໄຟຟ້າ, ມີສຸກສາລາບັນລຸມາດຖານ, ມີໄປສະນີວັດທະນະທຳ ແລະ ມີຊາວກະສີກອນພາກສ່ວນໜຶ່ງທຳມາຫາກິນຢ່າງມີປະສິດທິຜົນ, ດັ່ງນັ້ນວິວັດການກໍ່ສ້າງຊົນນະບົດໃໝ່ຈຶ່ງດຳເນີນຢ່າງສະດວກສະບາຍ ແລະ ບັນລຸໄດ້ຜົນງານໃນເບື້ອງຕົ້ນ. ທ່ານ ບູ່ຍງອກກວີ໋, ປະທານຄະນະກຳມະການປະຊາຊົນຕາແສງຊວນເທິ໋ຍເທື້ອງ, ເມືອງຮອກມົນ, ຖືວ່າ:
“ກ່ອນອື່ນໝົດ, ພວກຂ້າພະເຈົ້າຈັດຕັ້ງຊຸດຮຽນວິຊາຊີບໂດຍບໍ່ເສຍເງິນໃນຕາແສງ ເພື່ອດຶງດູດທຸກຄົນເຂົ້າຮ່ວມ. ທີສອງແມ່ນມອບຄາດໝາຍໃຫ້ບັນດາຫົວໜ່ວຍໃນທ້ອງຖີ່ນ ເພື່ອສາມາດສຳພັດໂດຍກົງກັບປະຊາຊົນ, ທີສາມແມ່ນສຸມໃສ່ບຳລຸງສ້າງວິຊາຊີບທີ່ເໝາະສົມກັບຈຸດພິເສດຂອງທ້ອງຖີ່ນ“.
ພາຍຫຼັງ 3 ປີແຫ່ງການປະຕິບັດແຜນຮ່າງກໍ່ສ້າງຊົນນະບົດໃໝ່, 6 ຕາແສງຂອງນະຄອນໂຮ່ຈີມິນສາມາດກໍ່ສ້າງໄດ້ເກືອບ 1000 ກິດຈະກຳ, ໃນນັ້ນມີປະມານ 240 ກິດຈະກຳຄົມມະນາຄົມ, ກວ່າ 100 ກິດຈະກຊົນລະປະທານ, ລົບລ້າງເຮືອນຊົ່ວຄາວໄດ້ 430 ຫຼັງ, ດ້ວຍຍອດຈຳນວນທຶນເກືອບ 2000 ຕື້ດົ່ງ, ໃນນັ້ນ 34% ແມ່ນແຫຼ່ງທຶນໂດຍປະຊາຊົນປະກອບ. ມາຮອດປະຈຸບັນ, ນອກຈາກ 2 ຕາແສງຄື: ເຕິນທົງໂຫ້ຍ ແລະ ທ໋າຍມີ້ ບັນລຸໄດ້ 19/19 ມາດຖານກ່ຽວກັບການກໍ່ສ້າງຊົນນະບົດໃໝ່ແລ້ວ, 4 ຕາແສງທີ່ຍັງເຫຼືອກໍ່ບັນລຸໄດ້ 17/19 ມາດຖານ. ປະຈຸບັນເນື້ອທີ່ປູກເຂົ້າຢູ່ບັນດາຕາແສງກໍ່ສ້າງຊົນນະບົດໃໝ່ຖືກຮັດແຄບໄວ້ ເພື່ອຫັນໄປສູ່ການປູກພືດ, ທີ່ສ້າງກຳໄລສູງກວ່າທົບຫຼາຍເທົ່າ. ບັນດາຮູບແບບປູກດອກໄມ້, ຕົ້ນໄມ້ປະດັບ, ລ້ຽງງົວນົມ, ໝູ່ບ້ານພື້ນເມືອງ ກໍ່ໄດ້ຮັບການຂະຫຍາຍອອກ, ອັນໄດ້ຊ່ວຍໃຫ້ປະຊາຊົນເພີ່ມລາຍຮັບ. ທ່ານ ຫງວຽນເຕິ໋ນຕ໋ວຽນ, ຮອງຫົວໜ້າຄະນະເສດຖະກິດງົບປະມານ, ສະພາປະຊາຊົນນະຄອນໂຮ່ຈີມິນ, ຢືນຢັນວ່າ:
“ແຜນນະໂຍບາຍຄາດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ແມ່ນຖືກຕ້ອງ, ເໝາະສົມກັບຈິດໃຈຂອງປະຊາຊົນ ແລະ ໄດ້ຮັບຄວາມເຫັນດີເຫັນພ້ອມຈາກປະຊາຊົນ. ຜົນສຳເລັດໃນໂຄງການກໍ່ສ້າງຊົນນະບົດໃໝ່ຮຽກຮ້ອງໃຫ້ເສີມຂະຫຍາຍບົດບາດຕິດຕາມກວດກາຂອງປະຊາຄົມ ແລະ ຕ້ອງເອົາໃຈໃສ່ເປັນພິເສດເຖິງວຽກງານບຳລຸງສ້າງພະນັກງານຂັ້ນຮາກຖານ. ຂ້າພະເຈົ້າຖືວ່ານີ້ແມ່ນປັດໃຈທີ່ມີຄວາມໝາຍສຳຄັນໃນການເປີດກວ້າງຮູບແບບກໍ່ສ້າງຊົນນະບົດໃໝ່“
ເນື້ອທີ່ປູກເຂົ້າໃນເມື່ອກ່ອນສ່ວນຫຼາຍໄດ້ຫັນເປັນເນື້ອທີ່ປູກພືດ ແລະ ດອກໄມ້
(ພາບ: ອິນເຕີແນດ)
ພາຍຫຼັງ 3 ປີແຫ່ງການປະຕິບັດ, ແຜນນະໂຍບາຍກໍ່ສ້າງຊົນນະບົດໃໝ່ ໄດ້ປຸກລຸກ ແລະ ເສີມຂະຫຍາຍກຳລັງແຮງຂອງປະຊາຊົນໃນທ້ອງຖີ່ນ. ນີ້ແມ່ນພື້ນຖານທີ່ສຳຄັນ ເພື່ອໃຫ້ນະຄອນໂຮ່ຈີມິນ ສືບຕໍ່ຂະຫຍາຍຮູບແບບຊົນນະບົດໃໝ່ອອກສູ່ 50 ຕາແສງທີ່ຍັງເຫຼືອ ເພື່ອຮອດປີ 2015, 56/56 ຕາແສງຂອງນະຄອນປະຕິບັດສຳເລັດ 19 ມາດຖານກໍ່ສ້າງຊົນນະບົດໃໝ່ ໂດຍພື້ນຖານ.