(vovworld) - ປະຈຸບັນມີຫຼາຍເຂດຊົນນະບົດຢູ່ຫວຽດນາມ, ໃນນັ້ນມີບັນດາໝູ່ບ້ານອາຊີບພວມຜັນຂະຫຍາຍໂຄງການກໍ່ສ້າງຊົນນະບົດໃໝ່ ດ້ວຍ 19 ມາດຕະຖານ, ໃນນັ້ນມີມາດຕະຖານໜຶ່ງນັ້ນແມ່ນ ຕ້ອງຮັບປະກັນເງື່ອນໄຂກ່ຽວກັບນ້ຳສະອາດ ແລະ ອະນາໄມສິ່ງແວດລ້ອມ. ພາຍຫຼັງ 3 ປີ ແຫ່ງການຜັນຂະຫຍາຍຮູບແບບກໍ່ສ້າງຊົນນະບົດໃໝ່, ການຮັບປະກັນອະນາໄມສິ່ງແວດລ້ອມຢູ່ຫຼາຍເຂດຊົນນະບົດໄດ້ມີການຫັນປ່ຽນຢ່າງຈະແຈ້ງ.
(ພາບ:google.com.vn)
ຈຸດໝາຍກ່ຽວກັບການສະໜອງນ້ຳສະອາດ ແລະ ຮັບປະກັນອະນາໄມສິ່ງແວດລ້ອມຢູ່ເຂດຊົນນະບົດ ແມ່ນໜຶ່ງໃນບັນດາມາດຕະຖານທີ່ສຳຄັນໃນໂຄງການກໍ່ສ້າງຊົນນະບົດໃໝ່. ເຊິ່ງທ່ານນາຍົກລັດຖະມົນຕີໄດ້ປະກາດໃຊ້ເມື່ອເດືອນ 6 ປີ 2010. ເພື່ອປະຕິບັດມາດຕະຖານນີ້, ໂຄງການຈຸດໝາຍແຫ່ງຊາດກ່ຽວກັບນ້ຳສະອາດ ແລະ ອະນາໄມສິ່ງແວດລ້ອມ, ກໍ່ສ້າງເຂດຊົນນະບົດໃໝ່ຕາມແຜນກຳນົດຊົນນະບົດໃໝ່ພວມຜັນຂະຫຍາຍການກໍ່ສ້າງຫຼາຍກິດຈະກຳຮັກສາສິ່ງແວດລ້ອມຢູ້ເຂດຊົນນະບົດຕາມແຜນກຳນົດ, ບຸລະນະ, ຍົກລະດັບລະບົບລະບາຍນ້ຳ, ກໍ່ສ້າງບ່ອນກຳຈັດຂີ້ເຫຍື່ອຢູ່ບັນດາຕາແສງ, ກໍ່ສ້າງສະນ້ຳ, ໜອງຊີວະພາບໃນເຂດຊຸມຊົນ.ການສະໜອງນ້ຳສະອາດ, ກຳຈັດຂີ້ເຫຍື່ອ, ການຜະລິດກະສີກຳ ແລະ ໝູ່ບ້ານອາຊີບແມ່ນຄວາມຕ້ອງການອັນຈຳເປັນໃນການກໍ່ສ້າງຊົນນະບົດໃໝ່. ຕາມນັ້ນແລ້ວ, ລັດຖະບານໄດ້ວາງອອກຈຸດໝາຍສະໜອງນ້ຳສະອາດ ແລະ ຮັບປະກັນອະນາໄມໃຫ້ເຂດຊຸມຊົນທັງໝົດ. ມີມາດຕະການໜຶ່ງທີ່ສຳຄັນທີ່ສຸດໃນການກໍ່ສ້າງຊົນນະບົດໃໝ່, ນັ້ນແມ່ນຍູ້ແຮງການລະດົມທຸກແຫຼ່ງກຳລັງໃນສັງຄົມ. ດ້ວຍຮູບການລັດປະກອບ 60% , ວິສາຫະກິດ ແລະ ປະຊາຊົນປະກອບ 40% ຄ່າໃຊ້ຈ່າຍທັງໝົດນັ້ນ ໄດ້ສ້າງການຫັນປ່ຽນໃນການລົງທຶນກໍ່ສ້າງບັນດາກິດຈະກຳພື້ນຖານໂຄງລ່າງຢູ່ເຂດຊົນນະບົດ, ໃນນັ້ນມີລະບົບສະໜອງ ແລະ ລະບາຍນ້ຳ. ມາດຕະການລະດົມປະຊາຄົມຮ່ວມແຮງຮ່ວມໃຈກໍສ້າງຊົນນະບົດໃໝ່ ກໍ່ຊ່ວຍໃຫ້ບັນດາວິສາຫະກິດມີງົບປະມານຢ່າງພຽງພໍເພື່ອລົງທຶນກໍ່ສ້າງ. ທ່ານ Nguyen Quang Hung, ຜູ້ອຳນວຍການບໍລິສັດ Song Chau, ເຊິ່ງແມ່ນບໍລິສັດປະສົບຜົນສຳເລັດໃນການລະດົມແຫຼ່ງກຳລັງສັງຄົມໃນການກໍ່ສ້າງກິດຈະກຳສະໜອງ ແລະ ລະບາຍນ້ຳຢູ່ແຂວງຮ່ານາມໃຫ້ຮູ້ວ່າ:
”ພວກຂ້າພະເຈົ້າຕ້ອງຮັບປະກັນໃຫ້ບັນດາຂັ້ນຕອນແຫ່ງການກັ່ນ ແລະ ສະໜອງນ້ຳຢ່າງກົມກຽວ, ດ້ວຍລາຄາຕ່ຳສຸດ ເພື່ອທັງຮັບປະກັນຜົນປະໂຫຍດໃຫ້ແກ່ປະຊາຊົນ, ທັງມີກຳໄລເພື່ອ”ສືບຕໍ່ການຜະລິດສ້າງວຽກເຮັດງານທຳໃຫ້ແກ່ຜູ້ອອກແຮງງານ”
(ພາບ:google.com.vn)
ຍັງມີບັນຫາສຳຄັນໜຶ່ງອີກໃນໂຄງການກໍ່ສ້າງຊົນນະບົດໃໝ່, ນັ້ນແມ່ນການກໍ່ສ້າງລະບົບບຳບັດນ້ຳເສຍ, ແກ້ໄຂມົນລະພິດຢູ່ບັນດາໝູ່ບ້ານອາຊີບ. ດ້ວຍ 2000 ກວ່າໝູ່ບ້ານໃນທົ່ວປະເທດ, ເລື່ອງແກ້ໄຂມົນລະພິດຢູ່ບັນດາມູ່ບ້ານນີ້ແມ່ນມີຄວາມໝາຍທີ່ສຸດ. ໃນນັ້ນມາດຕະການທີ່ມີປະສິດທິຜົນ, ແລະ ມີລັກສະນະຕັດສິນທີ່ສຸດນັ້ນແມ່ນການວາງແຜນກຳນົດ ແລະ ຍົກຍ້າຍບັນດາໝູ່ບ້ານອາຊີບອອກຈາກເຂດຊຸມຊົນ. ຕາມມາດຕະຖານກໍ່ສ້າງຊົນນະບົດໃໝ່, ເລື່ອງວາງແຜນກຳນົດຂະແໜງອາຊີບຊົນນະບົດຕ້ອງຕິດພັນກັບການວາງແຜນກຳນົດບັນດາເຂດອຸດສາຫະກຳ, ເຂດອຸດສາຫະກຳນ້ອຍຫັດຖະກຳ, ສ້າງເປັນເຂດຜະລິດລວມສູນ. ນີ້ແມ່ນມາດຕະການທັງແກ້ໄຂສະພາບມົນລະພິດສິ່ງແວດລ້ອມ, ທັງຕິດພັນການພັດທະນາໝູ່ບ້ານອາຊີບກັບການຈັດຕັ້ງບັນດາເຂດຊຸມຊົນຕາມແຜນກຳນົດກໍ່ສ້າງຊົນນະບົດໃໝ່. ເພື່ອຈຳກັດມົນລະພິດສິ່ງແວດລ້ອມ, ຫຼາຍທ້ອງຖີ່ນໄດ້ດຳເນີນການວາງແຜນກຳນົດ, ຈັດຕັ້ງການຜະລິດຄືນໃໝ່ຢູ່ບັນດາໝູ່ບ້ານອາຊີບໃຫ້ເໝາະສົມກັບລັກສະນະພິເສດຂອງແຕ່ລະຮູບການຜະລິດ, ລົງທຶນ, ໜູນຊ່ວຍດ້ານການເງິນ ເພື່ອໃຫ້ບັນດາໝູ່ບ້ານອາຊີບປ່ຽນໃໝ່ອຸປະກອນຮັບໃຊ້ການຜະລິດປ່ຽນແທນເຄື່ອງມືຫັດຖະກຳທີ່ຫຼ້າຫຼັງ, ຈາກນັ້ນສ້າງຕັ້ງອົງການຄຸ້ມຄອງສິ່ງແວດລ້ອມຢູ່ບັນດາໝູ່ບ້ານອາຊີບ. ພ້ອມກັບບັນດາມາດຕະການໃນຕໍ່ໜ້າ, ລັດຖະບານຍັງມອບໃຫ້ກະຊວງກະສີກຳ ແລະ ພັດທະນາຊົນນະບົດປະຕິບັດການປະສານສົມທົບບັນດາລາຍການ, ໂຄງການ ເພື່ອແນໃສ່ແກ້ໄຂບັນຫາສິ່ງແວດລ້ອມໃນລະດັບຊາດ. ທ່ານນາຍົກລັດຖະມົນຕີຫາກໍ່ເຊັນອະນຸມັດໂຄງການຈຸດໝາຍແຫ່ງຊາດແກ້ໄຂມົນລະພິດ ແລະ ປັບປຸງສິ່ງແວດລ້ອມໄລຍະ 2012 – 2015 ດ້ວຍຍອດຈຳນວນທຶນແມ່ນ 5.860 ຕຶ້ດົ່ງ ເພື່ອຜັນຂະຫຍາຍບັນດາໂຄງການເກັບໂຮມ, ບຳບັດນ້ຳເສຍ, ແກ້ໄຂສະພາບມົນລະພິດສິ່ງແວດລ້ອມຢູ່ 47 ໝູ່ບ້ານອາຊີບ. ສະຫຼຸບ 3 ປີແຫ່ງການປະຕິບັດໂຄງການກໍ່ສ້າງຊົນນະບົດໃໝ່ ຄະນະຊີ້ນຳແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຖືວ່າ ຜົນສຳເລັດໃນເບື້ອງຕົ້ນຢູ່ບາງທ້ອງຖີ່ນໃນການແກ້ໄຂສະພາບມົນລະພິດ, ຮັບປະກັນອະນາໄມສິ່ງແວດລ້ອມນັ້ນແມ່ນຍ້ອນມີການປະກອບສ່ວນຂອງປະຊາຊົນ. ທ່ານ Cao Duc Phat, ລັດຖະມົນຕີ ກະຊວງກະສີກຳ ແລະ ພັດທະນາຊົນນະບົດ, ຜູ້ປະຈຳການ ຄະນະຊີ້ນຳ ແຫ່ງຊາດກ່ຽວກັບການກໍ່ສ້າງ ຊົນນະບົດໃໝ່, ຖືວ່າ:
(ພາບ:google.com.vn) ”ໃນພາກຕົວຈິງ, ນີ້ແມ່ນບັ້ນຂົນຂວາຍ, ໃນນັ້ນພໍ່ແມ່ປະຊາຊົນສວມ ບົດບາດຕົ້ນຕໍ່. ຊາວກະສີກອນຈະປຶກສາ ຫາລືເລືອກເຟັ້ນບັນດາວຽກງານ ທີ່ມີຄວາມໝາຍອັນຈຳເປັນທີ່ມີຕໍ່ຊີວິດການເປັນຢູ່ໃນເຂດຊົນນະບົດ”.
ຕາມຄະນະຊີ້ນຳແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໃນໄລຍະຈະມາເຖິງວຽກງານໂຄສະນາ, ເຜີຍແຜ່ນະໂຍບາຍ, ກົດໝາຍກ່ຽວກັບການປົກປັກຮັກສາສິ່ງແວດລ້ອມຢູ່ເຂດຊົນນະບົດ, ໝູ່ບ້ານອາຊີບ ຈະສືບຕໍ່ໄດ້ຮັບການຍູ້ແຮງ ເພື່ອແນໃສ່ຍົກສູງສະຕິຂອງປະຊາຄົມ ແລະຊາວກະສີກອນ, ເພື່ອໃຫ້ເຂົາເຈົ້າບໍ່ພຽງແຕ່ຄິດເຖິງຜົນປະໂຫຍດທາງດ້ານເສດຖະກິດໃນຕໍ່ໜ້າເທົ່ານັ້ນ, ຫາກຍັງມີສະຕິໃນການຮັກສາສິ່ງແວດລ້ອມໃນໄລຍະຍາວອີກດ້ວຍ.