(vovworld) - ໂດຍປະຕິບັດບັ້ນຂົນຂວາຍ “ໄວໜຸ່ມຮ່ວມແຮງກໍ່ສ້າງຊົນນະບົດໃໝ່“ ຂອງສູນກາງຊາວໜຸ່ມກອມມູນິດ ໂຮ່ຈີມີນ, ໄລຍະຜ່ານມາ, ບັນດາອົງການຈັດຕັ້ງຊາວໜຸ່ມແຂວງບັກນິງ ໄດ້ປຸກລະດົມຂະບວນການ, ເສີມຂະຫຍາຍບົດບາດປະຈັນບານ, ອາສາສະໝັກ, ປຸກລຸກໄວໜຸ່ມຕັ້ງໜ້າເຂົ້າຮ່ວມກິດຈະກຳຕ່າງໆ, ປະກອບສ່ວນ ກໍ່ສ້າງຊົນນະບົດໃໝ່.
ໄວໜຸ່ມບັກນິງ ຊ່ວຍປະຊາຊົນກໍ່ສ້າງຊົນລະປະທານ
ພາຍຫຼັງກວ່າໜຶ່ງປີແຫ່ງການປະຕິບັດດບັ້ນຂົນຂວາຍ “ໄວໜຸ່ມຮ່ວມແຮງກໍ່ສ້າງຊົນນະບົດໃໝ່“ ໂດຍສູນກາງຊາວໜຸ່ມກອມມູນິດ ໂຮ່ຈີມີນ ປຸກລະດົມ, ຄະນະປະຈຳ ຄະນະຊາວໜຸ່ມແຂວງບັກນິງ ໄດ້ກຳນົດຄາດໝາຍສູ້ຊົນໃນແຕ່ລະປີ, ແຕ່ລະໄລຍະ ເພື່ອໃຫ້ບັນດາອົງການຊາວໜຸ່ມປະຕິບັດ, ໃນນັ້ນຈຸດສຸມແມ່ນບັນດາຈຸດໝາຍ: ເຂົ້າຮ່ວມການກໍ່ສ້າງ, ບຸລະນະສ້ອງແປງທາງຄົມມະນາຄົມ, ຊົນລະປະທານ, ໂຮງຮຽນ, ຫໍວັດທະນະທຳ, ສ້າງບັນດາຮູບແບບຮ່ວມສຳພັນ, ຮ່ວມມືພັດທະນາເສດຖະກິດໃນໝູ່ຊາວໜຸ່ມ; ໜູນຊ່ວຍຊາວໜຸ່ມຊົນນະບົດຮຽນວິຊາຊີບ, ແນະນຳວຽກເຮັດງານທຳ, ກູ້ຢືມທຶນພັດທະນາການຜະລິດ; ເຂົ້າຮ່ວມການກໍ່ສ້າງຊີວິດວັດທະນະທຳໃໝ່, ຮັກສາຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ; ສ້າງຮູບແບບຊາວໜຸ່ມປົກປັກຮັກສາສິ່ງແວດລ້ອມ; ກໍ່ສ້າງອົງການຊາວໜຸ່ມໝັ້ນຄົງເຂັ້ມແຂງ... ທ່ານຮອງເລຂາປະຈຳຄະນະຊາວໜຸ່ມແຂວງບັກນິງ ໂດດິ່ງຫື້ວ, ໃຫ້ຮູ້ວ່າ:
“ພວກຂ້າພະເຈົ້າກຳນົດວ່າ ຊາວໜຸ່ມແມ່ນກຳລັງປະຈັນບານ ນຳໜ້າໃນວຽກງານໂຄສະນາ, ຂົນຂວາຍເຮັດໃຫ້ປະຊາຊົນເຂົ້າໃຈແຈ້ງ ແລະ ມີຄວາມຮັບຜິດຊອບຕໍ່ວຽກງານກໍ່ສ້າງຊົນນະບົດໃໝ່ ຈາກນັ້ນການປະຕິບັດວຽກງານກໍ່ສ້າງຊົນນະບົດໃໝ່ຈຶ່ງບັນລຸປະສິດທິຜົນ. ສຳລັບໄວໜຸ່ມ, ພວກຂ້າພະເຈົ້າກຳນົດວ່າ, ນີ້ແມ່ນໜ້າທີ່ບຸກທະລຸຂອງໄວໜຸ່ມໃນການກໍ່ສ້າງຊົນນະບົດໃໝ່... ໃນຈຳນວນ 19 ມາດຖານກໍ່ສ້າງຊົນນະບົດໃໝ່ຂອງຕາແສງນັ້ນ, ຊາວໜຸ່ມຕ້ອງເລືອກເຟັ້ນ 1 – 2 ມາດຖານເພື່ອປະຕິບັດ “.
