(vovworld) – ການພັດທະນາໝູ່ບ້ານອາຊີບໃນປະຈຸບັນ ແມ່ນໜຶ່ງໃນບັນດາມາດຕະການສຳຄັນ ເພື່ອແນໃສ່ຫັນປ່ຽນໂຄງປະກອບເສດຖະກິດຢູ່ເຂດຊົນນະບົດ, ມັນບໍ່ພຽງແຕ່ແກ້ໄຂວຽກເຮັດງານທຳຢູ່ກັບທີ່, ຍົກສູງລາຍຮັບໃຫ້ແກ່ປະຊາຊົນເທົ່ານັ້ນ, ຫາກການພັດທະນາບັນດາໝູ່ບ້ານອາຊີບຍັງປະກອບສ່ວນຊຸກຍູ້ທ້ອງຖີ່ນຕ່າງໆບັນລຸບັນດາມາດຖານໃນໂຄງການກໍ່ສ້າງຊົນນະບົດໃໝ່ອີກດ້ວຍ. ຟູ່ຊວຽນ, ແມ່ນເມືອງຢູ່ທາງທິດໃຕ້ນະຄອນຫຼວງຮ່າໂນ້ຍ ແມ່ນເມືອງທີ່ບັນລຸໄດ້ຜົນງານຄືດັ່ງກ່າວ.
ນັກສິລະປະການແກະສະຫຼັກຢູ່ໝູ່ບ້ານອາຊີບ ຟູ໋ຊວຽນ
(ພາບ: ອິນເຕີແນດ)
ໂດຍໄດ້ຮັບຖືວ່າແມ່ນເມືອງທີ່ມີນັບຮ້ອຍອາຊີບ, ນັບແຕ່ດົນນານມາແລ້ວ, ຟູ່ຊວຽນ ໄດ້ມີຊື່ສຽງດ້ວຍຫຼາຍໝູ່ບ້ານອາຊີບຫັດຖະກຳທີ່ເປັນມູນເຊື້ອ. ຢູ່ຮ່າໂນ້ຍ, ມີກວ່າ 1000 ໝູ່ບ້ານອາຊີບ, ສະເພາະຟູ່ຊວຽນ ໄດ້ມີເຖິງ125 ໝູ່ບ້ານອາຊີບ, ຢືນອັນດັບ 3 ໃນຈຳນວນ 20 ເມືອງຂອງຮ່າໂນ້ຍ. ນີ້ແມ່ນທ່າແຮງຂອງໝູ່ບ້ານອາຊີບ ເຊິ່ງບໍ່ແມ່ນຢູ່ທ້ອງຖີ່ນໃດກໍ່ມີ. ເຖິງຢ່າງໃດກໍ່ຕາມ, ໃນຊຸມປີມໍ່ໆມານີ້, ຫຼາຍໝູ່ບ້ານອາຊີບຢູ່ທີ່ນີ້ມີໄພສູນຫາຍໄປ. ເພື່ອຟື້ນຟູ ແລະ ພັດທະນາອາຊີບຫັດຖະກຳທີ່ເປັນມູນເຊື້ອຄືນໃໝ່, ອຳນາດການປົກຄອງເມືອງຟູ່ຊວຽນ ໄດ້ຕັ້ງໜ້າຜັນຂະຫຍາຍຍຸດທະສາດກໍ່ສ້າງຊົນນະບົດໃໝ່ ຕິດພັນກັບການພັດທະນາໝູ່ບ້ານອາຊີບ. ບັນຫາສຳຄັນແມ່ນຕ້ອງຮັບຮູ້ຢ່າງຄົບຖ້ວນກ່ຽວກັບການກໍ່ສ້າງຊົນນະບົດໃໝ່. ທ່ານ ເຈືອງເທ໋ເກົ່າ, ເລຂາຄະນະພັກເມືອງຟູ໋ຊວຽນ, ໃຫ້ຮູ້ວ່າ:
“ໃນຈຳນວນ 19 ມາດຖານກ່ຽວກັບການກໍ່ສ້າງຊົນນະບົດໃໝ່, ມີມາດຖານສ້າງໂຄງປະກອບກະສີກຳຄືນໃໝ່. ຢາກຫັນປ່ຽນໂຄງປະກອບແຮງງານ ແມ່ນຕ້ອງພັດທະນາໝູ່ບ້ານອາຊີບ ແລະ ຕ້ອງປ່ຽນໃໝ່ແນວຄວາມຄິດ, ວິທີເຮັດ ເພື່ອໃຫ້ປະຊາຊົນໝູ່ບ້ານຕ່າງໆໃນເມືອງ ລ້ວນແຕ່ມີອາຊີບ ແລະ ລາຍຮັບຈາກການຜະລິດກະສີກຳ ແລະ ຈາກໝູ່ບ້ານອາຊີບ, ເຮັດໃຫ້ຊີວິດຂອງເຂົາເຈົ້ານັບມື້ນັບໄດ້ຮັບການປັບປຸງໃຫ້ດີຂຶ້ນ“.
