(vovworld) - ຍາກທີ່ຈະມີບ່ອນໃດຢູ່ບ້ານນາທີ່ມີທັດສະນີຍະພາບສວຍງາມຄືຢູ່ຕາແສງແທງວັນ, ດ້ວຍບັນດາແຖວເຮືອນຕຶກຫຼາຍຊັ້ນ, ຕະຫຼາດທີ່ອຶກກະທຶກຄຶກໂຄມ, ຫໍວັດທະນະທຳທີ່ໃຫຍ່ໂຕໂອໂຖງ, ບັນດາເສັ້ນທາງເບຕົງທີ່ກວ້າງຂວາງ. ປະຊາຊົນຢູ່ທີ່ນີ້ຜູ້ໃດກໍ່ພາກພູມໃຈຕໍ່ຊີວິດການເປັນຢູ່ ກໍ່ຄືຄືຄວາມເອົາໃຈໃສ່ຂອງອຳນາດການປົກຄອງທຸກຂັ້ນ. ນັ້ນແມ່ນພະຍານຫຼັກຖານທີ່ມີຊີວິດຊີວາກ່ຽວກັບໝາກຜົນແຫ່ງການກໍ່ສ້າງຊົນນະບົດໃໝ່ຢູ່ຕາແສງແທງວັນ, ເມືອງແທງອວາຍ, ນະຄອນຮ່າໂນ້ຍ.
ໂສມໜ້າຂອງຕາແສງແທງວັນໃນປະຈຸບັນ
ແທງວັນ ແມ່ນຕາແສງຜະລິດກະສີກຳເປັນຕົ້ນທີ່ຂຶ້ນກັບເມືອງແທງອວາຍ, ຫ່າງຈາກໃຈກາງຮ່າໂນ້ຍໄປທາງທິດໃຕ້ 15 ກມ, ກ່ອນນີ້, ຊີວິດຂອງປະຊາຊົນປະສົບກັບຄວາມຫຍຸ້ງຍາກຫຼາຍຢ່າງ. ໃນຕົ້ນຊຸມປີ 90 ຂອງສະຕະວັດກ່ອນ, ຈຳນວນຄອບຄົວຢູ່ແທງວັນ ທີ່ຕ້ອງການໄດ້ຮັບການຊ່ວຍເຫຼືອໃນຍາມປ່ຽນລະດູກວມເຖິງ 85%. ແຕ່ພາຍຫຼັງ 20 ປີ, ໂສມໜ້າຢູ່ແທງວັນ ໄດ້ມີການປ່ຽນແປງຫຼາຍຢ່າງ. ທັງຕາແສງມີ 6500 ຄອບຄົວ, ແຕ່ບໍ່ມີຄອບຄົວໃດທຸກຍາກ. ມີຫຼາຍຄອບຄົວທຳການຜະລິດໄດ້ຮັບຜົນດີ, ມີເຮືອນຕຶກຫຼາຍຊັ້ນ, ລູກຫຼານທຸກຄົນລ້ວນແຕ່ໄດ້ໄປຮຽນ. ຜົນງານດັ່ງກ່າວແມ່ນມາຈາກແຜນນະໂຍບາຍກໍ່ສ້າງຊົນນະບົດໃໝ່ດ້ວຍທິດນຳທີ່ວ່າ: ກຸ້ມຕົນເອງ, ບໍ່ລໍຖ້າຕໍ່ການຊ່ວຍເຫຼືອຂອງລັດ. ທ່ານ ກວາງວັນຖີງ, ເລຂາຄະນະພັກຕາແສງແທງວັນ, ຫວນຄືນວ່າ:
“ແນວຄວາມຄິດກ່ຽວກັບການກໍ່ສ້າງຊົນນະບົດໃໝ່ຢູ່ແທງວັນ ແມ່ນມີມາແຕ່ຊຸມປີ 90, ເມື່ອຊີວິດຂອງປະຊາຊົນຍັງປະສົບກັບຄວາມຫຍຸ້ງຍາກຫຼາຍ. ເວລານັ້ນຂ້າພະເຈົ້າພຽງແຕ່ຄິດວ່າຕ້ອງເຮັດແນວໃດເພື່ອໃຫ້ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນໄດ້ດີກວ່າເທົ່ານັ້ນ. ເວລານັ້ນ, ແທງວັນ ບໍ່ທັນຄິດເຖິງມາດຖານໃດເທື່ອ. ດ້ວຍຄວາມຄິດຄືດັ່ງກ່າວ, ແທງວັນ ໄດ້ທຳການກໍ່ສ້າງຊົນນະບົດໃໝ່ ດ້ວຍວຽກງານຕ່າງໆທີ່ບ່ອນອື່ນບໍ່ເຄີຍເຮັດ“.
