(vovworld) - ໃນຊຸມປີຜ່ານມາ, ຄຽງຂ້າງບັນດາຜົນງານທີ່ເປັນພື້ນຖານໃນຂົງເຂດກະສີກຳຄື: ການຄຳ້ປະກັນດ້ານສະບຽງອາຫານ, ຍົກສູງລາຍຮັບ ແລະ ຊີວິດການເປັນຢູ່ໃຫ້ແກ່ຊາວກະສີກອນ…ນັ້ນ, ຢູ່ເຂດຊົນນະບົດຫວຽດນາມ ຍັງປະກົດມີການທ້າທາຍໃໝ່ຄື: ສະພາບຂາດແຮງງານ, ລາຍຮັບຂອງຊາວກະສີກຳຍັງຕຳ່, ຂອບຂະໜາດການຜະລິດສິນຄ້າຍັງນ້ອຍ... ເພື່ອແກ້ໄຂບັນຫານີ້, ເລື່ອງນຳກົນຈັກເຂົ້າໃນການຜະລິດກະສີກຳ ແມ່ນມາດຕະການທີ່ສຳຄັນ.
ນຳໃຊ້ກົນຈັກເຂົ້າໃນການຜະລິດກະສີກຳ
(ພາບ: google.com.vn)
ການນຳໃຊ້ກົນຈັກ ແມ່ນບັນຫາສຳຄັນ ແລະ ມີຄວາມຈຳເປັນໃນວິວັດແຫ່ງການຫັນເປັນອຸດສາຫະກຳ, ແລະ ທັນສະໄໝໃນການຜະລິດກະສີກຳ ແລະ ກໍ່ສ້າງຊົນນະບົດໃໝ່. ເພາະວ່າບໍ່ນຳໃຊ້ກົນຈັກ ຈະບໍ່ສາມາດຍົກສູງຄູນຄ່າ, ຍົກສູງປະລິມານການຜະລິດ, ຍົກສູງຄຸນນະພາບຜະລິດຕະພັນໄດ້. ໂດຍເລີ່ມມາຈາກຄວາມຮຽກຮ້ອງຕ້ອງການຕົວຈິງນັ້ນ, ນັບແຕ່ຫຼາຍປີມານີ້, ລັດຖະບານຫວຽດນາມ ໄດ້ປະກາດໃຊ້ນະໂຍບາຍ ແລະ ມາດຕະການຫຼາຍຢ່າງ ເພື່ອນຳໃຊ້ກົນຈັກເຂົ້າໃນການຜະລິດກະສີກຳ. ໃນການກໍ່ສ້າງຊົນນະບົດໃໝ່, ລັດມີນະໂຍບາຍໜູນຊ່ວຍ, ສົ່ງເສີມຊາວກະສີກອນກູ້ຢືມທຶນ, ຫຼືລົງທຶນປະກອບກົນຈັກທີ່ເໝາະສົມເຊັ່ນ: ລົດໄຖ, ຄາດນາຂະໜາດນ້ອຍ, ຈັກສູບນ້ຳ, ຈັກສີເຂົ້າ, ບົດເຂົ້າ… ແນໃສ່ຕອບສະໜອງຄວາມຕ້ອງການພັດທະນາການຜະລິດ. ຈຸດໃໝ່ໃນການນຳໃຊ້ກົນຈັກເຈົ້າໃນການຜະລິດກະສີກຳ, ກໍ່ສ້າງຮູບແບບຊົນນະບົດໃໝ່ປະຈຸບັນນີ້, ນັ້ນແມ່ນຄຽງຂ້າງການໜູນຊ່ວຍຈາກລັດແລ້ວ, ຍັງຮຽກຮ້ອງໃຫ້ມີການເຂົ້າຮ່ວມຢ່າງຕັ້ງໜ້າຂອງບັນດາວິສາຫະກິດອີກດ້ວຍ, ພິເສດແມ່ນການເຂົ້າຮ່ວມຂອງຊາວກະສີກອນເອງ. ທ່ານ Bui Ba Bong, ລັດຖະມົນຕີຊ່ວຍວ່າການກະຊວງກະສີກຳ ແລະ ພັດທະນາຊົນນະບົດຫວຽດນາມ, ຖືວ່າ:
