(vovworld) - ໃນຂະບວນວິວັດແຫ່ງການກໍ່ສ້າງຊົນນະບົດໃໝ່, ແຂວງຮ່ານາມ ໄດ້ກຳນົດການໂຮມດິນນາຫຼາຍຜືນເຂົ້າເປັນຜືນດຽວເພື່ອພັດທະນາການຜະລິດຕາມທິດຜະລິດກະສີກຳລວມສູນ, ຢຸດຕິສະພາບຜະລິດແບບກະແຈກກະຈາຍ, ເພີ່ມລາຍຮັບໃຫ້ແກ່ຊາວກະສີກອນເທື່ອລະກ້າວ, ແມ່ນໜຶ່ງໃນບັນດາໜ້າທີ່ຈຸດສຸມ. ດັ່ງນັ້ນ, ຮ່ານາມ ໄດ້ ແລະ ພວມມີບັນດາມາດຕະການຜັນຂະຫຍາຍວຽກງານໂຮມດິນນາຫຼາຍຜືນເຂົ້າເປັນຜືນດຽວ, ແລະ ວາງແຜນກຳນົດທົ່ງນາຄືນໃໝ່ຢ່າງຕັ້ງໜ້າ.
ພາບປະກອບການໂຮມດິນນາຫຼາຍຜືນເຂົ້າເປັນຜືນດຽວ
(ພາບ: google.com.vn)
ກ່ອນນີ້, ຄອບຄົວທ່ານ Tran Van Thanh, ຢູ່ຕາແສງ ຫວູບານ, ເມືອງບິ່ງລູກ, ແຂວງຮ່ານາມ ມີເນື້ອທີ່ນາເກືອບ 1 ເຮັກຕາ ເຊິ່ງຖືກແບ່ງອອກເປັນ 5 ຜືນ ຢູ່ກະແຈກກະຈາຍ. ທ່ານ Thanh ໃຫ້ຮູ້ວ່າ, ຮອດຍາມໄຖນາ, ເກັບກ່ຽວເຂົ້າ ຊາວກະສີກອນໃນບ້ານເຄີຍເຮັດຕາມລຳພັງໃຈ. ບາງເທື່ອໃນລະດູການໜຶ່ງແຕ່ພັດດຳເຂົ້ານາເຖິງ 3, 4 ແນວພັນ, ຍ້ອນເຫດນັ້ນເລື່ອງກະກຽມຕ້ອງເສຍເວລາຫຼາຍ. ການບົວລະບັດກໍ່ລຳບາກທີ່ສຸດ. ໃນຂະນະນັ້ນ, ຄອບຄົວລາວພຽງແຕ່ມີ 2 ຜົວເມຍເຮັດນາເທົ່ານັ້ນ, ເພາະວ່າລູກເຕົ້າໄດ້ຍ້າຍໄປເຮັດວຽກຢູ່ບ່ອນອື່ນໝົດແລ້ວ. ຍ້ອນບໍ່ມີຜູ້ເຮັດ, ການຜະລິດຕ້ອງແກ່ຍາວເວລາເຖິງເກືອບເຄິ່ງເດືອນຈຶ່ງສຳເລັດ. ແຕ່ພາຍຫຼັງໂຮມດິນນາ 5 ຜືນເຂົ້າເປັນ 2 ຜືນນັ້ນ, ການບົວລະບັດກໍ່ໄຄກວ່າ, ຍ້ອນນຳໃຊ້ເຄື່ອງຈັກເຂົ້າໃນການຜະລິດ, ແລະ ການໄປມາກໍ່ສະດວກສະບາຍກວ່າ. ທ່ານ Tran Van Thanh, ໃຫ້ຮູ້ວ່າ:
”ຖ້າຈ້າງຄົນເຮັດຕ້ອງເສຍເງິນເຖິງ 300.000 ດົ່ງ/360 ຕາລາງແມັດ, ແຕ່ເມື່ອນຳໃຊ້ເຄື່ອງຈັກເຂົ້າໃນການເກັບກ່ຽວພຽງແຕ່ເສຍເງິນ 150.000 ດົ່ງ/360 ຕາລາງແມັດ ເທົ່ານັ້ນ. ໃນຕໍ່ໜ້າເມື່ອທາງຄົມມະນາຄົມກໍ່ສ້າງສຳເລັດແລ້ວ ຈະສ້າງຄວາມສະດວກໃຫ້ແກ່ການນຳເຄື່ອງຈັກເຂົ້າໃນການຜະລິດ, ຮອດເວລານັ້ນລາຄາຈະຖືກກວ່າຫຼາຍ ເມື່ອທຽບໃສ່ຄ່າອອກແຮງງານແບບຫັດຖະກຳ”
