ດ້ວຍຄວາມຄືບໜ້າຫຼາຍຢ່າງໃນການພັດທະນາຊົນນະບົດໃໝ່, ເມືອງ ຮ່ວາວາງ, ນະຄອນ ດ່ານັ້ງ, ແມ່ນໜຶ່ງໃນຈຳນວນ 41 ຫົວໜ່ວຍຂັ້ນເມືອງໃນທົ່ວປະເທດ ທີ່ທ່ານນາຍົກລັດຖະມົນຕີ ຫາກໍ່ມອບຄັນທຸງແຂ່ງຂັນປະຕິບັດສຳເລັດການກໍ່ສ້າງຊົນນະບົດໃໝ່ໄວກ່ວາເມື່ອທຽບໃສ່ແຜນການວາງອອກ. ນັກຂ່າວ ເຟືອງກຸກ, ມີບົດຂຽນ “ເມືອງຮ່ວາວາງ, ນະຄອນ ດ່ານັ້ງ ບັນລຸຈຸດໝາຍໃນການກໍ່ສ້າງຊົນນະບົດໃໝ່ກ່ອນກຳນົດ”
ການນຳເມືອງຮ່ວາວາງ ຮັບໃບຢັ້ງຢືນຈາກນາຍົກລັດຖະມົນຕີ
(ພາບ:nongthonmoi.gov.vn)
ເມື່ອໄດ້ຮັບການຮັບຮອງວ່າບັນລຸມາດຖານຊົນນະບົດໃໝ່, ໂສມໜ້າເຂດຊົນນະບົດຂອງເມືອງ ຮ່ວາວາງ ມີການປ່ຽນແປງຢ່າງຈະແຈ້ງ. ຮອດທ້າຍປີ 2015, ສະເລ່ຍຈຳນວນຄອບຄົວທຸກຍາກເຫຼືອພຽງ 2,3%, ທົ່ວເມືອງມີຈຳນວນ 11/11 ຕາແສງປະຕິບັດສຳເລັດການສຶກສາຂັ້ນມັດທະຍົມຕອນຕົ້ນຢ່າງທົ່ວເຖິງ, ມີໂຮງຮຽນ 30/44 ແຫ່ງບັນລຸມາດຕະຖານແຫ່ງຊາດ, 100% ຕາແສງບັນລຸມາດຕະຖານກ່ຽວກັບດ້ານສາທາລະນະສຸກ ແລະ ວັດທະນະທຳ, ອັດຕາປະຊາຊົນເຂດຊົນນະບົດມີບັດປະກັນສຸຂະພາບບັນລຸ 100%. ຄຽງຄູ່ກັນນັ້ນ, ວຽກງານໜູນຊ່ວຍສັງຄົມກໍ່ໄດ້ຮັບຄວາມເອົາໃຈໃສ່ເປັນພິເສດຈາກເມືອງ. ປະຈຸບັນ, ຕາແສງໃນເມືອງ ຮ່ວາວາງ, ນະຄອນ ດ່ານັ້ງ ເກືອບທັງໝົດພວມໃນໄລຍະບູລະນະເຂດຕົວເມືອງ. ດັ່ງນັ້ນ, ມາດຕະຖານກ່ຽວກັບການຮັບປະກັນສິ່ງແວດລ້ອມ ແລະ ຄວາມສະຫງົບ, ຄວາມເປັນລະບຽບຮຽບຮ້ອຍໄດ້ກາຍເປັນມາດຕະຖານສຳຄັນໃນວິວັດທະນາການປະຕິບັດຊົນນະບົດໃໝ່. ທ່ານ ເຈືອງເຕີ໋ນແມ້ງ, ຮອງປະທານຄະນະກຳມະການປະຊາຊົນຕາແສງ ຮ່ວາລຽນ, ໃຫ້ຮູ້ວ່າ:
“ສິ່ງແວດລ້ອມຢູ່ທີ່ນີ້ແມ່ນຖືກຂີ້ຝຸ່ນເຊິ່ງເກີດມາຈາກວິວັດການຫັນເປັນຕົວເມືອງ. ດັ່ງນັ້ນ, ການຮັບປະກັນສິ່ງແວດລ້ອມຂຽວ, ສະອາດ, ສວຍງາມ ແມ່ນຕ້ອງປະຕິບັດເພື່ອຮັບປະກັນເຂດຕົວເມືອງບັນລຸມາດຖານຊົນນະບົດໃໝ່. ດັ່ງນັ້ນມາດຕະຖານຮັບປະກັນສິ່ງແວດລ້ອມແມ່ນບັນຫາທີ່ໄດ້ວາງອອກທຳອິດຢູ່ຕາແສງ ຮ່ວາລຽນ ໃນການກໍ່ສ້າງຊົນນະບົດໃໝ່.”