ໝູ່ບ້ານອາຊີບຈັກສານຢູ່ ຟູ໋ຊວຽນ
(ພາບ: ອິນເຕີແນດ) ໜຶ່ງໃນບັນດາມາດຖານພື້ນຖານໃນໂຄງການຈຸດໝາຍກໍ່ສ້າງຊົນນະບົດໃໝ່ ນັ້ນແມ່ນ ຕ້ອງຮັບປະກັນ 90% ຈຳນວນພົນລະເມືອງມີວຽກເຮັດງານທຳ. ອຳນາດການປົກຄອງເມືອງຟູ໋ຊວນ ພວມຜັນຂະຫຍາຍຍຸດທະສາດກໍ່ສ້າງຊົນນະບົດໃໝ່ ຕິດພັນກັບການພັດທະນາໝູ່ບ້ານອາຊີບ, ໝູ່ບ້ານອາຊີບຕິດພັນກັບການທ່ອງທ່ຽວເທື່ອລະກ້າວ, ສູ້ຊົນເພື່ອໃຫ້ຄົນງານທັງໝົດຢູ່ບັນດາໝູ່ບ້ານອາຊີບລ້ວນແຕ່ມີວຽກເຮັດງານທຳ. ເມືອງສ້າງເງື່ອນໄຂກ່ຽວກັບທີ່ດິນ, ໜ້າພຽງໃຫ້ແກ່ບັນດາຂະແໜງອາຊີບຫັດຖະກຳ, ພິເສດແມ່ນບັນດາໝູ່ບ້ານອາຊີບທີ່ມີທ່າແຮງຄື: ອາຊີບຕັດຫຍິບ, ຜະລິດເກີບໜັງ, ຖັກແສ່ວ, ....ຍ້ອນເຫດນັ້ນບັນດາຮາກຖານຜະລິດໃນໝູ່ບ້ານອາຊີບຈຶ່ງມີເງື່ອນໄຂເປີດກວ້າງການຜະລິດ, ສ້າງລາຍຮັບໃຫ້ຜູ້ອອກແຮງງານໃນທ້ອງຖີ່ນນັບພັນຄົນ. ພາຍຫຼັງ 2 ປີແຫ່ງການຜັນຂະຫຍາຍຍຸດທະສາດພັດທະນາໝູ່ບ້ານອາຊີບຕິດພັນກັບການກໍ່ສ້າງຊົນນະບົດໃໝ່, ມາຮອດປະຈຸບັນໄດ້ມີກວ່າ 90% ຈຳນວນພົນລະເມືອງໃນເມືອງມີລາຍຮັບຈາກໝູ່ບ້ານອາຊີບທີ່ເປັນມູນເຊື້ອ. ທ່ານ ເຈືອງເທ໋ເກົ່າ, ເລຂາຄະນະພັກເມືອງຟູ໋ຊວຽນ, ໃຫ້ຮູ້ຕື່ມອີກວ່າ:
“ໝູ່ບ້ານອາຊີບໄດ້ປະກອບສ່ວນຍົກສູງລາຍຮັບ ແລະ ແກ້ໄຂວຽກເຮັດງານທຳໃຫ້ແກ່ປະຊາຊົນ ກໍ່ຄືຮັບປະກັນສະຖຽນລະພາບຢູ່ເຂດຊົນນະບົດ. ຍ້ອນເຫດນັ້ນ, ຄະນະກຳມະການ, ຄະນະພັກເມືອງພວກຂ້າພະເຈົ້າ ໄດ້ເລືອກເອົາວັນທີ 26/10 ປະຈຳປີເປັນວັນເຊີດຊູໝູ່ບ້ານອາຊີບທີ່ເປັນມູນເຊື້ອຢູ່ຟູ໋ຊວຽນ“.
