(vovworld) - ໂດຍແມ່ນແຂວງພູດອຍ, ທະເລໝູ່ເກາະ, ພູມສັນຖານຍາວຢຽດ, ປະຊາຊົນຢູ່ກະແຈກກະຈາຍ ແຕ່ແຂວງ ກວາງນີງ ໄດ້ປະຕິບັດສຳເລັດການຂະຫຍາຍຕາໜ່າງໄຟຟ້າແຫ່ງຊາດໄປເຖິງເຂດຫ່າງໄກຊອກຫຼີກ, ເຂດທະເລເກາະ. ນຳໄຟຟ້າໄປສູ່ເຂດຊົນນະບົດຊ່ວຍໃຫ້ແຂວງ ກວາງນີງ ພັດທະນາເສດຖະກິດ - ສັງຄົມຢ່າງໜັ້ນຄົງ. ບົດຂຽນ “ກວາງນີງ ນຳໜ້າທົ່ວປະເທດໃນການຂະຫຍາຍຕາໜ່າງໄຟຟ້າໄປສູ່ເຂດຊົນນະບົດ, ທະເລໝູ່ເກາະ” ຂອງນັກຂ່າວ ຟ້າມວັນຟອງ.
ບັນດາຜູ້ແທນຕັດແຖບຜ້າເປີດສະຫຼອງໂຄງການລົງທຶນກໍ່ສ້າງຕາໜ່າງໄຟຟ້າເຂດຊົນນະບົດໄລຍະ 1, 2
|
ໂດຍກຳນົດການຂະຫຍາຍໄຟຟ້າໄປສູ່ເຂດຊົນນະບົດຕ້ອງໄປກ່ອນບາດກ້າວໜຶ່ງເພື່ອສ້າງພື້ນຖານ ແລະ ກຳລັງໜູນໃນການພັດທະນາເສດຖະກິດ - ສັງຄົມ ໃຫ້ແກ່ປະຊາຊົນເຂດຊົນນະບົດ, ປະກອບສ່ວນຮັດແຄບຊ່ອງຫວ່າງໃນການພັດທະນາລະຫວ່າງບັນດາເຂດ, ພາກ, ດັ່ງນັ້ນ ເລື່ອງລົງທຶນຂະຫຍາຍຕາໜ່າງໄຟຟ້າແຫ່ງຊາດໄປເຖິງບັນດາຂົງເຂດນີ້ ໄດ້ຮັບຄວາມເອົາໃຈໃສ່ເປັນພິເສດຈາກແຂວງ ກວາງນີງ. ແຂວງ ກວາງນີງ ໄດ້ລະດົມທຸກໆແຫຼ່ງກຳລັງເພື່ອນຳໄຟຟ້າໄປເຖິງບັນດາເຂດຫ່າງໄກສອກຫຼີກ, ເຂດທະເລ, ໝູ່ເກາະ. ເຂດໃດໃນເຂດດິນຕໍ່ແຜ່ນບໍ່ທັນມີໄຟຟ້າ ກໍ່ໄດ້ຮັບການລົງທຶນ ກໍ່ສ້າງສະຖານີໝໍ້ແປງໄຟຟ້າ, ສາຍໄຟຟ້າແຮງກາງ ແຮງຕໍ່າ, ສ່ວນບັນດາຕາແສງເກາະ ກໍ່ລ້ວນແຕ່ໄດ້ຮັບການໜູນຊ່ວຍຄ່າໃຊ້ຈ່າຍສ່ວນໜຶ່ງຈາກແຂວງ ເພື່ອສາມາດນຳໃຊ້ໄຟຟ້າດ້ວຍແຮງກະຊວນ ແລະ ຖ່ານພະລັງງານແສງຕາເວັນ. ໃນໄລຍະ 15 ປີແຫ່ງການປະຕິບັດໂຄງການຂະຫຍາຍຕາໜ່າງໄຟຟ້າໄປສູ່ເຂດຊົນນະບົດ (ໄລຍະ 1998 – 2013), ແຂວງ ກວາງນີງ ໄດ້ບັນລຸເປົ້າໝາຍກ່ອນກຳນົດເວລາ 9 ປີ, ໃນຂະນະທີ່ປີ 2004, ແຂວງ ກວາງນີງ ບັນລຸໄດ້ຄາດໝາຍ 100% ຈຳນວນຕາແສງມີໄຟຟ້າ. ປ້າ ເລທິຫາຍ, ປະຊາຊົນຕາແສງ ລູກຮົ່ນ, ເມືອງ ບີ່ງລຽວ, ມີຄວາມປິຕິຊົມຊື່ນເມື່ອມີໄຟຟ້ານໍາໃຊ້ໃນທົ່ວເຂດບ້ານນາ.
“ພວກຂ້າພະເຈົ້າບໍ່ຄິດວ່າຈະມີໄຟຟ້າໃຊ້, ມັນຄືດັ່ງຄວາມໄຝ່ຝັນແທ້. ກ່ອນນີ້, ຊີວິດການເປັນຢູ່ປະສົບກັບຄວາມຫຍຸ້ງຍາກແຕ່ປະຈຸບັນໄດ້ມີການປ່ຽນແປງຢ່າງຈະແຈ້ງ”
ເລື່ອງນຳບັນດາກິດຈະກຳໃໝ່ເຂົ້ານໍາໃຊ້ໄດ້ຊ່ວຍໃຫ້ຊີວິດການເປັນຢູ່ຂອງປະຊາຊົນຢູ່ເຂດຊົນນະບົດ, ເຂດຫ່າງໄກສອກຫຼີິກ, ເຂດຊາຍແດນເກືອບ 12.000 ຄອບຄົວມີການປ່ຽນແປງ, ວິສາຫະກິດຜະລິດເປັນປົກກະຕິ, ປະຊາຊົນບໍ່ຕ້ອງດຳເນີນຊີວິດພາຍໃຕ້ແສງຕະກຽງອີກແລ້ວ. ຕາໜ່າງໄຟຟ້າແຫ່ງຊາດບໍ່ພຽງແຕ່ຊ່ວຍໃຫ້ແຂວງ ກວາງນີງມີຄວາມສະດວກໃນການພັດທະນາກະສິກຳເທົ່ານັ້ນ ຫາກຍັງຊ່ວຍໃຫ້ແຂວງພັດທະນາຂະແໜງອຸດສາຫະກຳປຸງແຕ່ງ, ອຸດສາຫະກຳສຳຮອງ…ອີກດ້ວຍ. ອ້າຍ ໂດ໋ວັນຕ໋ຽນ, ປະຊາຊົນຢູ່ຕາແສງເກາະ ກວານລ້ານ, ໃຫ້ຮູ້ວ່າ:
“ກ່ອນນີ້ ບໍ່ມີໄຟຟ້າ, ຊີວິດການເປັນຢູ່ປະສົບກັບຄວາມຫຍຸ້ງຍາກຫຼາຍ, ຕ້ອງໃຊ້ເຄື່ອງກຳເນີດໄຟຟ້າໝົດມື້, ຄ່າໃຊ້ຈ່າຍຊື້ນໍ້າມັນກະຊວນໃນແຕ່ລະມື້ແມ່ນຫຼາຍພໍສົມຄວນ. ນັບແຕ່ມື້ມີໄຟຟ້າແລ້ວ, ປະຊາຊົນທຳມາຫາກິນກໍ່ສະດວກສະບາຍ ແລະ ມີຄວາມເບີກບານມ່ວນຊື່ນທີ່ສຸດ.”
