(vovworld)-ໂດຍສືບຕໍ່ບົດທຳອິດໃນລາຍການ ”ຊົນນະບົດໃໝ່ຫວຽດນາມ” ສັບປະດາກ່ອນ ກ່ຽວກັບໜ້າທີ່ກໍ່ສ້າງຊົນນະບົດໃໝ່ຢູ່ຫວຽດນາມ ໃນປະຈຸບັນນັ້ນ. ມື້ນີ້, ພວກເຮົາຂໍແນະນຳ ”ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່”, ເຊິ່ງແມ່ນເນື້ອໃນສຳຄັນໃນການປະຕິບັດມະຕິ 26 ຂອງຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 10 ກ່ຽວກັບການກໍ່ສ້າງກະສີກຳ, ຊົນນະບົດ, ຊາວກະສີກອນຫວຽດນາມ.
(ພາບ: google.com.vn)
ຕາມທ່ານ Tang Minh Loc, ຫົວໜ້າກົມເສດຖະກິດຮ່ວມມື ແລະ ພັດທະນາຊົນນະບົດ, ຫົວໜ້າຫ້ອງການຄະນະຊີ້ນຳໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ສັງກັດກະຊວງກະສີກຳ ແລະ ພັດທະນາຊົນນະບົດຫວຽດນາມ ແລ້ວ, ໃນໂຄງການຈຸດໝາຍແຫ່ງຊາດກ່ຽວກັບຊົນນະບົດໃໝ່, ລັດຖະບານຫວຽດນາມ ໄດ້ວາງຈຸດໝາຍອັນລະອຽດວ່າ, ນັບແຕ່ນີ້ເຖິງປີ 2015, ຈະມີ 20% ຈຳນວນຕາແສງຂອງຫວຽດນາມ ບັນລຸມາດຕະຖານຊົນນະບົດໃໝ່, ເຖິງປີ 2020 ຈະມີປະມານ 50% ຈຳນວນຕາແສງບັນລຸມາດຕະຖານຊົນນະບົດໃໝ່ ຕາມມາດຖານແຫ່ງຊາດ, ເຊິ່ງລັດຖະບານໄດ້ປະກາດໃຊ້. ທ່ານ Tang Minh Loc ໃຫ້ຮູ້ວ່າ:
”ຈຸດໝາຍຂອງໂຄງການແມ່ນ ຢາກກໍ່ສ້າງຊົນນະບົດຫວຽດນາມ ໃຫ້ມີເສດຖະກິດພັດທະນາ, ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການຍົກສູງຂຶ້ນຢ່າງວ່ອງໄວ. ຕ້ອງມີໂຄງລ່າງພັດທະນາພໍສົມຄວນ ເພື່ອຮັບປະກັນການພັດທະນາໃນໄລຍະຍາວ, ຕອບສະໜອງຄວາມຮຽກຮ້ອງຕ້ອງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ ແລະ ຊົນນະບົດຕ້ອງໄດ້ຮັບການພັດທະນາຕາມແຜນກຳນົດ, ສິ່ງແວດລ້ອມຢູ່ເຂດຊົນນະບົດຕ້ອງຂຽວ, ສະອາດ, ສວຍງາມ, ລະດັບຄວາມຮູ້ຂອງປະຊາຊົນກໍ່ໄດ້ຮັບການຍົກສູງຂຶ້ນ, ບັນດາສີສັນດ້ານວັດທະນະທຳ ແລະ ຈິດໃຈຂອງປະຊາຊົນຕ້ອງໄດ້ຮັບການອະນຸລັກຮັກສາ, ແລະ ເສີມຂະຫຍາຍ. ນອກນັ້ນ, ຄຸນນະພາບຂອງລະບົບການເມືອງ, ຄວາມສາມາດ, ຄຸນນະທາດຂອງຖັນແຖວພະນັກງານຂັ້ນຮາກຖານຕ້ອງໄດ້ຮັບປັບປຸງ. ນີ້ແມ່ນ 5 ຈຸດພິເສດທີ່ເປັນພື້ນຖານຂອງຊົນນະບົດໃໝ່ຫວຽດນາມ”
