(vovworld) - ມາຮອດປະຈຸບັນ, ແຂວງແທງຮ່ວາ ໄດ້ມີ 12 ຕາແສງປະຕິບັດສຳເລັດຈຸດໝາຍກໍ່ສ້າງຊົນນະບົດໃໝ່ ແລະ ໃນປີນີ້ແທງຮ່ວາ ສູ້ຊົນກໍ່ສ້າງຊົນນະບົດໃໝ່ໃຫ້ສຳເລັດຕື່ມອີກ 25 ຕາແສງ. ເພື່ອບັນລຸໄດ້ຜົນງານຄືດັ່ງກ່າວ, ແຂວງແທງຮ່ວາ ໄດ້ລະດົມກຳລັງແຮງ, ຄວາມສາມັກຄີຈາກປະຊາຊົນໃນຂະບວນການທົ່ວປວງຊົນກໍ່ສ້າງຊົນນະບົດໃໝ່.
ກິດຈະກຳຊົນລະປະທານໄດ້ຮັບການກໍ່ສ້າງສຳເລັດໃນຂະບວນການກໍ່ສ້າງຊົນນະບົດໃໝ່ຢູ່ເມືອງຍືແທງ
(ພາບ: ອິນເຕີແນດ)
ອຽນທໍ້ ແມ່ນໜຶ່ງໃນຈຳນວນ 4 ຕາແສງຢູ່ເມືອງຍືແທງ ໃນເຂດພູດອຍ, ແຂວງແທງຮ່ວາ ໄດ້ຮັບເລືອກເປັນຕາແສງປະຕິບັດໂຄງການກໍ່ສ້າງຊົນນະບົດໃໝ່. ຜ່ານ 3 ປີແຫ່ງການຜັນຂະຫຍາຍ, ຕາແສງອຽນທໍ້ ລະດົມເງິນໄດ້ກວ່າ 80 ຕື້ດົ່ງເພື່ອລົງທຶນໃຫ້ໂຄງການ. ໃນນັ້ນລັດໜູນຊ່ວຍເກືອບ 10 ຕື້. ທິດນຳຂອງອຽນທໍ້ ແມ່ນລະດົມແຫຼ່ງກຳລັງໃນໝູ່ປະຊາຊົນເພື່ອຮັບໃຊ້ໃຫ້ແກ່ປະຊາຊົນ; ວຽກໃດງ່າຍເຮັດກ່ອນ, ວຽກໃດຍາກແມ່ນເຮັດຕາມຫຼັງ. ດັ່ງນັ້ນ, ອຽນທໍ້ ໄດ້ລະດົມປະຊາຊົນປະກອບກຳລັງເຫື່ອແຮງເພື່ອກໍ່ສ້າງລະບົບຄົມມະນາຄົມລະຫວ່າງບ້ານ, ຕາແສງໃຫ້ສຳເລັດກ່ອນ, ຫຼັງຈາກນັ້ນແມ່ນດຳເນີນການສ້າງທົ່ງນາຂະໜາດໃຫຍ່ເພື່ອຜະລິດຢ່າງສະດວກສະບາຍ. ມາຮອດປະຈຸບັນ, ເສັ້ນທາງ ລະຫວ່າງບ້ານ, ຕາແສງກວ່າ 50 ກມ, ເສັ້ນທາງໃນເຂດທົ່ງນາ 12 ກມ ແລະ ຄອງເໝືອງ 12 ກມໃນຕາແສງລ້ວນແຕ່ໄດ້ຮັບການກໍ່ສ້າງດ້ວຍເບຕົງ; ບັນດາໂຮງຮຽນ, ສຸກສາລາກໍ່ໄດ້ຮັບການກໍ່ສ້າງ, ບຸລະນະສ້ອມແປງຢ່າງກວ້າງຂວາງ, ສວຍງາມ. ທ່ານ ຫງວຽນງອກຕິ, ປະທານຄະນະກຳມະການປະຊາຊົນຕາແສງອຽນທໍ້, ໃຫ້ຮູ້ວ່າ:
”ປະຈຸບັນ, ອຽນທໍ້ ໄດ້ປະຕິບັດສຳເລັດ 16/19 ມາດຖານກໍ່ສ້າງຊົນນະບົດໃໝ່ແລ້ວ, ສ່ວນ 3 ມາດຖານທີ່ຍັງເຫຼືອທາງຕາແສງຈະສູ້ຊົນກໍ່ສ້າງໃຫ້ສຳເລັດໃນປີນີ້. ອຽນທໍ້ ພວມສະເໜີໃຫ້ລັດໜູນຊ່ວຍທຶນກໍ່ສ້າງສຳນັກງານຕາແສງເພື່ອເປັນບ່ອນໃຫ້ປະຊາຊົນພົວພັນແລກປ່ຽນຢ່າງສະດວກສະບາຍ”.
