ເມືອງຮ່າມອຽນ, ແຂວງ ຕວຽນກວາງ ມີເນື້ອທີ່ປູກຕົ້ນຊາກວ່າ 2000 ເຮັກຕາ, ໃນນັ້ນມີເນື້ອທີ່ເກືອບ 1.900 ເຮັກຕາແມ່ນເກັບກ່ຽວໄດ້ແລ້ວ. ເພື່ອຍົກສູງມູນຄ່າຂອງຕົ້ນຊາ, ຢູ່ຫຼາຍຕາແສງຂອງເມືອງ ຮ່າມອຽນ, ຜູ້ປູກຕົ້ນຊາພວມຫັນທິດປູກ ແລະ ປຸງແຕ່ງຊາຈາກວິທີທີ່ເປັນມູນເຊື້ອເປັນການປູກ ແລະ ຜະລິດຊາທີ່ມີຄວາມປອດໄພ ຕາມມາດຖານ ປະຕິບັດການຜະລິດກະສິກຳທີ່ດີຢູ່ຫວຽດນາມ (VietGap). ຄອບຄົວລຸງ ຟ້າມວັນລ້ວນ, ຢູ່ບ້ານ 3 ລ່າງບ໋າດ, ມີເນື້ອທີ່ປູກຕົ້ນຊາ 3 ເຮັກຕາ ແລະ ລຸງໄດ້ເຂົ້າຮ່ວມຮູບແບບການປູກຊາ ແລະ ປຸງແຕ່ງຊາຢ່າງປອດໄພຕາມມາດຕະຖານ VietGap ໂດຍກົມປ້ອງກັນພືດສາຂາແຂວງ ຕວຽນກວາງ ສົມທົບກັບໂຄງການໜູນຊ່ວຍກະສິກຳ, ຊາວກະສິກອນ, ຊົນນະບົດແຂວງ ແລະ ຄະນະກຳມະການປະຊາຊົນເມືອງ ຮ່າມອຽນ ຜັນຂະຫຍາຍນັບແຕ່ຕົ້ນປີ 2013. ທ່ານ ລ້ວນ ໃຫ້ຮູ້ວ່າ: ສະຫະກອນປູກຊາປອດສານພິດລວມມີ 30 ຄອບຄົວເຂົ້າຮ່ວມ ດ້ວຍເນື້ອທີ່ກວ່າ 16 ເຮັກຕາ. ໂຄງການໄດ້ໜູນຊ່ວຍຄອບຄົວລຸ່ງ ໃນການລົງທຶນສ້າງໂຮງງານ, ປະກອບອຸປະກອນອົບຊາ, ເຄື່ອງດູດອາກາດ… ເພື່ອປຸງແຕ່ງ ແລະ ຈຳໜ່າຍຜະລິດຕະພັນໃຫ້ບັນດາຄອບຄົວປູກຕົ້ນຊາ. ເພື່ອຮັບປະກັນການຜະລິດຊາໃຫ້ມີຄວາມປອດໄພຕາມມາດຕະຖານ VietGap, ບັນດາຄອບຄົວທີ່ເຂົ້າຮ່ວມໃນໜ່ວຍສະຫະກອນຕ້ອງໄດ້ເຊັນສັນຍາປະຕິບັດຕາມຫຼັກການ “4 ຖືກ” ຄື: ຖືກກັບເວລາ, ຖືກວິທີ, ຖືກປະລິມານ ແລະ ຖືກເວລາກຳນົດ.