ຖັດຈາກຜົນສຳເລັດຂອງໂຄງການລົງທຶນກໍ່ສ້າງຕາໜ່າງໄຟຟ້າໄປສູ່ເຂດຊົນນະບົດ, ແຂວງ ກວາງນີງ ໄດ້ເລີ່ມວາງອອກຄາດໝາຍໃຫຍ່ກ່ວາ, ນັ້ນແມ່ນນຳຕາໜ່າງໄຟຟ້າແຫ່ງຊາດອອກສູ່ທຸກໆເມືອງເກາະ. ໂຄງການນຳໄຟຟ້າອອກສູ່ເມືອງເກາະ ໂກໂຕ ໃນປີ 2013 ດ້ວຍລະດັບຈຳນວນເງິນລົງທຶນ 1.100 ຕື້ດົ່ງ ແລະ ໂຄງການນຳໄຟຟ້າອອກສູ່ 5 ຕາແສງຢູ່ເກາະເວີນດົ່ນໃນປີ 2014 ດ້ວຍຈຳນວນເງິນ 312 ຕື້ດົ່ງໂດຍແຂວງປຸກລະດົມທົ່ວລະບົບການເມືອງເຂົ້າຮ່ວມ ດ້ວຍຄວາມເຫັນດີເຫັນພ້ອມຂອງປະຊາຊົນ. ເລື່ອງປະຕິບັດສຳເລັດ 2 ໂຄງການຈຸດສຸມດັ່ງກ່າວໄດ້ຍົກອັດຕາຈໍານວນຄອບຄົວມີໄຟຟ້າໃຊ້ ຂອງແຂວງ ກວາງນີງ ຂຶ້ນເຖິງ 99,45%. ທ່ານ ຫວູດິ່ງເຕີນ, ຮອງຜູ້ອຳນວຍການບໍລິສັດໄຟຟ້າ ກວາງນີງ, ໃຫ້ຮູ້ວ່າ:
“ບໍລິສັດໄຟຟ້າ ກວາງນີງ ແມ່ນບໍລິສັດທຳອິດໃນທົ່ວປະເທດໄດ້ປະຕິບັດສຳເລັດເລື່ອງນຳໄຟຟ້າໄປເຖິງເຂດຫ່າງໄກສອກຫຼີກ ໃນປີ 2012 ແລະ ກໍ່ແມ່ນບໍລິສັດທຳອິດທີ່ນຳໄຟຟ້າດ້ວຍຄວາມແຮງ 22 kv ອອກສູ່ເຂດໝູ່ເກາະສຳເລັດຜົນ. ພາຍຫຼັງຜົນສຳເລັດຂອງແຂວງ ກວາງນີງ, ບັນດາທ້ອງຖິ່ນອື່ນກໍ່ເລີ່ມຕົ້ນປະຕິບັດ. ນັ້ນແມ່ນສິ່ງເປັນໜ້າເອກອ້າງທະນົງໃຈຂອງຂະແໜງໄຟຟ້າກວາງນີງ.”
ພາຍຫຼັງມີໄຟຟ້າໃຊ້ໃນເວລາອັນສັ້ນເທົ່ານັ້ນ, ໂສມໜ້າຊົນນະບົດຢູ່ບັນດາເຂດນີ້ໄດ້ມີການປ່ຽນແປງຢ່າງຈະແຈ້ງ, ເສດຖະກິດພັດທະນາ, ຊີວິດທາງດ້ານວັດທະນະທຳ, ຈິດໃຈຂອງປະຊາຊົນໄດ້ຮັບການຍົກສູງຂຶ້ນ.
ແຂວງ ກວາງນີງ ໄດ້ນຳໜ້າໃນທ່ົວປະເທດກ່ຽວກັບການປະຕິບັດສຳເລັດວຽກງານຂະຫຍາຍຕາໜ່າງໄຟຟ້າໄປຍັງເຂດຊົນນະບົດ ແລະ ນຳໄຟຟ້າອອກສູ່ທຸກໆຕາແສງໝູ່ເກາະ. ປະຈຸບັນ, ເມື່ອໄປຍັງບັນດາບ້ານຢູ່ຫ່າງໄກ ຫຼື ຕາແສງເກາະໃນບໍລິເວນແຂວງກໍ່ຮູ້ໄດ້ ພາບພົດຫັນເຂດຊົນນະບົດໃໝ່ທີ່ທັນສະໄໝຢ່າງຈະແຈ້ງກ່ວາເວລາໃດໝົດ. ບໍ່ພຽງແຕ່ເທົ່ານັ້ນ, ມີຫຼາຍໂຄງການຂອງຂະແໜງໄຟຟ້າແຂວງ ກວາງນີງ ໄດ້ກາຍເປັນບັນດາຮູບແບບທີ່ດີເພື່ອໃຫ້ຫຼາຍທ້ອງຖິ່ນໃນທົ່ວປະເທດຮຳ່ຮຽນເອົາບົດຮຽນ. ໝາກຜົນນີ້ຍັງປະກອບສ່ວນປະຕິບັດສຳເລັດບັນດາມາດຖານເຊິ່ງແຂວງ ກວາງນີງ ໄດ້ວາງອອກ ແລະ ແມ່ນພື້ນຖານເພື່ອໃຫ້ແຂວງ ກວາງນີງ ກາຍເປັນແຂວງອຸດສາຫະກຳຕາມທິດທັນສະໄໝໃນປີ 2020.