(vovworld)- ໄລ່ຮອດທ້າຍປີ 2013, ເມືອງເກາະໂກໂຕ ແຂວງກວາງນິງ ໄດ້ສຳເລັດບັນດາມາດຖານຂອງໂຄງການກໍ່ສ້າງຊົນນະບົດໃໝ່ໂດຍພື້ນຖານແລ້ວ. ໃນເວລາພຽງ 3 ປີ, ເມືອງເກາະໂກໂຕ ປະຕິບັດທັງໝົດ 19 ມາດຖານກໍ່ສ້າງຊົນນະບົດໃໝ່ສຳເລັດ, ກ່ອນແຜນທີ່ແຂວງກວາງນິງ ໄດ້ວາງອອກແມ່ນ 2 ປີ ແລະ ທົ່ວປະເທດແມ່ນ 7 ປີ ຊື່ອັນໄດ້ສ້າງຄວາມປະທັບໃຈຢ່າງແທ້ຈິງ..
(ພາບ: coto.gov.vn)
ໂກໂຕ ແມ່ນເມືອງເກາະທຸກຍາກກ່ວາໝູ່ໃນແຂວງກວາງນິງ ແລະ ທັງປະເທດຫວຽດນາມ. ກ່ອນນີ້, ຊີວິດຂອງ ປຊຊ ປະສົບກັບຄວາມຫຍຸ້ງຍາກທີ່ສຸດ, ຂາດນ້ຳໃຊ້, ຂາດໄຟຟ້າ, ຂາດເຮືອ, ກຳປັ່ນທີ່ເຊື່ອມຕໍ່ຄົມມະນາຄົມລະຫວ່າງເກາະກັບເຂດດິນຕໍ່ແຜ່ນ, ດິນຟ້າອາກາດບໍ່ອຳນວຍຄວາມສະດວກ… ເມື່ອເລີ່ມລົງມືກໍ່ສ້າງຊົນນະບົດໃໝ່, ເມືອງໂກໂຕ ປະສົບກັບຄວາມຫຍຸ້ງຍາກທີ່ສຸດ, ອັດຕາສ່ວນຄອບຄົວທຸກຍາກໃນທົ່ວເມືອງແມ່ນເກືອບ 10%.
ພາຍຫຼັງຜັນຂະຫຍາຍການກໍ່ສ້າງຊົນນະບົດໃໝ່ໃນເວລາພຽງ 3 ປີ, ມາຮອດປະຈຸບັນ, ທັງ 2 ຕາແສງຂອງເມືອງໂກໂຕ ໄດ້ສຳເລັດໂຄງການ ກໍ່ສ້າງຊົນນະບົດໃໝ່ໂດຍພື້ນຖານແລ້ວ. ເມືອງເກາະໂກໂຕ ໄດ້ລົງທຶນຍົກລະດັບ, ກໍ່ສ້າງໜອງໃໝ່ 12 ແຫ່ງໃນເກາະເພື່ອສະໜອງນ້ຳສະອາດໃຫ້ຄອບຄົວຢູ່ທີ່ນີ້ ໄດ້ 95%. ໂຄງການຕິດຕັ້ງລະບົບໄຟຟ້າຢູ່ເມືອງເກາະໂກໂຕ ໄດ້ສຳເລັດໃນທ້າຍປີ 2013. ໂຄງປະກອບເສດຖະກິດຂອງໂກໂຕ ມີການຫັນປ່ຽນຢ່າງໄວວາ, ຈາກເມືອງກະສິກຳທຸກຍາກກາຍເປັນສູນທ່ອງທ່ຽວໃໝ່ຂອງແຂວງກວາງນິງ ດ້ວຍຈຳນວນແຂກທ່ອງທ່ຽວປີ 2010 ແມ່ນ 3500 ຄົນ, ປີ 2013 ແມ່ນເກືອບ 60.000 ຄົນ, ເພີ່ມຂຶ້ນທົບ 17 ເທົ່າໃນໄລຍະ 3 ປີ. ໂສມໜ້າເຂດຊົນນະບົດຂອງເມືອງມີການປ່ຽນແປງຢ່າງໄວວາ ເສັ້ນທາງລະຫວ່າງຕາແສງ, ບ້ານ, ຮ່ອມບ້ານ ໄດ້ຮັບການກໍ່ສ້າງດ້ວຍເບຕົງ 100%. 100% ໂຮງຮຽນບັນລຸມາດຖານແຫ່ງຊາດ; ອັດຕາສ່ວນຄອບຄົວທຸກຍາກໃນທົ່ວເມືອງຍັງເຫຼືອພຽງ 0,5% ເທົ່ານັ້ນ. ປຊຊ ຢູ່ທີ່ນີ້ໄດ້ຕັ້ງໜ້າເຂົ້າຮ່ວມການກໍ່ສ້າງຊົນນະບົດໃໝ່. ປ້າເຈິ່ນທິຈິງ, ຢູ່ເທດສະບານເມືອງໂກໂຕ ໃຫ້ຮູ້ວ່າ:
“ຂ້າພະເຈົ້າໄດ້ສະໜັບສະໜູນ, ການກໍ່ສ້າງຊົນນະບົດໃໝ່ບໍ່ຫຼາຍກໍ່ໜ້ອຍ. ເຖິງວ່າຄອບຄົວຍັງທຸກຍາກກໍ່ຕາມແຕ່ຍັງຄົງສະໜັບສະໜູນການພັດທະນາຊົນນະບົດຢູ່“.
