(vovworld)- ພາຍຫລັງ 3 ປີແຫ່ງການຜັນຂະຫຍາຍການກໍ່ສ້າງຊົນນະບົດໃຫມ່, ເຂດຊົນນະບົດຢູ່ແຂວງ ນາມດີ້ງ ໄດ້ມີການປ່ຽນແປງຫລາຍຢ່າງ. ກິດຈະກຳຊົນລະປະທານ, ເສັ້ນທາງຄົມມະນາຄົມຊົນນະບົດ, ຂົວ, ຮ່ອມທາງໃນບ້ານໄດ້ຮັບການກໍ່ສ້າງຢ່າງສະອາດສວຍງາມ. ເພື່ອໄດ້ຮັບການການປ່ຽນແປງຄືປະຈຸບັນ, ແຂວງ ນາມດີ້ງ ໄດ້ເລືອກເຟັ້ນວິທີກໍ່ສ້າງຊົນນະບົດໃຫມ່ຈາກບ້ານ, ໂດຍອີງໃສ່ກຳລັງແຮງຂອງວົງຄະນາຍາດ, ຖືປະຊາຊົນເປັກກົກ. ໃນລາຍການຊົນນະບົດພາກນີ້, ເຊີນທ່ານຮັບຟັງບົດຂຽນຂອງນັກຂ່າວ ກີມແທງ ທີ່ມີຫົວຂໍ້ວ່າ: ແຂວງ ນາມດີ້ງ ກໍ່ສ້າງຊົນນະບົດໃຫມ່ ອີງໃສ່ກຳລັງແຮງຂອງວົງຄະນາຍາດ.
ລະບົບເສັ້ນທາງລະຫວ່າງບ້ານໄດ້ຮັບການກໍ່ສ້າງດ້ວຍເບຕົງ
(ພາບ: ອິນເຕີແນດ)
ມາຮອດປະຈຸບັນ, ໃນຈຳນວນ 96 ຕາແສງຢູ່ ແຂວງ ນາມດີ້ງ ທີ່ເຂົ້າຮ່ວມການກໍ່ສ້າງຊົນນະບົດໃຫມ່, ມີ 16 ຕາແສງ ບັນລຸໄດ້ 19 ມາດຖານໂດຍພື້ນຖານ, 100% ຕາແສງ, ເທດສະບານສຳເລັດການວາງແຜນກໍ່ສ້າງຊົນນະບົດໃຫມ່. ດ້ວຍທິດນຳ “ປະຊາຊົນເຮັດ, ລັດຫນູນຊ່ວຍ”, ແຂວງ ນາມດີ້ງ ໄດ້ຂົນຂວາຍປະຊາຊົນປະກອບທີ່ດິນກໍ່ສ້າງທາງຄົມມະນາຄົມ, ກໍ່ສ້າງບັນດາກິດຈະກຳສະຫວັດດີການສັງຄົມ, ໂສມຫນ້າຊົນນະບົດໃຫມ່ໄດ້ມີການປ່ຽນແປງຢ່າງເຫັນໄດ້ຊັດ. ຄອບຄົວລຸງ ຟ້າມວັນຫງໍ້, ຢູ່ເທດສະບານ ກາດແທ່ງ, ເມືອງ ຈືກນີງ ໄດ້ບໍລິຈາກເງິນ 2,5 ຕື້ດົ່ງ ເພື່ອກໍ່ສ້າງໂຮງຮຽນ, ບູລະນະປະຕິສັງຂອນສຸສານ ແລະ ປະກອບສ່ວນກໍ່ສ້າງເສັ້ນທາງຄົມມະນາຄົມ. ລຸງ ຟ້າມວັນຫງໍ້ ໃຫ້ຮູ້ວ່າ:
“ປະກອບສ່ວນກໍ່ສ້າງໂຮງຮຽນ ເພື່ອໃຫ້ລູກຫລານໃນໝູ່ບ້ານອຸ່ນອຽນໃຈ ຮຳ່ຮຽນ, ມຸ່ງໄປເຖິງອະນາຄົດທີ່ສົດໃສ. ແລະປະກອບສ່ວນບູລະນະສຸສານ, ວັດວາອາຮາມ ເພື່ອໃຫ້ຈິດໃຈປະຊາຊົນສະຫວາດສະເຫວີຍກວ່າ. ນັ້ນແມ່ນສາຍເຫດທີ່ຂ້າພະເຈົ້າໄດ້ປະກອບສ່ວນ.”
ຫນຶ່ງໃນບັນດາມາດຖານຕົ້ນຕໍໃນການກໍ່ສ້າງຊົນນະບົດໃຫມ່ ນັ້ນແມ່ນການວາງແຜນພັດທະນາລະບົບຄົມມະນາຄົມຊົນນະບົດ. ການເປີດກວ້າງ, ກໍ່ສ້າງບັນດາເສັ້ນທາງຄົມມະນາຄົມຊົນນະບົດດ້ວຍເບຕົງ ບໍ່ພຽງແຕ່ສ້າງເງື່ອນໄຂສະດວກໃຫ້ແກ່ການໄປມາຂອງປະຊາຊົນເທົ່ານັ້ນ ຫາກຍັງສ້າງເງື່ອນໄຂນຳກົນຈັກ, ໝູນໃຊ້ວິທະຍາສາດເຕັກນິກເຂົ້າໃນການຜະລິດໃນເຂດທົ່ງນາອີກດ້ວຍ. ໂດຍຮັບຮູ້ໄດ້ຄວາມສຳຄັນຂອງມາດຖານດັ່ງກ່າວ, ປະຊາຊົນຫລາຍຄົນຢູ່ ແຂວງ ນາມດີ້ງ ໄດ້ປະກອບທີ່ດິນດ້ວຍຄວາມສະໝັກໃຈ ເພື່ອຮັບໃຊ້ໂຄງການກໍ່ສ້າງຊົນນະບົດໃຫມ່. ທ່ານ ຫງວຽນວັນຕາວ ຢູ່ ບ້ານ ອານຫລາງ, ຕາແສງ ຈືກຈິງ, ຊື່ງແມ່ນຄອບຄົວທີ່ໄດ້ປະກອບທີ່ດິນກະສິກຳ 860 ຕາລາງແມັດ ເວົ້າວ່າ:
“ຂ້າພະເຈົ້າຄິດວ່າ ຕົນເອງຕ້ອງມີຄວາມຮັບຜິດຊອບຕໍ່ກັບທ້ອງຖິ່ນ, ດັ່ງນັ້ນຈຶ່ງປະກອບທີ່ດິນກໍ່ສ້າງພື້ນຖານໂຄງລ່າງຄົມມະນາຄົມຊົນນະບົດ, ນັ້ນແມ່ນພັນທະຂອງພົນລະເມືອງ. ຕົນເອງປະຕິບັດພັນທະ ແລະ ໄດ້ຮັບຜົນປະໂຫຍດໂດຍກົງຈາກພັນທະທີ່ດັ່ງກ່າວ.”
ທົ່ງນາຂະໜາດໃຫຍ່ຢູ່ແຂວງນາມດິ້ງ
(ພາບ: ອິນເຕີແນດ)
ໄປຄຽງຄູ່ກັບການກໍ່ສ້າງພື້ນຖານໂຄງລ່າງ, ແຂວງ ນາມດີ້ງ ເອົາໃຈໃສ່ເປັນພິເສດເຖິງການຫັນປ່ຽນ, ພັດທະນາຂະແຫນງອາຊີບ ເພື່ອເພີ່ມລາຍຮັບ, ຊ່ວຍໃຫ້ປະຊາຊົນຫລຸດພົ້ນອອກຈາກຄວາມທຸກຍາກຢູ່ໃນບ້ານເກີດເມືອງນອນຂອງຕົນ. ພົ້ນເດັ່ນ ແມ່ນ ອາຊີບປູກຕົ້ນໄມ້ປະດັບ ຢູ່ ບ້ານ ຕຽນຟອງ, ຕາແສງ ນາມໝີ ເມືອງ ນາມຈຶກ. ລຸງ ຫງວຽນຕຽນຈຸກ, ເຈົ້າບ້ານ ຕຽນຟອງ 2, ຕາແສງ ນາມໝີ ໃຫ້ຮູ້ວ່າ: ມາຮອດປະຈຸບັນ ມີ 90% ຈຳນວນຄອບຄົວໃນບ້ານປູກຕົ້ນໄມ້ປະດັບ. ເມື່ອທຽບໃສ່ການປູກເຂົ້າ, ລາຍຮັບຈາກການປູກຕົ້ນໄມ້ປະດັບເພີ່ມຂຶ້ນທົບ 5 – 10 ເທົ່າ. ໃນໄລຍະ 10 ປີມານີ້, ຊີວິດການເປັນຢູ່ຂອງປະຊາຊົນໄດ້ຮັບການຍົກສູງຂຶ້ນຢ່າງເຫັນໄດ້ຊັດ. ເສດຖະກິດຈາກອາຊີບປູກຕົ້ນໄມ້ປະດັບໄດ້ຊ່ວຍຫລຸດຜ່ອນອັດຕາຄອບຄົວທຸກຍາກຢູ່ທີ່ນີ້ລົງເຫລືອພຽງ 5%. ຸລຸງ ຫງວຽນຕຽນຈຸກ ໃຫ້ຮູ້ວ່າ:
“ ຮັກສາອາຊີບປູກຕົ້ນໄມ້ປະດັບຢູ່ທ້ອງຸຖິ່ນ ແມ່ນມາດຕະການເພື່ອຫລຸດຜ່ອນຄວາມທຸກຍາກແບບຍືນຍົງ, ພັດທະນາເສດຖະກິດທ້ອງຖິ່ນ. ຖ້າບໍ່ເຮັດອາຊີບນີ້, ແນ່ນອນວ່າ ຈະຕົກເຂົ້າສູ່ສະພາບທຸກຍາກຄືນ. ເນື້ອທີ່ປູກເຂົ້າຂອງພວກຂ້າພະເຈົ້າ ໃນປະຈຸບັນ ກວມ 2/3 ເນື້ອທີ່ດິນກະສິກຳ. ດ້ວຍຄວາມຕ້ອງການຕົ້ນໄມ້ປະດັບຄືໃນປະຈຸບັນ ຖ້າຫັນປ່ຽນຜົນລະປູກເປີດກວ້າງເນື້ອທີ່ປູກຕົ້ນໄມ້ປະດັບກວ່າອີກ, ຜົນໄດ້ຮັບຈະຫລາຍກວ່າ.”
