(vovworld) - ໂດຍແມ່ນເມືອງໜຶ່ງຢູ່ເຂດພູດອຍ, ຫ່າງຈາກນະຄອນແທງຮ໋ວາ ໄປທາງທິດຕາເວັນຕົກເກືອບ 50 ກມ. ທໍ້ຊວນ ແມ່ນໜຶ່ງໃນບັນດາເມືອງນຳໜ້າໃນການພັດທະນາເສດຖະກິດ, ສັງຄົມ ແລະ ບັນລຸບາດກ້າວພັດທະນາໃໝ່ໃນຂົງເຂດເສດຖະກິດກະສີກຳ, ຊົນນະບົດ. ພິເສດ, ພາຍຫຼັງເກືອບ 3 ປີ ແຫ່ງການຜັນຂະຫຍາຍຂະບວນການກໍ່ສ້າງຊົນນະບົດໃໝ່, ຊີວິດຂອງປະຊາຊົນຢູ່ທີ່ນີ້ນັບມື້ນັບໄດ້ຮັບການພັດທະນາ; ລະບົບການເມືອງ, ຄວາມໝັ້ນຄົງໃນສັງຄົມໄດ້ຮັບການຮັກສາໄວ້…ບັນດາຜົນງານໃນເບື້ອງຕົ້ນແຫ່ງການຜັນຂະຫຍາຍການກໍ່ສ້າງຊົນນະບົດໃໝ່ຢູ່ເມືອງດັ່ງກ່າວ ໄດ້ສ້າງເງື່ອນໄຂສະດວກ ເພື່ອໃຫ້ທໍ້ຊວນ ປະຕິບັດສຳເລັດຈຸດໝາຍກໍ່ສ້າງຊົນນະບົດໃໝ່.
ເມືອງທໍ້ຊວນ ກໍ່ສ້າງຊົນນະບົດໃໝ່
(ພາບ: google.com.vn)
ເມືອງທໍ້ຊວນ ໄດ້ຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ 37 ຕາແສງໃນເມືອງ. ພິເສດ, ວຽກງານໂຄສະນາໄດ້ຮັບການຍູ້ແຮງ. ຂະບວນການແຂ່ງຂັນ ”ທໍ້ຊວນ ຮ່ວມແຮງຮ່ວມໃຈກໍ່ສ້າງຊົນນະບົດໃໝ່” ໂດຍເມືອງປຸກລະດົມ ໄດ້ບັນລຸຜົນງານໃນເບື້ອງຕົນ. ມາຮອດປະຈຸບັນ, 100% ຈຳນວນຕາແສງໃນເມືອງທໍ້ຊວນ ໄດ້ປະຕິບັດສຳເລັດວຽກງານສຳຫຼວດ, ຕີລາຄາສະພາບຕົວຈິງຢູ່ເຂດຊົນນະບົດ ແລະ ວາງແຜນກຳນົດກໍ່ສ້າງຊົນນະບົດໃໝ່. ຜ່ານການກວດກາຕີລາຄາກໍ່ເຫັນວ່າ ເມືອງທໍ້ຊວນ ມີ 30 ຕາແສງບັນລຸແຕ່ 5-8/19 ມາດຖານແຫ່ງຊາດ. ກໍ່ເຊັ່ນດຽວກັບບັນດາທ້ອງຖີ່ນອື່ນໆວຽກງານກໍ່ສ້າງຊົນນະບົດໃໝ່ຢູ່ເມືອງທໍ້ຊວນ ໃນເບື້ອງຕົ້ນປະສົບກັບຄວາມຫຍຸ້ງຍາກຫຼາຍຢ່າງຄື: ການຫັນປ່ຽນໂຄງປະກອບເສດຖະກິດຢູ່ບາງຕາແສງຍັງຊັກຊ້າ; ລາຍຮັບຂອງປະຊາຊົນບໍ່ທັນສູງປານໃດ; ແຫຼ່ງທຶນຈາກງົບປະມານຍັງຈຳກັດຢູ່… ແຕ່ໃນ 2 ປີຜ່ານມາ, ເລື່ອງຜັນຂະຫຍາຍການກໍ່ສ້າງຊົນນະບົດໃໝ່ໃນບໍລິເວນເມືອງທໍ້ຊວນ ພັດບັນລຸໄດ້ບັນດາຜົນງານທີ່ຕັ້ງໜ້າ. ທົ່ວແຂວງໄດ້ກໍ່ສ້າງ ແລະ ຍົກລະດັບເຮືອນຢູ່ໄດ້ກວ່າ 600 ຫຼັງ, ກໍ່ສ້າງຄອງເໝືອງລະບາຍນ້ຳໄດ້ກ່ວາ 6 ກມ; ກໍ່ສ້າງທາງຄົມມະນາຄົມເຊື່ອມຕໍ່ຕາແສງ, ບ້ານໄດ້ເກືອບ 100 ກມ. ນອກນັ້ນຍັງບຸລະນະສ້ອມແປງຫໍວັດທະນະທຳ, ສູນກິລາຂອງບ້ານ, ຕາແສງໄດ້ກວ່າ 50 ແຫ່ງ ກໍ່ຄືຫ້ອງຮຽນທຸກຊັ້ນນັບຮ້ອຍຫ້ອງ. ທ່ານ Le Huy Hoang , ຮອງປະທານເມືອງທໍ້ຊວນ, ຮອງຫົວໜ້າຄະນະຊີ້ນຳການກໍ່ສ້າງຊົນນະ ບົດໃໝ່, ໃຫ້ຮູ້ວ່າ:
”ສຳຫຼັບການກໍ່ສ້າງຊົນນະບົດໃໝ່, ທາງເມືອງຍາມໃດກໍ່ຕິດຕາມ, ແນະນຳ ແລະ ຜັນຂະຫຍາຍຢູ່ບັນດາຕາແສງ, ບັນດາອົງການຈັດຕັ້ງມະຫາຊົນ ແລະ ໝູ່ປະຊາຊົນ. ໃນວິວັດແຫ່ງການຜັນຂະຫຍາຍພວກເຮົາໄດ້ໂຄສະນາກ່ຽວກັບການກໍ່ສ້າງຊົນນະບົດໃໝ່ຢ່າງເລິກເຊິ່ງ ແລະ ກວ້າງຂວາງ, ເພື່ອໃຫ້ທຸກຄົນໄດ້ຮູ້ ແລະ ເຂົ້າໃຈກ່ຽວກັບການກໍ່ສ້າງຊົນນະບົດໃໝ່. ຜ່ານ 2 ປີ ແຫ່ງການປະຕິບັດ, ຄວາມຮູ້ຂອງປະຊາຊົນໄດ້ຮັບການຍົກສູງຂຶ້ນ, ເຂົາເຈົ້າມີຄວາມມ່ວນຊື່ນຫຼາຍ ແລະ ເຊື່ອໝັ້ນຕໍ່ແຜນນະໂຍບາຍ, ນະໂຍບາຍຂອງພັກ, ລັດ. ດ້ວຍທິດນຳ ”ປະຊາຊົນຮູ້, ປະຊາຊົນປຶກສາຫາລື ແລະ ປະຊາຊົນຊົມໃຊ້” ດັ່ງນັ້ນ, ໃນເບື້ອງຕົ້ນ ພວກເຮົາໄດ້ຮັບຄວາມສະດວກໃນການກໍ່ສ້າງຊົນນະບົດໃໝ່”.
(ພາບ: google.com.vn)
ຢູ່ຕາແສງ ໄຕໂຮ່ ໃນເມືອງ ທໍ້ຊວນ, ເມື່ອລົງມືກໍ່ສ້າງຊົນນະບົດໃໝ່, ທາງຕາແສງໄດ້ລະດົມທັງລະບົບການເມືອງເຂົ້າຮ່ວມ, ພິເສດທາງຕາແສງໄດ້ຖືວຽກງານວາງແຜນກຳນົດເປັນສຳຄັນ. ເພື່ອມີບັນດາແນວຄວາມຄິດທີ່ດີ, ຕິດແທດກັບສະພາບຕົວຈິງ, ບັນດາສະມາຊິກໃນຄະນະຊີ້ນຳການການກໍ່ສ້າງຊົນນະບົດໃໝ່ຂອງຕາແສງໄດ້ໄປຢ້ຽມຢາມ, ຮຳ່ຮຽນຢູ່ບັນດາຕາແສງທີ່ເປັນແບບຢ່າງຂອງທ້ອງຖີ່ນອື່ນໆ, ຫຼັງຈາກນັ້ນປຶກສາຫາລືກັບປະຊາຊົນ, ຄິດໄລ່ແຕ່ລະມາດຕະຖານ, ວິທີການຜັນຂະຫຍາຍຢູ່ແຕ່ລະບ້ານຢ່າງລະອຽດ. ທ່ານ Pham Van Tung ຢູ່ບ້ານ 4, ຕາແສງ ໄຕໂຮ່, ເມືອງທໍ້ຊວນ, ໃຫ້ຮູ້ວ່າ:
”ຜ່ານ 2 ປີ ແຫ່ງການປະຕິບັດການກໍ່ສ້າງຊົນນະບົດໃໝ່, ໂສມໜ້າຂອງຊົນນະບົດນັບມື້ນັບໄດ້ຮັບການປ່ຽນແປງ, ຊີວິດທາງດ້ານເສດຖະກິດໄດ້ຮັບການຍົກສູງຂຶ້ນ. ທາງຄົມມະນາຄົມໄປມາຢ່າງສະດວກສະບາຍ, ພໍ່ແມ່ປະຊາຊົນດີໃຈຫຼາຍ. ສຳຫຼັບຄອບຄົວຂ້າພະເຈົ້າ, ຊີວິດທາງດ້ານເສດຖະກິດ ແລະ ວັດທະນະທຳນັບມື້ນັບດີຂຶ້ນ… ມີຊົນນະບົດໃໝ່, ການໄປມາສະດວກສະບາຍ, ການຄ້າກໍ່ໄດ້ຮັບການເປີດກວ້າງ ອັນໄດ້ສ້າງລາຍຮັບຕື່ມອີກທົບ 3, 4 ເທົ່າເມື່ອທຽບໃສ່ກ່ອນນີ້. ຄອງເໝືອງໄດ້ຮັບການບຸລະນະ ເຮັດໃຫ້ວຽກໄຮ່ການນາສະດວກສະບາຍທີ່ສຸດ”.
