(VOVWORLD) - ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ດ້ວຍເນື້ອທີ່ດິນປູກເຂົ້າກ່ວາ 3.2 ລ້ານເຮັກຕາ, ແຕ່ລະປີໄດ້ປະກອບສ່ວນກ່ວາ 50% ປະລິມານການຜະລິດເຂົ້າສານ ແລະ ກ່ວາ 90% ປະລິມານເຂົ້າທີ່ສົ່ງອອກນັ້ນ, ບໍ່ພຽງແຕ່ໄດ້ຄ້ຳປະກັນຄວາມໝັ້ນຄົງດ້ານສະບຽງອາຫານເທົ່ານັ້ນ ຫາກຍັງຢັ້ງຢືນໄດ້ບົດບາດ, ທີ່ຕັ້ງໃນອັນດັບທີ 1 ຂອງໂລກ ກ່ຽວກັບການສົ່ງອອກເຂົ້າສານຂອງຫວຽດນາມ ອີກດ້ວຍ. ເພື່ອມີສິ່ງດັ່ງກ່າວ, ໃນໄລຍະທີ່ຜ່ານມາ, ອຳນາດການປົກຄອງ ແລະ ຊາວກະສິກອນຢູ່ບັນດາທ້ອງຖິ່ນໃນເຂດ ໄດ້ສຸມໃສ່ການສ້າງໂຄງປະກອບຂະແໜງກະສິກຳຄືນໃໝ່, ໝູນໃຊ້ວິທະຍາສາດເຕັກໂນໂລຊີເຂົ້າໃນການຜະລິດ; ຮ່ວມສຳພັນ, ສ້າງເຄື່ອງໝາຍການຄ້າເຂົ້າສານຫວຽດນາມ.
 ເຂດທົ່ງພຽງແມ່ນ້ຳຂອງມີເນື້ອທີ່ດິນປູກເຂົ້າກ່ວາ 3.2 ເຮັກຕາ
|
ດ້ວຍເນື້ອທີ່ດິນປູກເຂົ້າກ່ວາ 1.7 ເຮັກຕາ, ທ່ານ ຟານທ້ຽນແຄັງ ຊາວກະສິກອນຢູ່ຕາແສງດິ້ງໂມນ ເມືອງເທີ໊ຍລາຍ ນະຄອນເກິ່ນເທີ ໄດ້ໝູນໃຊ້ວິທະຍາສາດເຕັກໂນໂລຊີເຂົ້າໃນການຜະລິດ, ປູກແນວພັນເຂົ້າທີ່ມີຄຸນນະພາບສູງ ແລະ ບັນລຸໄດ້ປະສິດທິຜົນເສດຖະກິດທີ່ດີຜ່ານແຕ່ລະລະດູການ. ທ່ານພ້ອມກັບຊາວກະສິກອນ 17 ຄົນອື່ນ ພວມເຂົ້າຮ່ວມໜ່ວຍຮ່ວມມືຜະລິດເຂົ້າ ລ້ວນແຕ່ ຮັບຮູ້ຢ່າງຈະແຈ້ງວ່າ ຕ້ອງຮັກສາການຜະລິດ ເພື່ອສ້າງຊີວິດເປັນປົກກະຕິ ແລະ ຍິ່ງໄປກ່ວານັ້ນ ແມ່ນການຄ້ຳປະກັນຄວາມໝັ້ນຄົງດ້ານສະບຽງອາຫານ. ໃນນັ້ນ, ການໝູນໃຊ້ວິທະຍາສາດເຕັກນິກ, ເລືອກເອົາບັນດາແນວພັນເຂົ້າທີ່ມີຄຸນນະພາບສູງ ເພື່ອທຳການຜະລິດແມ່ນສິ່ງສຳຄັນ. ທ່ານ ຟານທ້ຽນແຄັງ ເວົ້າວ່າ:
ຕາມລະດູການປູກເຂົ້າກ່ອນນີ້, ຊາວກະສິກອນເຄີຍໃຊ້ແນວພັນເຂົ້າ IR50404, ແຕ່ມາໃນປະຈຸບັນກໍ່ໄດ້ປ່ຽນມາໃຊ້ແນວພັນເຂົ້າທີ່ມີຄຸນນະພາບສູງ, ເປັນແມງໜ້ອຍ, ຄ່າໃຊ້ຈ່າຍໃນການສີດຢາຂ້າສັດຕູພືດກໍ່ໜ້ອຍກ່ວາ. ສ່ວນລາຄາຂາຍເຂົ້າສານທີ່ມີຄຸນນະພາບສູງນັ້ນ ຍາມໃດກໍ່ເປັນປົກກະຕິ.
