(ພາບ: baoquangbinh.vn)
(vovworld) – ກ່ອນນີ້ກວ່າ 50 ປີ, ສະຫະກອນດ້າຍຟອງ, ຢູ່ຕາແສງຟອງຖູຍ,ເມືອງເລ້ຖູຍ, ແຂວງກວາງບິ່ງ, ໄດ້ມີຊື່ສຽງໄປທົ່ວພາກເໜືອ ດ້ວຍຜົນງານເປັນຄັນທຸງນຳໜ້າໃນການຫັນເປັນສະຫະກອນຜະລິດກະສີກຳ ແລະ ສະຫະກອນນີ້ເປັນກຽດທີ່ໄດ້ຮັບຈົດໝາຍຍ້ອງຍໍຈາກປະທານ ໂຮ່ຈີມິນ ເຖິງ 2 ຄັ້ງ. ກວ່າ 50 ປີທີ່ຜ່ານມາ, ສະຫະກອນຕາແສງດ້າຍຟອງ ຍັງຄົງແມ່ນແບບຢ່າງ, ແມ່ນຄັນທຸງນຳໜ້າໃນຂະບວນການພັດທະນາການຜະລິດກະສີກຳ, ກໍ່ສ້າງຊົນນະບົດໃໝ່ຂອງແຂວງກວາງບິ່ງ ເວົ້າສະເພາະ ແລະ ທົ່ວປະເທດເວົ້າລວມ.
ວັນທີ 23/11/1959 ໄດ້ກາຍເປັນວັນທີ່ໜ້າຈົດຈຳຂອງຊາວບ້ານດ້າຍຟອງ, ເມື່ອທ້ອນໂຮມສະຫະກອນຂະໜາດນ້ອຍ, ຜະລິດແບບກະແຈກກະຈາຍ 3 ແຫ່ງເຂົ້າເປັນສະຫະກອນໜຶ່ງດຽວ ນັ້ນແມ່ນສະຫະກອນຕາແສງດ້າຍຟອງ ຕາມຮູບແບບສະຫະກອນຜະລິດກະສີກຳທີ່ເປັນແບບຢ່າງແຫ່ງທຳອິດຢູ່ພາກເໜືອ, ເມື່ອປະເທດຖືກແບ່ງອອກເປັນ 2 ພາກ. 50 ກວ່າປີທີ່ຜ່ານມາ, ພໍ່ຕູ້ຟ້າມງອກດິ໋ງ, ອະດີດຫົວໜ້າສະຫະກອນດ້າຍຟອງ, ປະຈຸບັນ, ເຖິງວ່າມີອາຍຸ 86 ປີແລ້ວກໍ່ຕາມ, ແຕ່ພໍ່ຕູ້ຍັງຄົງຈື່ຈຳບັນຍາກາດແຫ່ງການແຂ່ງຂັນອອກແຮງງານຢູ່ບ້ານເກີດຂອງຕົນ. ເວລານັ້ນ, ບັນຍາກາດຢູ່ບ້ານດ້າຍຟອງ ຟົດຟື້ນທີ່ສຸດ, ຊາວດ້າຍຟອງ ນັບທັງຜູ້ເຖົ້າ, ຜູ້ແກ່, ຊາວໜຸ່ມ, ແມ່ຍິງ ຕະຫຼອດຮອດເດັກນ້ອຍ ນັກຮຽນລ້ວນແຕ່ເຂົ້າຮ່ວມການປ້ານຄັນຄູກັນນ້ຳເຄັມ, ດັດສ້າງທົ່ງນາ, ເຮັດຊົນລະປະທານ. ພໍ່ແມ່ປະຊາຊົນສະມາຊິກສະຫະກອນດ້າຍຟອງ ຍັງໄປຖາງປ່າບຸກເບີກທີ່ດິນຢູ່ເຂດເບ໋ນຕ໋ຽນ, ທາງທິດຕາເວັນຕົກເມືອງເລ້ຖູຍ ເຊິ່ງແມ່ນເຂດຫ່າງຈາກຕາແສງດ້າຍຟອງ ນັບສິບກິໂລແມດ ເພື່ອປູກອ້ອຍ, ລ້ຽງງົວ, ຄວາຍ. ພາຍຫຼັງ 2 ປີ ແຫ່ງການບຸກເບີກ, ເນື້ອທີ່ດິນຂອງດ້າຍຟອງ ໄດ້ຮັບການເປີດກວ້າງຈາກ 2 ໄຮ່/ຄົນ ໄດ້ເພີ່ມຂຶ້ນເຖິງ 7 ໄຮ່/ຄົນ; ປະລິມານການຜະລິດທັນຍາຫານສະເລ່ຍກໍ່ເພີ່ມຂຶ້ນຈາກ 650 ກິໂລກຼາມ ເຖິງ 880 ກິໂລກຼາມ/ຄົນ ແລະ ເພີ່ມຂຶ້ນເທື່ອລະກ້າວໃນຊຸມປີຕໍ່ໆໄປ. ພໍ່ຕູ້ ຟ້າມງອກດິ໋ງ, ຫວນຄືນວ່າ:
“ເວລານັ້ນໄດ້ປຸກລະດົມຂະບວນການ ຜູ້ໜຶ່ງເຮັດວຽກເທົ່າກັບ 2 ຄົນ, ເຮັດວຽກກາງເວັນບໍ່ພໍ ກໍ່ພະຍາຍາມເຮັດວຽກຕື່ມອີກໃນຍາມກາງຄືນ. ຊາວໜຸ່ມ, ສະມາຊິກສະຫະກອນ, ແມ່ຍິງ, ຜູ້ເຖົ້າຜູ້ແກ່ ເຖິງວ່າມີບາງຄົນອາຍຸສູງ 70, 80 ປີ ແລ້ວ ແຕ່ຍັງສະໝັກໃຈເຂົ້າຮ່ວມຂະບວນການຢ່າງຫ້າວຫັນ. ພິເສດແມ່ນໃນສົງຄາມຕ້ານອາເມລິກາ, ອ້າຍນ້ອງຊາວໜຸ່ມທັງທຳການຜະລິດ ທັງຕໍ່ສູ້“.