”ພວກເຮົາເຄີຍເວົ້າຫຼາຍເຖິງນະໂຍບາຍຂອງລັດ, ແຕ່ພວກຂ້າພະເຈົ້າຄິດວ່າ, ເພື່ອໃຫ້ແຜນນຳໂຍບາຍ, ນະໂຍບາຍນີ້ໄດ້ຮັບການປະຕິບັດຢ່າງວ່ອງໄວ, ແມ່ນຕ້ອງລະດົມການປະກອບສ່ວນຂອງປະຊາຊົນ ແລະ ວິສາຫະກິດ ຈຶ່ງສາມາດຍູ້ໄວຄວາມຄືບໜ້າຫັນເປັນກົນຈັກໄດ້, ຖ້າຫາກພຽງແຕ່ອີງໃສ່ການຊ່ວຍເຫຼືອ, ເກື້ອກູນຂອງລັດແມ່ນຊັກຊ້າທີ່ສຸດ, ຕົວຢ່າງຄື ກ່ອນນີ້ສອງ, ສາມປີ, ຢູ່ເມືອງບາວີ່, ຮ່າໂນ້ຍໄດ້ມີ 70% ເນື້ອທີ່ທັງໝົດແມ່ນນຳໃຊ້ກົນຈັກເຂົ້າໃນການກ່ຽວເຂົ້າແລ້ວ, ໃນນັ້ນຊາວກະສີ ກອນໄດ້ມີການປະກອບສ່ວນຢ່າງຫຼວງຫຼາຍ”
ນຳໃຊ້ກົນຈັກເຂົ້າໃນການຜະລິດກະສີກຳ
(ພາບ: google.com.vn)
ດ້ວຍແຜນນະໂຍບາຍຮ່ວມມືກໍ່ສ້າງຊົນນະບົດໃໝ່, ມີວິສາຫະກິດຫຼາຍແຫ່ງໄດ້ກໍ່ສ້າງຮູບແບບຫັນເປັນກົນຈັກຢ່າງຄົບຊຸດ ດ້ວຍການຮ່ວມສຳພັນກັບບັນດາຮາກຖານຄົ້ນຄ້ວາວິທະຍາສາດເພື່ອດຳເນີນການຖ່າຍທອດວິທະຍາສາດ ເຕັກນິກໃນການປູກເຂົ້າ, ແລະ ສະໜອງວັດຖຸອຸປະກອນທຳການຜະລິດ. ບໍລິສັດຫຸ້ນສ່ວນອຸດສາຫະກຳ - ກະສີກຳບໍລິສັດຫວຽດ-ມີ້ ຢູ່ແຂວງ ແທງຮ໋ວາ ແມ່ນໜຶ່ງໃນບັນດາຫົວໜ່ວຍປະຕິບັດການພົວພັນນີ້ເປັນຢ່າງດີ. ໃນໄລຍະ 5 ກວ່າປີທີ່ຜ່ານມາ, ທາງບໍລິສັດໄດ້ເອົາໃຈໃສ່ເປັນພິເສດເຖິງການນຳໃຊ້ກົນຈັກເຂົ້າໃນການຜະລິດເຂົ້າ. ພິເສດ, ທາງບໍລິສັດໄດ້ພົວພັນກັບບໍລິສັດຫຸ້ນສ່ວນແນວພັນສູນກາງ ສະໜອງແນວພັນເຂົ້າທີ່ໃຫ້ສະມັດຕະພາບສູງ, ແລ້ວຖ່າຍທອດເຕັກນິກດຳນາດ້ວຍກົນຈັກ, ອັນໄດ້ຊ່ວຍໃຫ້ຊາວກະສີກອນຫຼຸດຜ່ອນລາຍຈ່າຍໃນເບື້ອງຕົ້ນ. ພາຍຫຼັງປະຕິບັດທົດລອງຢູ່ 5 ຕາແສງໃນແຂວງ ແທງຮ໋ວາ ດ້ວຍຜົນງານທີ່ຕັ້ງໜ້າ, ແລະ ໄດ້ຮັບການສະໜັບສະໜູນຈາກຊາວກະສີກອນນັ້ນ. ທ່ານ Le Doan Hung, ຢູ່ບ້ານ 8, ຕາແສງ ແຮ້ງຟຸກ, ເມືອງ ທໍ້ຊວນ, ໃຫ້ຮູ້ວ່າ:
“ກ່ອນນີ້ທ້ອງຖີ່ນພວກເຮົາເຮັດໄຮ່ໄຖນາລ້ວນແຕ່ຕາມແບບຫັດຖະ ກຳ, ປະຈຸບັນ, ບໍລິສັດຫວຽດ-ມີ້ໄດ້ນຳໃຊ້ເຄື່ອງຈັກເຂົ້າໃນການຜະລິດເຂົ້າ, ດັ່ງນັ້ນຈຶງປະຢັດຊັບພະຍາກອນມະນຸດ, ວັດຖຸ, ແຮງງານ ແລະ ຄ່າແຮງງານໃຫ້ແກ່ຊາວກະສີກອນ. ທົ່ງນາໃນບ້ານ ແຮ້ງຟຸກ ຂອງພວກຂ້າພະເຈົ້າກໍ່ໃຫ້ສະມັດຕະພາບສູງເມື່ອທຽບໃສ່ທົ່ງນາອື່ນໆ. ຊາວກະສີກອນດີໃຈຫຼາຍ ເມື່ອ ຮ່ວມມືທຳການຜະລິດກັບບໍລິສັດຫວຽດ-ມີ້ ”
ນຳໃຊ້ກົນຈັກເຂົ້າໃນການຜະລິດກະສີກຳ
(ພາບ: google.com.vn)
ຈາກຜົນສຳເລັດດັ່ງກ່າວ, ບໍລິສັດຫວຽດ-ມີ້ ພວມດຳເນີນການເປີດກວ້າງຮູບແບບນີ້ຢູ່ແຫ່ງຕ່າງໆ, ປະກອບສ່ວຫຼຸດຜ່ອນອັດຕານຳໃຊ້ແຮງງານຢູ່ເຂດຊົນນະບົດລົງ ແລະ ຍົກສູງປະສິດທິຜົນດ້ານເສດຖະກິດຢູ່ແຂວງ ແທງຮ໋ວາ. ທ່ານ Le VanMinh, ຜູ້ອຳນວຍການບໍລິສັດຫວຽດ-ມີ້, ໃຫ້ຮູ້ວ່າ:
”ໂດຍປະຕິບັດໂຄງການຫັນເປັນກົນຈັກຢ່າງຄົບຊຸດໃນການຜະລິດເຂົ້າ ສົມທົບກັບການສະໜອງວັດຖຸອຸປະກອນກະສີກຳ, ພວກຂ້າພະເຈົ້າໄດ້ຜັນຂະຫຍາຍໂຄງການນີ້ຢູ່ 5 ຕາແສງ, 4 ເມືອງໃນແຂວງ, ແລະ ຜົນງານທີ່ໄດ້ຮັບແມ່ນດີທີ່ສຸດ. ພວກຂ້າພະເຈົ້າຈະຂະຫຍາຍຢ່າງກວ້າງຂວາງໃນທົ່ວແຂວງ, ປະກອບສ່ວນໃຫ້ແກ່ການກໍ່ສ້າງຊົນນະບົດໃໝ່”
ຄວາມຈິງແລ້ວ, ການນຳໃຊ້ກົນຈັກໃນການຜະລິດກະສີກຳບໍ່ແມ່ນເລື່ອງທີ່ໃໝ່ອ່ຽມຢູ່ຫວຽດນາມ, ແຕ່ນັບແຕ່ ສາມ, ສີ່ປີມານີ້, ໂດຍສະເພາະແມ່ນນັບແຕ່ຜັນຂະຫຍາຍບັນດາມາດຕະຖານໃນການກໍ່ສ້າງຊົນນະບົດໃໝ່ຢ່າງຄົບຊຸດ, ບັນຫານຳໃຊ້ກົນຈັກໃນການຜະລິດກະສີກຳຍິ່ງມີເງື່ອນໄຂ ເພື່ອຜັນຂະຫຍາຍຢ່າງກວ້າງຂວາງໃນຫຼາຍຂະແໜງອາຊີບ, ໝູ່ບ້ານອາຊີບອື່ນໆຢູ່ເຂດຊົນນະບົດ. ຮູບພາບຈັກກ່ຽວເຂົ້າ, ລົດໄຖນາຂະໜາດນ້ອຍ… ປະກົດຕົວໃນທົ່ງນານັບມື້ນັບຫຼາຍ, ອັນໄດ້ເຮັດແທນບັນດາວຽກງານທີ່ໜັກໜ່ວງ, ລຳບາກໃຫ້ແກ່ຊາວກະສີກອນ. ນັ້ນແມ່ນຄາດໝາຍເຊິ່ງໂຄງການກໍ່ສ້າງຊົນນະບົດໃໝ່ພວມມຸ່ງໄປເຖິງ.
To Tuan