(vovworld) - ໂດຍປະຕິບັດໂຄງການກໍ່ສ້າງຊົນນະບົດໃໝ່, ນັບແຕ່ປີ 2010 ມາຮອດປະຈຸບັນ, ກວາງຈີ້ ໄດ້ລະດົມທັງລະບົບການເມືອງເຂົ້າຮ່ວມ ແລະ ໄດ້ຮັບຄວາມເຫັນດີເຫັນພ້ອມຈາກປະຊາຊົນທຸກຊັ້ນວັນນະ. ດ້ວຍວຽກງານແທດຈິງຫຼາຍຢ່າງ, ສະມາຄົມແມ່ຍິງທຸກຂັ້ນແຂວງກວາງຈີ້ ໄດ້ຢືນຢັນທີ່ຕັ້ງ, ບົດບາດຂອງຕົນໃນການກໍ່ສ້າງຊົນນະບົດໃໝ່ເທື່ອລະກ້າວ.
ແມ່ຍິງເຂົ້າຮ່ວມການກໍ່ສ້າງຊົນນະບົດໃໝ່
(ພາບປະກອບ)
ເຂົ້າຮ່ວມການກໍ່ສ້າງຊົນນະບົດໃໝ່, ສະມາຄົມແມ່ຍິງທຸກຂັ້ນແຂວງກວາງຈີ້ ໄດ້ກຳນົດບັນດາໜ້າທີ່ຈຸດສຸມ, ນັ້ນແມ່ນຊອກຫາບັນດາມາດຕະການເພື່ອຍົກສູງລາຍຮັບໃຫ້ເອື້ອຍນ້ອງແມ່ຍິງ. ເພາະວ່າເມື່ອເສດຖະກິດຄອບຄົວພັດທະນາ, ເຂົາເຈົ້າຈຶ່ງມີເງື່ອນໄຂປະກອບກຳລັງເຫື່ອແຮງ ແລະ ຊັບສິນໃຫ້ແກ່ການກໍ່ສ້າງບັນດາກິດຈະກຳສະຫວັດດີການໄດ້. ຍ້ອນເຫດນັ້ນ, ແຕ່ລະປີ, ສະມາຄົມທຸກຂັ້ນໄດ້ສົມທົບກັບບັນດາອົງການ, ຫົວໜ່ວຍ, ບັນດາພະແນກ, ຂະແໜງການຈັດຕັ້ງການບຳລຸງສ້າງວິຊາຊີບ, ຊຸດຝຶກອົບຮົມ, ຖ່າຍທອດບັນດາຄວາມກ້າວໜ້າດ້ານວິທະຍາສາດເຕັກນິກນັບສິບຊຸດ ເພື່ອຍົກສູງລາຍຮັບໃຫ້ແກ່ເອື້ອຍນ້ອງ ແນໃສ່ພັດທະນາເສດຖະກິດຄອບຄົວ. ເອື້ອຍ ຫງວຽນທິແທງຖູຍ, ປະທານສະມາຄົມແມ່ຍິງແຂວງກວາງຈີ້, ໃຫ້ຮູ້ວ່າ:
“ນັບແຕ່ປີ 2011 ມາຮອດປະຈຸບັນ, ພວກຂ້າພະເຈົ້າ ໄດ້ຈັດການບຳລຸງສ້າງຢ່າງຕໍ່ເນື່ອງ. ແຕ່ລະປີມີ 10-15 ຊຸດ, ແຕ່ລະຊຸດມີເອື້ອຍນ້ອງເຂົ້າຮ່ວມແຕ່ 30-35 ຄົນ, ດ້ວຍອາຊີບຕົ້ນຕໍແມ່ນການລ້ຽງສັດ, ສັດຕະວະແພດ, ການປູກຝັງ. ພາຍຫຼັງການບຳລຸງວິຊາຊີບ, 70% ຈຳນວນຜູ້ເຂົ້າຮຽນມີວຽກເຮັດງານທຳ, ຍ້ອນພວກຂ້າພະເຈົ້າໄດ້ຮ່ວມສຳພັນກັບບັນດາພະແນກ, ຂະແໜງການຕ່າງໆ ເພື່ອສ້າງວຽກເຮັດງານທຳໃຫ້ແກ່ເອື້ອຍນ້ອງ. ນອກນັ້ນສະມາຄົມທຸກຂັ້ນກໍ່ສ້າງຕັ້ງບັນດາໜ່ວຍແມ່ຍິງປະຕິບັດການເຄື່ອນໄຫວບໍລິການຄອບຄົວ, ໜ່ວຍສະຫະກອນລ້ຽງສັດ, ປຸງແຕ່ງທັນຍາຫານ, ຜະລິດບັນດາຜະລິດຕະພັນພິເສດຂອງໝູ່ບ້ານອາຊີບ“.
ພ້ອມກັບການຍູ້ແຮງວຽກງານໂຄສະນາ, ຂົນຂວາຍສະມາຄົມແມ່ຍິງທຸກຂັ້ນຢູ່ແຂວງກວາງຈີ້ ຍັງຜັນຂະຫຍາຍການເຄື່ອນໄຫວແທດຈິງ, ມີຫົວຄິດປະດິດສ້າງ ແລະ ເໝາະສົມຫຼາຍຢ່າງ ເພື່ອກໍ່ສ້າງຊົນນະບົດໃໝ່. ຂະບວນການທີ່ພົ້ນເດັ່ນນັ້ນແມ່ນສະມາຄົມທຸກຂັ້ນ ໄດ້ຊ່ວຍເຫຼືອແມ່ຍິງຜັນຂະຫຍາຍການຜະລິດ, ເຮັດເສດຖະກິດ, ປະຕິບັດການປະຢັດ, ຫຼຸດຜ່ອນຄວາມທຸກຍາກແບບຍືນຍົງ, ໃນນັ້ນໄດ້ຫາທຶນຈາກແຫຼ່ງຕ່າງໆເພື່ອໃຫ້ 90.000 ກວ່າຄົນກູ້ຢືມ. ຍົກເຫຼືອໜີ້ທັງໝົດໃນປະຈຸບັນຂຶ້ນກວ່າ 855 ຕື້ດົ່ງ, ຮັກສາການເຄື່ອນໄຫວຂອງ 4285 ໜ່ວຍສີນເຊື່ອປະຢັດຂອງແມ່ຍິງ ດ້ວຍຈຳນວນເງິນເຫຼືອກວ່າ 61 ຕື້ດົ່ງ.
ຄຽງຂ້າງນັ້ນ, ສະມາຄົມແມ່ຍິງທຸກຂັ້ນ ຍັງຈົດທະບຽນວຽກງານຕ່າງໆເຊິ່ງແມ່ຍິງຮັບຜິດຊອບຢ່າງມີປະສິດທິຜົນກັບຄະນະຊີ້ນຳການກໍ່ສ້າງຊົນນະບົດໃໝ່ຢູ່ທ້ອງຖີ່ນຕ່າງໆເຊັ່ນ: ເຂົ້າຮ່ວມການກໍ່ສ້າງບັນດາກິດຈະກຳສະຫວັດດີການ, ເຮັດອະນາໄມສິ່ງແວດລ້ອມ, ຮັກສາທາງບ້ານໃຫ້ສະອາດ, ສວຍງາມ. ກ່ຽວກັບວິທີເຮັດ, ທ່ານນາງ ຫງວຽນທິແທງຖູຍ, ໃຫ້ຮູ້ວ່າ:
“ພວກຂ້າພະເຈົ້າຈັດພິທີປຸກລະດົມຢູ່ແຕ່ລະທ້ອງຖີ່ນ, ປີນີ້ເຮັດຢູ່ກາມໂລ້, ປີໜ້າເຮັດຢູ່ ວິ້ງລິງ, ປີຕໍ່ມາເຮັດຢູ່ ຈ້ຽວຟອງ. ໃນການຂົນຂວາຍແຕ່ລະຄັ້ງ, ພວກຂ້າພະເຈົ້າກໍ່ເລືອກເຟັ້ນແຕ່ລະຫົວຂໍ້ຢ່າງເໝາະສົມ. ບາງເທື່ອແມ່ນເຮັດອະນາໄມສິ່ງແວດລ້ອມ; ບາງເທື່ອປະຢັດເພື່ອກໍ່ສ້າງທາງພາຍໃນທົ່ງນາ, ຕິດຕັ້ງໄຟຟ້າເຍືອງທາງ, ຫຼືສ້າງທົ່ງນາຂະໜາດໃຫຍ່, ຫັນປ່ຽນຜົນລະປູກ… ຫົວຂໍ້ເຫຼົ່ານັ້ນກໍ່ຕິດພັນກັບແຕ່ລະທ້ອງຖີ່ນ, ແຕ່ລະຫົວໜ່ວຍ. ພາຍຫຼັງພິທີປຸກລະດົມ, ພວກຂ້າພະເຈົ້າກໍ່ຜັນຂະຫຍາຍການປະຕິບັດໃນທັນທີ“.
ແມ່ຍິງເຂົ້າຮ່ວມການກໍ່ສ້າງຊົນນະບົດໃໝ່
(ພາບປະກອບ)
ປະທານສະຫະພັນແມ່ຍິງແຂວງກວາງຈີ້ ກໍ່ເນັ້ນໜັກວ່າ, ໃນວິວັດແຫ່ງການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ສະມາຄົມແມ່ຍິງທຸກຂັ້ນ ໄດ້ສະແດງທີ່ຕັ້ງ, ບົດບາດຂອງຕົນຢ່າງຈະແຈ້ງ, ນັບແຕ່ການວາງແຜນການ, ລາຍການດຳເນີນງານເຖິງການຊີ້ນຳນຳພາ, ແລະ ການຈັດຕັ້ງປະຕິບັດ. ໃນນັ້ນໄດ້ເລືອກເຟັ້ນບັນດາກິດຈະກຳ, ວຽກງານທີ່ເໝາະສົມກັບຄວາມສາມາດຂອງແມ່ຍິງຄື, ສ້າງຕັ້ງບັນດາໜ່ວຍງານ, ໜ່ວຍເກັບຂີ້ເຫຍື່ອ, ເຮັດອະນາໄມສິ່ງແວດລ້ອມ, ຮັກສາທາງໃຫ້ຂຽວ, ສະອາດ ແລະ ສວຍງາມ. ທ່ານນາງ ຫງວຽນທິແທງຖູຍ, ຕີລາຄາວ່າ:
“ໃນການກໍ່ສ້າງຊົນນະບົດໃໝ່, ວຽກງານທີ່ພວກຂ້າພະເຈົ້າເຫັນວ່າມີປະສິດທິຜົນທີ່ສຸດນັ້ນແມ່ນ, ແມ່ຍິງຮູ້ສົມທົບກັບຂະແໜງກະສິກຳ ແລະ ຈົດທະບຽນແຕ່ລະເນື້ອໃນເຂົ້າຮ່ວມຢ່າງລະອຽດ. ຕົວຢ່າງຄືປີ 2015 ພວກຂ້າພະເຈົ້າຈົດທະບຽນກັບພະແນກກະສິກຳກ່ຽວກັບການກໍ່ສ້າງຊົນນະບົດໃໝ່ ແມ່ນບຸລະນະສ້ອມແປງຊົນນະບົດ, ເສັ້ນທາງຄົມມະນາຄົມ. ປີ 2014 ພວກຂ້າພະເຈົ້າສຸມໃສ່ເຂົ້າໃນການກຳຈັດຂີ້ເຫຍື່ອ“.
ພ້ອມກັບການກໍ່ສ້າງສະມາຄົມໃຫ້ໝັ້ນຄົງເຂັ້ມແຂງ ແລະ ປອດໄສ, ໂຄສະນາ, ສຶກສາ, ຂົນຂວາຍແມ່ຍິງປະຕິບັດບັນດາແຜນນະໂຍບາຍ, ກົດໝາຍ, ນະໂຍບາຍ, ຫຼໍ່ຫຼອມຄຸນນະທາດ, ຄຸນສົມບັດ, ຍົກສູງລະດັບຄວາມຮູ້, ສະມາຄົມແມ່ຍິງທຸກຂັ້ນຢູ່ແຂວງກວາງຈີ້ ກຳນົດໜ້າທີ່ຈຸດສຸມແມ່ນສືບຕໍ່ຜັນຂະຫຍາຍບັນດາການເຄື່ອນໄຫວຮ່ວມແຮງຮ່ວມໃຈເພື່ອກໍ່ສ້າງຊົນນະບົດໃໝ່ຢູ່ກວາງຈີ້ ໃຫ້ນັບມື້ນັບພັດທະນາ.