(ພາບ: google.com.vn)
ປະຈຸບັນ, ທໍ້ຊວນ ພວມວາງແຜນການເຖິງປີ 2015, ຈະມີ 8 ຕາແສງ, ໃນນັ້ນມີ 7 ຕາແສງທີ່ເປັນແບບຢ່າງຂອງເມືອງ ແລະ 1 ຕາແສງທີ່ເປັນແບບຢ່າງຂອງແຂວງປະຕິບັດສຳເລັດການກໍ່ສ້າງຊົນນະບົດໃໝ່ແລະ ຮອດປີ 2020 ຈະມີ 50% ຈຳນວນຕາແສງປະຕິບັດສຳເລັດການກໍ່ສ້າງຊົນນະບົດໃໝ່. ທ່ານ Le Huy Hoang, ຮອງປະທານເມືອງທໍ້ຊວນ, ຖືວ່າ:
”ຂ້າພະເຈົ້າຖືວ່າວຽກງານໂຄສະນາຕ້ອງແມ່ນວຽກງານທຳອິດໃນການກໍ່ສ້າງຊົນນະບົດໃໝ່. ຕ້ອງເຮັດແນວໃດໃຫ້ພະນັກງານ, ປະຊາຊົນທຸກຄົນເຂົ້າໃຈໄດ້ຄວາມຮັບຜິດຊອບຂອງຕົນໃນການກໍ່ສ້າງຊົນນະບົດໃໝ່. ທີສອງແມ່ນຕ້ອງເສີມຂະຫຍາຍລັກສະນະປະຊາທິປະໄຕໃນການກໍ່ສ້າງຊົນນະບົດໃໝ່. ທີສາມແມ່ນບົດບາດຂອງລະບົບການເມືອງ, ນັ້ນແມ່ນເມື່ອກໍ່ສ້າງຊົນນະບົດໃໝ່, ທັງລະບົບການເມືອງຕ້ອງເຂົ້າຮ່ວມຢ່າງເດັດຂາດ”.
ມາຮອດປະຈຸບັນ, ເມືອງທໍ້ຊວນ ສາມາດລະດົມທຶນໄດ້ກວ່າ 500 ຕື້ດົ່ງ, ໃນນັ້ນທຶນລະດົມຈາກຊຸມຊົນແມ່ນ 346 ຕື້ດົ່ງ, ກວມ 69%, ຂອງຈຳນວນທຶນທັງໝົດເພື່ອກໍ່ສ້າງຊົນນະບົດໃໝ່. ໃນໄລຍະຈະມາເຖິງ, ເມືອງທໍ້ຊວນສືບຕໍ່ກວດກາ, ເພີ່ມເຕີມແຜນກຳນົດພັດທະນາເສດຖະກິດ - ສັງຄົມໃນບໍລິເວນເມືອງ, ບົນພື້ນຖານນັ້ນ, ສົ່ງເສີມທຸກພາກສ່ວນເສດຖະກິດລົງທຶນພັດທະນາການຜະລິດ, ດຳເນີນທຸລະກິດ, ລະດົມທຸກແຫຼ່ງກຳລັງເພື່ອຫັນລະບົບໂຄງລ່າງຊົນນະບົດເປັນທັນສະໄໝເທື່ອລະກ້າວ.