ມາຮອດປະຈຸບັນ, ບັນດາຮາກຖານຊາວໜຸ່ມຢູ່ແຂວງບັກນິງ ພວມຍູ້ແຮງການເຄື່ອນໄຫວຕ່າງໆຄື: “ວັນເສົາອາສາສະໝັກ“; “ວັນອາທິດຂຽວ“ ດ້ວຍເລື່ອງປູກຕົ້ນໄມ້ຊະນິດຕ່າງໆກວ່າ 82.000 ຕົ້ນ; ເປີດສະຫຼອງ ແລະ ຕິດປ້າຍກິດຈະກຳຊາວໜຸ່ມ “ຕິດຕັ້ງໄຟຟ້າເຍືອງທາງຢູ່ເຂດບ້ານນາ“ ດ້ວຍຄວາມຍາວ 50 ກມ, ລວມມູນຄ່າ 1,5 ຕຶ້ດົ່ງ. ພິເສດ, ໃນຂະບວນການຊາວໜຸ່ມອາສາສະໝັກລະດູຮ້ອນປີ 2013, ໄວໜຸ່ມບັກນິງ ໄດ້ປະຕິບັດ 2 ກິດຈະກຳຊາວໜຸ່ມຂັ້ນແຂວງ, ນັ້ນແມ່ນຂຸດຄອງເໝືອງລະບາຍ ແລະ ຫົດນ້ຳຢູ່ຕາແສງມິງເຕິນ, ເມືອງເລືອງຕ່າຍ ແລະ ຮ່ຽນເລືອງ 4, ຕາແສງຫວຽດຮຸ່ງ, ເມືອງເກວ໋ຫວໍ, ໃຫ້ຄຳປຶກສາ, ຊ່ວຍນັກຮຽນກວ່າ 9 ພັນຄົນໃນການສອບເສງເຂົ້າມະຫາວິທະຍາໄລ, ວິທະຍາໄລປີ 2013, ໄປຢ້ຽມຢາມ ແລະ ມອບຂອງຂວັນທີ່ມີມູນຄ່າກວ່າ 1 ຕື້ດົ່ງໃຫ້ບັນດາຄອບຄົວນະໂຍບາຍ, ທະຫານເຈັບປ່ວຍ, ທະຫານເສຍອົງຄະ. ຜ່ານຂະບວນການຕ່າງໆ, ສະມາຊິກຊາວໜຸ່ມມີໂອກາດເພື່ອຫໍ່ຼຫຼອມ, ເຕີບໃຫຍ່ກວ່າ, ປະກອບສ່ວນປຸກລຸກກຳລັງໜຸ່ມ, ຄວາມມຸ້ງຫວັງ, ຄວາມໄຝ່ຝັ່ນຂອງຊາວໜຸ່ມໃນການສ້າງຄວາມສິວິໄລ ແລະ ວັດທະນະທຳໃນເຂດຊົນນະບົດ. ທ່ານ ເຢືອງງອກຢ໋ຽນ, ເລຂາຄະນະຊາວໜຸ່ມຕາແສງຄັກນ້ຽມ, ນະຄອນບັກນິງ, ແບ່ງປັນວ່າ:
“ເມື່ອຜັນຂະຫຍາຍເນື້ອໃນເຄື່ອນໄຫວ ກໍ່ຄືປະຕິບັດບັນດາກິດຈະກຳ, ຊາວໜຸ່ມ, ພະນັກງານສະມາຊິກຊາວໜຸ່ມເວົ້າລວມລ້ວນແຕ່ສູ້ຊົນ, ຕັ້ງໜ້າ, ຫ້າວຫັນເຂົ້າຮ່ວມດ້ວຍຄວາມຮັບພິດຊອບ ເພື່ອປະກອບສ່ວນເຂົ້າໃນການກໍ່ສ້າງຊົນນະບົດໃໝ່“.