ໃນຊຸມປີຜ່ານມາ, ຂະແໜງກະສິກຳນະຄອນເກິ່ນເທີ ໄດ້ສຸມໃສ່ ສ້າງໂຄງປະກອບການຜະລິດຄືນໃໝ່, ຫັນປ່ຽນຜົນລະປູກ, ສັດລ້ຽງໃຫ້ເໝາະສົມກັບເຂດຊີວະພາບແຕ່ລະແຫ່ງ. ສຳລັບເຂດທີ່ຂາດເຂີນນ້ຳຮັບໃຊ້ໃຫ້ແກ່ການຜະລິດນັ້ນ, ທາງນະຄອນໄດ້ແນະນຳໃຫ້ປະຊາຊົນຫັນມາປູກພືດຜັກຊະນິດຕ່າງໆ, ສ່ວນບັນດາເຂດທີ່ມີນ້ຳ, ຮັບປະກັນ ໃຫ້ແກ່ການຜະລິດ ຈຶ່ງໄດ້ປູກເຂົ້າ. ຂະແໜງກະສິກຳໄດ້ຊ່ວຍປະຊາຊົນເລືອກເອົາບັນດາແນວພັນທີ່ມີຄຸນນະພາບ, ຮັບປະກັນສະມັດຕະພາບ, ຄຸນນະພາບ ແລະ ນຳມາເຊິ່ງປະສິດທິຜົນດ້ານເສດຖະກິດ.
ທ່ານ ຟ້າມເຈື່ອງອຽນ, ຮອງຫົວໜ້າພະແນກກະສິກຳ ນະຄອນເກິ່ນ ເທີ ໃຫ້ຮູ້ວ່າ: ເນື້ອທີ່ດິນປູກເຂົ້າແຕ່ລະປີຂອງທ້ອງຖິ່ນ ແມ່ນກ່ວາ 200.000 ເຮັກຕາ, ປະລິມານການຜະລິດເຂົ້າແຕ່ລະປີແມ່ນປະມານແຕ່ 1.3-1.4 ລ້ານໂຕນ. ຂະແໜງກະສິກຳ ນະຄອນເກິ່ນເທີ ກໍ່ກຳນົດແຈ້ງບົດບາດສຳຄັນໃນການ ຄ້ຳປະກັນຄວາມໝັ້ນຄົງດ້ານສະບຽງອາຫານ ຂະນະທີ່ຍັງຮັກສາເນື້ອທີ່ດິນປູກເຂົ້າຢູ່. ທ່ານ ຟ້າມເຈື່ອງອຽນກ່າວວ່າ:
ເພື່ອຮັບປະກັນເນື້ອທີ່ດິນປູກເຂົ້າ ແລະ ບັນຫາຄ້ຳປະກັນຄວາມໝັ້ນຄົງດ້ານສະບຽງອາຫານ, ຂະແໜງກະສິກຳ ນະຄອນເກິ່ນເທີ ກໍ່ໄດ້ປະຕິບັດຕາມແຜນການຫັນປ່ຽນຜົນລະປູກ, ສັດລ້ຽງ. ສຳລັບເຂດຜະລິດກະສິກຳ ໂດຍສະເພາະແມ່ນປູກເຂົ້າ ບໍ່ບັນລຸປະສິດທິຜົນນັ້ນ ຈະຫັນໄປປູກພືດຜັກຕ່າງໆ ແລະ ລ້ຽງປູກສິນໃນນ້ຳ.