ກ່ຽວກັບບັນຫານີ້, ທ່ານ ດັ້ງຟູ໋ແຮ່ງ, ຮອງປະທານຄະນະກຳມະການປະຊາຊົນເມືອງ ຮ່ວາວາງ, ນະຄອນ ດ່ານັ້ງ, ຢັ້ງຢືນວ່າ: ທາງເມືອງຈະຊອກຫາທຸກໆມາດຕະການເພື່ອຮັກສາບັນດາມາດຕະຖານທີ່ບັນລຸໄດ້ໃນການກໍ່ສ້າງຊົນນະບົດໃໝ່:
“ພວກຂ້າພະເຈົ້າກໍ່ໄດ້ສະເໜີຕໍ່ນະຄອນລົງເຮັດວຽກກັບບັນດາໂຮງຈັກ, ໂຮງງານຫລຸດຜ່ອນສຽງເນືອງນັນ, ມົນລະພິດສິ່ງແວດລ້ອມ. ຕ້ອງມີບັນດາມາດຕະການຢ່າງຂ້ຽວຂາດສຳລັບບັນດາຫົວໜ່ວຍຂຸດຄົ້ນທີ່ດິນ, ຫີນ ເພື່ອຂົນສົ່ງ, ດຳເນີນທຸລະກິດໃນໄລຍະປະຕິບັດບັນດາກິດຈະກຳຂອງນະຄອນ”
ການເກັບກຽວເຂົ້າສານ
ໂດຍກຳນົດເອົາການພັດທະນາເສດຖະກິດແມ່ນຈຸດໝາຍປາຍແຫຼມ, ເມືອງ ຮ່ວາວາງ ໄດ້ສຸມໃສ່ປະຕິບັດການສ້າງໂຄງປະກອບຄືນໃໝ່, ປະຕິບັດການຫັນກະສິກຳ, ຊົນນະບົດເປັນອຸດສາຫະກຳ, ທັນສະໄໝຕິດພັນກັບການຍົກສູງຄຸນນະພາບການກໍ່ສ້າງຊົນນະບົດໃໝ່, ກໍ່ສ້າງ ແລະ ຜັນຂະຫຍາຍແຜນຮ່າງ “ຍູ້ແຮງການໝູນໃຊ້ເຕັກໂນໂລຢີສູງເຂົ້າໃນການຜະລິດ, ເພີ່ມສະມັດຕະພາບ, ຄຸນນະພາບຜະລິດຕະພັນກະສິກຳຮັບໃຊ້ເຂດຕົວເມືອງໄລຍະ 2016 - 2020”, ບຸລິມະສິດການພັດທະນາກະສິກຳເຕັກໂນໂລຢີສູງ, ກະສິກຳປອດສານພິດ, ຂຽວ, ສະອາດ, ມີເຄື່ອງໝາຍການຄ້າ ແລະ ມຸນຄ່າດ້ານເສດຖະກິດສູງ. ພິເສດ, ທາງເມືອງໄດ້ຍູ້ແຮງການໝູນໃຊ້ວິທະຍາສາດເຕັກໂນໂລຢີເຂົ້າໃນການຜະລິດ, ເອົາໃຈໃສ່ເປັນພິເສດການຮ່ວມສຳພັນ, ການຜະລິດ ແລະ ການຈຳໜ່າຍ, ການພັດທະນາຕາມລະບົບມູນຄ່າກະສິກການຳຫັນປ່ຽນໂຄງປະກອບເສດຖະກິດ ແລະ ແຮງງານຊົນນະບົດເທື່ອລະກ້າວ, ຍົກສູງລາຍຮັບ, ສູ້ຊົນຮອດປີ 2020 ລາຍຮັບສະເລ່ຍໃສ່ຫົວຄົນຂອງບັນດາຕາແສງຊົນນະບົດໃໝ່ບັນລຸ 