(vovworld) - ເມົ້າເຢ້ ແມ່ນໜຶ່ງໃນຈຳນວນ 4 ຕາແສງທີ່ເປັນແບບຢ່າງໃນການກໍ່ສ້າງຊົນນະບົດໃໝ່ຂອງເມືອງ ອຽນມິງ, ແຂວງ ຮ່າຢາງ. ເຖິງວ່າແມ່ນຕາແສງພູດອຍໃນເຂດຊາຍແດນທີ່ຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ. ແຕ່ປະຈຸບັນ, ຕາແສງສາມາດປະຕິບັດສຳເລັດ 13/19 ມາດຖານກໍ່ສ້າງຊົນນະບົດໃໝ່. ແລະ ສູ້ຊົນຮອດທ້າຍປີນີ້ຈະກາຍເປັນຕາແສງຊົນນະບົດໃໝ່. ບັນລຸໄດ້ຜົນງານນີ້, ແມ່ນຍ້ອນຕາແສງໄດ້ມີບັນດາວິທີເຮັດທີ່ດີ, ເໝາະສົມກັບເງື່ອນໄຂທຳມະຊາດຂອງຕາແສງ… ພ້ອມກັບຄວາມເຫັນດີເຫັນພ້ອມ, ຄວາມຕັດສິນໃຈຂອງພະນັກງານ, ປະຊາຊົນຕາແສງໃນການກໍ່ສ້າງຊົນນະບົດໃໝ່.
ທາງເບຕົງລະຫວ່າງບ້ານຊ່ວຍການໄປມາຢ່າງສະດວກສະບາຍ
ບ້ານ ກົກກາຍ, ຕັ້ງຢູ່ໃຈກາງຕາແສງ ເມົ້າເຢ້, ໄດ້ຮັບເລືອກເປັນບ້ານທີ່ເປັນແບບຢ່າງໃນການກໍ່ສ້າງຊົນນະບົດໃໝ່. ມາຮອດປະຈຸບັນ, ບ້ານສາມາດປະຕິບັດສຳເລັດ 13 ມາດຖານກໍ່ສ້າງຊົນນະບົດໃໝ່. ສິ່ງທີ່ສ້າງຄວາມປະທັບໃຈທຳອິດ ເມື່ອເຂົ້າບ້ານ ກົກກາຍ ນັ້ນແມ່ນ, ທາງເບຕົງລະຫວ່າງບ້ານທີ່ສະອາດ, ຫໍວັດທະນະທຳ, ເດີນກິລາທີ່ກວ້າງຂວາງ ພ້ອມກັບເຮືອນຮ້ານຕັ້ງຢູ່ກາງສວນໝາກໄມ້, ຄຽງຂ້າງນັ້ນແມ່ນໜອງລ້ຽງປາ, ຄອກລ້ຽງໝູ, ຄວາຍ, ງົວຢ່າງສະອາດ. ທ່ານ ຫງວຽນວັນດຽນ, ບ້ານກົກກາຍ, ຕາແສງ ເມົ້າເຢ້, ໃຫ້ຮູ້ວ່າ:
“ເມື່ອມີໂຄງການກໍ່ສ້າງຊົນນະບົດໃໝ່ຂອງລັດ, ພວກຂ້າພະເຈົ້າໄດ້ມີທາງໄປມາຢ່າງສະດວກສະບາຍ ແລະ ປີນີ້ໄດ້ມີທາງໃນເຂດທົ່ງນາອີກ. ກ່ອນນີ້, ເມື່ອບໍ່ທັນມີໂຄງການກໍ່ສ້າງຊົນນະບົດໃໝ່, ການໄປມາປະສົບກັບຄວາມຫຍຸ້ງຍາກຫຼາຍ. ປະຈຸບັນຊາວກະສິກອນໄປເຮັດນາ, ເກັບກ່ຽວເຂົ້າສະດວກທີ່ສຸດ. ຊີວິດການເປັນຢູ່ຂອງປະຊາຊົນໄດ້ຮັບການຍົກສູງຂຶ້ນຫຼາຍທີ່ສຸດ“.
