(vovworld) – ພາຍຫຼັງ 3 ປີ ແຫ່ງການປະຕິບັດໂຄງການກໍ່ສ້າງຊົນນະບົດໃໝ່, ກະສີກຳ, ຊົນນະບົດຂອງນະຄອນຫຼວງ ຮ່າໂນ້ຍ ໄດ້ມີການຫັນປ່ຽນອັນຕັ້ງໜ້າຫຼາຍຢ່າງ. ບົດຮຽນໃນການກໍ່ສ້າງຊົນນະບົດໃໝ່ຂອງຮ່າໂນ້ຍ ນັ້ນແມ່ນ ເສີມຂະຫຍາຍບົດບາດຂອງປະຊາຊົນ, ລະດົມບັນດາແຫຼ່ງກຳລັງໃນສັງຄົມ. ພິເສດແມ່ນບັນດາແຜນນະໂຍບາຍ, ນະໂຍບາຍໄດ້ຮັບການປຶກສາຫາລືຢ່າງປະຊາທິປະໄຕ.
(ພາບອິນເຕີແນດ)
ພາຍຫຼັງ 3 ປີ ແຫ່ງການປະຕິບັດໂຄງການກໍ່ສ້າງຊົນນະບົດໃໝ່, ມີ 19/19 ຈຳນວນເມືອງ, ເທດສະບານເມືອງໃນນະຄອນຮ່າໂນ້ຍ ໄດ້ວາງແຜນຮ່າງຂັ້ນເມືອງ; 100% ຈຳນວນຕາແສງໄດ້ວາງແຜນຮ່າງ ແລະ ແຜນກຳນົດກ່ຽວກັບການກໍ່ສ້າງຊົນນະບົດໃໝ່ສຳເລັດ. ມີຮອດປະຈຸບັນ, ທົ່ວນະຄອນມີ 161/401 ຈຳນວນຕາແສງບັນລຸໄດ້ 10 – 19 ມາດຖານ, ໃນນັ້ນມີ 12 ຕາແສງບັນລຸໄດ້ 19/19 ຈຳນວນມາດຖານ… ພາຍຫຼັງຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ຮ່າໂນ້ຍ, ມີຫຼາຍຕາແສງໄດ້ຮັບການພັດທະນາເສດຖະກິດ, ຊີວິດ ແລະ ລາຍຮັບຂອງປະຊາຊົນໄດ້ຮັບການຍົກສູງຂຶ້ນ, ຕົວຢ່າງຄື ”ບ້ານເສດຖີເງິນຕື້” ໃນຕາແສງເຟືອງດິ່ງ, ເມືອງດານເຟື້ອງ, ພັດທະນາຍ້ອນການຫັນປ່ຽນຜົນລະປູກຢ່າງມີປະສິດທິຜົນ; ຫຼືຕາແສງຕ່ຽນອຽນ, ເມືອງຮ່ວາຍດຶກ, ພັດທະນາດ້ວຍການປູກຜັກສະອາດ, ຕາແສງໄຕຕື້ວ, ເມືອງຕື່ລຽມ, ພັດທະນາດ້ວຍອາຊີບປູກດອກໄມ້… ກ່ອນນີ້, ຕາແສງເຟືອງດິ່ງ, ເມືອງດານເຟື້ອງ, ພຽງແຕ່ປູກສາລີ ແລະ ພືດສຳຮອງ, ດັ່ງນັ້ນປະສິດທິຜົນທາງດ້ານເສດຖະກິດຕຳ່, ຫຼາຍຄົນຕ້ອງປະວຽກໄຮ່ການນາຍ້າຍໄປເຮັດວຽກອື່ນ. ປະຈຸບັນ, ປະຊາຊົນໄດ້ຕິດພັນກັບວຽກໄຮ່ການນາ ຍ້ອນເນື້ອທີ່ດິນ 60 ເຮັກຕາແຄມແມ່ນຳ້ໄດ໋ ໄດ້ຮັບການວາງແຜນກຳນົດ ດ້ວຍທາງເບຕົງໃນເຂດຊົນນະບົດ ອັນໄດ້ສ້າງເງື່ອນໄຂໃຫ້ປະຊາຊົນໄປມາຢ່າງສະດວກສະບາຍ. ຍ້ອນການຫັນປ່ຽນຜົນລະປູກ, ລາຍຮັບຂອງຫຼາຍຄອບຄົວບັນລຸນັບຮ້ອຍລ້ານດົ່ງ/ປີ. ທ່ານ ຫງວຽນວັນວຽນ, ຊາວບ້ານລາແທກ, ຕາແສງເຟືອງດິ່ງ, ເມືອງດານເຟື້ອງ, ໃຫ້ຮູ້ວ່າ:
”ພວກຂ້າພະເຈົ້າໄດ້ຫັນປ່ຽນຜົນລະປູກ. ໃນເນື້ອທີ່ດິນກວ່າ 60 ເຮັກຕາ ແມ່ນປູກຕົ້ນໄມ້ກິນໝາກ ແລະ ຜັກ. ປີນີ້ພວກຂ້າພະເຈົ້າດີໃຈຫຼາຍ ເພາະວ່າການເກັບກ່ຽວໄດ້ຮັບຜົນດີ, ແລະ ຜັກກໍ່ຂາຍໄດ້ລາຄາສູງ. ດັ່ງນັ້ນ, ພວກຂ້າພະເຈົ້າຈຶ່ງຢາກສືບຕໍ່ຂະຫຍາຍເຂດປູກຜັກສະອາດຕື່ມອີກ. ກ່ຽວກັບການລ້ຽງສັດ, ພວກຂ້າພະເຈົ້າມີງົວນົມ 160 ໂຕ. ບັນດາຄອບຄົວລ້ຽງງົວນົມລ້ວນແຕ່ມີຂອງກິນຂອງເພື່ອ”.
