(vovworld) - ໂດຍແມ່ນໜຶ່ງໃນ 5 ເມືອງໃນທົ່ວປະເທດທີ່ໄດ້ຮັບການເລືອກເຟັ້ນຈາກສູນກາງໃຫ້ປະຕິບັດທົດລອງໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໄລຍະ 2010 – 2015. ໃນ 3 ປີ ກວ່າທີ່ຜ່ານມາ, ເມືອງເຟືອກລອງ, ແຂວງບາກລຽວ ໄດ້ມານະພະຍາຍາມປະຕິບັດສຳເລັດຫຼາຍຄາດໝາຍທີ່ໄດ້ວາງອອກ. ຜົນງານທີ່ບັນລຸໄດ້ສະແດງໃຫ້ເຫັນວ່າ, ຄຽງຂ້າງການນຳໃຊ້ແຜນນະໂຍບາຍ, ນະໂຍບາຍຂອງສູນກາງຢ່າງມີຫົວຄິດປະດິດສ້າງ ແລະ ມີໄຫວພິບ, ເໝາະສົມກັບເງື່ອນໄຂລະອຽດຂອງທ້ອງຖີ່ນແລ້ວ, ແມ່ນຕ້ອງອີງໃສ່ກຳລັງແຮງຂອງປະຊາຊົນໃນການກໍ່ສ້າງຊົນນະບົດໃໝ່ອີກດ້ວຍ.
ຊາວເຟືອກລອງ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່
ເດືອນ 5 ຜ່ານມາ, ຕາແສງວິ້ງແທງ ແມ່ນຕາແສງທຳອິດຂອງເມືອງເຟືອກລອງ ແລະ ແຂວງບາກລຽວ ບັນລຸມາດຖານຊົນນະບົດໃໝ່.. ຕາມແຜນການແລ້ວ, ນັບແຕ່ນີ້ຮອດທ້າຍປີ, 6 ຕາແສງທີ່ຍັງເຫຼືອຂອງເມືອງເຟືອກລອງ ຈະບັນລຸມາດຖານຊົນນະບົດໃໝ່. ທ່ານ ເຈິ່ນຮ່ວາງຢວຽນ, ເລຂາຄະນະພັກເມືອງເຟືອກລອງ, ໃຫ້ຮູ້ວ່າ: ບັນລຸໄດ້ຜົນງານດັ່ງກ່າວແມ່ນຍ້ອນມີແຜນນະໂຍບາຍ, ນະໂຍບາຍຖືກຕ້ອງຂອງພັກ ແລະ ລັດທີ່ເໝາະສົມກັບຈິດໃຈຂອງປະຊາຊົນ, ກໍ່ຄືມີຄວາມສະໜິດຕິດພັນ ແລະ ຄວາມຮັບຜິດຊອບຂອງປະຊາຊົນທຸກຊັ້ນວັນນະ. ພິເສດ, ແມ່ນອຳນາດການປົກຄອງທຸກຂັ້ນຍາມໃດກໍ່ຊອກຫາ, ຮ່ຳຮຽນເອົາບົດຮຽນຈາກທ້ອງຖີ່ນຕ່າງໆ, ພ້ອມກັບການໝູນໃຊ້ແຜນນະໂຍບາຍຂອງສູນກາງຢ່າງມີໄຫວພິບ ແລະ ມີຫົວຄິດປະດິດສ້າງ, ເໝາະສົມກັບເງື່ອນໄຂລະອຽດຂອງທ້ອງຖີ່ນ. ຈາກນັ້ນໄດ້ນຳມາເຊິ່ງຜົນປະໂຫຍດທີ່ແທດຈິງໃຫ້ປະຊາຄົມສັງຄົມ ແລະ ປະຊາຊົນໃນທ້ອງຖີ່ນ
“ບົດຮຽນໃນການຊີ້ນຳນຳພາໂຄງການຈຸດໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່, ນັ້ນແມ່ນກ່ອນອື່ນໝົດຜູ້ນຳ ແລະ ອຳນາດການປົກຄອງທ້ອງຖີ່ນຕ້ອງມີຄວາມສຸດຈິດສຸດໃຈ, ຫ້າວຫັນ, ຕັ້ງໜ້າ, ເປັນແບບຢ່າງນຳໜ້າໃນການປະຕິບັດວຽກງານ, ແຕ່ກໍ່ຕ້ອງຮັບປະກັນລັກສະນະເປັນຫຼັກການ, ເປີດເຜີຍ, ໂປ່ງໃສ ເພື່ອສ້າງຄວາມເຫັນດີເຫັນພ້ອມໃນໝູ່ປະຊາຊົນ. ຈາກນັ້ນຊີວິດຂອງປະຊາຊົນຈຶ່ງໄດ້ຮັບການຍົກສູງຂຶ້ນ ແລະ ໂສມໜ້າຊົນນະບົດຈຶ່ງປ່ຽນໃໝ່ຢ່າງແທ້ຈິງ”.
