(vovworld) – ໂດຍປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ແຂວງກວາງບິ່ນ ໄດ້ເລືອກເອົາ 6 ຕາແສງໃນບັນດາເມືອງເລ້ຖູຍ, ກວາງນິນ, ໂບ໋ແຈກ, ກວາງແຈກ, ຕວຽນຮ໋ວາ ແລະ ມິນຮ໋ວາ ເພື່ອຜັນຂະຫຍາຍການກໍ່ສ້າງຊົນນະບົດໃໝ່. ວຽກງານນີ້ໄດ້ຮັບການສະໜັບສະໜູນຢ່າງສຸດຈິດສຸດໃຈ ດ້ວຍຄວາມຮັບຜິດຊອບສູງຈາກປະຊາຊົນເປັນຈຳນວນຫຼວງຫຼາຍ.
ໂຮງຮຽນອະນຸບານພວມໄດ້ຮັບການລົງທຶນກໍ່ສ້າງ
(ພາບ: baoquangbinh.vn)
ພາຍຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ມາຮອດປະຈຸບັນ, ບັນດາຕາແສງປະຕິບັດທົດລອງເກືອບທັງໝົດໃນຈຳນວນ 70 ຕາແສງຂອງແຂວງກວາງບິ່ນ ລ້ວນແຕ່ບັນລຸໄດ້ແຕ່ 8-12/19 ມາດຖານ. ທົ່ວແຂວງກໍ່ສ້າງທາງຄົມມະນາຄົມໄດ້ກວ່າ 100 ກມ, ໂຮງຮຽນ ແລະ ກິດຈະກຳອື່ນໆຫຼາຍແຫ່ງໄດ້ຮັບການຍົກລະດັບ. ນັບໝື່ນຄອບຄົວຊາວກະສີກອນໄດ້ມອບທີ່ດິນເກືອບ 250.000 ຕາລາງແມັດໃຫ້ຂະບວນການກໍ່ສ້າງຊົນນະບົດໃໝ່ ດ້ວຍຄວາມສະໝັກໃຈ.
ຢູ່ຕາແສງຊວນນິນ, ເມືອງກວາງນິນ, ເຊິ່ງແມ່ນໜຶ່ງໃນຈຳນວນ 6 ຕາແສງປະຕິບັດທົດລອງການກໍ່ສ້າງຊົນນະບົດໃໝ່ຂອງແຂວງກວາງບິ່ນ, ປະຊາຊົນພວມແຂ່ງຂັນກັນສູ້ຊົນປະຕິບັດສຳເລັດບັນດາມາດຖານກ່ຽວກັບການກໍ່ສ້າງຊົນນະບົດໃໝ່ໃນປີນີ້. ທ່ານ ຫງວຽນເຈື່ອງຕ໋ຽນ, ປະທານຄະນະກຳມະການປະຊາຊົນຕາແສງຊວນນິນ ໃຫ້ຮູ້ວ່າ, ຜົນສຳເລັດຂອງຂະບວນການກໍ່ສ້າງຊົນນະບົດໃໝ່ຢູ່ຕາແສງຊວນນິນ ໄດ້ເປັນການປຸກລຸກສະຕິຕື່ນຕົວ, ສະມັກໃຈຂອງປະຊາຊົນ. ມາຮອດປະຈຸບັນ, ປະຊາຊົນຕາແສງຊວນນິນ ໄດ້ປະກອບທີ່ດິນເກືອບ 1.000 ຕາລາງແມັດ, ບໍລິຈາກເງິນນັບແສນດົ່ງເພື່ອຍົກລະດັບ, ເປີດກວ້າງເສັ້ນທາງໃນບ້ານຕາແສງ. ທ່ານ ຫງວຽນເຈື່ອງຕ໋ຽນ ຢັ້ງຢືນວ່າ, ຮອດປີ 2015, ທາງຕາແສງຈະປະຕິບັດສຳເລັດ 19/19 ມາດຖານ
“ນັບແຕ່ປີ 2010, ທາງຕາແສງເລີ່ມຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ປະຈຸບັນຊວນນິນ ໄດ້ສຳເລັດ 9 ມາດຖານແລ້ວ, ສ່ວນບັນດາມາດຖານທີ່ຍັງເຫຼືອພວມໄດ້ຮັບການປະຕິບັດ. ພວກຂ້າພະເຈົ້າສູ້ຊົນຮອດປີ 2015 ຈະປະຕິບັດສຳເລັດ 19 ມາດຖານ. ເມື່ອຜັນຂະຫຍາຍການກໍ່ສ້າງຊົນນະບົດໃໝ່, ປະຊາຊົນໄດ້ສະໜັບສະໜູນທີ່ສຸດ. ພວກຂ້າພະເຈົ້າພະຍາຍາມສູ້ຊົນເຮັດໃຫ້ຊີວິດຂອງປະຊາຊົນນັບມື້ນັບພັດທະນາ“.