“ເພື່ອຜະລິດຊາໃຫ້ມີຄວາມປອດໄພຕາມຂໍ້ກຳນົດທີ່ພວມປະກາດໃຊ້, ສະມາຊິກໃນໜ່ວຍສະຫະກອນຕ້ອງປະຕິບັດຕາມຂໍ້ກຳນົດໃນການປູກ, ການບົວລະບັດ, ການເກັບກ່ຽວ ແລະ ການປຸງແຕ່ງຜະລິດຕະພັນຈຶງຮັບປະກັນຄຸນນະພາບ, ປອດໄພ. ຈາກແນວພັນປູກ, ເຂດດິນ, ແຫຼ່ງນ້ຳ ຕະຫຼອດຮອດລະລອບບົວລະບັດຮັກສາ ພວກຂ້າພະເຈົ້າລ້ວນແຕ່ປະຕິບັດຕາມຂໍ້ກຳນົດຕ່າງໆທີ່ອະນຸຍາດໄດ້ນຳໃຊ້ໃນຜະລິດຕະພັນປອດສາພິດ. ການເກັບຊາ ແລະ ຮາກຖານປຸງແຕ່ງຕ້ອງຮັບປະກັນສຸຂະອະນາໄມຄວາມປອດໄພດ້ານສະບຽງອາຫານ.”
ຄອບຄົວເອື້ອຍ ຟ້າມທິເຮື່ອງ, ບ້ານ 5 ລ່າງບ໋າດ, ຕາແສງ ເຕີນແທ່ງ, ເມືອງຮ່າມອຽນ ໄດ້ເຂົ້າຮ່ວມໜ່ວຍສະຫະກອນຜະລິດຊາປອດສານພິດ. ພາຍຫຼັງເກືອບ 3 ປີ, ຊີວິດທາງດ້ານວັດຖຸຂອງຄອບຄົວເອື້ອຍ ເຮື່ອງ ໄດ້ຮັບການປັບປຸງ ແລະ ສາມາດປຸກເຮືອນໃໝ່ 2 ຊັ້ນຢ່າງກວ້າງຂວາງ, ສວຍງາມ. ນັບແຕ່ໄດ້ເຂົ້າຮ່ວມຮູບແບບຜະລິດຊາປອດສານພິດຕາມມາດຕະຖານ Vietgap, ເອື້ອຍໄດ້ຮັບການຝຶກອົບຮົມດ້ານເຕັກນິກ, ໄດ້ໄປທັດສະນະສຶກສາບັນດາຮູບແບບຜະລິດຊາຢູ່ແຂວງທ໋າຍງວຽນ ແລະ ນຳໃຊ້ຖືກຕາມຂັ້ນຕອນດ້ານເຕັກນິກໃນການບົວລະບັດຮັກສາ, ການເກັບກ່ຽວ, ການຮັກສາຜະລິດຕະພັນຊາ ຕາມມາດຕະຖານ VietGap ສະນັ້ນ, ມູນຄ່າຂອງຕົ້ນຊາໄດ້ຮັບການຍົກສູງຂຶ້ນ. ປະຈຸບັນ, ຊາທີ່ໄດ້ອົບແຫ້ງຕາມມາດຕະຖານ VietGap 1 kg ມີລາຄາສູງກວ່າແຕ່ 30 ຫາ 50 ພັນດົ່ງ ເມື່ອທຽບໃສ່ຊາທີ່ຜະລິດແບບທຳມະດາ. ດ້ວຍເນື່ອທີ່ປູກຊາປອດສານພິດກວ່າ 0,3 ເຮັກຕາ, ແຕ່ລະປີຄອບຄົວເອື້ອຍ ເຮື່ອງ ສ້າງລາຍຮັບໄດ້ກວ່າ 150 ລ້ານດົ່ງ/ປີ. ເອື້ອຍເຮື່ອງ ໃຫ້ຮູ້ວ່າ.
“ກ່ອນນີ້, ຄອບຄົວເອື້ອຍຜະລິດຊາຕາມແບບທີ່ເປັນມູນເຊື້ອ ລາຄາຖືກ ແລະ ຂາຍກໍຍາກ. ນັບແຕ່ມື້ທີ່ໄດ້ຜະລິດຊາປອດສານພິດຂາຍກໍໄດ້ລາຄາສູງກວ່າ. ມາຮອດປະຈຸບັນ, ຊີວິດຂອງຄອບຄົວກໍຮັບປະກັນກວ່າຫຼາຍເມື່ອທຽບໃສ່ກ່ອນນີ້”.