ໃນ 3 ກວ່າປີຜ່ານມາ, ເມືອງເຟືອກລອງ ສາມາດກໍ່ສ້າງທາງເບຕົງໄດ້ກວ່າ 400 ກມ, ປ້ານຄັນຄູໄດ້ 14 ກມ, ກໍ່ສ້າງຂົວເບຕົງເສີມເຫຼັກໄດ້ກວ່າ 14 ແຫ່ງ, ທົ່ງນາຂະໜາດໃຫຍ່ 16 ແຫ່ງ, ຍົກລະດັບ ແລະ ເປີດກວ້າງຕະຫຼາດຊົນນະບົດ 3 ແຫ່ງ, ພ້ອມກັບກິດຈະກຳສຳຄັນອື່ນໆອີກ. ພິເສດແມ່ນຖືການຜະລິດກະສີກຳ ແລະ ສິນໃນນ້ຳເປັນຕົ້ນຕໍເພື່ອພັດທະນາເສດຖະກິດ, ໃນຊຸມປີຜ່ານມາເຟືອກລອງ ໄດ້ເປີດກວ້າງບັນດາຮູບແບບຜະລິດຢ່າງບໍ່ຢຸດຢັ້ງ ແລະ ບັນລຸໄດ້ປະສິດທິຜົນເສດຖະກິດສູງ. ພິເສດແມ່ນນຮູບແບບປູກເຂົ້າພ້ອມກັບພືດ, ປູກເຂົ້າພ້ອມກັບການລ້ຽງສິນໃນນ້ຳ. ພັດທະນາການລ້ຽບສັດທີ່ມີມູນຄ່າເສດຖະກິດສູງ, ພິເສດແມ່ນຮູບແບບລ້ຽງໂຕແຂ້. ຈາກນັ້ນການຜະລິດກະສີກຳ ແລະ ສິນໃນນ້ຳຂອງເມືອງນັບມື້ນັບພັດທະນາ, ຍອດມູນຄ່າສະເລ່ຍໃນແຕ່ລະປີບັນລຸ 3.100 ຕື້ດົ່ງ. ຄຽງຂ້າງການຜະລິດກະສີກຳ - ສິນໃນນ້ຳແລ້ວ, ເມືອງຍັງສຸມໃສ່ຊີ້ນຳພັດທະນາການຜະລິດອຸດສາຫະກຳ - ອຸດສາຫະກຳນ້ອຍຫັດຖະກຳ ແລະ ການຄ້າ - ການບໍລິການ, ຍອດມູນຄ່າແຕ່ລະປີບັນລຸ 5.100 ຕື້ດົ່ງ. ປະຈຸບັນ, ປະຊາຊົນເມືອງເຟືອກລອງ ບັນລຸລາຍຮັບກວ່າ 33 ລ້ານດົ່ງ/ຄົນ/ປີ, ເພີ່ມຂຶື້ນເກືອບ 2,4 ເທົ່າເມື່ອທຽບໃສ່ປີ 2009. ອ້າຍ ເຈິ່ນວັນທົ໋ງ ຢູ່ບ້ານເຟືອກແທ່ງ, ຕາແສງເຟືອກລອງ, ເມືອງເຟືອກລອງ, ໃຫ້ຮູ້ວ່າ:
“ຄອບຄົວຂ້າພະເຈົ້າທັງດຳເນີນທຸລະກິດ, ທັງລ້ຽງປູກສິນໃນນ້ຳ. ນັບແຕ່ມີໂຄງການກໍ່ສ້າງຊົນນະບົດໃໝ່, ປະຊາຊົນພວກຂ້າພະເຈົ້າໄດ້ຊົມໃຊ້ຜົນປະໂຫຍດຫຼາຍຢ່າງຈາກໂຄງການກໍ່ສ້າງຊົນນະບົດໃໝ່. ກ່ອນນີ້ປະສົບກັບຄວາມຫຍຸ້ງຍາກຫຼາຍ, ສະມັດຕະພາບການຜະລິດຕ່ຳ, ຍ້ອນຖືກຜົນສະທ້ອນຈາກແຫຼ່ງນ້ຳ, ແຕ່ມາບັດນີ້ການລ້ຽງປູກສິນໃນນ້ຳບັນລຸສະມັດຕະພາບສູງ ແລະ ມີປະສິດທິຜົນທີ່ສຸດ. ດັ່ງນັ້ນຊາວກະສີກອນພວກຂ້າພະເຈົ້າດີໃຈທີ່ສຸດ”.
ເຟືອກລອງໃນປະຈຸບັນ ບັນດາປະສິດທິຜົນອັນໃຫຍ່ຫຼວງຈາກໂຄງການກໍ່ສ້າງຊົນນະບົດໃໝ່ໄດ້ສ້າງກຳລັງໜູນເພື່ອໃຫ້ປະຊາຊົນເຟືອກລອງ ຮ່ວມແຮງ, ຮ່ວມໃຈຫຼາຍກວ່າໃນການພັດທະນາເສດຖະກິດສັງຄົມ.. ໃນຊຸມປີຜ່ານມາ, ຄຽງຂ້າງການຮ່ວມແຮງຮ່ວມໃຈ, ການບໍລິຈາກເງິນນັບພັນຕື້ດົ່ງແລ້ວ, ມີຫຼາຍຄອບຄົວຊາວກະສີກອນຢູ່ເມືອງເຟືອກລອງ ຍັງບໍລິຈາກທີ່ດິນເກືອບ 600.000 ຕາແມັດ ເພື່ອກໍ່ສ້າງທາງຄົມມະນາຄົມຊົນນະບົດ, ຫໍວັດທະນະທຳ, ແລະ ບັນດາກິດຈະກຳສະຫວັດດີການສັງຄົມອື່ນໆອີກ. ທ່ານ ຫງວຽນວັນຢຸງ, ຢູ່ບ້ານເຕື່ອງ 3A, ຕາແສງວິ້ງແທງ, ເມືອງເຟືອກລອງ, ແຂວງບາກລຽວ, ໃຫ້ຮູ້ວ່າ:
“ໂຄງການກໍ່ສ້າງຊົນນະບົດໃໝ່ນີ້ແມ່ນເໝາະສົມກັບຈິດໃຈຂອງປະຊາຊົນ, ເພາະມັນສ້າງຄວາມສະດວກ ແລະ ຜົນປະໂຫຍດໃຫ້ແກ່ປະຊາຊົນ, ດັ່ງນັ້ນຂ້າພະເຈົ້າ ແລະ ປະຊາຊົນລ້ວນແຕ່ສະໜັບສະໜູນ. ຄອບຄົວຂ້າພະເຈົ້າໄດ້ບໍລິຈາກທີ່ດິນ 100 ຕາແມັດ ເພື່ອກໍ່ສ້າງທາງຄົມມະນາຄົມ, ເຮັດໃຫ້ການໄປມາຂອງປະຊາຊົນສະດວກສະດວກສະບາຍກວ່າ”.
ອາດເຫັນໄດ້ວ່າ, ເມືອງເຟືອກລອງ ໄດ້ອີງໃສ່ກຳລັງແຮງຂອງປະຊາຊົນເພື່ອເສີມຂະຫຍາຍກຳລັງພາຍໃນ ແລະ ສິ່ງສຳຄັນແມ່ນໃນເວລາປະສົບກັບຄວາມຫຍຸ້ງຍາກ, ການນຳເມືອງໄດ້ຮູ້ໝູນໃຊ້ບັນດາກົນໄກນະໂຍບາຍຂອງລັດເຂົ້າໃນເງື່ອນໄຂຕົວຈິງຂອງປະຊາຊົນຢ່າງເໝາະສົມ ແລະ ມີໄຫວພິບ. ສ້າງຄວາມສາມັກຄີ, ຄວາມເປັນແບບຢ່າງຂອງພະນັກງານສະມາຊິກພັກ, ດ້ວຍທິດນຳ “ສະມາຊິກພັກໄປກອນ, ປະຊາຊົນໄປຕາມຫຼັງ”. ທ່ານ ຮວີ່ງກ໋ຽນທຽດ, ຢູ່ບ້ານເຟືອກເຈື່ອງ, ຕາແສງເຟືອກລອງ, ເມືອງເຟືອກລອງ, ໃຫ້ຮູ້ວ່າ:
“ຂ້າພະເຈົ້າເຫັນວ່າ, ເມື່ອການນຳພັກເປັນແບບຢ່າງຈຶ່ງສາມາດສ້າງຄວາມສາມັກຄີ, ເປັນເອກະພາບໃນໝູ່ປະຊາຊົນ ແລະ ນຳມາເຊິ່ງໝາກຜົນຄືທຸກວັນນີ້ໄດ້. ການນຳເມືອງ, ຕາແສງ, ບ້ານມີຄວາມໃກ້ຊິດກັບປະຊາຊົນ, ປະຊາຊົນຈຶ່ງເຂົ້າໃຈແຜນນະໂຍບາຍ, ນະໂຍບາຍຂອງລັດເພື່ອປະຕິບັດຕາມ, ເຮັດໃຫ້ໂສມໜ້າຊົນນະບົດໃນປະຈຸບັນມີການປ່ຽນແປງ, ຊີວິດຂອງປະຊາຊົນນັບມື້ນັບພັດທະນາໃຫ້ດີຂຶ້ນ”.
ຈາກຜົນງານທີ່ບັນລຸໄດ້ໃນກວ່າ 3 ປີ ແຫ່ງການກໍ່ສ້າງຊົນນະບົດໃໝ່ຢູ່ເຟືອກລອງ, ສະແດງໃຫ້ເຫັນວ່າ, ຄຽງຂ້າງວິທີເຮັດຢ່າງຂະຫຍັນຂັນເຄື່ອນ, ມີຫົວຄິດປະດິດສ້າງແລ້ວ, ຍັງມີຄວາມເອົາໃຈໃສ່ຢ່າງໃກ້ຊິດຂອງການນຳທ້ອງຖີ່ນອີກ. ເມື່ອໄດ້ຊົມໃຊ້ຜົນປະໂຫຍດຈາກກິດຈະກຳກໍ່ສ້າງຊົນນະບົດໃໝ່, ປະຊາຊົນມີຄວາມເຊື່ອໝັ້ນຕື່ມອີກຕໍ່ແຜນນະໂຍບາຍ, ນະໂຍບາຍຂອງພັກ ແລະ ລັດ, ມີຄວາມເຊື່ອໝັ້ນຕໍ່ຖັນແຖວພະນັກງານທ້ອງຖີ່ນ… ເພື່ອພ້ອມກັນກໍ່ສ້າງບ້ານເກີດເມືອງນອນ, ສ້າງປະເທດຊາດໃຫ້ນັບມື້ນັບຮັ່ງມີເຂັ້ມແຂງ.