ຊາວກະສີກອນກວາງບິ່ນນຳໃຊ້ກົນຈັກໃນການເກັບກ່ຽວເຂົ້າລະດູຮ້ອນຕໍ່ລະດູໃບໄມ້ຫຼົ່ນປີ 2013
(ພາບ: baoquangbinh.vn) ສ່ວນຢູ່ຕາແສງກວາງຟຸກ, ເມືອງກວາງແຈກ, ແຫ່ງທີ່ມີ 90% ຈຳນວນປະຊາຊົນເຊື່ອຖືສາສະໜາຄຣິດນັ້ນ ກໍ່ມີນັບຮ້ອຍຄອບຄົວບໍລິຈາກເງິນ, ທີ່ດິນເພື່ອກໍ່ສ້າງທາງໃນບ້ານຕາແສງ. ທ່ານ ຫງວຽນຈີ໋ດ່ວາຍ, ຕາແສງກວາງຟຸກ, ເມືອງກວາງແຈກ, ແຂວງກວາງບິ່ນ, ໃຫ້ຮູ້ວ່າ:
“ປະຊາຊົນພວກຂ້າພະເຈົ້າພາກພູມໃຈຫຼາຍ ແລະ ພ້ອມແລ້ວທີ່ຈະປະກອບທີ່ດິນເພື່ອກໍ່ສ້າງທາງ, ກໍ່ສ້າງຊົນນະບົດໃໝ່. ປະຈຸບັນ,ໂສມມໜ້າເຂດຊົນນະບົດຂອງພວກຂ້າພະເຈົ້າໄດ້ມີການປ່ຽນໃໝ່ຫຼາຍຢ່າງ, ມີທາງໄປມາຢ່າງສະດວກສະບາຍ, ມີເຮືອນຕຶກ 2, 3 ຊັ້ນ ຫຼາຍຫຼັງ. ປະຊາຊົນມີສະຕິໃນການກໍ່ສ້າງຊົນນະບົດໃໝ່“.
ມາຮອດປະຈຸບັນ, ແຂວງກວາງບິ່ນ ລະດົມທຶນໄດ້ເກືອບ 500 ຕື້ດົ່ງ ເພື່ອກໍ່ສ້າງຊົນນະບົດໃໝ່, ໃນນັ້ນມີແຫຼ່ງທຶນຈາກງົບປະມານຂອງລັດ, ສິນເຊື່ອ, ວິສາຫະກິດ ແລະ ການບໍລິຈາກຂອງປະຊາຊົນ. ທ່ານ ຮ່ວາງວັນມິ້ນ , ຮອງຫົວໜ້າພະແນກກະສີກຳ ແລະ ພັດທະນາຊົນນະບົດແຂວງກວາງບິນ, ໃຫ້ຮູ້ວ່າ:
“ເພື່ອຮັບໃຊ້ວຽກງານກໍ່ສ້າງຊົນນະບົດໃໝ່ໃຫ້ດີ, ທາງແຂວງໄດ້ຊີ້ນຳບຸລິມາສິດແຫຼ່ງງົບປະມານຂອງສູນກາງໃຫ້ບັນດາຕາແສງບັນລຸໄດ້ຫຼາຍມາດຖານແລ້ວ ເພື່ອປະຕິບັດສຳເລັດໂຄງການຢ່າງສິ້ນເຊິງ. ນອກນັ້ນ, ບັນດາຕາແສງ, ເມືອງຍັງຕັ້ງໜ້າຍູ້ແຮງການໂຄສະນາ, ຂົນຂວາຍ ເພື່ອໃຫ້ປະຊາຊົນປະກອບສ່ວນກໍ່ສ້າງ ທາງຄົມມະນາຄົມທີ່ເຊື່ອມຕໍ່ເຂດຕົວເມືອງກັບຊົນນະບົດ“ .
ພ້ອມກັບການກໍ່ສ້າງຊົນນະບົດໃໝ່, ປະຈຸບັນ,ບັນດາເມືອງ, ຕົວເມືອງໃນແຂວງພວມຜັນຂະຫຍາຍຫຼາຍຮູບແບບຜະລິດທົດລອງແນວພັນເຂົ້າໃໝ່, ໜູນຊ່ວຍປະຊາຊົນກໍ່ສ້າງ, ພັດທະນາການລ້ຽງສັດ; ປະຕິບັດທົດລອງໂຄງການທົ່ງນາຂະໜາດໃຫຍ່… ເພື່ອແນໃສ່ຍົກສູງຊີວິດການເປັນຢູ່ຂອງປະຊາຊົນ. ເລື່ອງສ້າງຄວາມເຫັນດີເຫັນພ້ອມສູງຈາກປະຊາຊົນ, ພ້ອມກັບການເຂົ້າຮ່ວມຂອງອຳນາດການປົກຄອງທ້ອງຖີ່ນ, ຈຸດໝາຍກໍ່ສ້າງຊົນນະບົດໃໝ່ຂອງແຂວງກວາງບິ່ນ ນັບມື້ນັບປະກົດຜົນເປັນຈິງ, ເຮັດໃຫ້ຊີວິດຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ./.