ດ້ວຍຂະບວນການແຂ່ງຂັນນັ້ນ, ແບບຢ່າງສະຫະກອນດ້າຍຟອງ ໄດ້ແຜ່ຂະຫຍາຍໄປທົ່ວໝູ່ບ້ານ, ທົ່ງນາຕ່າງໆຢູ່ພາກເໜືອ. ດ້ວຍນາມປາກກາ ເຈິ່ນເລຶກ, ປະທານໂຮ່ຈີມິນ ໄດ້ຂຽນບົດລົງພິມໃນໜັງສືພິມເຍິນເຢີນ (ປະຊາຊົນ) ສະບັບອອກວັນທີ 15-4-1961, ເພື່ອຍ້ອງຍໍສະຫະກອນດ້າຍຟອງ ວ່າ: “ນັບແຕ່ເວລາທີ່ຫົວໜ້າຄະນະກະສີກອນສູນກາງ ຫງວຽນຈີ໋ແທງ ຍົກອອກບັນດາດ້ານດີ ແລະ ຄວາມກ້າວໜ້າຂອງສະຫະກອນດ້າຍຟອງ, ມາຮອດປະຈຸບັນແມ່ນບໍ່ທັນຮອດ 2 ເດືອນ, ແຕ່ທັງພາກເໜືອໄດ້ມີສະຫະກອນ 1 ພັນ ແຫ່ງ ຈົດທະບຽນແຂ່ງຂັນ ”ຮຳ່ຮຽນຕາມແບບຢ່າງດ້າຍຟອງ, ທັດທຽມກັບດ້າຍຟອງ ແລະ ລື່ນກາຍດ້າຍຟອງ”. ນັ້ນແມ່ນຂະບວນການທີ່ດີ ແລະ ແຂງແຮງທີ່ສຸດ, ມັນພິສູດໃຫ້ເຫັນນ້ຳໃຈຫ້າວຫັນ, ກຳລັງອັນໃຫຍ່ຫຼວງ ແລະ ຄວາມສາມາດທີ່ລົ້ນເຫຼືອຂອງຊາວກະສີກອນຫວຽດນາມ“.
ປີ 1961, ສະຫະກອນດ້າຍຟອງ ເປັນກຽດທີ່ໄດ້ຮັບລົດແກ່ DT.54 ໂດຍປະທານ ໂຮ່ຈີມິນ ມອບໃຫ້. ລົດແກ່ນີ້ໂດຍຄະນະຊາວໜຸ່ມກອມມູນິດໂກໂຊມົນ ຂອງໂຊຫວຽດ ມອບໃຫ້ປະທານ ໂຮ່ຈີມິນ ແລະ ປະທານ ໄດ້ມອບໃຫ້ປະຊາຊົນແຫ່ງນີ້. ພໍ່ຕູ້ ຟ້າມງອກດິ໋ງ, ເລົ່າສູ່ຟັງວ່າ:
“ດ້າຍຟອງ ໄດ້ຮັບຄັນທຸງນຳໜ້າຈາກລັດຖະບານ ແລະ ລົດແກ່ຂອງປະທານໂຮ່ຈີມິນ, ເຂົາເຈົ້າຮູ້ສຶກເປັນກຽດ ແລະ ພາກພູມໃຈຫຼາຍ, ດັ່ງນັ້ນຈຶ່ງພະຍາຍາມແຂ່ງຂັນກັນອອກແຮງງານທຳການຜະລິດຢ່າງສຸດຈິດສຸດໃຈ“.