ຕັດແຖບພ້າເປີດສະຫຼອງຕາໜ່າງໄຟຟ້າຢູ່ໂກໂຕ
(ພາບ:Internet)
ໝາກຜົນຂອງການກໍ່ສ້າງຊົນນະບົດໃໝ່ໄດ້ສ້າງທ່ວງທ່າໃຫ້ແກ່ການພັດທະນາລວມຂອງເມືອງເກາະ. ບົດຮຽນທີ່ໂກໂຕໄດ້ຖອດຖອນມາໄດ້ພາຍຫລັງ 3 ປີຜ່ານມາ, ນັ້ນແມ່ນ: ບົດຮຽນກ່ຽວກັບຄວາມຕັດສິນໃຈ, ມີຫົວຄິດປະກິດສ້າງໃນການຊີ້ນຳນຳພາ, ກ່ຽວກັບການກຳນົດຈຸດໝາຍຢ່າງຖືກຕ້ອງ, ຂັ້ນຕອນພັດທະນາເໝາະສົມກັບເງື່ອນໄຂຂອງທ້ອງຖິ່ນ, ບົດຮຽນກ່ຽວກັບການເລືອກເຟັ້ນເນື້ອໃນ, ຮູບການໂຄສະນາ, ກ່ຽວກັບລະດົມແຫຼ່ງກຳລັງ, ໃນນັ້ນມີແຫຼ່ງກຳລັງຈາກ ປຊຊ ປະກອບໃຫ້ໂຄງການກໍ່ສ້າງຊົນນະບົດໃໝ່. ທ່ານຫງວຽນວັນໂກຍ, ປຊຊ ຕາແສງຫາຍຕຽນ, ເມືອງດົ່ງຕຽນ ໃຫ້ຮູ້ວ່າ:
“ອຳນາດການປົກຄອງຂົນຂວາຍ ປຊຊ ປະກອບທີ່ດິນເພື່ອກໍ່ສ້າງເສັ້ນທາງ, ຂ້າພະເຈົ້າກໍ່ເຫັນດີ. ປຊຊ ພວກຂ້າພະເຈົ້າກໍ່ເຫັນດີນຳກັນວ່າ, ແຕ່ລະຄອບຄົວຈະປະກອບດິນແຕ່ 3 ແມັດ, 5 ແມັດເພື່ອກໍ່ສ້າງເສັ້ນທາງໃຫ້ພວກຫຼານໄປຮຽນ“.
ປີ 2014 ນີ້, ເມືອງເກາະໂກໂຕ ມຸ່ງໄປສູ່ທະເລທີ່ກ້ວາງໃຫ່ຍ ດ້ວຍໜ້າທີ່ນຳສູນພະລາທິການອາຊີບຫາປາໃນບໍລິເວນເມືອງເຂົ້າເຄື່ອນໄຫວ, ຫັນຮູບແບບການບໍລິການເປັນຫຼາຍຮູບຫຼາຍແບບເພື່ອໃຫ້ໂກໂຕ ກາຍເປັນສູນບໍລິການພາລະທິການອາຊີບຫາປາຂອງທັງເຂດທາງທິດເໜືອຂອງອ່າວພາກເໜືອ. ທ່ານຮ່າແມັງຮຸ່ງ, ເລຂາຄະນະພັກຕາແສງດົ່ງຕຽນ ໃຫ້ຮູ້ວ່າ:
“ໃນໄລຍະຈະມາເຖິງ, ພວກຂ້າພະເຈົ້າກຳນົດວ່າການພັດທະນາສິນທະເລແມ່ນຂະແໜງເສດຖະກິດປາຍແຫຼມ. ຄຽງຄູ່ກັນນັ້ນ, ກໍ່ພັດທະນະບັນດາການບໍລິການທ່ອງທ່ຽວ. ສະນັ້ນ, ພວກຂ້າພະເຈົ້າຕັດສິນໃຈໂຄສະນາ, ຂົນຂວາຍ ປຊຊ ຫັນການຜະລິດແບບກະແຈກກະຈາຍ, ບໍ່ມີຈຸດສຸມເປັນການຜະລິດເປັນສິນຄ້າແບບລວມສູນ ແລະ ພິເສດແມ່ນບັນດາຜະລິດຕະພັນສິນໃນນ້ຳຕົ້ນຕໍ“.
ເພື່ອປະຕິບັດການກໍ່ສ້າງຊົນນະບົດໃໝ່ໃຫ້ສຳເລັດ, ໂກໂຕ ພວມສູ້ຊົນກາຍເປັນສູນທ່ອງທ່ຽວຄຸນນະພາບສູງ, ເປັນເຂດພັກຜ່ອນບັນລຸມາດຖານສູງເທື່ອລະກ້າວ ຊື່ງແມ່ນໜຶ່ງໃນບັນດາສະຖານທີ່ຈຸດສຸມດ້ານເສດຖະກິດທະເລໃນຍຸດທະສາດພັດທະນາເສດຖະກິດທະເລຂອງປະເທດຊາດ ແລະ ຂອງແຂວງກວາງນິງ./.