(vovworld)- ໂຄງການກໍ່ສ້າງຊົນນະບົດໃໝ່ທີ່ພວມໄດ້ຮັບການຜັນຂະຫຍາຍຢູ່ຫວຽດນາມ ໃນເບື້ອງຕົ້ນໄດ້ສ້າງພາບພົດໃໝ່ໃຫ້ເຂດຊົນນະບົດຫຼາຍແຫ່ງ. ສະຫະກອນດອກໄມ້, ຕົ້ນໄມ້ປະດັບຕາແສງຖູ້ຍເຮືອງ, ເມືອງເຈືອງມີ້, ຊານນະຄອນຮ່າໂນ້ຍ, ແມ່ນຮູບແບບປະສົບຜົນສຳເລັດ, ປະກອບສ່ວນຢ່າງຕັ້ງໜ້າເຂົ້າໃນໂຄງການກໍ່ສ້າງຊົນນະບົດໃໝ່ຢູ່ທ້ອງຖີ່ນ.
ຜູ້ຊ່ຽວຊານແນະນຳກ່ຽວກັບເຕັກນິກປູກດອກໄມ້ຢູ່ຕາແສງຖູ້ຍເຮືອງ, ເມືອງເຈືອງມີ້
(ພາບ: ອິນເຕີແນດ)
ໂຄງການກໍ່ສ້າງຊົນນະບົດໃໝ່ມີ 19 ມາດຖານ ເພື່ອເປັນພື້ນຖານໃຫ້ທ້ອງຖີ່ນຕ່າງໆຈັດຕັ້ງຜັນຂະຫຍາຍການປະຕິບັດ, ໃນນັ້ນມີມາດຖານສ້າງຕັ້ງໜ່ວຍສະຫະກອນ, ຫຼືສະຫະກອນຜະລິດດຳເນີນທຸລະກິດຢ່າງມີປະສິດທິຜົນ. ຕາແສງຖູ້ຍເຮືອງ, ເມືອງເຈືອງມີ້, ຮ່າໂນ້ຍ ແມ່ນໜຶ່ງໃນຈຳນວນ 11 ຮູບແບບ ທີ່ໄດ້ຮັບການເລືອກເຟັ້ນຈາກຄະນະຊີ້ນຳກໍ່ສ້າງຊົນນະບົດໃໝ່ສູນກາງ ເປັນແບບຢ່າງໃນການກໍ່ສ້າງຊົນນະບົດໃໝ່ຂອງທົ່ວປະເທດ. ພາຍຫຼັງກວ່າ 3 ປີ ແຫ່ງການຜັນຂະຫຍາຍ, ມາຮອດປະຈຸບັນ, ຕາແສງຖູ້ຍເຮືອງ ບັນລຸໄດ້ 19/19 ມາດຖານກ່ຽວກັບການກໍ່ສ້າງຊົນນະບົດໃໝ່, ໃນນັ້ນມີບັນດາມາດຖານປະຕິບັດຍາກທີ່ສຸດຄື: ວາງແຜນສັງລວມ, ທ້ອນໂຮມທີ່ດິນໃຫ້ເປັນທົ່ງນາໃຫຍ່ເພື່ອນຳໃຊ້ກົນຈັກໃນການຜະລິດ. ພິເສດ, ຮູບແບບສະຫະກອນດອກໄມ້ ແລະ ຕົ້ນໄມ້ປະດັບຖູ້ຍເຮືອງ ໄດ້ຮັບຖືວ່າປະສົບຜົນສຳເລັດໃນການຫັນປ່ຽນຮູບແບບສະຫະກອນແບບໃໝ່. ໂດຍໄດ້ຮັບການສ້າງຕັ້ງຂຶ້ນນັບແຕ່ປີ 2010, ສະຫະກອນດອກໄມ້ ແລະ ຕົ້ນໄມ້ປະດັບຖູ້ຍເຮືອງ ໄດ້ສ້າງເຂດປູກສະເພາະດອກໄມ້ທີ່ມີຄຸນນະພາບສູງ. ໃນຈຳນວນສະຫະກອນ 33 