ທ່ານປະລິນຍາເອກ ເຈີ່ນງອັກແທັກ, ຫົວໜ້າສະຖາບັນເຂົ້າສານເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໃຫ້ຮູ້ວ່າ: ທາງສະຖາບັນໄດ້ຄົ້ນຄ້ວາ, ຜະລິດແນວພັນເຂົ້າໃໝ່ກ່ວາ 180 ຊະນິດ ເພື່ອຕອບສະໜອງຄວາມຕ້ອງການຂອງບັນດາທ້ອງຖິ່ນ ແລະ ປະຊາຊົນໃນເຂດ. ປະຈຸບັນ, ເນື້ອທີ່ດິນປູກເຂົ້າຂອງເຂດທົ່ງພຽງແມ່ນ້ຳຂອງແມ່ນ 3.2 ລ້ານເຮັກຕາ, ປະລິມານການຜະລິດເຂົ້າບັນລຸແຕ່ 24-25 ລ້ານໂຕນ/ປີ. ດ້ວຍຕົວເລກນີ້, ເຂດທົ່ງພຽງແມ່ນ້ຳຂອງບໍ່ພຽງແຕ່ໄດ້ຄ້ຳປະກັນຄວາມໝັ້ນຄົງດ້ານສະບຽງອາຫານເທົ່ານັ້ນ ຫາກຍັງໄດ້ປະກອບສ່ວນຢ່າງໃຫ່ຍຫຼວງເຂົ້າໃນການສົ່ງອອກເຂົ້າສານຂອງຫວຽດນາມ ອີກດ້ວຍ. ທ່ານແທັກເວົ້າວ່າ:
ສຳລັບເຂດມີຄວາມສ່ຽງຫຼາຍຕ້ອງຫັນໄປປູກພືດຜັກຊະນິດອື່ນໆ ຫຼືວ່າລ້ຽງປູກສິນໃນນ້ຳ. ເຂດທີ່ມີຄວາມສາມາດບົ່ມຊ້ອນໃນການປູກເຂົ້ານັ້ນ ຕ້ອງປະຕິບັດໃຫ້ຖືກຕ້ອງຕາມການແນະນຳຂອງແຕ່ລະທ້ອງຖິ່ນຢ່າງລະອຽດ, ຕ້ອງຍາດແຍ່ງແຫຼ່ງນ້ຳຈືດເພື່ອປູກຝັງໃຫ້ເໝາະສົມກັບແຕ່ລະເຂດ.
ໃນໄລຍະຜ່ານມາ, ຂະແໜງກະສິກຳບັນດາທ້ອງຖິ່ນເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໄດ້ສຸມໃສ່ການສ້າງໂຄງປະກອບການຜະລິດຄືນໃໝ່, ປ່ຽນແປງຈິນຕະການ ການຜະລິດກະແຈກກະຈາຍ ໄປເປັນການຮ່ວມສຳພັນໃນລະບົບມູນຄ່າ; ພ້ອມທັງຫັນບັນດາຂັ້ນຕອນການຜະລິດເປັນກົງຈັກ, ໝູນໃຊ້ວິທະຍາສາດເຕັກໂນໂລຊີ ເພື່ອຫລຸດຜ່ອນຄ່າໃຊ້ຈ່າຍໃນການຜະລິດ, ອຸປະກອນກະສິກຳໃນລະດັບຕ່ຳສຸດ; ສ້າງ ເຂດທົ່ງນາຂະໜາດໃຫ່ຍເພື່ອເພີ່ມມູນຄ່າສິນຄ້າ, ຕອບສະໜອງຄວາມຕ້ອງການພາຍໃນປະເທດ ແລະ ການສົ່ງອອກ.
ໃນສະພາບການປະຈຸບັນ, ບັນຫາຄ້ຳປະກັນຄວາມໝັ້ນຄົງດ້ານສະບຽງອາຫານ ແມ່ນບັນຫາສຳຄັນສຳລັບທຸກໆປະເທດ. ຕໍ່ໜ້າສິ່ງທ້າທາຍຂອງການປ່ຽນແປງຂອງດິນຟ້າອາກາດ, ໄພແຫ້ງແລ້ງ, ນ້ຳເຄັມຊຶມ ພວມເກີດຂຶ້ນຢ່າງໜັກໜ່ວງນັ້ນ, ເລື່ອງຮັບປະກັນການປູກເຂົ້າໃນລະດູໜາວຕໍ່ໃສ່ລະດູບານໃໝ່ ບັນລຸທັງສະມັດຕະພາບ ແລະ ມີລາຄາຂາຍໄດ້ດີຄືໃນປະຈຸບັນນັ້ນ ແມ່ນສັນຍານທີ່ດີ ເພື່ອໃຫ້ປະຊາຊົນຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ຍິ່ງມີຄວາມຜູກພັນກັບຕົ້ນເຂົ້າ ແລະ ທົ່ງນາກ່ວາອີກ.