40 ລ້ານດົ່ງ/ຄົນ/ປີ… ຄາດວ່າ, ລາຍຈ່າຍທັງໝົດໃນການກໍ່ສ້າງຊົນນະບົດໃໝ່ໄລຍະ 2016 – 2020 ໃນບໍລິເວນເມືອງ ຮ່ວາວາງ ແມ່ນ 2.130 ຕື້ດົ່ງ. ທ່ານ ເຈີ່ນແທງນາມ, ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ, ຮອງຫົວໜ້າຄະນະຊີ້ນຳສູນກາງ ໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່, ປາຖະໜາວ່າ: ທາງທ້ອງຖິ່ນສືບຕໍ່ຍົກສູງຄຸນນະພາບບັນດາມາດຕະຖານກ່ຽວກັບການກໍ່ສ້າງຊົນນະບົດໃໝ່:
“ສືບຕໍ່ກວດກາ, ຍົກລະດັບຄຸນນະພາບແຕ່ລະມາດຕະຖານຊົນນະບົດໃໝ່, ພິເສດແມ່ນມາດຕະຖານທີ່ກ່ຽວຂ້ອງເຖິງສິ່ງແວດລ້ອມແຫ່ງການດຳລົງຊີວິດຂອງພົນລະເມືອງເຂດຊົນນະບົດ, ຄືຍົກສູງລາຍຮັບ, ຮັກສາສະຖຽນລະພາບດ້ານການເມືອງໃຫ້ໝັ້ນຄົງ, ຄວາມເປັນລະບຽບຮຽບຮ້ອຍ ແລະ ຄວາມປອດໄພທາງສັງຄົມ, ທັດສະນີຍະພາບເຂດສິ່ງແວດລ້ອມ, ຮູບພາບຊົນນະບົດຂຽວ, ສະອາດ, ສວຍງາມໄວ້.”
ເຖິງວ່າບັນລຸຈຸດໝາຍໃນການກໍ່ສ້າງຊົນນະບົດໃໝ່ໄວກ່ວາກຳນົດເວລາ 5 ປີເມື່ອທຽບໃສ່ລະດັບຄວາມຄືບໜ້າລວມຂອງທົ່ວປະເທດແລ້ວກໍ່ຕາມ, ແຕ່ ເມືອງ ຮ່ວາວາງ ຍັງກຳນົດທ້ອງຖິ່ນຍັງມີຫຼາຍວຽກງານຕ້ອງເຮັດ. ໃນນັ້ນ, ເອົາໃຈໃສ່ເປັນພິເສດເຖິງການຮັກສາ ແລະ ຍົກສູງຄຸນນະພາບບັນດາມາດຖານທີ່ບັນລຸໄດ້ຢູ່ໃນລະດັບຍືນຍົງ. ໃນສະພາບການໃໝ່, ເມືອງ ຮ່ວາວາງ ໄດ້ຍູ້ແຮງວິວັດການຫັນກະສິກຳ, ຊົນນະບົດເປັນອຸດສາຫະກຳ ແລະ ທັນສະໄໝ. ພ້ອມກັນນັ້ນ, ເມືອງກໍ່ມານະພະຍາຍາມຍົກສູງຄຸນນະພາການໜູນຊ່ວຍສັງຄົມ, ຫລຸດຜ່ອນຄວາມທຸກຍາກແບບຍືນຍົງເພື່ອແນໃສ່ຍົກສູງຄຸນນະພາບຊີວິດການເປັນຢູ່ຂອງປະຊາຊົນ.