ໄວໜຸ່ມບັກນິງ ຮ່ວມແຮງກໍ່ສ້າງຊົນນະບົດໃໝ່
ການປະກອບສ່ວນຂອງໄວໜຸ່ມບັກນິງ ໄດ້ສ້າງການຫັນປ່ຽນຢ່າງຕັ້ງໜ້າໃນຊີວິດຂອງປະຊາຊົນທ້ອງຖີ່ນ, ຊ່ວຍໃຫ້ທ້ອງຖີ່ນປະຕິບັດສຳເລັດໂຄງການກໍ່ສ້າງຊົນນະບົດໃໝ່ໂດຍໄວ. ລຸງ ເຢືອງດຶກຢຸງ, ບ້ານດ່ວາຍ, ຕາແສງຄັກນ້ຽມ, ນະຄອນບັກນິງ ໃຫ້ຮູ້ວ່າ:
“ໄວໜຸ່ມບັກນິງ ໄດ້ມີລາຍການເຄື່ອນໄຫວແທດຈິງຫຼາຍຢ່າງ ເພື່ອຮ່ວມແຮງຮ່ວມໃຈພ້ອມກັບລັດ, ອຳນາດການປົກຄອງທ້ອງຖີ່ນກໍ່ສ້າງຊົນນະບົດໃໝ່. ໃນນັ້ນນຳໜ້າແມ່ນຂະບວນການປູກຕົ້ນໄມ້ ແລະ ຕິດຕັ້ງໄຟຟ້າເຍືອງທາງເຖິງເຂດຫ່າງໄກສອກຫຼີກ. ເຊິ່ງກ່ອນນັ້ນຍ້ອນເງື່ອນໄຂດ້ານການເງິນຖືກຈຳກັດ ຫຼາຍບ້ານບໍ່ທັນເຮັດໄດ້.“
ໂດຍຜ່ານບັນດາຂະບວນການປະຈັນບານ, ອາສາສະໝັກຂອງກຳລັງຊາວໜຸ່ມແຂວງບັກນິງ, ປະຊາຊົນມີຄວາມເຊື່ອໝັ້ນກວ່າອີກຕໍ່ລຸ້ນໜຸ່ມທີ່ຂະຫຍັນຂັນເຂື່ອນ, ມີຫົວຄິດປະດິດສ້າງ, ເຮັດວຽກຢ່າງສຸດຈິດສຸດໃຈ ແລະ ມີປະສິດທິຜົນ. ການຮ່ວມແຮງຮ່ວມໃຈຂອງໄວໜຸ່ມແຂວງບັກນິງ ດ້ວຍບັນດາກິດຈະກຳ, ວຽກງານລະອຽດ ໄດ້ປະກອບສ່ວນພ້ອມກັບອຳນາດການປົກຄອງ ແລະ ປະຊາຊົນທ້ອງຖີ່ນ ຜັນຂະຫຍາຍໂຄງການກໍ່ສ້າງຊົນນະບົດໃໝ່ຢ່າງມີປະສິດທິຜົນ, ເພື່ອພ້ອມກັນມຸ່ງໄປເຖິງຈຸດໝາຍຮອດປີ 2020 ມີ 50% ຈຳນວນຕາແສງຢູ່ບັກນິງບັນລຸມາດຖານຊົນນະບົດໃໝ່.