(vovworld) ເມືອງພູດອຍ ນາມດົງ, ແຂວງເທື່ອທຽນເຫ໋ວ, ມີປະຊາຊົນເກືອບ 45.000 ຄົນ, ໃນນັ້ນຊາວເຜົ່າສ່ວນຫນ້ອຍກວມເກືອບເຄິ່ງໜຶ່ງ, ຫຼາຍກວ່າໝູ່ ແມ່ນເຜົ່າ ເກີຕູ, ສ່ວນຍັງເຫຼືອແມ່ນເຜົ່າອື່ນໆຄື: ຕາໂອຍ, ປາໂກ, ປາຮີ, ເວິນກ່ຽວ…. ແຂວງເທື່ອທຽນເຫ໋ວ ໄດ້ຄັດເລືອກເມືອງ ນາມດົງ ເພື່ອປະຕິບັດທົດລອງໂຄງການກໍ່ສ້າງຊົນນະບົດໃໝ່ ໄລຍະ 2011 – 2015. ແຜນນະໂຍບາຍນີ້ໄດ້ຮັບການສະໜັບສະໜູນຈາກປະຊາຊົນເປັນຢ່າງດີ.
ເມືອງພູດອຍນາມດົງ ແຂວງເທື່ອທຽນເຫວ໋ ກໍ່ສ້າງຊົນນະບົດໃໝ່
(ພາບ: google.com.vn)
ຕາແສງ ເທື້ອງເຍິດ, ເມືອງນາມດົງ ມີປະຊາຊົນເກືອບ 500 ຄອບຄົວ, ສ່ວນຫຼາຍແມ່ນເຜົ່າເກີຕູ. ຊີວິດຂອງປະຊາຊົນຢູ່ທີ່ນີ້ສ່ວນຫຼາຍແມ່ນອີງໃສ່ຕົ້ນຢາງພາລາ, ເຮັດເສດຖະກິດສວນ ແລະ ປູກປ່າ; ລາຍຮັບສະເລ່ຍໃສ່ຫົວຄົນໃນແຕ່ລະປີບັນລຸ 10 ລ້ານດົ່ງ. ເມື່ອຕາແສງໄດ້ຮັບເລືອກເປັນຕາແສງປະຕິບັດທົດລອງການກໍ່ສ້າງຊົນນະບົດໃໝ່, ລັດໄດ້ລົງທຶນ 6,2 ຕື້ດົ່ງ ໃຫ້ແກ່ການກໍ່ສ້າງທາງຄົມມະນາຄົມຊົນນະບົດດ້ວຍເບຕົງ, ຍົກລະດັບສຸກສາລາ, ໂຮງຮຽນອະນຸບານ, ຫໍວັດທະນະທຳ, ເຂດຫຼິ້ນກິລາ… ມາຮອດປະຈຸບັນ, ທົ່ວຕາແສງສາມາດປະຕິບັດມາດຕະຖານຊົນນະບົດໃໝ່ໄດ້ 10/19 ມາດຕະຖານ. ທ່ານ Nguyen Ngoc Moi, ປະທານຄະນະກຳມະການແນວໂຮມຕາແສງ ເທື້ອງເຍິດ, ໃຫ້ຮູ້ວ່າ:
”ຍາມໃດຄະນະກຳມະການແນວໂຮມຕາແສງກໍ່ມີການປະສານສົມທົບກັນກັບອຳນາດການປົກຄອງ, ແລະ ແຕ່ລະຄອບຄົວຢ່າງແໜ້ນແຟ້ນ ເພື່ອໂຄສະນາ, ຂົນຂວາຍພໍ່ແມ່ປະຊາຊົນໃນຕາແສງເຂົ້າຮ່ວມການກໍ່ສ້າງຊົນນະບົດໃໝ່. ເພື່ອບັນລຸໄດ້ 19 ມາດຕະຖານທີ່ໄດ້ວາງອອກ, ແນວໂຮມ ແລະ ທຸກຂະແໜງການ ຕ້ອງຂົນຂວາຍປະຊາຊົນປະກອບທີ່ດິນ, ຕົ້ນໄມ້ ແລະ ທຸກສິ່ງທຸກຢ່າງທີ່ກ່ຽວຂ້ອງເຖິງການກໍ່ສ້າງຊົນນະບົດໃໝ່ . ບັນດາມາດຕະຖານໃດທີ່ມີຢູ່ແລ້ວ, ປະຕິບັດງ່າຍ ຈະຂົນຂວາຍປະຊາຊົນເຮັດກ່ອນ, ບັນດາມາດຕະຖານໃດຍັງຄ້າງຄາ ແລະ ຫຍຸ້ງຍາກແມ່ນເຮັດຕາມຫຼັງ”.