ແຫ່ງໃນເມືອງ, ນີ້ແມ່ນສະຫະກອນທຳອິດທີ່ປະຕິບັດການປູກສະເພາະດອກໄມ້ ແລະ ຕົ້ນໄມ້ປະດັບ ດ້ວຍຮູບແບບຮ່ວມສຳພັນລະຫວ່າງ: ລັດ, ນັກວິທະຍາສາດ, ນັກທຸລະກິດ ແລະ ຊາວກະສີກອນ. ລະດູເກັບກ່ຽວດອກໄມ້ປີ 2012 ຜ່ານມາ, ຍ້ອນມີການລົງທຶນກໍ່ສ້າງລະບົບຫົດນ້ຳ, ແນວພັນດອກໄມ້, …. ສະຫະກອນດອກໄມ້ ແລະ ຕົ້ນໄມ້ປະດັບຖູ້ຍເຮືອງ ໄດ້ສະໜອງດອກໄມ້ນັບພັນຊະນິດໃຫ້ຕະຫຼາດ, ສ້າງລາຍຮັບໄດ້ກວ່າ 3 ຕື້ດົ່ງ. ທ່ານ ຫງວຽນຮື້ວທັ໋ງ, ຫົວໜ້າສະຫະກອນ, ໃຫ້ຮູ້ວ່າ:
“ປະຊາຊົນໄດ້ປະກອບທຶນໃຫ້ສະຫະກອນເພື່ອຜະລິດ, ເບິ່ງລວມແລ້ວ, ລາຍການນີ້ແມ່ນເໝາະສົມກັບຊີວິດຂອງຊາວກະສີກອນ. ຈຸດປະສົງຂອງສະຫະກອນແມ່ນ ການຜະລິດ, ດຳເນີນທຸລະກິດຕ້ອງສ້າງກຳໄລໃຫ້ໄດ້ ເພື່ອຮັບປະກັນຊີວິດຂອງຊາວກະສີກອນ”.
ຈຸດຕົ້ນຕໍໃນຮູບແບບສະຫະກອນແບບໃໝ່ຢູ່ ຖູ້ຍເຮືອງ ແມ່ນຄວາມສະໝັກໃຈຂອງຊາວກະສີກອນໃນການປະກອບທຶນ, ທ້ອນໂຮມທີ່ດິນໃຫ້ເປັນທົ່ງນາໃຫຍ່. ເມື່ອທຽບໃສ່ກ່ອນນີ້, ຊາວກະສີກອນຈາກຜູ້ຮັບຈ້າງ, ປະຈຸບັນໄດ້ກາຍເປັນເຈົ້າຂອງ ແລະ ໄດ້ຮັບ 40% ລະດັບກຳໄລດຳເນີນທຸລະກິດ. ນີ້ແມ່ນກຳລັງໜູນເພື່ອໃຫ້ເຂົາເຈົ້າປ່ຽນແປງສະຕິໃນການກະທຳ, ດ້ວຍວຽກງານລະອຽດຄື: ຮ່ຳຮຽນວິທີການຜະລິດໃໝ່, ເກັບກຳຂໍ້ມູນຂ່າວໃກ້ຊິດກັບຕະຫຼາດ. ອ້າຍ ຫງວຽນຢູຍເຍິດ, ສະມາຊິກສະຫະກອນນີ້, ໃຫ້ຮູ້ວ່າ:
“ຢູ່ສະຫະກອນນີ້, ຂ້າພະເຈົ້າໄດ້ຮັບເອົາວິທະຍາສາດເຕັກໂນໂລຢີໃໝ່, ເຊິ່ງບັນດາຮາກຖານອື່ນບໍ່ມີ, ດັ່ງນັ້ນການຜະລິດກໍ່ເປັນປົກກະຕິກວ່າ. ສະມາຊິກສະຫະກອນກໍ່ມີຄວາມຮັບຜິດຊອບສູງໃນການເຮັດວຽກ, ດັ່ງນັ້ນໄດ້ສ້າງຄວາມເຫັນດີເຫັນພ້ອມ ແລະ ການພົວພັນທີ່ດີລະຫວ່າງຄະນະຄຸ້ມຄອງສະຫະກອນກັບສະມາຊິກສະຫະກອນ”.
