ຕາແສງເຂດ 3 ບ້ານຢາງ, ເມືອງ ຕາມເດື່ອງ, ແຂວງລາຍເຈົາ ລວມມີ 9 ບ້ານ, 5 ຊົນເຜົ່າ, ດ້ວຍຈຳນວນພົນລະເມືອງກວ່າ 3.500 ຄົນ, ຕົ້ນຕໍ່ແມ່ນເຜົ່າ ໄຢ໋ ແລະ ມົງ. ເຖິງວ່າແມ່ນເຂດພູດອຍທີ່ຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ ແຕ່ນີ້ພັດແມ່ນຕາແສງທີ່ປະຕິບັດສຳເລັດໂຄງການແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ຂອງແຂວງລາຍເຈົາ ໃນປີ 2015. ເພື່ອປະຕິບັດໃຫ້ສຳເລັດຈຸດໝາຍທີ່ໄດ້ວາງອອກຖືກຕາມການກຳນົດ, ນັບແຕ່ປີ 2011 ມາຮອດປະຈຸບັນ, ບ້ານຢາງ ໄດ້ປຸກລະດົມທຸກແຫຼ່ງກຳລັງລົງທຶນ, ດ້ວຍຍອດຈຳນວນທຶນກວ່າ 39 ຕື້ດົງ ເພື່ອກໍ່ສ້າງພື້ນຖານໂຄງລ່າງ, ໃນນັ້ນປະຊາຊົນໄດ້ສະຫງວນທີ່ດິນເກືອບ 3 ເຮັກຕາ, ສະໜັບສະໜູນເງິນກວ່າ 500 ລ້ານດົງ ແລະ ປະກອບສ່ວນແຮງງານນັບພັນມື້ ເພື່ອກໍ່ສ້າງບັນດາກິດຈະກຳສາທາລະນະ. ລະດູບານໃໝ່ໄດ້ວຽນມາ, ປະຊາຊົນ ບ້ານຢາງ ຍິ່ງມີຄວາມເບີກບານມ່ວນຊື່ນກວ່າ ຍ້ອນວ່າບັນລຸບັນດາໝາກຜົນທີ່ຕົນເອງໄດ້ມານະພະຍາຍາມສູ້ຊົນ ແລະ ໄດ້ຮັບການຮັບຮອງວ່າ ເປັນບ້ານທີ່ບັນລຸມາດຖານກໍ່ສ້າງຊົນນະບົດໃໝ່ໃນໄລຍະຜ່ານມາ. ທ່ານ ຫງວຽນບ໋າກ້ຽນ, ປະທານຄະນະກຳມະການປະຊາຊົນຕາແສງ ບ້ານຢາງ, ເມືອງ ຕາມເດື່ອງ, ໃຫ້ຮູ້ວ່າ.
“ໃນໄລຍະຈະມາເຖິງ, ພວກຂ້າພະເຈົ້າຈະນຳໃຊ້ແຫຼ່ງທຶນຂອງທ້ອງຖິ່ນ ແລະ ປຸກລະດົມບັນດາແຫຼ່ງທຶນຈາກທະນາຄານນະໂຍບາຍ, ທະນາຄານກະສິກຳ ເພື່ອຊ່ວຍໃຫ້ພໍ່ແມ່ປະຊາຊົນພັດທະນາການລ້ຽງສັດ, ພັດທະນາການຜະລິດ. ພວກຂ້າພະເຈົ້າຄິດວ່າ, ດ້ວຍຜົນງານທີ່ບັນລຸໄດ້ນັບແຕ່ປີ 2015, ໃນປີ 2016 ພວກຂ້າພະເຈົ້າຈະມານະພະຍາຍາມສຸມໃສ່ຍົກອັດຕາຄອບຄົວທີ່ທຸກຍາກໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ”.
ເມືອງ ຕາມເດື່ອງ ກໍແມ່ນທ້ອງຖິ່ນນຳໜ້າຂອງແຂວງ ລາຍເຈົາ ໃນການປະຕິບັດໂຄງການກໍ່ສ້າງຊົນນະບົດໃໝ່, ມີ 4/13 ຕາແສງບັນລຸມາດຖານຊົນນະບົດໃໝ່. ເລື່ອງການນຳໃຊ້ບັນດາແຫຼ່ງກຳລັງເຂົ້າໃນການກໍ່ສ້າງບັນດາກິດຈະກຳສາທາລະນະແມ່ນໄດ້ຮັບການປຶກສາຈາກປະຊາຊົນຢ່າງມີປະຊາທິປະໄຕ, ວິວັດການຜັນຂະຫຍາຍໄດ້ຮັບການເປີດເຜີຍ, ກະຈາງແຈ້ງ ແລະ ມີການຕິດຕາມກວດກາຂອງທັງປະຊາຄົມ. ນອກຈາກການກໍ່ສ້າງພື້ນຖານໂຄງລາງແລ້ວ, ປະຊາຊົນບັນດາເຜົ່າໃນບໍລິເວນແຂວງຍັງສຸມໃສ່ໃຫ້ແກ່ວຽກງານລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກຢ່າງມີປະສິດທິຜົນ ແລະ ຫຼັກຖານທີ່ຊີ້ິໃຫ້ເຫັນແມ່ນອັດຕາຄອບຄົວທີ່ທຸກຍາກໄດ້ຫຼຸດຈາກ 51,78% ໃນປີ 2010 ລົງເຫຼືອພຽງ 14,7% ໃນປີ 2015. ທ່ານບຸຍກວາງວິງ, ຮອງປະທານຄະນະກຳມະການປະຊາຊົນເມືອງ ຕາມເດື່ອງ ໃຫ້ຮູ້ວ່າ.
“ພວກຂ້າພະເຈົ້າຈະສືບຕໍ່ຂົນຂວາຍປະຊາຊົນ ເພື່ອໃຫ້ປະຊາຊົນມີຄວາມຕັ້ງໜ້າເຂົ້າຮ່ວມ ແລະ ເສີມຂະຫຍາຍບົດບາດເປັນເຈົ້າຕົນເອງ, ເພື່ອໃຫ້ໂຄງການກໍ່ສ້າງຊົນນະບົດໃໝ່ເຂົ້າສູ່ຊີວິດຕົວຈິງຢ່າງແທ້ຈິງ. ເອົາໃຈໃສ່ພັດທະນາການຜະລິດສິນຄ້າລວມສູນ, ຕິດພັນກັບການຮ່ວມສຳພັນຕະຫຼຼາດ, ຍູ້ແຮງການນຳໃຊ້ວິທະຍາສາດທີ່ກ້າວໜ້າເຂົ້າໃນການຜະລິດ, ເພື່ອຍົກສູງສະມັດຕະພາບຕາມທິດໃນການຜະລິດສິນຄ້າແບບຍືນຍົງ. ຜັນຂະຫຍາຍປະສິດທິຜົນບັນດາໂຄງການ, ນະໂຍບາຍໜູນຊ່ວຍໃຫ້ຄອບຄົວທີ່ທຸກຍາກ, ສຸມໃສ່ໜູນຊ່ວຍ, ລົງທຶນໃຫ້ບັນດາຕາແສງທີ່ມີອັດຕາສ່ວນຄອບຄົວທຸກຍາກສູງຢ່າງມີປະສິດທິຜົນ. ຄຽງຂ້າງນັ້ນ, ຕ້ອງເພີ່ມທະວີວຽກງານຕິດຕາມກວດກາ, ຄຸ້ມຄອງບັນດາແຫຼ່ງທຶນໜູນຊ່ວຍ, ຮັບປະກັນໃຫ້ແຫຼ່ງທຶນສາມາດເສີມຂະຫຍາຍໄດ້ຕາມຄາດໝາຍທີ່ໄດ້ວາງໄວ້, ນຳມາເຊິ່ງປະສິດທິຜົນຢ່າງແທດຈິງ”.