ປະຊາຊົນລາແທກ, ຕາແສງເຟືອງດິ່ງ, ເມືອງດານເຟື້ອງ
ປູກຜັກສະອາດໄດ້ຮັບຜົນດີ
(ພາບອິນເຕີແນດ)
ໂດຍປະຕິບັດການທ້ອນໂຮມເນື້ອທີ່ດິນນາ, ຫັນປ່ຽນຜົນລະປູກໃນການກໍ່ສ້າງຊົນນະບົດໃໝ່, ບ້ານບັກເທື້ອງ, ຕາແສງກວາງຕ໋ຽນ, ເມືອງຊອກເຊີນ ໄດ້ວາງແຜນກຳນົດເນື້ອທີ່ດິນນາ 54 ເຮັກຕາ ເພື່ອແບ່ງໃຫ້ຊາວກະສີກອນປູກຝັງ. ທ່ານ ຫງວຽນງອກດົ່ງ, ຮອງຫົວໜ້າຄະນະທ້ອນໂຮມເນື້ອທີ່ດິນນາ, ຫັນປ່ຽນຜົນລະປູກ ບ້ານບັກເທື້ອງ, ຕາແສງກວາງຕ໋ຽນ ແບ່ງປັນວ່າ, ເພື່ອປະຕິບັດວຽກງານນີ້ ສິ່ງສຳຄັນກວ່າໝູ່ແມ່ນຕ້ອງປ່ຽນໃໝ່ຄວາມຮັບຮູ້ຂອງປະຊາຊົນ, ພ້ອມກັນປຶກສາຫາລືຢ່າງປະຊາທິປະໄຕ ແລະ ມີທິດຫັນປ່ຽນຜົນລະປູກຢ່າງມີປະສິດທິຜົນໃຫ້ແກ່ຊາວກະສີກອນ.
“ກ່ອນອື່ນໝົດ, ທາງບ້ານໄດ້ຖືວຽກງານໂຄສະນາເປັນຂອດບຸກທະລຸ, ການວາງແຜນກຳນົດເປັນເປັນຕົ້ນຕໍ່, ບົນພື້ນຖານປະຊາຊົນຮູ້, ປະຊາຊົນປຶກສາຫາລື, ປະຊາຊນໄດ້ຮັບສິດຜົນປະໂຫຍດ. ເພື່ອໃຫ້ປະຊາຊົນມີຄວາມໄວ້ເນື້ອເຊື່ອໃຈຕໍ່ວຽກງານທ້ອນໂຮມເນື້ອທີ່ດິນນາ, ຫັນປ່ຽນຜົນລະປູກ, ກ່ອນທີ່ດຳເນີນກອງປະຊຸມກັບປະຊາຊົນ, ທາງຕາແສງໄດ້ຍົກເລີກບັນດາກິດຈະກຳທີ່ບຽດຢືດທີ່ດິນ ແລະ ລະເມີດຄວາມເປັນລະບຽບຮຽບຮ້ອຍໃນການກໍ່ສ້າງ...ຍ້ອນເຫດນັ້ນ, ໃນກອງປະຊຸມທຳອິດ, ປະຊາຊົນທຸກຄົນໃນຕາແສງໄດ້ລົງມະຕິເຫັນດີຕໍ່ວຽກງານດັ່ງກ່າວ”.