ທ່ານ ຫງວຽນວັນຕວນ, ປະທານຄະນະກຳມະການປະຊາຊົນ ແຂວງ, ຫົວຫນ້າຄະນະຊີ້ນຳການກໍ່ສ້າງຊົນນະບົດໃຫມ່ຂອງແຂວງນາມດີ້ງ ໃຫ້ຮູ້ວ່າ: ໃນການກໍ່ສ້າງຊົນນະບົດໃຫມ່, ແຂວງ ນາມດີ້ງ ຖືເປັນສຳຄັນມາດຖານສ້າງທົ່ງນາ ຂະຫນາດໃຫຍ່ ແລະ ຖືວ່າ ນີ້ແມ່ນຂອດຕົ້ນຕໍໃນການກໍ່ສ້າງຊົນນະບົດໃຫມ່. ພາຍຫລັງປະຕິດການສ້າງທົ່ງນາຂະຫນາດໃຫຍ່, ບັນດາທ້ອງຖິ່ນມີເງື່ອນໄຂສ້າງແຜນການ, ຈັດຕັ້ງການຜະລິດຕາມຮູບແບບທົ່ງນາຂະຫນາດໃຫຍ່, ພັດທະນາກະສິກຳເປັນສິນຄ້າຢ່າງມີປະສິດທິຜົນ ແລະ ໝັ້ນຄົງ, ດ້ວຍຈຸດໝາຍສ້າງລາຍຮັບໃຫ້ແກ່ປະຊາຊົນ. ທ່ານ ຫງວຽນວັນຕວນ ໃຫ້ຮູ້ວ່າ:
“ ໃນວິວັດການກໍ່ສ້າງຊົນນະບົດໃຫມ່ ບໍ່ພຽງແຕ່ກໍ່ສ້າງພື້ນຖານໂຄງລ່າງເທົ່ານັ້ນ ກ່ອນອື່ນໝົດຕ້ອງຜະລິດ, ສ້າງແຫລ່ງກຳລັງ, ສ້າງຊີວິດທາງດ້ານວັດຖຸໃຫ້ປະຊາຊົນໃຫ້ນັບມື້ນັບດີກວ່າ. ບົນພື້ນຖານນັ້ນ ຈະສ້າງຄວາມໄວ້ເນື້ອເຊື່ອໃຈໃຫ້ແກ່ປະຊາຊົນ, ລະດົມປະຊາຊົນປະກອບສ່ວນ ການກໍ່ສ້າງຊົນນະບົດໃຫມ່. ພວກຂ້າພະເຈົ້າກຳນົດວ່າ ບໍ່ຟ້າວເຮັດ, ຕ້ອງເຮັດຢ່າງໝັ້ນຄົງ ແລະ ຖືການກໍ່ສ້າງຊົນນະບົດໃຫມ່ແມ່ນບັນຫາຍາວນານ.”
ໂດຍກຳນົດວ່າ ການກໍ່ສ້າງຊົນນະບົດໃຫມ່ ແມ່ນຫນ້າທີ່ເປັນປະຈຳ, ແຂວງ ນາມດີ້ງ ສືບຕໍ່ລະດົມທຸກແຫລ່ງກຳລັງ, ເສີມຂະຫຍາຍບົດບາດເປັນເຈົ້າຂອງປະຊາຊົນໃນການກໍ່ສ້າງຊົນນະບົດໃຫມ່. ບົນພື້ນຖານເສີມຂະຫຍາຍແຫລ່ງກຳລັງທ້ອງຖິ່ນ, ການຮ່ວມແຮງຮ່ວມໃຈຂອງປະຊາຊົນ, ແຂວງ ນາມດີ້ງ ສູ້ຊົນເພື່ອໃຫ້ 100% ຈຳນວນຕາແສງບັນລຸໄດ້ມາດຖານທັງໝົດໃນການກໍ່ສ້າງຊົນນະບົດໃຫມ່ໃນປີ 2015.