ຫໍວັດທະນະທຳຂອງບ້ານກົກກາຍ, ບ້ານທີ່ເປັນແບບຢ່າງໃນການກໍ່ສ້າງຊົນນະບົດໃໝ່
ຍ້ອນປະຕິບັດວຽກງານໂຄສະນາເປັນຢ່າງດີ, ປະຊາຊົນຢູ່ 17 ບ້ານໃນຕາແສງ ເມົ້າເຢ້ ຈຶ່ງເຂົ້າໃຈຄວາມໝາຍຂອງການກໍ່ສ້າງຊົນນະບົດໃໝ່, ຈາກນັ້ນເຫັນດີເຫັນພ້ອມໃນການຜັນຂະຫຍາຍ, ປະຕິບັດບັນດາມາດຖານຕາມແຜນການທີ່ໄດ້ວາງອອກ. ທ່ານ ຫງວຽນວັນເມົ້າ, ປະທານຄະນະກຳມະການປະຊາຊົນຕາແສງ ເມົ້າເຢ້, ໃຫ້ຮູ້ວ່າ:
”ພວກຂ້າພະເຈົ້າໂຄສະນາໃຫ້ປະຊາຊົນຜ່ານຫຼາຍຮູບການເຊັ່ນ: ຜ່ານອົງການຈັດຕັ້ງມະຫາຊົນ, ການປະຊຸມໃນບ້ານ ຫຼືຜ່ານໂທລະໂຄ່ງ… ຈາກນັ້ນປະຊາຊົນຈະເຫັນດີເຫັນພ້ອມ ແລະ ສະໜັບສະໜູນ, ວຽກງານທັງໝົດຄືການກໍ່ສ້າງພື້ນຖານໂຄງລ່າງຢູ່ຊົນນະບົດ, ໂຄງການເຮືອນສະອາດ, ສວນງາມ, ຮົ້ວຂຽວ…ຈຶ່ງໄດ້ຮັບການຜັນຂະຫຍາຍຢ່າງໄວ ແລະ ຖືກກັບຄວາມຄືບໜ້າ.”
ທົ່ງນາທີ່ໃຫ້ສະມັດຕະພາບສູງຂອງຊາວກະສິກອນຕາແສງເມົ້າເຢ້
ດ້ວຍທິດນຳ: “ອັນໃດງ່າຍເຮັດກ່ອນ, ອັນໃດຫຍຸ້ງຍາກເຮັດຕາມຫຼັງ“. “ອັນໃດເສຍເງິນໜ້ອຍເຮັດກ່ອນ, ອັນໃດເສຍເງິນຫຼາຍເຮັດຕາມຫຼັງ“, ລະດົມ ແລະ ເສີມຂະຫຍາຍແຫຼ່ງກຳລັງຈາກປະຊາຊົນ, ດັ່ງນັ້ນຜ່ານ 5 ປີແຫ່ງການຜັນຂະຫຍາຍ, ຍາມໃດ ເມົ້າເຢ້ ກໍ່ແມ່ນຕາແສງນຳໜ້າເມືອງ ອຽນມິງ ໃນການກໍ່ສ້າງຊົນນະບົດໃໝ່. ທ່ານ ຮ່ວາງເທ໋ດົງ, ຮອງປະທານຄະນະກຳມະການປະຊາຊົນຕາແສງ ເມົ້າເຢ້, ໃຫ້ຮູ້ວ່າ: ຕາແສງເອົາໃຈໃສ່ທີ່ສຸດເຖິງວຽກງານໂຄສະນາໃຫ້ປະຊາຊົນກ່ຽວກັບການກໍ່ສ້າງຊົນນະບົດໃໝ່. ນັບແຕ່ຜັນຂະຫຍາຍການກໍ່ສ້າງຊົນນະບົດໃໝ່ເມື່ອປີ 2011, ຕາແສງໄດ້ໂຄສະນາເຖິງບ້ານຕ່າງໆເພື່ອໃຫ້ປະຊາຊົນເຂົ້າໃຈ ແລະ ພ້ອມກັນເຮັດ, ພ້ອມກັນຊົມໃຊ້ຜົນປະໂຫຍດ. ປະຈຸບັນອັດຕາສ່ວນຄອບຄົວທຸກຍາກໃນຕາແສງໄດ້ຫຼຸດລົງເຫຼືອພຽງ 13%, ລາຍຮັບສະເລ່ຍໃສ່ຫົວຄົນບັນລຸ 13,5 ລ້ານດົ່ງ/ຄົນ/ປີ. ທ່ານ ຮ່ວາງເທ໋ດົງ, ໃຫ້ຮູ້ວ່າ:
“ສຳລັບຊົນນະບົດໃໝ່, ພວກຂ້າພະເຈົ້າໂຄສະນາໃຫ້ປະຊາຊົນປະຕິບັດບັນດາມາດຖານທີ່ກຸ້ມຕົນເອງໄດ້ ໂດຍບໍ່ຕ້ອງການເຖິງເງິນໜູນຊ່ວຍຂອງລັດ. ບັນດາມາດຖານໃດງ່າຍ ແລະ ນຳໃຊ້ໃນຄອບຄົວງ່າຍແມ່ນເຮັດກ່ອນ. ສ່ວນບັນດາມາດຖານທີ່ຕ້ອງໄດ້ຮັບການໜູນຊ່ວຍຈາກລັດ ຫຼືບັນດາກິດຈະກຳທີ່ລັດ ແລະ ປະຊາຊົນພ້ອມກັນເຮັດ, ທາງຕາແສງຈະເອົາໃຈໃສ່ ແລະ ຜັນຂະຫຍາຍ… ຜ່ານວຽກງານໂຄສະນາຂົນຂວາຍ, ຖ້າຫາກປະຊາຊົນເຂົ້າໃຈໄດ້, ເລື່ອງຜັນຂະຫຍາຍການຂົນຂວາຍຈະສະດວກທີ່ສຸດ. ປັດໃຈເພື່ອເຮັດໃຫ້ວຽກງານກໍ່ສ້າງຊົນນະບົດໃໝ່ບັນລຸຜົນສຳເລັດ ແມ່ນຕ້ອງມີຄວາມເຫັນດີເຫັນພ້ອມ ແລະ ສະໜັບສະໜູນຈາກປະຊາຊົນ. ຕ້ອງຖືວຽກງານໂຄສະນາ, ຂົນຂວາຍເປັນສຳຄັນ ເພື່ອໃຫ້ປະຊາຊົນທຸກຄົນເຂົ້າໃຈໄດ້ວຽກງານທຸກຢ່າງ “.
ນັບແຕ່ນີ້ເຖິງທ້າຍປີ 2015, ຕາແສງ ເມົ້າເຢ້ ສຸມໃສ່ພັດທະນາເສດຖະກິດ, ຍົກສູງລາຍຮັບ, ປັບປຸງຊີວິດການເປັນຢູ່ຂອງປະຊາຊົນ, ປັບປຸງລະບົບໂຄງລ່າງ. ພ້ອມກັບການນຳໃຊ້ບັນດາຊັບພະຍາກອນດ້ານການເງິນ, ການປະສົມແຫຼ່ງທຶນຈາກລາຍການ, ໂຄງການຕ່າງໆເພື່ອລົງທຶນພັດທະນາຊົນນະບົດ, ທາງຕາແສງກໍ່ໄດ້ລະດົມແຫຼງກຳລັງໃນໝູ່ປະຊາຊົນ… ຮ່ວມແຮງຮ່ວມໃຈປະຕິບັດສຳເລັດບັນດາມາດຖານທີ່ຍັງເຫຼືອ ເພື່ອເຮັດໃຫ້ຕາແສງ ເມົ້າເຢ້ ກາຍເປັນຕາແສງທຳອິດທີ່ບັນລຸມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຢູ່ເມືອງ ອຽນມິງ, ແຂວງ ຮ່າຢາງ.