(vovworld) - ພາບພົດເຂດຊົນນະບົດໃໝ່ນັບມື້ນັບໄດ້ຮັບການສະແດງອອກຢ່າງຈະແຈ້ງ, ເມື່ອໂຄງການຈຸດໝາຍແຫ່ງຊາດ ກ່ຽວກັບການການກໍ່ສ້າງຊົນນະບົດໃໝ່ໄດ້ຮັບການຜັນຂະຫຍາຍຢູ່ຕາແສງໃນເຂດພູດອຍ ສິ໋ນແຈ໋ງ (Sín Chéng), ເຊິ່ງແມ່ນຕາແສງໃນເຂດພູດອຍທີ່ປະສົບກັບຄວາມຫຍຸ້ງຍາກຂອງເມືອງ ຊີມາກາຍ, ແຂວງ ລາວກາຍ. ດ້ວຍຄວາມຕັດສິນໃຈ ແລະ ຄວາມມານະພະຍາຍາມຂອງອຳນາດການປົກຄອງ ແລະ ປະຊາຊົນທ້ອງຖີ່ນ, ຕາແສງສິ໋ແຈ໋ງ (Sín Chéng)ໄດ້ກາຍເປັນໜຶ່ງໃນບັນດາຕາແສງແບບຢ່າງໃນການກໍ່ສ້າງຊົນນະບົດໃໝ່ຂອງແຂວງ ລາວກາຍ.
(ພາບປະກອບ: google.com.vn)
ສອງປີກ່ອນນີ້, ເສັ້ນທາງເຂົ້າໝູ່ບ້ານ ມ່າວແຊວຝິ່ນ (Mào Seo Phìn) ເຮັດດ້ວຍດິນ ແລະ ຫີນກະຕຸກກະຕາດ, ລະດູຝົນຕົກ, ຂີ່ລົດຈັກບໍ່ໄດ້ເພາະວ່າເສັ້ນທາງນີ້ທັງໝື່ນ, ທັງເປັນຄ້ອຍຊັນ. ດັ່ງນັ້ນ, ເມື່ອໄປຕະຫຼາດປະຊາຊົນໃນໝູ່ບ້ານຕ້ອງຍ່າງເປັນເວລານັບຊົ່ວໂມງ. ແຕ່ປະຈຸບັນ, ໄດ້ມີເສັ້ນທາງດິນແດງເຂົ້າສູ່ໝູ່ບ້ານທັງໝົດແລ້ວ, ປະຊາຊົນສາມາດຂີ່ລົດຈັກໄປຍັງແຕ່ລະຄອບຄົວໄດ້. ມາຮອດປະຈຸບັນ ໝູ່ບ້ານທັງໝົດ 9 ແຫ່ງຂອງຕາແສງ ສິ໋ແຈ໋ງ (Sín Chéng) ລ້ວນແຕ່ມີເສັ້ນທາງຄົມມະນາຄົມຢ່າງຮຽບຮ້ອຍ. ນາຍບ້ານຢ່າງອາຈ໋າງ (Giàng A Tráng) , ໃຫ້ຮູ້ວ່າ:
”ໃນການກໍ່ສ້າງຊົນນະບົດໃໝ່, ບໍ່ພຽງແຕ່ຄອບຄົວຂ້າພະເຈົ້າເທົ່ານັ້ນ, ຫາກທຸກຄອບຄົວໃນໝູ່ບ້ານລ້ວນແຕ່ປະກອບເຫື່ອແຮງ ແລະ ທີ່ດິນ ເພື່ອກໍ່ສ້າງທາງ. ລັດພຽງແຕ່ໜູນຊ່ວຍແຕ່ 30-40% ເທົ່ານັ້ນ, ສ່ວນຍັງເຫຼືອແມ່ນປະຊາຊົນປະກອບສ່ວນດ້ວຍຄວາມສະໝັກໃຈ. ປະຈຸບັນ, ໄດ້ມີທາງໄປຍັງແຕ່ລະໝູ່ບ້ານແລ້ວ, ເຖິງວ່າມັນນ້ອຍໆ, ລົດໃຫຍ່ເຂົ້າບໍ່ໄດ້ກໍ່ຕາມ, ແຕ່ສາມາດຂີ່ລົດຈັກໄປໄດ້, ດັ່ງນັ້ນການຂົນສົ່ງສິນຄ້າກໍ່ສະດວກສະບາຍທີ່ສຸດ”.