ປີ 1991, ຢູ່ຕາແສງແທງວັນ ໄດ້ກໍ່ສ້າງກອງທຶນລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ດ້ວຍກອງທຶນໃນເບື້ອງຕົ້ນພຽງແຕ່ມີເຂົ້າເປືອກ 20 ໂຕນ, ແລະ ເງິນ 20 ລ້ານດົ່ງເທົ່ານັ້ນ. ບ້ວງເງິນດັງກ່າວແມ່ນເພື່ອໃຫ້ປະຊາຊົນກູ້ຢືມໂດຍບໍ່ຕ້ອງເສຍດອກເບ້ຍ, ທາງຕາແສງໄດ້ຊື້ເບ້ຍໄມ້, ແນວພັນສັດລ້ຽງ, ຫຼືຊື້ດິນຈີ່ຊ່ວຍໃຫ້ປະຊາຊົນປຸກສ້າງເຮືອນຢູ່. ແຫຼ່ງທຶນດັ່ງກ່າວນັບມື້ນັບເພີ່ມຂຶ້ນ, ອັນໄດ້ຊ່ວຍໃຫ້ຊາວກະສີກອນຢູ່ຕາແສງແທງວັນ ນັບຮ້ອຍຄົນຫຼຸດພົ້ນອອກຈາກຄວາມທຸກຍາກ. ພິເສດແມ່ນ, ຕາແສງໄດ້ວາງແຜນທີ່ດິນກະສີກຳ, ທ້ອນໂຮມເນື້ອທີ່ດິນໃຫ້ເປັນທົ່ງນາໃຫຍ່, ດ້ວຍຈຸດປະສົງນຳໃຊ້ທີ່ດິນໃນໄລຍະຍາວ ແລະ ກ້າວເຂົ້າສູ່ການຜະລິດດ້ວຍຂະໜາດໃຫຍ່. ທາງຕາແສງກໍ່ໄດ້ຫັນປ່ຽນ, ສ້າງກອງທຶນທີ່ດິນ, ຊ່ວຍປະຊາຊົນມີທີ່ດີນປຸກສ້າງເຮືອນຢູ່, ກໍ່ສ້າງທາງຄົມມະນາຄົມ, ສ້າງເງື່ອນໄຂໃຫ້ແກ່ການປູກຝັງ ແລະ ຈຳໜ່າຍຜະລິດຕະພັນ. ຢູ່ຕາແສງແທງວັນໃນປະຈຸບັນ, ມີຕຶກອາຄານຫຼາຍຊັ້ນທີ່ມີມູນຄ່ານັບຕື້ນດົ່ງຫຼາຍຫຼັງ. ປະຊາຊົນເອີ້ນວ່າ, ນັ້ນແມ່ນຜົນງານແຫ່ງການ “ປະຕິວັດທີ່ດິນ“. ທ່ານ ຫງວຽນຈີ໋ຕ໋ວຽນ, ຫົວໜ້າບ້ານແບກມາຍ, ຕາແສງແທງວັນ ໃຫ້ຮູ້ວ່າ:
“ເຮືອນຊານທັງໝົດຢູ່ບ້ານນີ້ສ່ວນຫຼາຍແມ່ນຜົນທີ່ໄດ້ຮັບຈາກການປະຕິວັດທີ່ດິນ. ຖ້າຫາກບໍ່ມີການປະຕິວັດທີ່ດິນ, ບັນດາຄອບຄົວທຸກຍາກໃນຕາແສງ ກໍ່ບໍ່ສາມາດມີເຮືອນຫຼັງໃໝ່ຄືໃນປະຈຸບັນໄດ້“.