ການບົວລະບັດດອກໄມ້ຢູ່ຕາແສງຖູ້ຍເຮືອງ, ເມືອງເຈືອງມີ້
(ພາບ: ອິນເຕີແນດ)
ການຜະລິດ, ດຳເນີນທຸລະກິດມີກຳໄລ, ລາຍຮັບຂອງສະມາຊິກສະຫະກອນນັບມື້ນັບເພີ່ມຂຶ້ນ ແລະ ເປັນປົກກະຕິ. ການເຄື່ອນໄຫວຂອງສະຫະກອນ ໄດ້ປະກອບສ່ວນຢ່າງຕັ້ງໜ້າ ເຂົ້າໃນການຫັນປ່ຽນອົງປະກອບກະສີກຳໃນການກໍ່ສ້າງຊົນນະບົດໃໝ່ຢູ່ຕາແສງຖູ້ຍເຮືອງ ເວົ້າສະເພາະ ແລະ ເມືອງເຈືອງມີ້ ເວົ້າລວມ. ຕີລາຄາກ່ຽວກັບປະສິດທິຜົນແຫ່ງການເຄື່ອນໄຫວຂອງ ສະຫະກອນດອກໄມ້ ແລະ ຕົ້ນໄມ້ປະດັບຖູ້ຍເຮືອງ, ທ່ານ ຫງວຽນວັນແຢງ, ຮອງປະທານເມືອງ ເຈືອງມີ້, ໃຫ້ຮູ້ວ່າ:
“ຜ່ານການປະຕິບັດທົດລອງຢູ່ຕາແສງ ຖູ້ຍເຮືອງ, ພວກຂ້າພະເຈົ້າມີແຜນນະໂຍບາຍເປີດກວ້າງຮູບແບບນີ້ອອກສູ່ຕາແສງຕ່າງໆໃນເມືອງ. ເຈືອງມີ້ ມີ 30 ຕາແສງ ແລະ 2 ເທດສະບານ. ໃນໄລຍະ 2010 – 2015 ພວກຂ້າພະເຈົ້າຊີ້ນຳໃຫ້ 12 ຕາແສງ ດຳເນີນການກໍ່ສ້າງຊົນນະບົດໃໝ່ ແລະ ສູ້ຊົນເຖິງປີ 2020 ຈະມີ 100% ຈຳນວນຕາແສງປະຕິບັດສຳເລັດໂຄງການກໍ່ສ້າງຊົນນະບົດໃໝ່”.
ຜ່ານການກໍ່ສ້າງຊົນນະບົດໃໝ່ຢູ່ຕາແສງ ຖູ້ຍເຮືອງ ກໍ່ເຫັນວ່າ: ການສ້າງຮູບແບບສະຫະກອນແບບໃໝ່ມີຄວາມຈຳເປັນ, ແມ່ນເງື່ອນໄຂເພື່ອໃຫ້ຊາວກະສີກອນພັດທະນາຕາມທິດໝັ້ນຄົງ. ການສ້າງບັນດາຮູບແບບສະຫະກອນແບບໃໝ່ກໍ່ຈະປະກອບສ່ວນຊ່ວຍໃຫ້ທ້ອງຖີ່ນຕ່າງໆສຳເລັດບັນດາມາດຖານກ່ຽວກັບການຫັນປ່ຽນການຜະລິດກະສີກຳທີ່ເປັນສິນຄ້າໃນຈຳນວນມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່.