ສ່ວນຢູ່ຕາແສງເຮືອງເຊີນ, ເມືອງນາມດົງ, ມີກວ່າ 300 ຄອບຄົວຊາວເຜົ່າເກີຕູ ໄດ້ປູກຢາງພາລາ 400 ເຮັກຕາ ແລະ ຕົ້ນໄມ້ອື່ນ 300 ເຮັກຕາ. ບັນດາຄອບຄົວເກືອບທັງໝົດລ້ວນແຕ່ມີປ່າ, ຄອບຄົວມີເນື້ອທີ່ຫຼາຍສຸດແມ່ນ 6 ເຮັກຕາ, ຄອບຄົວມີເນື້ອທີ່ໜ້ອຍສຸດແມ່ນ 2 ເຮັກຕາ. ເສດຖະກິດສວນ, ລ້ຽງສັດ ກໍ່ນຳມາເຊິ່ງແຫຼ່ງລາຍຮັບຫຼວງຫຼາຍໃຫ້ແກ່ຊາວຊົນເຜົ່າ. ມີຫຼາຍຄອບຄົວແຕ່ລະປີບັນລຸລາຍຮັບແຕ່ 60 ເຖິງ 100 ລ້ານດົ່ງ. ໂດຍຕອບສະໜອງແຜນນະໂຍບາຍກໍ່ສ້າງຊົນນະບົດໃໝ່, ຊາວຊົນເຜົ່າໄດ້ລົງທຶນ ຂຸດ ແລະ ກໍ່ນ້ຳສ້າງ, ທາງເບຕົງເຊື່ອມຕໍ່ບ້ານກັບບ້ານ. ທ່ານ Tran Xuan Bh La, ຊາວເຜົ່າບ້ານ 7, ຕາແສງເຮືອງເຊີນ, ໃຫ້ຮູ້ວ່າ:
”ຊາວຊົນເຜົ່າໃນບ້ານ, ໃຜໆກໍ່ຢາກເຮັດໃຫ້ບ້ານຂອງຕົນມີການປ່ຽນໃໝ່, ຂຽວ, ສະອາດ ແລະ ສວຍງາມ, ມີທາງຄົມມະນາຄົມກວ້າງຂວາງເພື່ອໄປມາຢ່າງສະດວກສະບາຍ, ດັ່ງນັ້ນທຸກຄົນໄດ້ປະກອບສ່ວນຢ່າງສຸດຈິດສຸດໃຈ. ປະຈຸບັນ, ໝູ່ບ້ານໄດ້ມີທາງເບຕົງ, ມີຕົ້ນໄມ້ຢູ່ລຽບຕາມ 2 ຝາກທາງ, ຊີວິດຂອງປະຊາຊົນໄດ້ພັດທະນາຢ່າງເຫັນໄດ້ຊັດ, ພວກຂ້າພະເຈົ້າດີໃຈຫຼາຍ”.