ຊາວກະສີກອນທ້ອນໂຮມເນື້ອທີ່ດິນນາ, ຫັນປ່ຽນຜົນລະປູກ
(ພາບອິນເຕີແນດ)
ເຖິງຢ່າງໃດກໍ່ຕາມ, ເລື່ອງຜັນຂະຫຍາຍການກໍ່ສ້າງຊົນນະບົດໃໝ່ຢູ່ຮ່າໂນ້ຍ ຍັງປະສົບກັບຄວາມຫຍຸ້ງຍາກ. ການລົງທຶນໃຫ້ຂົງເຂດກະສີກຳບໍ່ທັນເໝາະສົມ; ຂາດບັນດາມາດຕະການແກ້ໄຂສະພາບມົນລະພິດສິ່ງແວດລ້ອມຢູ່ເຂດຊົນນະບົດ; ເລື່ອງພັດທະນາຕະຫຼາດຈຳໜ່າຍຜະລິດຕະພັນກະເສດ ບໍ່ທັນໄດ້ຮັບການເອົາໃຈໃສ່ເທົ່າທີ່ຄວນ. ໃນ 2 ກວ່າປີທີ່ຜ່ານມາ, ຮ່າໂນ້ຍ ໄດ້ລະດົມເງິນກວ່າ 8.500 ຕື້ດົ່ງໃຫ້ແກ່ການກໍ່ສ້າງຊົນນະບົດໃໝ່, ໃນນັ້ນວິສາຫະກິດ ແລະ ປະຊາຊົນປະກອບເກືອບ 1000 ຕື້ດົ່ງ. ທ່ານຮອງເລຂາປະຈຳຄະນະພັກນະຄອນຮ່າໂນ້ຍ ຫງວຽນກົງຊ໋ວາຍ, ຫົວໜ້າຄະນະຊີ້ນຳໂຄງການກໍ່ສ້າງຊົນນະບົດໃໝ່ນະຄອນຮ່າໂນ້ຍ, ໃຫ້ຮູ້ວ່າ:
“ໃນໄລຍະຈະມາເຖິງ, ທາງນະຄອນສືບຕໍ່ເລືອກເຟັ້ນບັນດາວຽກງານຈຸດສຸມ, ຕົ້ນຕໍ່ເພື່ອປະຕິບັດ. ສຳລັບບັນດາຕາແສງບັນລຸໄດ້ 14/18 ມາດຖານ ແມ່ນຕ້ອງສູ້ຊົນປະຕິບັດໃຫ້ສຳເລັດໃນປີ 2013 – 2014. ສຳລັບຕາແສງໄດ້ປະຕິບັດສຳເລັດບັນດາມາດຖານກ່ຽວກັບການກໍ່ສ້າງຊົນນະບົດໃໝ່ແລ້ວ ແມ່ນຕ້ອງຮັກສາ ແລະ ເສີມຂະຫຍາຍ. ທາງນະຄອນໄດ້ຊີ້ນຳໃຫ້ທ້ອງຖີ່ນຕ່າງໆສືບຕໍ່ຫັນປ່ຽນຜົນລະປູກ, ສັດລ້ຽງ, ນຳໃຊ້ຄວາມກ້າວໜ້າດ້ານວິທະຍາສາດ, ສ້າງແບບແຜນການດຳລົງຊີວິດສີວິໄລໃນເຂດຊົນນະບົດ. ສຸມໃສ່ວຽກງານໂຄສະນາ ເພື່ອປ່ຽນແປງຄວາມຮັບຮູ້ໃຫ້ພະນັກງານສະມາຊິກພັກ ໃນການກໍ່ສ້າງຊົນນະບົດໃໝ່”.
ທາງນະຄອນຮ່າໂນ້ຍ ວາງຄາດໝາຍເຖິງປີ 2015, ມີປະມານ 160 ຕາແສງຕື່ມອີກບັນລຸ 19 ມາດຖານ; ລາຍຮັບສະເລ່ຍຂອງຊາວກະສີກອນບັນລຸ 25 ລ້ານດົ່ງ/ປີ; ຫຼຸດຜ່ອນອັດຕາຄອບຄົວທີ່ທຸກຍາກລົງແຕ່ 1,5-1,8%/ປີ. ເພື່ອບັນລຸຄາດໝາຍດັ່ງກ່າວໃຫ້ໄດ້, ບັນດາຂັ້ນ, ຂະແໜງການຂອງນະຄອນພວມຍູ້ແຮງການປະຕິບັດມາດຕະການຕ່າງໆຢ່າງຄົບຊຸດ, ໃນນັ້ນເອົາໃຈໃສ່ເປັນພິເສດເຖິງວຽກງານໂຄສະນາ, ສ້າງຄວາມເຫັນດີເຫັນພ້ອມໃນໝູ່ປະຊາຊົນ ເພື່ອໃຫ້ໂຄງການພັດທະນາຊົນນະບົດໃໝ່ຂອງນະຄອນພັດທະນາຢ່າງໝັ້ນຄົງ.
Vinh Phong