(ພາບ: google.com.vn)
ທ່ານ Tang Minh Loc ຍັງໃຫ້ຮູ້ຕື່ມອີກວ່າ, 5 ຈຸດພິເສດທີ່ເປັນພື້ນຖານຂອງຊົນນະບົດໃໝ່ຫວຽດນາມ ໄດ້ສະແດງອອກຢ່າງລະອຽດ ດ້ວຍ 19 ມາດຖານ ໃນຈຳນວນມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ເຊິ່ງທ່ານນາຍົກລັດຖະມົນຕີໄດ້ປະກາດໃຊ້. ເພື່ອບັນລຸໄດ້ບັນດາມາດຖານດັ່ງກ່າວ, ລັດຖະບານກໍ່ໄດ້ວາງອອກ 11 ເນື້ອໃນໃຫຍ່ທີ່ຕ້ອງປະຕິບັດໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະ ບົດໃໝ່. ຕາມນັ້ນແລ້ວ, ກ່ອນອື່ນໝົດແມ່ນຕ້ອງປະຕິບັດວຽກງານວາງແຜນກຳນົດໃຫ້ດີ, ແຜນກຳນົດຕ້ອງວາງກ່ອນ ເພື່ອໃຫ້ຊົນນະບົດພັດທະ ນາຢ່າງເປັນລະບຽບຮຽບຮ້ອຍ, ປະຢັດແຫຼ່ງກຳລັງ ແລະ ຮັບປະກັນພັດທະນາຢ່າງໝັ້ນຄົງໃນໄລຍະຍາວ. ທີສອງແມ່ນ, ຕ້ອງພັດທະນາລະບົບໂຄງລ່າງ, ພິເສດແມ່ນບັນດາໂຄງລ່າງທີ່ເປັນພື້ນຖານຄື: ລະບົບໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ, ລະບົບສະໜອງນ້ຳສະອາດ, ເຮືອນຢູ່ຂອງປະຊາຊົນ… ໝາຍຄວາມວ່າລະບົບໂຄງລ່າງຕ້ອງບັນລຸມາດ ຖານ ແລະ ມຸ້ງໄປເຖິງການກໍ່ສ້າງໂຄງລ່າງແບບຍືນຍົງກວ່າ, ຕາມແຜນກຳ ນົດ ແລະ ຄຸ້ມຄອງ, ບຸລະນະ ເພື່ອໃຫ້ປະຊາຊົນນຳໃຊ້ໃນໄລຍະຍາວ. ແລະກໍ່ ຕາມທ່ານ Tang Minh Loc ແລ້ວ, ຍັງມີເນື້ອໃນໜຶ່ງອີກນັ້ນແມ່ນ ຊົນນະບົດໃໝ່ຕ້ອງພັດທະນາບັນດາຮູບການຜະລິດເພື່ອເພີ່ມລາຍຮັບ. ຕາມນັ້ນແລ້ວ, ພ້ອມກັບການພັດທະນາການຜະລິດ, ຊົນນະບົດໃໝ່ ຫວຽດນາມ ຕ້ອງມີບັນດາຮູບການທີ່ມີປະສິດທິຜົນທີ່ສຸດ ແນໃສ່ເຕົ້າໂຮມ ປະຊາຊົນ ແລະ ຈັດຕັ້ງໃຫ້ເຂົາເຈົ້າຮ່ວມສຳພັນກັບບັນດາວິສາຫະກິດເພື່ອນຳໃຊ້ວິທະຍາສາດເຕັກນິກໃນການພັດທະນາກະສີກຳ, ມຸ້ງໄປເຖິງການຜະລິດສິນຄ້າຕາມຄວາມຕ້ອງການຂອງຕະຫຼາດ.
