(vovworld) – ຕາແສງເຊີນເຢືອງ, ເມືອງເລິມທາວ, ແມ່ນໜຶ່ງໃນ 3 ຕາແສງທີ່ແຂວງຟູ໋ທໍ້ ເລືອກເຟັ້ນເພື່ອກໍ່ສ້າງທົດລອງຮູບແບບຊົນນະບົດໃໝ່. ພາຍຫຼັງກວ່າ 2 ປີ ແຫ່ງການຜັນຂະຫຍາຍ, ມາຮອດປະຈຸບັນ, ຕາແສງໄດ້ປະຕິບັດສຳເລັດ 18/19 ມາດຖານ. ເພື່ອບັນລຸໄດ້ໝາກຜົນດັ່ງກ່າວ, ກ່ອນອື່ນໝົດແມ່ນຕ້ອງເສີມຂະຫຍາຍກຳລັງແຮງ ແລະ ສ້າງຄວາມເຫັນດີເຫັນພ້ອມໃນໝູ່ປະຊາຊົນໃຫ້ໄດ້.
(ພາບປະກອບ: ອິນເຕີແນດ)
ພວກຂ້າພະເຈົ້າໄປຕາແສງເຊີນເຢືອງ ບົນເສັ້ນທາງເບຕົງທີ່ຮາບພຽງ ແລະ ສະອາດສວຍງາມ. ເສັ້ນທາງລະຫວ່າງບ້ານລວມຄວາມຍາວ 7 ກມ ແມ່ນໄດ້ຮັບການກໍ່ສ້າງດ້ວຍເບຕົງ, ທາງເບຕົງໃນຮ່ອມບ້ານກວມ 80%, ໃນເຂດທົ່ງນາກວມ 65%. ລະບົບຄອງເໝືອງຢູ່ເຂດທົ່ງນາກໍ່ໄດ້ຮັບການກໍ່ສ້າງແບບຖາວອນ, ຮັບປະກັນສະໜອງນ້ຳໃຫ້ແກ່ການຜະລິດກະສີກຳຢ່າງພຽງພໍ. ທ່ານ ມາຍວຽດແທງ, ປະຊາຊົນໃນເຂດ 8, ຕາແສງເຊີນເຢືອງ, ໄດ້ເວົ້າດ້ວຍຄວາມພາກພູມໃຈວ່າ:
“ປະຕິບັດການກໍ່ສ້າງຊົນນະບົດໃໝ່ ແມ່ນຖືກກັບແຜນນະໂຍບາຍ, ນະໂຍບາຍຂອງພັກ ແລະ ລັດ ກໍ່ຄືຖືກກັບຈິດໃຈຂອງປະຊາຊົນ. ພວກຂ້າພະເຈົ້າເຫັນວ່າ, ຕາແສງມີອັນໃໝ່ຫຼາຍຢ່າງ, ວັດທະນະທຳທີ່ເປັນມູນເຊື້ອໄດ້ຮັບການຟື້ນຟູ ແລະ ຮັກສາໄວ້. ຄອງເໝືອງກໍ່ໄດ້ຮັບການກໍ່ສ້າງແບບຖາວອນ. ກ່ອນນີ້ແມ່ນຫຍຸ້ງຍາກຫຼາຍ, ພິເສດແມ່ນໃນຍາມຝົນຕົກ. ໂດຍໄດ້ຮັບຄວາມເອົາໃຈໃສ່ຈາກພັກ ແລະ ລັດໃນການກໍ່ສ້າງຊົນນະບົດໃໝ່, ປະຊາຊົນດີໃຈຫຼາຍ ແລະ ສະໜັບສະໜູນຢ່າງສຸດຈິດສຸດໃຈ”.
