(vovworld) - ດ້ວຍບັນດາປັດໃຈສະດວກຄື: ເວລາເຕີບໂຕສັ້ນ, ຄ່າຜະລິດໜ້ອຍ ແລະ ສາມາດນຳໃຊ້ສິ່ງເສດເຫຼືອຈາກຕົ້ນເຂົ້າໄດ້, ດັ່ງນັ້ນຈຶ່ງມີຫຼາຍຄອບຄົວຢູ່ແຂວງ ຊອກຈັງ ຜະລິດເຫັດເຟືອງທີ່ນຳມາເຊິ່ງປະສິດທິຜົນທາງດ້ານເສດຖະກິດສູງ. ສ້າງລາຍຮັບຕື່ມອີກໃຫ້ແກ່ຊາວກະສິກອນ, ປະກອບສ່ວນປະຕິບັດບັນດາມາດຖານກໍ່ສ້າງຊົນນະບົດໃໝ່ໃນທ້ອງຖີ່ນ. ບົດຂຽນ “ຮູບແບບຜະລິດເຫັດເຟືອງທີ່ສ້າງກຳໄລສູງຂອງຊາວກະສິກອນຊອກຈັງ“ ຂອງ ແທກຮົ່ງ, ນັກຂ່າວວິທະຍຸກະຈາຍສຽງຫວຽດນາມ.
ພາບ: ອິນເຕີແນດ
ໃນຊຸມເດືອນບໍ່ຕິດຄາກັບວຽກງານກະສິກຳ ລໍຖ້າກ້າວເຂົ້າສູ່ການຜະລິດເຂົ້າລະດູໜາວຕໍ່ລະດູບານໃໝ່, ຄອບຄົວອ້າຍ ຫງວຽນວັນເລິມ ຢູ່ຕາແສງ 2, ເທດສະບານ ງ້ານຳ, ແຂວງ ຊອກຈັງ, ກໍ່ນຳໃຊ້ບັນດາສິ່ງເສດເຫຼືອຈາກເຟືອງໃນລະດູການປູກເຂົ້າກ່ອນນັ້ນເພື່ອຜະລິດເຫັດເຟືອງ. ດ້ວຍແນວເຫັດ 400 ແກ້ວທີ່ຊື້ມາປູກ, ພາຍຫຼັງ 20 ກວ່າວັນ, ຄອບຄົວອ້າຍ ເລິມ ສາມາດເກັບກ່ຽວເຫັດເຟືອງໄດ້ເກືອບ 100 ກິໂລກຼາມ/ວັນ. ຕາມການຄິດໄລ່ຂອງຄອບຄົວອ້າຍແລ້ວ, ດ້ວຍລາຄາຂາຍອອກແມ່ນແຕ່ 25.000-28.000 ດົ່ງ/ກິໂລກຼາມ, ໂດຍບໍ່ຄິດໄລ່ຄ່າໃຊ້ຈ່າຍຕ່າງໆ, ຄອບຄົວອ້າຍສາມາດສ້າງລາຍຮັບໄດ້ເກືອບ 15 ລ້ານດົ່ງ. ອ້າຍ ຫງວຽນວັນເລິມ, ໃຫ້ຮູ້ວ່າ:
“ພາຍຫຼັງເກັບກ່ຽວເຂົ້າແລ້ວ, ເຫັນວ່າເຟືອງເສດເຫຼືອຫຼາຍ ດັ່ງນັ້ນຄອບຄົວຂ້າພະເຈົ້າຈຶ່ງນຳໃຊ້ເພື່ອປູກເຫັດເຟືອງ. ແຕ່ລະປີກໍ່ສາມາດສ້າງລາຍຮັບໄດ້ສອງ, ສາມລ້ານດົ່ງ. ປູກເຫັດເຟືອງບໍ່ລຳບາກຄືປູກເຂົ້າ, ເພາະໄລຍະເວລາເກັບກ່ຽວສັ້ນ ແຕ່ກຳໄລທີ່ສ້າງມາໄດ້ພັດສູງ“.
ປະສິດທິຜົນດ້ານເສດຖະກິດສູງຈາກຮູບແບບນີ້ ໄດ້ຊຸກຍູ້ຫຼາຍຄອບຄົວຢູ່ເທດສະບານ ງ້ານຳ ຜະລິດເຫັດເຟືອງຕະຫຼອດປີ. ໃນນັ້ນມີຄອບຄົວທ່ານ ດ່າວວັນກຽດ, ນອກຈາກຊື້ເຟືອງຢູ່ໃນທ້ອງຖີ່ນແລ້ວ, ຄອບຄົວທ່ານຍັງຊື້ຈາກແຂວງຕ່າງໆຢູ່ອ້ອມຂ້າງມາປູກເຫັດອີກ, ເຊັ່ນ: ເຫົ້າຢາງ, ບາກລຽວ ແລະ ກ່າເມົາເພື່ອ. ຕາມນັ້ນແລ້ວ, ເມື່ອປູກແນວພັນເຫັດປະມານ 900 – 1.000 ແກ້ວ, ຈະບັນລຸສະມັດຕະພາບເກືອບ 2 ໂຕນ, ພາຍຫຼັງລົບຄ່າໃຊ້ຈ່າຍແລ້ວ, ຄອບຄົວທ່ານກໍ່ສາມາດສ້າງລາຍຮັບໄດ້ກວ່າ 30 ດົ່ງ/ລະດູການຜະລິດ. ທ່ານ ດ່າວວັນກຽດ, ໃຫ້ຮູ້ວ່າ:
“ຢາກປູກເຫັດເຟືອງໃຫ້ບັນລຸຜົນ ແມ່ນຕ້ອງມີສອງປັດໃຈຕົ້ນຕໍ. ທີໜຶ່ງແມ່ນເລືອກເຟັ້ນເຟືອງທີ່ດີ. ທີສອງແມ່ນຕ້ອງບົວລະບັດເຟືອງເພື່ອຮັບປະກັນໃຫ້ເຫັດພັດທະນາ, ນຳມາເຊິ່ງສະມັດຕະພາບ ແລະ ປະສິດທິຜົນສູງ“.
