(vovworld) - ໃນການກໍ່ສ້າງຊົນນະບົດໃໝ່, ຄຽງຂ້າງການນຳໃຊ້ແຫຼ່ງທຶນຕ່າງໆຢ່າງມີປະສິດທິຜົນ ແລະ ລະດົນກຳລັງແຮງຢ່າງຫຼວງຫຼາຍຈາກປະຊາຊົນນັ້ນ, ຍັງຮຽກຮ້ອງໃຫ້ມີຖັນແຖວພະນັກງານລັດຖະກອນຕາແສງທີ່ມີລະດັບຄວາມຮູ້, ຄວາມສາມາດຢ່າງພຽງພໍອີກ. ສຳລັບບັນດາຕາແສງຢູ່ເຂດພູດອຍ, ເຂດຫ່າງໄກສອກຫຼີກ, ເຊິ່ງແມ່ນແຫ່ງທີ່ຖັນແຖວພະນັກງານ, ລັດຖະກອນຍັງຈຳກັດດ້ານວິຊາການ, ວິຊາສະເພາະນັ້ນ, ຄວາມຮຽກຮ້ອງດັ່ງກ່າວຍິ່ງມີຄວາມຈຳເປັນ.
ຊາວກະສີກອນເຂົ້າຮ່ວມຊຸດອົບຮົມ
(ພາບ: ອິນເຕີແນດ)
ພາຍຫຼັງ 3 ປີ ແຫ່ງການຜັນຂະຫຍາຍການກໍ່ສ້າງຊົນນະບົດໃໝ່, ແຂວງອຽນບ໋າຍສາມາດບັນລຸໄດ້ບັນດາຜົນງານໃນເບື້ອງຕົ້ນທີ່ໜ້າສົ່ງເສີມ. ແຕ່, ດ້ວຍຈຸດພິເສດແມ່ນແຂວງພູດອຍ, ເງື່ອນໄຂທາງດ້ານເສດຖະກິດຍັງປະສົບກັບຄວາມຫຍຸ້ງຍາກຫຼາຍຢ່າງ. ພິເສດແມ່ນລະດັບຄວາມຮູ້ຂອງພະນັກງານຕາແສງ, ເມືອງຢູ່ທ້ອງຖີ່ນຍັງຈຳກັດ, ເຮັດໃຫ້ການປະຕິບັດຈຸດໝາຍກ່ຽວກັບການກໍ່ສ້າງຊົນນະບົດໃໝ່ປະສົບກັບຄວາມຫຍຸ້ງຍາກຫຼາຍຢ່າງ. ທ່ານ ຈິ້ງຊວນແທ່ງ, ປະທານຕາແສງແທ່ງເລືອງ, ເມືອງວັນເຈິ໋ນ, ໃຫ້ຮູ້ວ່າບົດບາດຂອງພະນັກງານຕາແສງໃນການກໍ່ສ້າງຊົນນະບົດໃໝ່ແມ່ນສຳຄັນທີ່ສຸດ. ຍ້ອນເຫດນັ້ນ, ການນຳຕາແສງແທງເລືອງ ຈຶ່ງຕັດສິນໃຈກໍ່ສ້າງຖັນແຖວພະນັກງານໜຸ່ມໃຫ້ມີຄວາມສາມາດ ແລະ ມີລະດັບຄວາມຮູ້ ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານ. ທ່ານ ຈິ້ງຊວນແທ່ງ ໃຫ້ຮູ້ວ່າ, ມາຮອດປະຈຸບັນ, ພະນັກງານ, ລັດຖະກອນທັງໝົດໃນຕາແສງໄດ້ບັນລຸມາດຕະຖານແລ້ວ, ໃນນັ້ນມີພະນັກງານຫຼາຍຄົນບໍ່ແມ່ນຊາວທ້ອງຖີ່ນແຕ່ກໍ່ສາມາດອ່ານອອກຂຽນເປັນພາສາເຜົ່າເພື່ອພົບປະ, ໂຄສະນາແຜນນະໂຍບາຍ, ນະໂຍບາຍເຖິງປະຊາຊົນຢ່າງສະດວກສະບາຍກວ່າ. ທ່ານ ຈິ້ງຊວນແທ່ງ ໃຫ້ຮູ້ວ່າ:
“ປະຈຸບັນ, ຖັນແຖວພະນັກງານຕາແສງສາມາດຕອບສະໜອງວຽກງານໄດ້ໂດຍພື້ນຖານ, ແຕ່ວິໄສທັດ, ຈີນຕະນາການ, ຄວາມຮັບຮູ້ຂອງພະນັກງານຍັງມີຄວາມຈຳກັດຢູ່. ພວກຂ້າພະເຈົ້າພວມແກ້ໄຂບັນຫານີ້ເທື່ອລະກ້າວ”.
ປະຈຸບັນນະຄອນອຽນບ໋າຍ ແມ່ນແຫ່ງທີ່ມີຖັນແຖວພະນັກງານ, ລັດຖະກອນຂັ້ນຕາແສງສົມບູນກວ່າໝູ່ໃນແຂວງ ດ້ວຍກວ່າ 80% ບັນລຸມາດຕະຖານ. ໃນ 2 ປີຜ່ານມາ, ອຳນາດການປົກຄອງທຸກຂັ້ນ ໄດ້ສ້າງເງື່ອນໄຂສະດວກໃຫ້ພະນັກງານ, ລັດຖະກອນຕາແສງຕ່າງໆນັບຮ້ອຍຄົນໄປຮຽນ ເພື່ອຍົກສູງລະດັບຄວາມຮູ້. ນາງເຈິ່ນທິງວຽດ, ຮອງຫົວໜ້າຫ້ອງເສດຖະກິດນະຄອນອຽນບ໋າຍ, ໃຫ້ຮູ້ວ່າ:
“ເພື່ອກໍ່ສ້າງລະບົບການເມືອງຂັ້ນຮາກຖານໃຫ້ໝັ້ນຄົງເຂັ້ມແຂງ, ທາງນະຄອນ ແລະ ຕາແສງຕ່າງໆໄດ້ເອົາໃຈໃສ່ເຖິງການບຳລຸງສ້າງດ້ານການເມືອງ, ວິຊາສະເພາະໃຫ້ຖັນແຖວພະນັກງານ, ລັດຖະກອນຕາແສງ. ກ່ອນປີ 2009, ອັດຕາສ່ວນພະນັກງານຕາແສງບັນລຸມາດຖານແມ່ນເກືອບ 69%. ແຕ່ປະຈຸບັນ, ອັດຕານີ້ໄດ້ເພີ່ມຂຶ້ນເຖິງ 86%. ໃນໄລຍະຈະມາເຖິງທາງນະຄອນຈະສືບຕໍ່ເອົາໃຈໃສ່ເຖິງການບຳລຸງສ້າງຖັນແຖວພະນັກງານຕາແສງ ເພື່ອຕອບສະໜອງຄວາມຮຽກຮ້ອງຕ້ອງການກໍ່ສ້າງຊົນນະບົດໃໝ່ໃນປະຈຸບັນ”.
ແນະນຳເຕັກນິກການປູກຝັງ
(ພາບ: ອິນເຕີແນດ) ພາຍຫຼັງ 2 ປີ (2010 – 2012) ແຫ່ງການປະຕິບັດແຜນຮ່າງບຳລຸງສ້າງວິຊາຊີບໃຫ້ແກ່ຜູ້ອອກແຮງງານຢູ່ເຂດຊົນນະບົດເຖິງປີ 2020 ຂອງລັດຖະບານນັ້ນ, ອຽນບ໋າຍ ສາມາດບຳລຸງສ້າງວິຊາຊີບໃຫ້ແກ່ພະນັກງານລັດຖະກອນຕາແສງໄດ້ກວ່າ 2.100 ເທື່ອຄົນ; ໃນ 2 ປີ ຈະມາເຖິງ, ອຽນບ໋າຍ ກໍ່ຈະມານະພະຍາຍາມບຳລຸງສ້າງພະນັກງານ, ລັດຖະກອນຕາແສງໃຫ້ກວ່າ 2000 ຄົນ. ທ່ານ ຮ່ວາງດຶກເວື້ອງ, ຫົວໜ້າພະແນກແຮງງານ, ທະຫານເສຍອົງຄະ ແລະ ສັງຄົມແຂວງອຽນບ໋າຍ, ໃຫ້ຮູ້ວ່າ:
“ຈຸດໝາຍ ບຳລຸງສ້າງຖັນແຖວພະນັກງານ, ລັດຖະກອນຕາແສງໄລຍະ 2013 – 2015 ແມ່ນ ບຳລຸງສ້າງພະນັກງານ, ລັດຖະກອນຕາແສງໃຫ້ໄດ້ 2.090 ຄົນ, ດ້ວຍຄ່າໃຊ້ຈ່າຍປະມານ 6 ຕື້ 750 ລ້ານດົ່ງ. ໃນນັ້ນ, ບຳລຸງສ້າງພະນັກງານຮັບຜິດຊອບວຽກງານພັກ, ມະຫາຊົນ 200 ຄົນ, ບຳລຸງສ້າງດ້ານວິຊາການໃຫ້ປະທານສະພາປະຊາຊົນ ແລະ ຄະນະກຳມະການປະຊາຊົນ 100 ຄົນ, ບຳລຸງສ້າງດ້ານວິຊາສະເພາະ 1.190 ຄົນ, ບຳລຸງສ້າງດ້ານເຕັກໂນໂລຢີຂໍ້ມູນຂ່າວສານ 400 ຄົນ, ແລະ ສອນພາສາເຜົ່າໃຫ້ 300 ຄົນ”.
ແນະນຳວິຊາຊ່າງໄມ້ໃຫ້ຜູ້ອອກແຮງງານ
(ພາບ: ອິນເຕີແນດ)
ເພື່ອປະຕິບັດສຳເລັດໂຄງການກໍ່ສ້າງຊົນນະບົດໃໝ່, ການບຳລຸງສ້າງ ແລະ ປັບປຸງຖັນແຖວພະນັກງານ, ລັດຖະກອນຕາແສງແມ່ນຄວາມຮຽກຮ້ອງອັນຈຳເປັນຂອງຫຼາຍທ້ອງຖີ່ນ, ໃນນັ້ນມີແຂວງອຽນບ໋າຍ. ປະຈຸບັນ, ພັກ, ລັດໄດ້ມີນະໂຍບາຍໃຫ້ບຸລິມາສິດແກ່ວຽກງານບຳລຸງສ້າງ, ຍົກສູງລະດັບຄວາມຮູ້ໃຫ້ແກ່ພະນັກງານ, ພິເສດແມ່ນພະນັກງານໜຸ່ມເພື່ອຮັບໃຊ້ໃຫ້ແກ່ການພັດທະນາຊົນນະບົດຢູ່ເຂດຫ່າງໄກສອກຫຼີກ… ນີ້ຈະແມ່ນກາລະໂອກາດເພື່ອໃຫ້ທ້ອງຖີ່ນຕ່າງໆ, ໃນນັ້ນມີອຽນບ໋າຍ, ຍົກສູງຄຸນນະພາບແຫຼ່ງຊັບພະຍາກອນມະນຸດໃຫ້ແກ່ການພັດທະນາຊົນນະບົດ. ກໍ່ຄືກໍ່ສ້າງຊົນນະບົດໃໝ່.