ເມື່ອກຳນົດຕົ້ນຊາແມ່ນທ່າແຮງໃນການພັດທະນາເສດຖະກິດ, ເມືອງ ຮ່າມອຽນ ໄດ້ຮ່ວມກັບປະຊາຊົນ ສ້າງບັນດາມາດຕະການຍົກສູງຄຸນນະພາບ ກໍຄືມູນຄ່າຂອງຕົ້ນຊາ ດ້ວຍບັນດາແນວພັນຊາໃໝ່ ທີ່ມີຄຸນນະພາບສູງ ແລະ ວິທີການຜະລິດຊາຕາມທິດປອດສານຜິດ. ບັນດາຕາແສງທີ່ມີເນື້ອທີ່ປູກຊາກວ້າງ ໄດ້ຮັບການລົງທຶນກໍ່ສ້າງ ເພື່ອຮັບປະກັນ ອະນາໄມສິ່ງແວດລ້ອມ, ການຜະລິດປອດສານພິດ. ທ່ານ ນົງຮຸຍຕຸ່ງ, ຮອງປະທານຄະນະກຳມະການປະຊາຊົນ ເມືອງຮ່າມອຽນ, ໃຫ້ຮູ້ວ່າ.
“ແຜນນະໂຍບາຍຂອງເມືອງແມ່ນ, ປູກຕົ້ນຊາເປັນຕົ້ນ, ມີຄຸນນະພາບ ແລະ ຜະລິດເປັນສິນຄ້າແບບລວມສູນ, ຜະລິດຊາປອດສານພິດຢ່າງແທ້ຈິງ ແລະ ກາຍເປັນຊາທີ່ບັນລຸມາດຕະຖານ VietGap. ພວກຂ້າພະເຈົ້າໄດ້ສ້າງຮູບແບບປູກ ແລະ ປຸງແຕ່ງຊາຕາມມາດຕະຖານ VietGap ຢູ່ບ້ານ ລ່າງບ໋າດ, ຕາແສງ ເຕີນແທ່ງ, ເມືອງ ຮ່າມອຽນ. ໃນປະຈຸບັນ, ຄຸນນະພາບນັບມື້ນັບໄດ້ຮັບການເພີ່ມຂຶ້ນ, ຜູ້ບໍລິໂພກກໍໄດ້ຮູ້ຈັກເຖິງນັບມື້ນັບຫຼາຍຂຶ້ນ. ປະຈຸບັນ, ລູກຄ້າພາຍໃນປະເທດ ແລະ ຕ່າງປະເທດ ໄດ້ຮູ້ຈັກເຖິງຊາ ລ່າງບ໋າດ, ເຕີນແທ່ງ ແລ້ວ”.
ປະຈຸບັນ, ເລື່ອງແນະນຳໃຫ້ຊາວກະສິກອນເຂົ້າຮ່ວມການຜະລິດຊາປອດສານພິດ ຕາມມາດຕະຖານ VietGap ແມ່ນທິດທາງທີ່ຕັ້ງໜ້າ ເພື່ອນຳຕົ້ນຊາ ໃຫ້ກາຍເປັນຕົ້ມໄມ້ອຸດສາຫະກຳປາຍແຫຼມຢູ່ເມືອງຮ່າມອຽນ. ພ້ອມກັນນັ້ນ, ດ້ວຍເລື່ອງນຳໃຊ້ຄວາມຮູ້, ວິທະຍາສາດເຕັກນິກໃນການຜະລິດຊາປອດສານພິດ ໄດ້ຊ່ວຍໃຫ້ປະຊາຊົນປ່ຽນແປງຮູບແບບການຜະລິດຊາແບບດັ້ງເດີມຢ່າງແທ້ຈິງ, ນຳມາເຊິ່ງປະສິດທິຜົນສູງກວ່າໃນການຜະລິດ, ແມ່ນກາລະໂອກາດເພື່ອໃຫ້ປະຊາຊົນພັດທະນາເສດຖະກິດແບບຍືນຍົງ.