(ພາບປະກອບ: ອິນເຕີແນດ)
ຈຸດພົ້ນເດັ່ນຂອງໂຄງການກໍ່ສ້າງຊົນນະບົດໃໝ່ຢູ່ທີ່ນີ້ແມ່ນ ພໍ່ແມ່ນປະຊາຊົນໄດ້ເປັນເຈົ້າການສະໜອງທີ່ດິນຂອງຕົນເພື່ອກໍ່ສ້າງທາງລະຫວ່າງບ້ານ, ຮ່ອມບ້ານ, ລະບົບຄອງເໝືອງໃນບໍລິເວນຕາແສງ. ໃນການຜັນຂະຫຍາຍການກໍ່ສ້າງຄອງເໝືອງຢູ່ເຂດທົ່ງນາຜ່ານມາ, ອຳນາດການປົກຄອງຕາແສງຂົນຂວາຍປະຊາຊົນສະໜອງທີ່ດິນໄດ້ເກືອບ 10.000 ຕາລາງແມດ. ປ້າ ຫງວຽນທິແຊນ, ຜູ້ທີ່ໄດ້ສະຫງວນທີ່ດິນໃຫ້ແກ່ການກໍ່ສ້າງທາງໃນຕາແສງເຊີນເຢືອງ, ເວົ້າວ່າ:
“ຄອບຄົວຂ້າພະເຈົ້າສະໝັກໃຈສະໜອງທີ່ດິນ 240 ຕາລາງແມດ. ຂ້າພະເຈົ້າກໍ່ໄດ້ລະດົມອ້າຍເອື້ອຍນ້ອງພ້ອມກັນສະໜອງທີ່ດິນ ຮັບໃຊ້ໃຫ້ແກ່ການກໍ່ສ້າງທາງລະຫວ່າງບ້ານໃຫ້ສວຍງາມ ເພື່ອໄປມາສະດວກສະບາຍກວ່າ”.
(ພາບປະກອບ: ອິນເຕີແນດ)
ຜົນງານໃຫຍ່ກວ່າໝູ່ຂອງເຊີນເຢືອງ ໃນການກໍ່ສ້າງຊົນນະບົດໃໝ່ນັ້ນແມ່ນປະຕິບັດສຳເລັດສອງມາດຖານຄື: ຄົມມະນາຄົມ ແລະ ຊົນລະປະທານ, ເພື່ອຊ່ວຍປະຊາຊົນພັດທະນາເສດຖະກິດ. ອັດຕາຄອບຄົວທຸກຍາກຢູ່ຕາແສງເຊີນເຢືອງ ໃນປີ 2012 ໄດ້ຫຼຸດລົງເກືອບ 5%. ກົນໄກແຮງງານຢູ່ເຊີນເຢືອງ ກໍ່ພວມມີບາດກ້າວຫັນປ່ຽນຫຼາຍພໍສົມຄວນ, ຈາກກະສີກຳຫັນເປັນຂະແໜງອາຊີບອື່ນຄືການບໍລິການ, ອຸດສາຫະກຳຫັດຖະກຳ. ເຊີນເຢືອງ ນັບມື້ນັບມີຫຼາຍຮ້ານບໍລິການ, ຮາກຖານຜະລິດ, ປະກອບສ່ວນສ້າງໂສມໜ້າໃໝ່ໃຫ້ແກ່ໝູ່ບ້ານ.
ພ້ອມກັນນັ້ນ, ທາງຕາແສງຍັງປະສົບຜົນສຳເລັດໃນການທ້ອນໂຮມເນື້ອທີ່ດິນນາ. ເນື້ອທີ່ດິນປູກຝັງ 240 ເຮັກຕາໃນແຕ່ລະປີ ໄດ້ກາຍເປັນເຂດຜະລິດ, ໃນນັ້ນມີ 27,7 ເຮັກຕາ ແມ່ນລ້ຽງປູກສິນໃນນ້ຳ. ການຫັນປ່ຽນຜົນລະປູກ - ສັດລ້ຽງ ກໍ່ນຳມາເຊິ່ງປະສິດທິຜົນຢ່າງຕັ້ງໜ້າໃນການພັດທະນາເສດຖະກິດຟາມ, ຄອບຄົວ, ປະກອບສ່ວນຍົກສູງລາຍຮັບຂອງປະຊາຊົນ. ຖ້າຫາກວ່າປີ 2011, ລາຍຮັບສະເລ່ຍບັນລຸ 16,5 ລ້ານດົ່ງ/ຄົນ, ຮອດປີ 2012 ໄດ້ເພີ່ມຂຶ້ນ 18 ລ້ານດົ່ງ/ຄົນ.