(ພາບປະກອບ: google.com.vn)
ນອກຈາກໄດ້ຮັບຜົນປະໂຫຍດ ໂດຍເສັ້ນທາງໃໝ່ນຳມາໃຫ້ແລ້ວ, ປະຊາຊົນໃນຕາແສງຍັງໄດ້ກູ້ຢືມທຶນເພື່ອລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກອີກ. ພາບພົດຊົນນະບົດຢູ່ ສິ໋ນແຈ໋ງ (Sín Chéng) ນັບມື້ນັບໄດ້ຮັບການປ່ຽນໃໝ່.
ອ້າຍມາອານ໋າວ (Ma A Náo), ຊາວເຜົ່າມົ້ງ ຢູ່ບ້ານຄາ, ຕາແສງສິ໋ນແຈ໋ງ (Sín Chéng), ໃຫ້ຮູ້ວ່າ, ໃນສອງບ້ານມໍ່ໆນີ້, ມີແຕ່ຄອບຄົວອ້າຍມີຈັກສີເຂົ້າ, ດັ່ງນັ້ນຕ້ອງເຮັດວຽກໝົດມື້. ໃນເບື້ອງຕົ້ນມີເງິນ 10 ລ້ານດົ່ງທີ່ກູ້ຢືມຈາກທະນາຄານນະໂຍບາຍສັງຄົມເມືອງ ສີມາກາຍ ເພື່ອຊື້ງົວເທົ່ານັ້ນ, ມາບັດນີ້, ອ້າຍໄດ້ຂະຫຍາຍການຜະລິດດ້ວຍການຂຸດໜອງລ້ຽງປາ, ຊື້ງົວ, ຄວາຍຕື່ມອີກ, ຮັບສີເຂົ້າ ແລະ ເກັບຊື້ຜະລິດຕະພັນກະເສດຂອງປະຊາຊົນໃນບ້ານ. ປະຈຸບັນ, ຄອບຄົວອ້າຍໄດ້ມີເຮືອນຫຼັງໃຫຍ່ ແລະ ສວຍງາມ, ມີຊີວິດອີ່ມໜຳສຳລານ. ທ່ານ ອາມານ໋າວ (Ma A Náo), ແບ່ງປັນວ່າ:
”ໃນການກໍ່ສ້າງຊົນນະບົດໃໝ່, ປະຊາຊົນຕາແສງ ສິ໋ແຈ໋ງ (Sín Chéng)ໄດ້ຮັບຄວາມເອົາໃຈໃສ່ທີ່ສຸດຈາກພັກ ແລະ ລັດ. ສະເພາະຂ້າພະເຈົ້າເອງໄດ້ກູ້ຢືມທຶນຈາກທະນາຄານເພື່ອດຳເນີນທຸລະກິດ. ປະຈຸບັນ, ຄອບຄົວຂ້າພະເຈົ້າໄດ້ຫຼຸດພົ້ນອອກຈາກຄວາມທຸກຍາກແລ້ວ, ມີຂອງກິນຂອງເໄວ້, ດັ່ງນັ້ນຈຶ່ງດີໃຈຫຼາຍ. ໂດຍແມ່ນຊາວເຜົ່າມົ້ງ, ແຕ່ຍາມໃດຄອບຄົວຂ້າພະເຈົ້າກໍ່ນຳໜ້າໃນຂະບວນການຜະລິດດຳເນີນທຸລະກິດ, ປະກອບສ່ວນກໍ່ສ້າງຊົນນະບົດໃໝ່. ປະຈຸບັນ, ໝູ່ບ້ານໄດ້ມີການປ່ຽນແປງ, ມີທາງຄົມມະນາຄົມ, ມີຄອງເໝືອງ ແລະ ນຳ້ສະອາດແລ້ວ, ພໍ່ແມ່ປະຊາຊົນດີໃຈຫຼາຍ”.