ໂດຍກຳນົດໄດ້ວ່າກໍ່ສ້າງຊົນນະບົດໃໝ່ເພື່ອປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ຕາແສງອຽນທໍ້ ໄດ້ສຸມໃສ່ເຂົ້າໃນການຫັນປ່ຽນຜົນລະປູກ, ສ້າງບັນດາເຂດປູກສະເພາະຕົ້ນໄມ້ທີ່ໃຫ້ສະມັດຕະພາບ ແລະ ຄຸນຄ່າສູງຄື: ເຂົາແນວປະສົມ, ເຜັດສົ່ງອອກ, ອ້ອຍ ແລະ ເຫັດ. ທ່ານ ເລດິ່ງມາຍ, ເຈົ້າຂອງຮາກຖານປູກເຫັດຢູ່ບ້ານຊວນທໍ້, ຕາແສງອຽນທໍ້ ໃຫ້ຮູ້ວ່າ, ຍ້ອນມີຮູບແບບນີ້, ແຕ່ລະປີຄອບຄົວຂອງທ່ານສ້າງກຳໄລໄດ້ປະມານ 200 ລ້ານດົ່ງ, ສ້າງວຽກເຮັດງານທຳໃຫ້ຜູ້ອອກແຮງງານໃນທ້ອງຖີ່ນແຕ່ 10 – 20 ຄົນ, ໝູນໃຊ້ແຫຼ່ງວັດຖຸຢູ່ກັບທີ່, ປະກອບສ່ວນທຳຄວາມສະອາດສິ່ງແວດລ້ອມ. ປ້າ ໂຮ່ທິຊິງ ຢູ່ບ້ານຊວນທໍ້, ໃຫ້ຮູ້ວ່າ:
”ນັບແຕ່ຫັນປ່ຽນຜົນລະປູກ, ຊີວິດຂອງປະຊາຊົນກໍ່ເປັນປົກກະຕິ. ກ່ອນນີ້ປູກເຂົ້າສະມັດຕະພາບບໍ່ສູງ, ແຕ່ເມື່ອຫັນມາປູກເຜັດກໍ່ບັນລຸໄດ້ສະມັດຕະພາບສູງ, ແຕ່ລະຄອບຄົວສາມາດສ້າງກຳໄລໄດ້ແຕ່ 8 – 9 ລ້ານດົ່ງ/ລະດູ. ພວກຂ້າພະເຈົ້າຢາກມີສົ້ນອອກເປັນປົກກະຕິເພື່ອໃຫ້ປະຊາຊົນອູ່ອ່ຽນໃຈທຳການຜະລິດ”.