ຊ່າງໄມ້ຢູ່ຟູ໋ຊວຽນ
(ພາບ: ອິນເຕີແນດ) ກຳນົດໄດ້ຄຸນຄ່າຂອງໝູ່ບ້ານອາຊີບທີ່ເປັນມູນເຊື້ອ ບໍ່ພຽງແຕ່ນຳມາເຊິ່ງຄຸນຄ່າດ້ານເສດຖະກິດເທົ່ານັ້ນ, ຫາກຍັງຄຸນຄ່າດ້ານວັດທະນະທຳ ທີ່ຕິດພັນກັບສະພາບແວດລ້ອມແຫ່ງການດຳລົງຊີວິດຂອງປະຊາຊົນອີກດ້ວຍ. ມີຫຼາຍໝູ່ບ້ານອາຊີບຢູ່ຟູ໋ຊວຽນ ບໍ່ພຽງແຕ່ເອົາໃຈໃສ່ເປັນພິເສດເຖິງການສ້າງວຽກເຮັດງານທຳເປັນປົກກະຕິ, ເພີ່ມລາຍຮັບໃຫ້ແກ່ປະຊາຊົນເທົ່ານັ້ນ, ຫາກຍັງຖືເປັນສຳຄັນເຖິງວຽກງານຮັກສາວັດທະນະທຳ, ພັດທະນາການທ່ອງທ່ຽວໝູ່ບ້ານອາຊີບອີກດ້ວຍ. ຄຽງຂ້າງເລື່ອງຈັດຕັ້ງການເຊີດຊູບັນດາໝູ່ບ້ານອາຊີບ, ນັກສິລະປະການໃນແຕ່ລະປີແລ້ວ, ອຳນາດການປົກຄອງຍັງສ້າງເງື່ອນໄຂໃຫ້ແກ່ການແນະນຳຜະລິດຕະພັນຕິດພັນກັບການໂຄສະນາ ແລະ ສົ່ງເສີມບັນດາລາຍການທ່ອງທ່ຽວໝູ່ບ້ານອາຊີບອີກ. ທ່ານ ຫງວຽນກົງຄາ, ເຈົ້າຂອງຮາກຖານຜະລິດ ຢູ່ໝູ່ບ້ານອາຊີບຕັດຫຍິບ ເວິນຕື່, ຖືວ່າ:
“ການເຊີດຊູໝູ່ບ້ານອາຊີບ ກໍ່ແມ່ນໂອກາດ ເພື່ອໃຫ້ນັກທ່ອງທ່ຽວຈາກທຸກສາລະທິດມາຢ້ຽມຢາມຟູ໋ຊວຽນ, ຜ່ານນັ້ນ ຈະຂະຫຍາຍຢ່າງກວ້າງຂວາງຢູ່ຮ່າໂນ້ຍເວົ້າສະເພາະ ແລະ ໃນທົ່ວປະເທດເວົ້າລວມ. ຜ່ານລາຍການທ່ອງທ່ຽວ ຕ່າງໆ, ນັກທ່ອງທ່ຽວຈະມີໂອກາດມາຢາມບັນດາໝູ່ບ້ານອາຊີບທີ່ເປັນມູນເຊື້ອໃນທົ່ວປະເທດ“.
ໝູ່ບ້ານຜະລິດເຄື່ອງປັ້ນດິນເຜົາຢູ່ຟູ໋ຊວຽນ
(ພາບ: ອິນເຕີແນດ) ໜຶ່ງໃນບັນດາຈຸດໝາຍຂອງໂຄງການກໍ່ສ້າງຊົນນະບົດໃໝ່ທີ່ພວມໄດ້ຮັບການຜັນຂະຫຍາຍຢ່າງກວ້າງຂວາງຢູ່ຫວຽດນາມ ນັ້ນແມ່ນ: ກໍ່ສ້າງຊົນນະບົດໃໝ່ທີ່ມີໂຄງລ່າງເສດຖະກິດ - ສັງຄົມທີ່ທັນສະໄໝເທື່ອລະກ້າວ, ມີໂຄງປະກອບເສດຖະກິດ ແລະ ບັນດາຮູບການຈັດຕັ້ງການຜະລິດທີ່ເໝາະສົມ, ກະສີກຳຕິດພັນກັບການພັດທະນາການບໍລິການ. ຮູບແບບຟື້ນຟູ ແລະ ພັດທະນາບັນດາໝູ່ບ້ານອາຊີບທີ່ເປັນມູນເຊື້ອຢູ່ຟູ໋ຊວຽນ, ຮ່າໂນ້ຍ ແມ່ນໜຶ່ງໃນບັນດາທິດທາງ, ທີ່ປະກອບສ່ວນເຮັດໃຫ້ໂຄງການກໍ່ສ້າງຊົນນະບົດໃໝ່ພັດທະນາຢ່າງໝັ້ນຄົງ