ຈາກສະພາບຕົວຈິງ, ຕາແສງເຊີນເຢືອງ ຈະບໍ່ກໍ່ສ້າງຕະຫຼາດຊົນນະບົດໃໝ່, ເພາະວ່າຢູ່ມໍ່ກັບຕາແສງໄດ້ມີຕະຫຼາດ ຕື໋ສ໋າ ລະດັບເມືອງ. ສະນັ້ນ, ຕາແສງຈະສຸມໃສ່ປະຕິບັດມາດຖານກ່ຽວກັບການບຳບັດນ້ຳເປື້ອນຮັກສາສິ່ງແວດລ້ອມ. ທ່ານ ໂດດຶກທັ໋ງ, ຮອງປະທານຄະນະກຳມະການປະຊາຊົນຕາແສງເຊີນເຢືອງ, ໃຫ້ຮູ້ວ່າ:
“ບັນຫາທີ່ພວກຂ້າພະເຈົ້າພວມສຸມໃສ່ປະຕິບັດໃນປີ 2013 ແມ່ນບຳບັດນ້ຳເປື້ອນຮັກສາສິ່ງແວດລ້ອມ. ພວກຂ້າພະເຈົ້າກໍ່ຈະຂົນຂວາຍປະຊາຊົນກໍ່ສ້າງວິດຖ່າຍຮັບປະກັນມາດຖານເຊິ່ງຂະແໜງສາທາລະນະສຸກກຳນົດ. ກ່ຽວກັບແຫຼ່ງເງິນແມ່ນຈະລະດົມປະຊາຊົນປະກອບສ່ວນ, ເພື່ອລັດແລະປະຊາຊົນພ້ອມກັນເຮັດ”.
ຕາມການຕີລາຄາຂອງຂະແໜງກະສີກຳແຂວງຟູ໋ທໍ້ ແລ້ວ, ໃນ 3 ຕາແສງໄດ້ຮັບການເລືອກເຟັ້ນປະຕິບັດທົດລອງຮູບແບບກໍ່ສ້າງຊົນນະບົດໃໝ່ຄື: ເຊີນເຢືອງ (ເມືອງເລິມທາວ), ດົ່ງລ້ວນ (ເມືອງແທງຖູຍ) ແລະ ຢາດ່ຽນ (ເມືອງຫ້າຮ່ວາ) ນັ້ນ, ເຊີນເຢືອງ ແມ່ນຕາແສງແມ່ນປະສົບຜົນສຳເລັດທີ່ສຸດ. ຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຂອງແຂວງຟູ໋ທໍ້ ຈະສືບຕໍ່ຊີ້ນຳ 3 ຕາແສງດັ່ງກ່າວຜັນຂະຫຍາຍການກໍ່ສ້າງຕາມແຜນກຳນົດ, ລົງທຶນກໍ່ສ້າງພື້ນຖານໂຄງລ່າງ ເພື່ອສຳເລັດບັນດາມາດຖານທີ່ໄດ້ກຳນົດ, ຈາກນັ້ນດຳເນີນການສະຫຼຸບຮູບແບບຂອງເຊີນເຢືອງ ແລະ ສອງຕາແສງທີ່ຍັງເຫຼືອ ເພື່ອຕີລາຄາ, ຖອດຖອນບົດຮຽນ ແລະ ຂະຫຍາຍອອກສູ່ທຸກຕາແສງໃນບໍລິເວນແຂວງ