ເມືອງພູດອຍນາມດົງ ແຂວງເທື່ອທຽນເຫວ໋ ກໍ່ສ້າງຊົນນະບົດໃໝ່
(ພາບ: google.com.vn)
ໂຄງການກໍ່ສ້າງຊົນນະບົດໃໝ່ຢູ່ເມືອງນາມດົງ, ແຂວງເທື່ອທຽນເຫ໋ວ ໄລຍະ 2011 – 2015 ແມ່ນສຸມໃສ່ພັດທະນາເສດຖະກິດສວນ, ປ່າຢ່າງໝັ້ນຄົງ. ສູ້ຊົນເຮັດໃຫ້ເນື້ອທີ່ສວນແຕ່ລະເຮັກຕາຈະສ້າງລາຍຮັບໄດ້ແຕ່ 27 – 30 ລ້ານດົ່ງຕໍ່ປີ, ສະເພາະຕົ້ນຢາງພາລາບັນລຸໄດ້ແຕ່ 45 – 50 ລ້ານດົ່ງ; ເສດຖະກິດປ່າແຕ່ 40 – 45 ລ້ານດົ່ງຕໍ່ເຮັກຕາຕໍ່ປີ… ທ່ານ Ngo Van Chien, ປະທານຄະນະກຳມະການປະຊາຊົນເມືອງນາມດົງ, ໃຫ້ຮູ້ວ່າ:
”ເມືອງນາມດົງສູ້ຊົນກາຍເປັນຊົນນະບົດໃໝ່ໃນປີ 2015, ປີ 2012 ສູ້ຊົນເພື່ອມີ 2 ຕາແສງຊົນນະບົດໃໝ່, ປີ 2014 ມີ 3 ຕາແສງ, ປີ 2015 ມີ 3 ຕາແສງຊົນນະບົດໃໝ່. ສ່ວນ 2 ຕາແສງເທື້ອງລອງ ແລະ ເຮືອງຮື້ວ (Huong Huu) ອັດຕາຄອບຄົວທີ່ທຸກຍາກຍັງສູງ, ດັ່ງນັ້ນພວກຂ້າພະເຈົ້າສູ້ຊົນຮອດປີ 2015 ບັນລຸໄດ້ 80% ມາດຕະຖານທີ່ໄດ້ວາງອອກ. ປະຈຸບັນ, ທົ່ວລະບົບການເມືອງໄດ້ເຂົ້າຮ່ວມການກໍ່ສ້າງຊົນນະບົດໃໝ່”.
ນອກຈາກບັນດາມາດຕະຖານທີ່ເປັນພື້ນຖານໃນຈຳນວນ 19 ມາດຕະຖານແລ້ວ, ບັນດາມາດຕະຖານທີ່ຍັງເຫຼືອຄື ແຕ່ລະຕາແສງຕ້ອງມີຕະຫຼາດ, ຫັນແຮງງານຈາກກະສີກຳໄປສູ່ອຸດສາຫະກຳນັ້ນ ແມ່ນບັນດາມາດຕະຖານຍາກທີ່ຈະປະຕິບັດໄດ້ຢູ່ເມືອງພູດອຍຄືນາມດົງ.
ມາຢ້ຽມຢາມນາມດົງ, ໃຜໆກໍ່ຮູ້ສຶກໄດ້ການປ່ຽນໃໝ່ຂອງເຂດດິນແດນແຫ່ງນີ້. ດ້ວຍທາງຢູຢາງ, ທາງເບຕົງໄປຍັງໝູ່ບ້ານ, ມີໂຮງຮຽນຖືກກໍ່ສ້າງແບບຖາວອນ. ປະຈຸບັນ, ພະນັກງານ ແລະ ປະຊາຊົນບັນດາເຜົ່າເມືອງນາມດົງ, ແຂວງເທື່ອທຽນເຫວ໋ ພວມສືບຕໍ່ສຸມກຳລັງເຫື່ອແຮງໃຫ້ແກ່ການກໍ່ສ້າງຊົນນະບົດໃໝ່. ດ້ວຍວິທີເຮັດຢ່າງມີຫົວຄິດປະດິດສ້າງ, ຖືກກັບຈິດໃຈຂອງປະຊາຊົນ, ເມືອງນາມດົງ ບໍ່ພຽງແຕ່ສູ້ຊົນກໍ່ສ້າງຊົນນະບົດໃໝ່ໃຫ້ສຳເລັດເທົ່ານັ້ນ, ຫາກຍັງສູ້ຊົນກາຍເປັນເມືອງ “ຊົນນະບົດທີ່ເປັນແບບຢ່າງ”ຂອງແຂວງເທື່ອທຽນເຫວ໋ ໃນປີ 2015 ອີກດ້ວຍ