ມົງເຊີນຈະກາຍເປັນຕາແສງຊົນນະບົດໃໝ່ໂດຍໄວ
(ພາບ: yenbai)
(vovworld) - ມາຢ້ຽມຢາມຕາແສງມົງເຊີນ, ເມືອງອຽນບິ່ງ, ແຂວງອຽນບ໋າຍ ໃນຊຸມມື້ນີ້, ສາມາດເຫັນໄດ້ການປ່ຽນແປງຢູ່ແຫ່ງນີ້ຢ່າງຈະແຈ້ງ. ລະບົບສາຍໄຟຟ້າ, ໂຮງຮຽນ, ສຸກສາລາ, ບັນດາກິດຈະກຳຊົນລະປະທານ ພວມໄດ້ຮັບການລົງທຶນຍົກລະດັບ, ກໍ່ສ້າງໃໝ່. ພາຍຫຼັງ 5 ປີແຫ່ງຄວາມມານະພະຍາມປະຕິບັດໂຄງການກໍ່ສ້າງຊົນນະບົດໃໝ່. ຄາດຄະເນວ່າມົງເຊີນ ຈະກາຍເປັນຕາແສງຊົນນະບົດໃໝ່ໃນທ້າຍປີ 2015.
ມົງເຊີນ ແມ່ນຕາແສງກະສິກຳຢູ່ແຄມໜອງ ທາກບ່າ, ມີເນື້ອທີ່ດິນທຳມະຊາດ 4.500 ກວ່າເຮັກຕາ, ໃນນັ້ນເນື້ອທີ່ຖືກນຳ້ຖ້ວມແມ່ນ 2.800 ເຮັກຕາ. ສິ່ງດັ່ງກ່າວໄດ້ສົ່ງຜົນສະທ້ອນບໍ່ແມ່ນໜ້ອຍເຖິງການປະຕິບັດບັນດາມາດຖານກໍ່ສ້າງຊົນນະບົດໃໝ່, ພິເສດແມ່ນໃນການວາງແຜນກຳນົດ, ການພັດທະນາລະບົບຄົມມະນາຄົມ. ແຕ່ພາຍຫຼັງ 5 ປີ, ດ້ວຍຄວາມມານະພະຍາຍາມຂອງທັງລະບົບການເມືອງ, ພ້ອມກັບຄວາມເຫັນດີເຫັນພ້ອມ, ຮ່ວມແຮງຮ່ວມໃຈຂອງປະຊາຊົນ, ບັນດາເສັ້ນທາງລະຫວ່າງຕາແສງ, ບ້ານລ້ວນແຕ່ໄດ້ຮັບການປູຢາງ, ກໍ່ສ້າງດ້ວຍເບຕົງຕາມມາດຖານທີ່ໄດ້ວາງອອກ. ເອື້ອຍ ຫງວຽນທິຖູູຍ, ຢູ່ບ້ານ ຈູງເຊີນ, ແມ່ນໜຶ່ງໃນບັນດາຄອບຄົວທີ່ໄດ້ບໍລິຈາກທີ່ດິນຫຼາຍທີ່ສຸດໃຫ້ແກ່ການກໍ່ສ້າງທາງຄົມມະນາຄົມຊົນນະບົດຢູ່ຕາແສງ ມົງເຊີນ, ໃຫ້ຮູ້ວ່າ: ບໍ່ພຽງແຕ່ຄອບຄົວເອື້ອຍເທົ່ານັ້ນ, ຫາກບັນດາຄອບຄົວໃນຕາແສງເກືອບທັງໝົດ ລ້ວນແຕ່ບໍລິຈາກທີ່ດິນ, ເຫື່ອແຮງດ້ວຍຄວາມສະໝັກໃຈ ເພື່ອກໍ່ສ້າງທາງຄົມມະນາຄົມ.
“ເມື່ອຮູ້ສຶກວ່າ, ໂຄງການກໍ່ສ້າງຊົນນະບົດໃໝ່ເໝາະສົມກັບສະພາບຕົວຈິງ, ຄອບຄົວຂ້າພະເຈົ້າກໍ່ບໍລິຈາກທີ່ດິນ, ເພື່ອກໍ່ສ້າງທາງຄົມມະນາຄົມ ເຮັດໃຫ້ການໄປມາສະດວກສະບາຍກວ່າ“.