ພາບປະກອບການໂຮມດິນນາຫຼາຍຜືນເຂົ້າເປັນຜືນດຽວ
(ພາບ: google.com.vn)
ຕາແສງ ຫວູບານ, ເມືອງບິ່ງລູກ, ແມ່ນໜຶ່ງໃນ 2 ຕາແສງທີ່ຄະນະກຳມະການປະຊາຊົນແຂວງຮ່ານາມ ເລືອກເຟັ້ນປະຕິບັດທົດລອງການໂຮມດິນນາຫຼາຍຜືນເຂົ້າເປັນຜືນດຽວ. ຍ້ອນເຫັນໄດ້ຜົນປະໂຫຍດອັນໃຫຍ່ຫຼວງຂອງການໂຮມດິນນາຫຼາຍຜືນເຂົ້າເປັນຜືນດຽວ, ຊາວກະສີກອນ ສ່ວນຫຼາຍໄດ້ສະໜັບສະໜູນ. ທ່ານ La Quoc Toan, ເລຂາຄະນະພັກເມືອງ ບິ່ງລຸກ, ໃຫ້ຮູ້ວ່າ, ມີບາງກໍລະນີມີສອງ, ສາມອ້າຍນ້ອງໃນຄອບຄົວດຽວໄດ້ສະມັກໃຈໂຮມດິນນາຫຼາຍຜືນເຂົ້າເປັນຜືນດຽວ. ດັ່ງນັ້ນ, ລາຄາສົ້ນເຂົ້າໃນລະດູໜາວຕໍ່ລະດູບານໃໝ່ຜ່ານມາ ແລະ ໃນລະດູການເກັບກ່ຽວທີ່ຈະມາເຖິງໄດ້ຫຼຸດລົງຫຼາຍພໍສົມຄວນແມ່ນປະມານ 30%, ລາຍຮັບຂອງປະຊາຊົນກໍ່ໄດ້ຮັບການຍົກສູງຂຶ້ນ. ພາຍຫຼັງປະຕິບັດທົດລອງຢູ່ຕາແສງຫວູບານ ສຳເລັດ, ເມືອງບິ່ງລູກ ສືບຕໍ່ຜັນຂະຫຍາຍການໂຮມດິນນາຫຼາຍຜືນເຂົ້າເປັນຜືນດຽວຢູ່ 19 ຕາແສງໃນທົ່ວເມືອງ. ທ່ານ La Quoc Toan, ໃຫ້ຮູ້ວ່າ: ເມື່ອນຳໃຊ້ເຄື່ອງຈັກເຂົ້າການຜະລິດໃນທົ່ງນາໃຫຍ່, ກຳລັງແຮງງານຂອງຊາວກະສິກອນຈະໄດ້ຮັບການປົດປ່ອຍ, ດັ່ງນັ້ນທາງເມືອງກໍ່ມີບັນດາມາດຕະການສ້າງວຽກເຮັດງານທຳໃຫ້ແກ່ຜູ້ອອກແຮງງານເຫຼົ່ານັ້ນ.
”ນອກຈາກການໂຮມດິນນາຫຼາຍຜືນເຂົ້າເປັນຜືນດຽວແລ້ວ, ພວກຂ້າພະເຈົ້າຍັງຮຽກຮ້ອງບັນດານັກລົງທຶນເຂົ້າມາກໍ່ສ້າງໂຮງຈັກ, ໂຮງງານ, ສ້າງວຽກເຮັດງານທຳໃຫ້ແກ່ຜູ້ອອກແຮງງານໃນເວລາຫວ່າງ. ປະຈຸບັນ, ພວກຂ້າພະເຈົ້າມີໂຮງງານ 3 ແຫ່ງ, ປີ 2011 ໄດ້ຮັບເອົາກຳມະກອນ 1 ພັນກວ່າຄົນເຂົ້າເຮັດວຽກ, ອັນໄດ້ສ້າງວຽກເຮັດງານທຳເປັນປົກກະຕິໃຫ້ແກ່ເຂົາເຈົ້າ”.