ໃນຊຸມປີແຫ່ງສົງຄາມ, ພໍ່ແມ່ປະຊາຊົນ ສະມາຊິກສະຫະກອນດ້າຍຟອງ ໄດ້ຕິດພັນກັບທົ່ງນາທັງເວັນ ແລະ ຄືນ, ແຂ່ງຂັນກັນທຳການຜະລິດ. ເມື່ອປະເທດຊາດກ້າວເຂົ້າສູ່ໄລຍະປ່ຽນແປງໃໝ່, ມີສະຫະກອນຫຼາຍແຫ່ງເຄື່ອນໄຫວບໍ່ມີປະສິດທິຜົນຕ້ອງຍຸບເລີກ, ແຕ່ສະຫະກອນດ້າຍຟອງ ຍັງຄົງແມ່ນ “ໂຕນົກນຳໜ້າ“ ກ່ຽວກັບສະມັດຕະພາບການຜະລິດເຂົ້າຢູ່ແຂວງກວາງບິ່ງ, ທັງ ແມ່ນສະຫະກອນບໍລິການກະສີກຳແບບໃໝ່ທີ່ດີເດັ່ນຂອງທົ່ວປະເທດ. ທ່ານຫງວຽນວັນຮ່ວາງ, ຫົວໜ້າສະຫະກອນຕາແສງດ້າຍຟອງ, ເວົ້າວ່າ:
“ຖ້າຫາກວ່າສະຫະກອນກະສີກຳຍັງຄົງຮັກສາກົນໄກຜະລິດກະສີກຳຄືເກົ່າ, ຈະພັດທະນາຍາກທີ່ສຸດ. ສິ່ງສຳຄັນກວ່າໝູ່ແມ່ນຕ້ອງສ້າງແຫຼ່ງທຶນ, ຕ້ອງມີແຜນດຳເນີນທຸລະກິດ, ພິເສດແມ່ນການບໍລິການວັດຖຸອຸປະກອນ, ຝຸ່ນເຄມີ ແລະ ທຸກສິ່ງທຸກຢ່າງທີ່ມີປະໂຫຍດໃຫ້ແກ່ສະມາຊິກສະຫະກອນ“.
ມາຢ້ຽມຢາມດ້າຍຟອງ ໃນທຸກວັນນີ້, ຢູ່ບ່ອນໃດກໍ່ຮັບຟັງພໍ່ແມ່ປະຊາຊົນເວົ້າເຖິງເລື່ອງສະໝັກໃຈສະຫງວນທີ່ດິນໃຫ້ແກ່ການກໍ່ສ້າງບັນດາກິດຈະກຳຊົນນະບົດໃໝ່. ສະຫະກອນດ້າຍຟອງ ກໍ່ໄດ້ຫັກເງິນ 25 ຕື້ດົ່ງຈາກກອງທຶນສະຫວັດດີການສັງຄົມ ເພື່ອກໍ່ສ້າງຄອງເໝືອງ, ກິດຈະກຳຊົນລະປະທານ, ທາງຄົມມະນາຄົມໃນບ້ານດ້ວຍເບຕົງ, ກໍ່ສ້າງຫໍວັດທະນະທຳບ້ານ, ໂຮງຮຽນ ກໍ່ຄືກິດຈະກຳອື່ນໆເພື່ອຮັບໃຊ້ໃຫ້ແກ່ປະຊາຊົນອີກ. ທັງຕາແສງຟອງຖູຍ ໄດ້ມີ 70% ຈຳນວນຄອບຄົວຮັ່ງມີ, ແລະ ມີລະດັບຄອງຊີບພໍສົມຄວນ, ຈຳນວນຄອບຄົວທຸກຍາກເຫຼືອພຽງ 5% ເທົ່ານັ້ນ. ທ່ານ ກາວວັນໂກຍ, ປະທານຄະນະກຳມະການປະຊາຊົນຕາແສງຟອງຖູຍ, ເມືອງເລ້ຖູຍ, ແຂວງກວາງບິ່ງ, ໃຫ້ຮູ້ວ່າ:
“ໃນຕາແສງໜຶ່ງແຕ່ມີເຖິງ 2 ສະຫະກອນເຄື່ອນໄຫວໄດ້ດີໃນໄລຍະຜ່ານມາ, ໄດ້ເຮັດໃຫ້ຟອງຖູຍ ກາຍເປັນຕາແສງທຳອິດຂອງແຂວງ ທີ່ມີ 2 ບ້ານວັດທະນະທຳຂັ້ນແຂວງ“.
ພາຍຫຼັງ 50 ປີ ທີ່ໄດ້ຕ້ອນຮັບຄັນທຸງນຳໜ້າໃນການຜະລິດກະສີກຳ, ປະຈຸບັນ, ດ້າຍຟອງ ຍັງຄົງແມ່ນແບບຢ່າງ, ແມ່ນພະລັງຊີວິດທີ່ເສີມສ້າງຄວາມເອກອ້າງທະນົງໃຈໃຫ້ແກ່ປະຊາຊົນໃນຕາແສງຟອງຖູຍ, ເມືອງເລ້ຖູຍ, ແຂວງກວາງບິ່ງຕື່ມອີກ.