ຫໍວັດທະນະທຳໃນຕາແສງແທງວັນ
ດ້ວຍການປະຕິວັດທີ່ມີຫົວຄິດປະດິດສ້າງນີ້, ທ້ອງຖີ່ນສາມາດລະດົມທຶນໄດ້ເກືອບ 600 ຕື້ດົ່ງເພື່ອລົງທຶນກໍ່ສ້າງພື້ນຖານໂຄງລ່າງຊົນນະບົດ, ໂດຍບໍ່ຕ້ອງອີງໃສ່ການຊ່ວຍເຫຼືອຈາກງົບປະມານຂອງລັດ. ໃນການກໍ່ສ້າງຊົນນະບົດໃໝ່, ອຳນາດການປົກຄອງຕາແສງແທງວັນ ມີແຜນນະໂຍບາຍປະຕິບັດກົດລະບຽບປະຊາທິປະໄຕຢູ່ຮາກຖານ, ເປີດເຜີຍ, ໂປ່ງໃສ. ທາງຕາແສງພຽງແຕ່ວາງແຜນກຳນົດ, ມອບຄາດໝາຍເທົ່ານັ້ນ, ສ່ວນປະຊາຊົນປຶກສາຫາລື, ຜັນຂະຫຍາຍ ແລະ ຕິດຕາມກວດກາການປະຕິບັດ. ແຜນນະໂຍບາຍດັ່ງກ່າວໄດ້ສ້າງຄວາມເຫັນດີເຫັນພ້ອມ, ປະຊາທິປະໄຕ ແລະ ສ້າງຄວາມເຊື່ອໝັ້ນຕໍ່ການບໍລິຫານຂອງອຳນາດການປົກຄອງຕາແສງໃຫ້ແກ່ປະຊາຊົນ. ທ່ານ ຫງວຽນຕາມແທງ, ປະຊາຊົນໃນຕາແສງ, ແບ່ງປັນວ່າ:
“ປະຊາຊົນເວົ້າລວມໄດ້ສະໜັບສະໜູນ, ເພາະເຂົາເຈົ້າເຫັນໄດ້ຜົນປະໂຫຍດຕົວຈິງ. ໃນຕາແສງຢູ່ບ່ອນໃດກໍ່ເຫັນທາງໄປມາສະອາດສວຍງາມ“.
ຈາກກອງທຶນລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກໃນເມື່ອກ່ອນ, ປະຊາຊົນຕາແສງໄດ້ສະມັກໃຈປະກອບເງິນສ້າງຕັ້ງກອງທຶນສະຫວັດດີການສັງຄົມ ດ້ວຍແຫຼ່ງທຶນໃນປະຈຸບັນໄດ້ຂຶ້ນເຖິງ 46 ຕຶ້ດົ່ງ. ດ້ວຍກອງທຶນດັ່ງກ່າວ, ແທງວັນ ໄດ້ກາຍເປັນຕາແສງທຳອິດໃນທົ່ວປະເທດທີ່ມອບເບ້ຍບຳນານໃຫ້ແກ່ຊາວກະສີກອນ. ແທງວັນ ໄດ້ກາຍເປັນແບບຢ່າງກ່ຽວກັບການເສີມຂະຫຍາຍລັກສະນະກຸ້ມຕົນເອງ, ເປັນເຈົ້າໃນການກໍ່ສ້າງຊົນນະບົດໃໝ່ຕາມວິທີສະເພາະທີ່ເໝາະສົມກັບເງື່ອນໄຂທ້ອງຖີ່ນ, ເພື່ອໃຫ້ທ້ອງຖີ່ນຕ່າງໆປະຕິບັດຕາມ. ນ້ັນແມ່ນກໍ່ສ້າງຊົນນະບົດໃໝ່ຕິດພັນກັບຕົວຈິງ, ອຳນາດການປົກຄອງໃກ້ຊິດກັບປະຊາຊົນ, ສະແດງໃຫ້ເຫັນຄວາມມຸ້ງຫວັງຂອງປະຊາຊົນ. ນັ້ນແມ່ນກຳລັງໜູນເພື່ອໃຫ້ຮູບແບບກໍ່ສ້າງຊົນນະບົດໃໝ່ຢູ່ແທງວັນ ປະສົບຜົນສຳເລັດ, ຮັບປະກັນຊີວິດສັງຄົມ, ເຮັດໃຫ້ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນນັບມື້ນັບດີຂຶ້ນ.