ພາຍຫຼັງ 5 ປີແຫ່ງການຜັນຂະຫຍາຍການປະຕິບັດໂຄງການກໍ່ສ້າງຊົນນະບົດໃໝ່, ມາຮອດປະຈຸບັນແຂວງ ລາຍເຈົາ ໄດ້ມີ 15 ຕາແສງບັນລຸມາດຖານຊົນນະບົດໃໝ່. ເພື່ອບັນລຸໄດ້ໝາກຜົນດັ່ງກ່າວນັ້ນ, ແຂວງລາຍເຈົ້າ ໄດ້ຂຸດຄົ້ນບັນດາທ່າແຮງກ່ຽວກັບທີ່ຕັ້ງພູມສາດ, ທີ່ດິນ, ພື້ນຖານໂຄງລ່າງ ແລະ ມູນເຊື້ອການຜະລິດຂອງທ້ອງຖິ່ນຢູ່ລຽບຕາມທາງຫຼວງແຫ່ງຊາດເລກທີ 32, 4D ຢ່າງສຸດຂີດ. ນອກຈາກນັ້ນ, ລາຍເຈົາ ຍັງໄດ້ຂຸດຄົ້ນທ່າແຮງຂອງບັນດາຕາແສງທີ່ຕັ້ງຖິ່ນຖານຄົງທີ່ຄືນໃໝ່ຈາກບັນດາກິດຈະກຳເຄື່ອນໄຟຟ້ານ້ຳຕົກໃຫຍ່ຄື: ຮ້ວຍກວາງ, ບ້ານຈ໋າດ, ເຊີນລາ ແລະ ລາຍເຈົາ, ກໍຄືແຫຼ່ງລາຍຈ່າຍການບໍລິການກ່ຽວກັບສະພາບແວດລ້ອມຂອງປ່າໄມ້ ເພື່ອໃຫ້ປະຊາຊົນລົງທຶນຄືນໃໝ່, ຍົກສູງລາຍຮັບໃຫ້ເຂົາເຈົ້າ.
ທ່ານຮ່າວັນອູມ, ຫົວໜ້າພະແນກກະສິກຳ ແລະ ພັດທະນາຊົນນະບົດ, ຮອງປະທານຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ແຂວງ ລາຍເຈົາ ໃຫ້ຮູ້ວ່າ: ນັບແຕ່ນີ້ຮອດປີ 2020, ແຂວງລາຍເຈົາ ສູ້ຊົນໃນແຕ່ລະປີຈະໃຫ້ມີ 6 ຕາແສງບັນລຸມາດຖານຊົນນະບົດໃໝ່ຕື່ມອີກ.
“ໃນໄລຍະຈະມາເຖິງ, ທຸກໆແຫຼ່ງກຳລັງຂອງແຂວງ ພວກຂ້າພະເຈົ້າຈະໃຫ້ບຸລິມະສິດແກ່ 15 ຕາແສງບັນລຸມາດຖານໄດ້ແລ້ວ ເພື່ອສ້າງບັນດາມາດຖານໃຫ້ສົມບູບແບບ. ທີ່ 2 ແມ່ນໃຫ້ບຸລິມະສິດແກ່ 6 ຕາແສງປະຕິບັດໃນປີ 2016 ນີ້, ພິເສດແມ່ນມາດຖານຄົມມະນາຄົມຊົນນະບົດ, ຄົມມະນາຄົມເຂດທົ່ງນາ, ສະພາບແວດລ້ອມ ແລະ ມາດຖານເຮືອນຢູ່ໃນເຂດຊຸມຊົນ. ນອກນັ້ນ, ມາດຖານເພື່ອຍົກສູງລາຍຮັບ, ທາງແຂວງຈະສືບຕໍ່ຍູ້ແຮງການປະຕິບັດການສ້າງໂຄງປະກອບຂະແໜງກະສິກຳຄືນໃໝ່; ໃນນັ້ນ, ກຳນົດບັນດາແນວປູກ, ສັດລ້ຽງຕົ້ນຕໍຂອງແຕ່ລະຕາແສງ, ພ້ອມທັງເພີ່ມທະວີການກໍ່ສ້າງວິຊາຊີບໃຫ້ຄົນງານຊົນນະບົດ ເພື່ອຍົກສູງຊີວິດການເປັນຢູ່ຂອງປະຊາຊົນ”.
ດ້ວຍວິທີປະຕິບັດຢ່າງມີຫົວຄິດປະດິດສ້າງ, ມີປະສິດທິຜົນ ແລະ ເໝາະສົມກັບເງື່ອນໄຂຕົວຈິງຢູ່ທ້ອງຖິ່ນແລ້ວ, ແຂວງເຂດຊາຍແດນລາຍເຈົາ ຍັງໄດ້ ແລະ ພວມໄປຖືກທິດໃນການປະຕິບັດໂຄງການກໍ່ສ້າງຊົນນະບົດໃໝ່. ບາດກ້າວບຸກທະລຸນີ້ ໄດ້ນຳມາເຊິ່ງປະສິດທິຜົນໃຫ້ອຳນາດການປົກຄອງທ້ອງຖິ່ນທຸກຂັ້ນໃນກິດຈະການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກແບບຍືນຍົງ.