ຮູບແບບ ”ທົ່ງນາຮ່ວມສຳພັນ” ຢູ່ແຂວງດົ່ງທາບ ປະກອບສ່ວນກໍ່ສ້າງຊົນນະບົດໃໝ່
Thanh Tung - Bui Hang -
(vovworld) - ໃນການຜະລິດເຂົ້າສານປະຈຸບັນນີ້, ດົ່ງທາບ ໄດ້ເລືອກເຟັ້ນທິດທາງໃໝ່, ນັ້ນແມ່ນນຳໃຊ້ຮູບແບບ ”ທົ່ງນາຮ່ວມສຳພັນ”. ດ້ວຍການເລືອກເຟັ້ນນີ້, ທ້ອງຖີ່ນປາຖະໜາຢາກເຮັດໃຫ້ຊາວກະສີກອນຕິດພັນຢ່າງແໜ້ນແຟັ້ນກັບວິສາຫະກິດສົ່ງອອກກວ່າ. ຄຽງຂ້າງນັ້ນ, ຊາວກະສີກອນເຂົ້າຮ່ວມຮູບແບບນີ້ຈະຮູ້ໄດ້ວ່າຕົນເອງຈະປູກຕົ້ນໄມ້ປະເພດໃດ, ຂາຍໃຫ້ໃຜ, ຂາຍຄືແນວໃດ. ສ່ວນບັນດາວິສາຫະກິດກໍ່ບໍ່ຕ້ອງສົນໃຈເຖິງເລື່ອງຊື້ຢູ່ໃສ, ຂອງໃຜ ແລະ ຊື້ຄືແນວໃດອີກ.
ຮູບແບບຜະລິດເຂົ້າຕາມທິດທັນສະໄໝ
(ພາບ: ອິນເຕີແນດ)
ນັບແຕ່ປີ 2008, ແຂວງດົ່ງທາບ ໄດ້ວາງແຜນຮ່າງ ”ກໍ່ສ້າງທົ່ງນາຜະລິດເຂົ້າຕາມທິດທັນສະໄໝ ໄລຍະ 2008-2011” ດ້ວຍຈຸດປະສົງເພື່ອໃຫ້ຊາວກະສີກອນຜະລິດສິນຄ້າແບບລວມສູນ, ມີລາຄາຕຳ່ ແລະ ຄຸນນະພາບສູງ, ປອດໄພເພື່ອຮັບໃຊ້ໃຫ້ຜູ້ບໍລິໂພກ, ອຸປະໂພກ ແລະ ສົ່ງອອກ. ບັນດາຮູບແບບກໍ່ສ້າງທົ່ງນາຂະໜາດໃຫຍ່, ຮ່ວມສຳພັນລະຫວ່າງວິສາຫະກິດ ກັບຊາວກະສີກອນມີຊື່ວ່າ ”ທົ່ງນາຮ່ວມສຳພັນ” ນັບມື້ນັບໄດ້ຮັບການພັດທະນາ. ເຮັດໃຫ້ຊາວກະສີກອນ ບໍ່ຕ້ອງເປັນຫ່ວງກັງວົນເຖິງສົ້ນອອກອີກ... ພາຍຫຼັງ 3 ປີແຫ່ງການຜັນຂະຫຍາຍ, ຮູບແບບນີ້ໄດ້ຮັບຜົນງານຫຼາຍຢ່າງທີ່ໜ້າຊື່ນຊົມ, ຈຳນວນຄອບຄົວເຂົ້າຮ່ວມຮູບແບບນີ້ໄດ້ເພີ່ມຂຶ້ນໃນແຕ່ລະປີ, ລະດັບຄວາມຮູ້ ແລະ ເຕັກນິກໃນການຜະລິດຂອງຊາວກະສີກອນໄດ້ເພີ່ມຂຶ້ນ, ການນຳໃຊ້ກົນຈັກໃນເຂດທົ່ງນາກໍ່ນັບມື້ນັບທັນສະໄໝ, ສະມັດຕະພາບ ແລະ ຄຸນນະພາບເຂົ້າສານນັບມື້ນັບໄດ້ຮັບການຍົກສູງຂຶ້ນ, ນຳມາເຊິ່ງປະສິດທິຜົນສູງ. ນັບແຕ່ປີ 2011 ມາຮອດປະຈຸບັນ, ຮູບແບບ ”ທົ່ງນາຮ່ວມສຳພັນ” ໄດ້ພັດທະນາ ຢ່າງແຮງຢູ່ແຂວງດົ່ງທາບ, ປີ 2011, ທັງແຂວງມີທົ່ງນາຮ່ວມສຳພັນພຽງ 2.400 ເຮັກຕາ, ຜະລິດເຂົ້າໄດ້ປະມານ 800 ໂຕນ. ປີ 2012 ມີທົ່ງນາຮ່ວມສຳພັນ 17.000 ເຮັກຕາ, ມາຮອດປະຈຸບັນ, ຍ້ອນດຶງດູດວິສາຫະກິດລົງທຶນເຂົ້າຂົງເຂດກະສີກຳໄດ້ຫຼາຍ, ດັ່ງນັ້ນດົ່ງທາບໄດ້ມີ 145 ທົ່ງນາຮ່ວມສຳພັນ, ດ້ວຍເນື້ອທີ່ຜະລິດເຂົ້າທີ່ມີຄຸນນະພາບສູງເກືອບ 54.000 ເຮັກຕາ. ຜົນປະໂຫຍດທີ່ນຳມາໃຫ້ຈາກຮູບແບບນີ້ນັ້ນແມ່ນ ໄດ້ສ້າງຄວາມອຸ່ນອ່ຽນໃຈ ແລະ ຜົນປະໂຫຍດຫຼາຍກວ່າໃຫ້ແກ່ຊາວກະສີກອນ. ອ້າຍ ຟ້າມວັນສຶ້, ສະມາຊິກສະຫະກອນເຕິນຕ໋ຽນ, ເມືອງຕາມນົງ, ແຂວງດົ່ງທາບ, ຖືວ່າ:
”ກ່ອນນີ້ຂ້າພະເຈົ້າໃຊ້ຢາດັບສູນສັດຕູພືດບໍ່ຖືກເວລາ, ປີນີ້ກຳໄດ້ເຕັກນິກການປູກຝັງ, ການໃຊ້ຢາດັບສູນສັດຕູພືດຖືກກັບເວລາ, ດັ່ງນັ້ນຈຶ່ງສ້າງກຳໄລໄດ້ 2 ລ້ານດົ່ງ/ເຮັກຕາ.”
ຮູບແບບທົ່ງນາຮ່ວມສຳພັນລະຫວ່າງຊາວກະສີກອນກັບວິສາຫະກິດ
(ພາບ: ອິນເຕີແນດ)
ເມື່ອເຂົ້າຮ່ວມ ຮູບແບບ ”ທົ່ງນາຮ່ວມສຳພັນ”, ຊາວກະສີກອນໄດ້ຮັບການຊ່ວຍເຫຼືອຈາກພະນັກງານເຕັກນິກໃນວິວັດແຫ່ງການຜະລິດຄື: ແນະນຳວິທີບົວລະບັດຕົ້ນເຂົ້າ, ປ້ອງກັນ ແລະ ດັບສູນສັດຕູພືດ, ການຄຸ້ມຄອງທົ່ງນາ, ການໄລ່ລຽງເສດຖະກິດ... ສາດສະດາຈານ, ດຣ ຫລໍຕ່ອງຊວນ, ເນັ້ນໜັກວ່າ, ນີ້ແມ່ນຮູບການຮ່ວມສຳພັນທີ່ນຳມາເຊິ່ງປະສິດທິຜົນຢ່າງແທດຈິງໃຫ້ແກ່ຊາວກະສີກອນ.
”ສະຫະກອນແມ່ນຮູບແບບທີ່ສ້າງຄວາມສະດວກໃຫ້ບໍລິສັດຕ່າງໆຮ່ວມສຳພັນນຳກັນ, ຈາກນັ້ນຊາວກະສີກອນຈະມີຝຸ່ນເຄມີ, ຢາດັບສູນສັດຕູພືດທີ່ດີ, ເມື່ອຊາວກະສີກອນຜະລິດຖືກກັບເຕັກນິກ, ຂັ້ນຕອນການຜະລິດທີ່ໄດ້ວາງອອກ, ວິສາຫະກິດຮ່ວມສຳພັນຈະເກັບຊື້ເພື່ອຜະລິດເຂົ້າສານສຳເລັດຮູບ, ເຮັດໄດ້ຄືແນວນັ້ນ,ແມ່ນສາມາດຈົດທະບຽນເຄື່ອງໝາຍເຂົ້າສານໄດ້. ນີ້ແມ່ນຮູບການດີທີ່ສຸດ”.
ຜົນໄດ້ຮັບຈາກຮູບແບບທົ່ງນາຮ່ວມສຳພັນ
(ພາບ: ອິນເຕີແນດ)
ການນຳໃຊ້ຮູບແບບ ”ທົ່ງນາຮ່ວມສຳພັນ” ສຳເລັດຜົນ, ກໍ່ເປັນການປະກອບສ່ວນໃຫ້ທ້ອງຖີ່ນຕ່າງໆປະຕິບັດສຳເລັດບັນດາມາດຖານໃນການກໍ່ສ້າງຊົນນະບົດໃໝ່. ເພາະວ່າຕາມແຜນນະໂຍບາຍຂອງການກໍ່ສ້າງຊົນນະບົດໃໝ່ແລ້ວ, ແຕ່ລະຕາແສງຕ້ອງມີຮູບແບບເສດຖະກິດເປັນສິນຄ້າຂະໜາດໃຫຍ່ຢ່າງໜ້ອຍສຸດຮູບແບບໜຶ່ງ. ແລະຢາກຍົກສູງຊີວິດຂອງປະຊາຊົນຂຶ້ນຕື່ມ, ແມ່ນຕ້ອງກໍ່ສ້າງ ແລະ ພັດທະນາບັນດາທົ່ງນາຂະໜາດໃຫຍ່ທີ່ມີການຮ່ວມສຳພັນ, ລົງທຶນ ຈຳໜ່າຍກັບບັນດາວິສາຫະກິດ. ນີ້ແມ່ນຈຸດໝາຍຂອງພື້ນຖານກະສີກຳທີ່ໝັ້ນຄົງ, ຫາກບໍ່ພຽງແຕ່ອີງໃສ່ທົ່ງນາຂະໜາດໃຫຍ່ຫຼືນ້ອຍເທົ່ານັ້ນ. ດຣ ດັ້ງກິມເຊີນ, ຫົວໜ້າສະຖາບັນນະໂຍບາຍ ແລະ ຍຸດທະສາດພັດທະນາກະສີກຳ, ສັງກັດກະຊວງກະສີກຳ ແລະ ພັດທະນາຊົນນະບົດຊີ້ແຈ້ງວ່າ ”ທົ່ງນາຂະໜາດໃຫຍ່” ແມ່ນຮູບແບບຜະລິດຂະໜາດໃຫຍ່, ສ່ວນ ”ທົ່ງນາຮ່ວມສຳພັນ” ແມ່ນການ ”ຮ່ວມມື” ລະຫວ່າງຜູ້ຜະລິດ ແລະ ”ການຮ່ວມສຳພັນ” ລະຫວ່າງການຜະລິດກັບການຈຳໜ່າຍຜະລິດຕະພັນ. ນີ້ແມ່ນຈຸດໝາຍຂອງພື້ນຖານກະສີກຳທີ່ໝັ້ນຄົງ.
”ທົ່ງນາຮ່ວມສຳພັນ ແມ່ນເນັ້ນໜັກເຖິງການຮ່ວມສຳພັນລະຫວ່າງຜູ້ຜະລິດກັບຜູ້ຈຳໜ່າຍ. ໝາຍຄວາມວ່າເລັ່ງໃສ່ການຈັດຕັ້ງການຜະລິດຫຼາຍກວ່າ, ຊາວກະສີກອນຕ້ອງຮ່ວມສຳພັນນຳກັນໃນຮູບການເສດຖະກິດສະຫະກອນ, ຊາວກະສີກອນ ແລະ ວີສາຫະກິດຕ້ອງຮ່ວມສຳພັນນຳກັນດ້ວຍຫຼາຍຮູບການ, ບໍ່ພຽງແຕ່ສອງຝ່າຍ, ຫາກຫຼາຍຝ່າຍນຳກັນ, ເພື່ອທັງຮັບປະກັນສົ້ນເຂົ້າ, ສົ້ນອອກ ແລະ ທັງກໍ່ສ້າງລະບົບຂະແໜງສິນຄ້າ.”
ປະສິດທິຜົນຈາກຮູບແບບ ”ທົ່ງນາຮ່ວມສຳພັນ” ຢູ່ແຂວງດົ່ງທາບ ໄດ້ປະກອບສ່ວນສ້າງສາຍສຳພັນທີ່ແໜ້ນແຟ້ນລະຫວ່າງຊາວກະສີກອນ ແລະ ບັນດາວິສາຫະກິດກ່ຽວກັບສົ້ນເຂົ້າໃຫ້ແກ່ການຜະລິດ ແລະ ສົ້ນອອກໃຫ້ຜະລິດຕະພັນທີ່ບັນລຸຄຸນນະພາບສູງ ແລະ ໝັ້ນຄົງ. ຈາກນັ້ນຊ່ວຍໃຫ້ຊາວກະສີກອນມີຄວາມອຸ່ນອ່ຽນໃຈ ແລະ ຮ່ວມມືຜະລິດຢ່າງມີປະສິດທິຜົນໃນເຂດທົ່ງນາຂອງຕົນ, ປະກອບສ່ວນປະຕິບັດສຳເລັດບັນດາມາດຖານກໍ່ສ້າງຊົນນະບົດໃໝ່.
Thanh Tung - Bui Hang