ພາບ: ອິນເຕີແນດ
ປະຈຸບັນ, ມີຫຼາຍຄົບຄົວຊາວກະສິກອນຢູ່ເທດສະບານ ງ້ານຳ ພວມຍູ້ແຮງການຂະຫຍາຍເນື້ອທີ່ປູກເຫັດເຟືອງ, ພິເສດແມ່ນໃນເວລາບໍ່ຕິດຄາກັບວຽກງານກະສິກຳ. ດ້ານໜຶ່ງ, ປູກເຫັດຊ່ວຍຮັບປະກັນອະນາໄມເຂດທົ່ງນາ. ດ້ານອື່ນແມ່ນແກ້ໄຂວຽກເຮັດງານທຳໃນຍາມບໍ່ຕິດຄາກັບວຽກງານກະສິກຳ, ແລະ ສ້າງລາຍຮັບຕື່ມອີກໃຫ້ແກ່ຊາວກະສິກອນ.
ປະຈຸບັນ, ຢູ່ເທດສະບານ ງ້ານຳ ມີ 445 ຄອບຄົວຜະລິດເຫດເຟືອງ, ໃນນັ້ນມີປະມານ 150 ຄອບຄົວຜະລິດຕະຫຼອດປີ, ດ້ວຍປະລິມານການຜະລິດແມ່ນເກືອບ 800.000 ໂຕນ/ປີ. ດ້ວຍປະສິດທິຜົນຈາກຮູບແບບນີ້, ໃນໄລຍະຈະມາເຖິງ, ອຳນາດການປົກຄອງ ແລະ ສະມາຄົມຊາວກະສິກອນເທດສະບານ ງ້ານຳ ສືບຕໍ່ຊ່ວຍເຫຼືອບັນດາຄອບຄົວຊາວກະສິກອນພັດທະນາຮູບແບບປູກເຫັດເຟືອງ, ທັງເພີ່ມທະວີການໂຄສະນາເຜີຍແຜ່ບັນດາຄວາມກ້າວໜ້າດ້ານວິທະຍາສາດເຕັກນິກ ເພື່ອເພີ່ມສະມັດຕະພາບ ແລະ ປະສິດທິຜົນການປູກເຫັດໃຫ້ແກ່ຊາວກະສິກອນກວ່າ. ພິເສດແມ່ນສົ່ງເສີມຊາວກະສິກອນສ້າງຕັ້ງບັນດາໜ່ວຍສະຫະກອນຜະລິດເຫັດ, ເພີ່ມປະລິມານການຜະລິດ, ສ້າງຄວາມສະດວກໃນການຈຳໜ່າຍ ແລະ ເພີ່ມມູນຄ່າຜະລິດຕະພັນ ກໍ່ຄືກຳໄລຕື່ມອີກ. ທ່ານ ຮ່ວາງມິງເຍິດ, ຫົວໜ້າຫ້ອງການເສດຖະກິດເທດສະບານ ງ້ານຳ, ແຂວງຊອກຈັງ, ໃຫ້ຮູ້ວ່າ:
“ເທດສະບານ ງ້ານຳ ຈະສົມທົບກັບທະນາຄານຕ່າງໆ ເພື່ອຜັນ ຂະຫຍາຍຂໍ້ຕົກລົງຂອງນາຍົກລັດຖະມົນຕີ ກ່ຽວກັບນະໂຍບາຍໜູນຊ່ວຍ ເຄື່ອງຈັກຮັບໃຊ້ໃຫ້ແກ່ການພັດທະນາກະສິກຳ, ພ້ອມທັງສົມທົບກັບທະນາຄານນະໂຍບາຍພິຈາລະນາໜູນຊ່ວຍທຶນໃນການຊອກຫາວຽກເຮັດງານທຳ ເພື່ອຊ່ວຍປະຊາຊົນພັດທະນາອາຊີບປູກເຫັດເຟືອງ, ພັດທະນາເສດຖະກິດ“.
ພາບ: ອິນເຕີແນດ
ບໍ່ພຽງແຕ່ບັນດາຄອບຄົວຊາວກະສິກອນຢູ່ເທດສະບານ ງ້ານຳ ພັດທະນາອາຊີບປູກເຫັດເຟືອງເທົ່ານັ້ນ, ຫາກປະຈຸບັນຂະບວນການປູກເຫັດເຟືອງໄດ້ຂະຫຍາຍອອກສູ່ບັນດາເມືອງອ້ອມຂ້າງເຊັ່ນ: ມີ້ຕູ໋, ເຈົາແທ່ງ, ແທກຈີ້. ສົ້ນອອກຂອງຜະລິດຕະພັນໄດ້ຮັບປະກັນ, ຍ້ອນມີບາງຮາກຖານຜະລິດປຸງແຕ່ງໄດ້ຜະລິສົ້ມເຫັດສົ່ງອອກ ແລະ ຈຳໜ່າຍພາຍໃນປະເທດ. ສິ່ງດັ່ງກ່າວ ໄດ້ຊ່ວຍຊາວກະສິກອນຮັບປະກັນການຜະລິດເປັນປົກກະຕິ ແລະ ອຸ່ນອ່ຽນໃຈພັດທະນາອາຊີບປູກເຫັດເຟືອງ