ຕອບສະໜອງບັນດາຂະບວນການພັດທະນາເສດຖະກິດໂດຍຕາແສງປຸກລະດົມ, ປະຊາຊົນຕາແສງ ມົງເຊີນ ໄດ້ຕັ້ງໜ້າຫັນປ່ຽນໂຄງປະກອບຜົນລະປູກ, ສັດລ້ຽງ. ມາຮອດປະຈຸບັນ, ໃນຕາແສງມີ 3 ຮາກຖານຜະລິດປຸງແຕ່ງໄມ້ປ່າ, 1 ຮາກຖານຜະລິດປຸງແຕ່ງແປ້ງມັນຕົ້ນ, 2 ຮາກຖານເຮັດການບໍລິການເຮືອກຳ່ປັ່ນ ພ້ອມກັບຫຼາຍຮູບແບບປູກຝັງ, ລ້ຽງສັດຢ່າງມີປະສິດທິຜົນ. ຄອບຄົວອ້າຍ ຫງວຽນວັນແມ້ງ, ຢູ່ບ້ານ ກ້ານ ແມ່ນແບບຢ່າງຄືແນວນັ້ນ. ກ່ອນນີ້, ຄອບຄົວອ້າຍພຽງແຕ່ຫາເງິນລ້ຽງຊີບດ້ວຍການເຮັດນາ ແລະ ຫາປາໃນໜອງ ທາກບ່າເທົ່ານັ້ນ, ຊີວິດຈຶ່ງປະສົບກັບຄວາມຫຍຸ້ງຍາກຫຼາຍ. ເມື່ອຕາແສງຜັນຂະຫຍາຍໂຄງການກໍ່ສ້າງຊົນນະບົດໃໝ່, ອ້າຍກໍ່ມີບົດຮຽນ, ຄວາມຮູ້ຫຼາຍຢ່າງໃນການພັດທະນາເສດຖະກິດຄອບຄົວ. ອ້າຍໄດ້ຫັນອາຊີບຫາປາມາປູກຕົ້ນໄມ້ກິນໝາກທີ່ມີມູນຄ່າເສດຖະກິດສູງກວ່າ. ນອກນັ້ນອ້າຍຍັງລ້ຽງເຜີ້ງ ແລະ ໝູອີກ. ມາຮອດປະຈຸບັນ, ຄອບຄົວອ້າຍສາມາດສ້າງລາຍຮັບໄດ້ 100 ລ້ານກວ່າດົ່ງ/ປີ. ອ້າຍ ຫງວຽນວັນແມ້ງ ແບ່ງປັນວ່າ:
“ກ່ອນນີ້ເມື່ອເຮັດອາຊີບຫາປາຊີວິດການເປັນຢູ່ບໍ່ເປັນປົກກະຕິ, ນັບແຕ່ຫັນມາປູກຕົ້ນໄມ້ກິນໝາກ, ຄອບຄົວຂ້າພະເຈົ້າໄດ້ມີຊີວິດເປັນປົກກະຕິກວ່າ, ການເຮັດວຽກກໍ່ສະບາຍກວ່າກ່ອນນີ້ອີກ“.
ຜ່ານເກືອບ 5 ປີແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ຕາແສງ ມົງເຊີນ ລະດົມເງິນໃຫ້ການກໍ່ສ້າງຊົນນະບົດໃໝ່ໄດ້ກວ່າ 176 ຕຶ້ດົ່ງ, ໃນນັ້ນງົບປະມານຂອງສູນກາງ ແລະ ທ້ອງຖີ່ນກວມກວ່າ 15%, ສ່ວນຍັງເຫຼືອກວ່າ 80% ແມ່ນລະດົມຈາກບັນດາວິສາຫະກິດ ແລະ ປະຊາຊົນຕາມຮູບການປະກອບເງິນສົດ, ແຮງງານ, ວັດສະດຸກໍ່ສ້າງ ແລະ ບໍລິຈາກທີ່ດິນ. ຈາກແຫຼ່ງງົບປະມານນີ້, ປະຊາຊົນໄດ້ກໍ່ສ້າງທາງລະຫວ່າງບ້ານ, ຕາແສງ ດ້ວຍຄວາມຍາວເກືອບ 20 ກມ, ຕາແສງ ມົງເຊີນ ຍັງກໍ່ສ້າງຫໍວັດທະນະທຳບ້ານຕາແສງໄດ້ 8 ແຫ່ງ. ພ້ອມກັນນັ້ນລະບົບກິດຈະກຳຊົນລະປະທານທົ່ວຕາແສງກໍ່ໄດ້ຮັບການກໍ່ສ້າງອີກ. ມາຮອດປະຈຸບັນ, ມົງເຊີນ ໄດ້ປະຕິບັດສຳເລັດ 17/19 ມາດຖານກໍ່ສ້າງຊົນນະບົດໃໝ່. ທ່ານ ຫງວຽນວັນດົງ, ປະທານຄະນະກຳມະການປະຊາຊົນມົງເຊີນ, ໃຫ້ຮູ້ວ່າ:
“ພວກຂ້າພະເຈົ້າຈະສືບຕໍ່ສຸມໃສ່ຊີ້ນຳຂະແໜງຕ່າງໆ, ພິເສດແມ່ນສົມທົບກັບບັນດາໂຮງຮຽນເພື່ອຮັບປະກັນບັນລຸມາດຖານວັດທະນະທຳສຶກສາ. ໃນປີນີ້ພວກຂ້າພະເຈົ້າຈະກໍ່ສ້າງຫໍວັດທະນະທຳບ້ານ, ຕາແສງຕື່ມອີກ 2 ແຫ່ງ“.
ດ້ວຍການຮ່ວມແຮງຮ່ວມໃຈຂອງປະຊາຄົມ, ພ້ອມກັບການເຂົ້າຮ່ວມຂອງອຳນາດການປົກຄອງທ້ອງຖີ່ນທຸກຂັ້ນ, ຄາດຄະເນວ່າ, ທ້າຍປີນີ້, ມົງເຊີນ ຈະປະຕິບັດສຳເລັດ 19 ມາດຖານກໍ່ສ້າງຊົນນະບົດໃໝ່ ແລະ ຈະກາຍເປັນຕາແສງທຳອິດຂອງເມືອງ ອຽນບິ່ງ, ແຂວງ ອຽນບ໋າຍ ສຳເລັດການກໍ່ສ້າງຊົນນະບົດໃໝ່.