(ພາບປະກອບ: google.com.vn)
ຕາມແຜນການແລ້ວ, ຮອດປີ 2015, ຕາແສງສິ໋ແຈ໋ງ (Sín Chéng) ຈະປະຕິບັດສຳເລັດ 19 ມາດຖານ ເພື່ອກາຍເປັນຕາແສງຊົນນະບົດໃໝ່. ປະຈຸບັນ, ຍັງມີມາດຖານຈຳນວນໜຶ່ງບໍ່ທັນປະຕິບັດສຳເລັດເທື່ອຄື: ລະບົບຊົນລະປະທານ, ພື້ນຖານດ້ານວັດຖຸ, ວັດທະນະທຳ, ລະດັບລາຍຮັບສະເລ່ຍໃສ່ຫົວຄົນ… ທ່ານ ຫຼີຊວນແທງ (Lý Xuân Thành), ເລຂາຄະນະພັກ, ທັງເປັນປະທານຄະນະກຳມະການປະຊາຊົນຕາແສງສິ໋ແຈ໋ງ, ຖືວ່າ, ມີຫຼາຍມາດຖານກ່ຽວກັບຊົນນະບົດໃໝ່ຄວນໄດ້ຮັບການປັບປຸງ, ເພີ່ມເຕີມໃຫ້ເໝາະສົມກັບຈຸດພິເສດສະເພາະຂອງແຕ່ລະເຂດ, ແຕ່ລະທ້ອງຖີ່ນ:
”ດ້ວຍບັນດາມາດຖານທີ່ຍັງເຫຼືອ, ຂ້າພະເຈົ້າເຫັນວ່າຍາກທີ່ຈະປະຕິບັດໄດ້, ຍ້ອນບໍ່ເໝາະສົມກັບສະພາບຕົວຈິງຂອງທ້ອງຖີ່ນຢູ່ເຂດຫ່າງໄກສອກຫຼີກ, ທີ່ເຮັດອາຊີບກະສີກຳເປັນຕົ້ນຄືພວກຂ້າພະເຈົ້າ. ທີສອງແມ່ນ, ອັດຕາສ່ວນຜູ້ທຸກຍາກຂອງຕາແສງຍັງຢູ່ໃນລະດັບສູງ, ດັ່ງນັ້ນບັນດາແຫຼ່ງກຳລັງທີ່ປະກອບສ່ວນໃຫ້ແກ່ການກໍ່ສ້າງຊົນນະບົດໃໝ່ຂອງປະຊາຊົນຍັງຈຳກັດຢູ່. ເຖິງຢ່າງໃດກໍ່ຕາມ, ໃນໄລຍະຜ່ານມາ, ທາງຕາແສງໄດ້ປຸກລະດົມຂະບວນການ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່ ເພື່ອລະດົມແຫ່ງກຳລັງໃນທົ່ວລະບົບການເມືອງ, ກໍ່ຄືວິສາຫະກິດຕ່າງໆ. ພິເສດ, ພວກຂ້າພະເຈົ້າກຳນົດວ່າຕ້ອງປ່ຽນໃໝ່ຄວາມຮັບຮູ້ຂອງປະຊາຊົນ, ຖ້າເຮັດໄດ້ຄືແນວນັ້ນ, ການກໍ່ສ້າງຊົນນະບົດໃໝ່ຈຶ່ງປະສົບຜົນສຳເລັດ”.
ຄວາມຈິງແລ້ວ, ວິວັດແຫ່ງການຜັນຂະຫຍາຍການກໍ່ສ້າງຊົນນະບົດໃໝ່ຢູ່ຕາແສງ ສິ໋ແຈ໋ງ (Sín Chéng), ເມືອງ ຊີມາກາຍ, ແຂວງລາວກາຍ ໄດ້ສະແດງໃຫ້ເຫັນວ່າ, ຄຽງຂ້າງຄວາມຕັດສິນໃຈ, ຄວາມມານະພະຍາຍາມຂອງອຳນາດການປົກຄອງທ້ອງຖີ່ນ ແລະ ປະຊາຊົນແລ້ວ, ລັດຄວນເອົາໃຈໃສ່ລົງທຶນຢ່າງທັນການ ແລະ ມີການຄົ້ນຄ້ວາ, ປັບປຸງມາດຖານໃຫ້ເໝາະສົມກັບສະພາບຕົວຈິງຢູ່ເຂດພູດອຍ, ເຂດປະສົບກັບຄວາມຫຍຸ້ງຍາກກວ່າ.