ຕາມບັນດາມາດຖານນີ້ແລ້ວ, ຊົນນະບົດໃໝ່ຫວຽດນາມ ມີຄວາມແຕກຕ່າງກັບຊົນນະບົດເກົ່າ ແລະ ວິທີການກໍ່ສ້າງຊົນນະບົດໃໝ່ ກໍ່ແຕກຕ່າງກັບເມື່ອກ່ອນ. ທ່ານ Tang Minh Loc ເນັ້ນໜັກວ່າ:
”ໃນການກໍ່ສ້າງຊົນນະບົດໃໝ່ຄັ້ງນີ້, ພວກເຮົາປະຕິບັດຢູ່ຂັ້ນຕາແສງ, ເພາະວ່າຕາແສງແມ່ນຂັ້ນບໍລິຫານ, ມີອົງປະກອບຢ່າງຄົບຖ້ວນເພື່ອປະຕິບັດບັນດາໜ້າທີ່ຊົນນະບົດທີ່ຫາກໍ່ວາງອອກໃຫ້ໄດ້. ທຸກສິ່ງທຸກຢ່າງທີ່ກ່ຽວຂ້ອງເຖິງໂຄງລ່າງລ້ວນແຕ່ບັນລຸມາດຖານ, ເພື່ອຮັບປະກັນວ່າ, ເມື່ອກໍ່ ສ້າງຊົນນະບົດໃໝ່ຕາມມາດຖານ ແລະ ແຜນກຳນົດນັ້ນຈະຮັບປະກັນ ພັດທະນາຢ່າງໝັ້ນຄົງ ແລະ ຍາວນານໄດ້. ແລະມາດຖານນີ້ໂດຍບັນດາກະຊວງ, ຂະແໜງການກ່ຽວຂ້ອງກຳນົດ, ປະກາດໃຊ້ ແລະ ມີເອກະສານແນະນຳ. ແລະສິ່ງສຳຄັນທີ 3 ນັ້ນແມ່ນພວກເຮົາກໍ່ສ້າງຊົນນະບົດໃໝ່ໂດຍຖືຊາວກະສີກອນແມ່ນເຈົ້າຂອງ, ກຳລັງພາຍໃນປະຊາຄົມແມ່ນຕົ້ນຕໍເພື່ອກໍ່ສ້າງຊົນນະບົດ. ໝາຍຄວາມວ່າການເຄື່ອນໄຫວທັງໝົດຂອງພວກເຮົາລ້ວນແຕ່ມຸ້ງໄປສູ່ຊາວກະສີກອນຢູ່ເຂດຊົນນະບົດ. ແລະ ເຂົາເຈົ້າເອງກໍ່ແມ່ນຜູ້ວາງແຜນການ, ຈັດຕັ້ງການປະຕິບັດ ແລະ ໄດ້ຊົມໃຊ້ແຜນການນັ້ນ”
(ພາບ: google.com.vn)
ສິ່ງທີ່ໜ້າສົນໃຈນັ້ນແມ່ນ, ລັດຈະໜູນຊ່ວຍຊາວກະສີກອນໃນຕະຫຼອດວິວັດແຫ່ງການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຫວຽດນາມ ຄັ້ງນີ້. ໃນໂຄງການກໍ່ສ້າງຊົນນະບົດໃໝ່, ລັດສູມໃສ່ໜູນຊ່ວຍຊາວກະສີກອນກ່ຽວກັບງົບປະມານ, ວິທີການປະຕິບັດ, ປະກາດໃຊ້ບັນດາມາດຖານ ເພື່ອກຳນົດທິດໃຫ້ຊົນນະບົດພັດທະນາ. ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຄັ້ງນີ້ ແມ່ນໂຄງການສັງລວມ, ເຕົ້າໂຮມທຸກບັນຫາ. ທຸກເນື້ອໃນອັນຈຳເປັນທີ່ກ່ຽວຂ້ອງເຖິງກະສີກຳ, ຊົນນະບົດ, ຊາວກະສີກອນ, ເຊິ່ງບັນດາກະຊວງ, ຂະແໜງການ, ທ້ອງຖີ່ນ, ອົງການຈັດຕັ້ງມະຫາຊົນຈະພ້ອມກັບຊາວກະສີ ກອນຜັນຂະຫຍາຍການປະຕິບັດ. ອັນໃດກ້າວກ່າຍກັນໃນວິວັດແຫ່ງການປະຕິບັດລ້ວນແຕ່ຖືກລົບລ້າງ, ເພື່ອສຸມແຫຼ່ງກຳລັງປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຫວຽດນາມ ໃຫ້ສຳເລັດຜົນ.
ທີ່ທ່ານຟັງມານັ້ນແມ່ນບົດທີ່ມີຫົວຂໍ້ວ່າ ”ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຫວຽດນາມ” ໃນລາຍການຊົນນະບົດໃໝ່ອາທິດໜ້າ, ພວກເຮົາຂໍແນະນຳ 7 ມາດຕະການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຫວຽດນາມ, ເຊີນທ່ານຮັບຟັງ.