ພາບປະກອບການໂຮມດິນນາຫຼາຍຜືນເຂົ້າເປັນຜືນດຽວ
(ພາບ: google.com.vn)
ໂດຍແມ່ນທ້ອງຖີ່ນພວມຢູ່ໃນໄລຍະຫັນປ່ຽນໂຄງປະກອບເສດຖະ ກິດ, ໃນນັ້ນການຜະລິດກະສີກຳຍັງຄົງກວມອັດຕາສ່ວນຫຼາຍຢູ່, ດັ່ງນັ້ນແຂວງຮ່ານາມ ຈຶ່ງເອົາໃຈໃສ່ເປັນພິເສດເຖິງການກໍ່ສ້າງຊົນນະບົດໃໝ່. ຮ່ານາມໄດ້ຖືວຽກງານສັບຊ້ອນທົ່ງນາຄືນໃໝ່, ຖືການໂຮມດິນນາຫຼາຍຜືນເຂົ້າເປັນຜືນດຽວແມ່ນໜ້າທີ່ຈຸດສຸມເພື່ອປະຕິບັດໂຄງການກໍ່ສ້າງຊົນນະບົດໃໝ່. ໄປຄຽງຄູ່ກັນນັ້ນແມ່ນການວາງແຜນກຳນົດ ແລະ ກໍ່ສ້າງລະບົບຄົມມະນາຄົມ, ຊົນລະປະທານພາຍໃນທົ່ງນາ. ຜ່ານນັ້ນ, ສ້າງເງື່ອນໄຂໃຫ້ຊາວກະສີກອນນຳໃຊ້ບັນດາຄວາມກ້າວໜ້າດ້ານວິທະຍາສາດ ເຕັກນິກ, ນຳກົນຈັກເຂົ້າໃນການຜະລິດ. ທ່ານ Nguyen Manh Hung, ຮອງຫົວໜ້າພະແນກກະສິກຳ ແລະ ພັດທະນາຊົນນະບົດແຂວງຮ່ານາມ, ໃຫ້ຮູ້ວ່າ:
”ການໂຮມດິນນາຫຼາຍຜືນເຂົ້າເປັນຜືນດຽວຢູ່ 2 ຕາແສງປະຕິບັດທົດລອງໄດ້ສຳເລັດແລ້ວ, ແລະປະຈຸບັນພວມຜັນຂະຫຍາຍໃນທົ່ວແຂວງ. ທົ່ວແຂວງສູ້ຊົນຮອດທ້າຍປີ 2012, 28 ຕາແສງປະຕິບັດທົດລອງຈະສຳເລັດການໂຮມດິນນາຫຼາຍຜືນເຂົ້າເປັນຜືນດຽວ. ສ່ວນບັນດາຕາແສງທີ່ຍັງເຫຼືອຈະດຳເນີນການໂຮມດິນນາຫຼາຍຜືນເຂົ້າເປັນຜືນດຽວໃຫ້ສຳເລັດໃນທ້າຍປີ 2013 ”
ຄວາມຈິງໄດ້ສະແດງໃຫ້ເຫັນວ່າ, ເມື່ອຊາວກະສີກອນເປັນເຈົ້າຂອງ ແລະ ໄດ້ປູກຝັງໃນເຂດດິນນາຜືນໃຫຍ່ ແມ່ນມີຄວາມສະດວກກວ່າຫຼາຍ. ອັນໄດ້ຫຼຸດຈຳນວນກຳມະກອນ ແລະ ຄ່າລົງທຶນເຖິງ 30% ເມື່ອທຽບໃສ່ກ່ອນນີ້. ສິ່ງດັ່ງສະແດງໃຫ້ເຫັນວ່າ, ເລື່ອງກຳນົດວຽກງານໂຮມດິນນາຫຼາຍຜືນເຂົ້າເປັນຜືນດຽວຂອງແຂວງຮ່ານາມ ແມ່ນຖືກຕ້ອງ ແລະ ພວມໄດ້ຮັບການສະໜັບສະໜູນຢ່າງຕັ້ງໜ້າຈາກປະຊາຊົນ.