ປະຊາຊົນເມືອງຍືແທງປູກເຜັດສົ່ງອອກ
(ພາບ: ອິນເຕີແນດ) ເຖິງວ່າແມ່ນເມືອງທີ່ທຸກຍາກຢູ່ເຂດພູດອຍ ແລະ ບໍ່ທັນມີຕາແສງໃດບັນລຸໄດ້ 19 ມາດຖານກໍ່ຕາມ, ແຕ່ວິທີກໍ່ສ້າງຊົນນະບົດໃໝ່ຂອງເມືອງຍືແທງ ພັດໄດ້ຮັບການຕີລາຄາວ່າເໝາະສົມກັບສະພາບຕົວຈິງ. ທ່ານ ເຈິ່ນວັນຕ໋ວນ, ເລຂາຄະນະພັກເມືອງຍືແທງ, ໃຫ້ຮູ້ວ່າ, ດ້ວຍ 16 ຕາແສງຜັນຂະຫຍາຍການກໍ່ສ້າງຊົນນະບົດໃໝ່, ເມືອງລະດົມເງິນໄດ້ກວ່າ 560 ຕື້ດົ່ງ, ໃນນັ້ນ 70% ແມ່ນແຫຼ່ງກຳລັງໂດຍປະຊາຊົນປະກອບ. ພາຍຫຼັງ 3 ປີແຫ່ງການກໍ່ສ້າງຊົນນະບົດໃໝ່, ປະຈຸບັນແຕ່ລະຕາແສງບັນລຸລະດັບສະເລ່ຍລວມຂອງທົ່ວແຂວງແມ່ນກວ່າ 9 ມາດຖານ, ພິເສດມີ 2 ຕາແສງບັນລຸໄດ້ 16 ມາດຖານ, 1 ຕາແສງບັນລຸໄດ້ 15 ມາດຖານ ແລະ ສາມາດກາຍເປັນຕາແສງຊົນນະບົດໃໝ່ໃນປີ 2015.
”ຢາກກໍ່ສ້າງຊົນນະບົດໃໝ່ໃຫ້ສຳເລັດ ແມ່ນຕ້ອງສ້າງໃຫ້ມີຄວາມຮູ້ຢ່າງຖືກຕ້ອງ ແລະ ມີຄວາມເຫັນດີເຫັນພ້ອມໃນທົ່ວເມືອງ. ຍືແທງ ແມ່ນເມືອງທີ່ທຸກຍາກ, ດັ່ງນັ້ນພວກຂ້າພະເຈົ້າຖືການພັດທະນາການຜະລິດເປັນສຳຄັນທີ່ສຸດເພື່ອຍົກສູງລາຍຮັບໃຫ້ແກ່ປະຊາຊົນ. ພວກຂ້າພະເຈົ້າຖືວ່າ, ນີ້ທັງແມ່ນຈຸດປະສົງ, ທັງແມ່ນພື້ນຖານເພື່ອກໍ່ສ້າງຊົນນະບົດໃໝ່ສຳເລັດຜົນ”.
ໂດຍຖືວຽກງານຍົກສູງລາຍຮັບ, ປັບປຸງຊີວິດຂອງຊາວກະສີກອນໃຫ້ດີຂຶ້ນ ແມ່ນຈຸດໝາຍອັນດັບໜຶ່ງ. ໂຄງການກໍ່ສ້າງຊົນນະບົດໃໝ່ຢູ່ຍືແທງ, ແຂວງແທງຮ່ວາ ໄດ້ຮັບການຜັນຂະຫຍາຍ ບົນພື້ນຖານຄວາມຮຽກຮ້ອງຕ້ອງການຂອງປະຊາຊົນ, ໂດຍປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ ແລະ ປະຊາຊົນຊົມໃຊ້ຜົນງານທີ່ບັນລຸໄດ້. ຜົນງານໃນເບື້ອງຕົ້ນຂອງຍືແທງ ແມ່ນບົດຮຽນອັນລ້ຳຄ່າເພື່ອໃຫ້ບັນດາເມືອງອື່ນໆໃນແທງຮ໋ວາ ແລະ ທ້ອງຖີ່ນຕ່າງໆໃນທົ່ວປະເທດຜັນຂະຫຍາຍໂຄງການກໍ່ສ້າງຊົນນະບົດໃໝ່ບັນລຸປະສິດທິຜົນສູງສຸດ.