ຕົ້ນໝາກກ້ຽງກາວຟອງ (ພາບ: google.com.vn)
|
(vovworld) - ຮ່ວາບິ່ງ, ແມ່ນແຂວງໜຶ່ງໃນເຂດພູດອຍທາງພາກເໜືອຫວຽດນາມ ທີ່ຕິດກັບນະຄອນຫຼວງຮ່າໂນ້ຍ ບໍ່ພຽງແຕ່ມີຊື່ສຽງດ້ວຍທິວ ທັດທຳມະຊາດທີ່ສວຍງາມຂອງເຂດພູຜາປ່າໄມ້, ພ້ອມກັບບັນດາໝູ່ບ້ານຂອງຊົນເຜົ່າເມື່ອງ, ໄທ ເທົ່ານັ້ນ, ຫາກຍັງມີຊື່ສຽງແມ່ນທ້ອງຖີ່ນທີ່ມີຜະລິດຕະພັນຫຼາຍປະເພດອີກດ້ວຍ, ໃນນັ້ນມີຕົ້ນໝາກກ້ຽງຢູ່ໝູ່ບ້ານກາວຟອງ, ປະຈຸບັນແມ່ນເທດສະບານກາວຟອງ. ດ້ວຍທ່າແຮງແມ່ນເຂດໂນນພູແຄມໜອງຮ່ວາບິ່ງ, ເມືອງກາວຟອງ ພວມສ້າງເຄື່ອງໝາຍການຄ້າໃຫ້ຕົ້ນໝາກກ້ຽງ, ເພື່ອແນໃສ່ເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງທ້ອງຖີ່ນ, ພ້ອມທັງສົມທົບກັບການພັດທະນາບັນດາຮູບແບບທ່ອງທ່ຽວວັດທະນະທຳ, ຊີວະພາບ.
ຈາກໃຈກາງນະຄອນຫຼວງຮ່າໂນ້ຍ, ໄປຕາມທາງຫຼວງເລກ 6 ປະມານ 60-70 ກມ, ແມ່ນຈະຮອດເທດສະບານເມືອງກາວຟອງ, ແຂວງ ຮ່ວາບິ່ງ, ສິ່ງທີ່ສ້າງຄວາມປະທຳໃຈໃຫ້ແກ່ນັກທ່ອງທ່ຽວນັ້ນແມ່ນຕົ້ນໝາກກ້ຽງ. ໝາກກ້ຽງຖືກວາງຂາຍຢ່າງຫຼວງຫຼາຍຢູ່ລຽບຕາມສອງຟາກທາງ. ປະຊາຊົນຢູ່ທີ່ນີ້ໃຫ້ຮູ້ວ່າ, ຕົ້ນໝາກກ້ຽງຢູ່ກາວຟອງ ແມ່ນເອົາແນວພັນມາຈາກຕາແສງດ່ວາຍ, ເຊິ່ງແມ່ນຕາແສງປູກຕົ້ນໝາກກ້ຽງທີ່ມີຊື່ສຽງຂອງແຂວງເງ້ອານ. ກ່ອນນີ້ຫຼາຍທົດສະວັດ, ເມື່ອນຳເອົາໝາກກ້ຽງມາປູກຢູ່ກາວຟອງ, ຍ້ອນເງື່ອນໄຂດິນຟ້າອາກາດເໝາະສົມແລະເອື້ອອຳນວຍ, ຕົ້ນໝາກກ້ຽງໄດ້ຮັບການພັດທະນາຢ່າງວ່ອງໄວ ແລະ ກາຍເປັນຕົ້ນໝາກໄມ້ທີ່ມີຊື່ສຽງຂອງກາວຟອງ. ຍ້ອນສາຍເຫດຕ່າງໆຂອງພື້ນຖານເສດຖະກິດການຕະຫຼາດ, ຕົ້ນໝາກກ້ຽງຢູ່ກາວຟອງ ຈຶ່ງບໍ່ສາມາດຂະຫຍາຍຕາມຄວາມຕ້ອງການຂອງການຜະລິດເປັນສິນຄ້າ. ອາຊີບປູກຕົ້ນໝາກກ້ຽງຢູ່ກາວຟອງ ເຄີຍພັດທະນາຢ່າງແຮງໃນຊຸມປີ 70-80 ຂອງສະຕະວັດກ່ອນ ແລະ ພຽງແຕ່ໄດ້ຮັບການປ່ຽນແປງຢ່າງເປັນທາງການ, ເມື່ອອຳນາດການປົກຄອງປະຕິບັດແຜນການຫັນປ່ຽນຜົນລະປູກ, ພັດທະນາຕົ້ນໄມ້ກິນໝາກໄລຍະ 2006-2010 ຢ່າງໝັ້ນຄົງ. ໃນນັ້ນ, ເຮັດໃຫ້ຕົ້ນໝາກກ້ຽງກາວຟອງ ກາຍເປັນຕົ້ນໄມ້ພິເສດທີ່ເປັນເສດຖະກິດປາຍແຫຼມຂອງແຂວງ. ເພື່ອຮັກສາຄຸນນະພາບ, ອິດທິພົນຊື່ສຽງຕົ້ນໝາກກ້ຽງນີ້ໄວ້, ເມືອງກາວຟອງ ໄດ້ປະຕິບັດແຜນຮ່າງກໍ່ສ້າງເຄື່ອງໝາຍຕົ້ນໝາກກ້ຽງກາວຟອງ, ແນໃສ່ຊ່ວຍປະຊາຊົນສ້າງຄວາມຮັ່ງມີຈາກສວນໝາກກ້ຽງ. ທ່ານ ຫງວຽນຮົ່ງຖູຍ, ປະທານເທດສະບານເມືອງກາວຟອງ, ໃຫ້ຮູ້ວ່າ:
”ອຳນາດການປົກຄອງໄດ້ເປັນເຈົ້າການຮ່ວມສຳພັນກັບບັນດາຫົວໜ່ວຍ, ອົງການວິຊາການ, ພິເສດແມ່ນສູນພັດທະນາຕົ້ນໝາກໄມ້ທີ່ມີງີມ ເພື່ອສ້າງບັນດາໂຄງການພັດທະນາຕົ້ນໝາກໄມ້ປະເພດນີ້. ເຖິງວ່າບັນດາໂຄງການລົງທຶນຍັງມີຂະໜາດນ້ອຍກໍ່ຕາມ, ແຕ່ພັດແມ່ນຮູບແບບເພື່ອໃຫ້ປະຊາຊົນທ້ອງຖີ່ນຖ່າຍທອດວິທະຍາສາດ ເຕັກໂນໂລຢີເທື່ອລະກ້າວ”
ຕົ້ນໝາກກ້ຽງກາວຟອງ (ພາບ: google.com.vn)
|
ດ້ວຍທິດທາງປະຕິບັດຢ່າງຖືກຕ້ອງ, ຕົ້ນໝາກກ້ຽງຢູ່ກາວຟອງ ນັບມື້ນັບມີທ່າໄດ້ປຽບເມື່ອທຽບໃສ່ຕົ້ນໝາກກ້ຽງຊະນິດຕ່າງໆໃນທ້ອງຕະຫຼາດ. ໝາກກ້ຽງຂອງໝູ່ບ້ານກາວຟອງ ທັງງາມ, ທັງຫອມຫວານ ແລະ ມີນ້ຳຫຼາຍ. ການປູກໝາກກ້ຽງ ບໍ່ພຽງແຕ່ຊ່ວຍໃຫ້ປະຊາຊົນຢູ່ທີ່ນີ້ຫຼຸດພົ້ນອອກຈາກຄວາມທຸກຍາກເທົ່ານັ້ນ, ຫາກຍັງເປັນອາຊີບຊ່ວຍໃຫ້ຫຼາຍຄອບຄົວ ສ້າງຄວາມຮັ່ງມີອີກດ້ວຍ. ຄອບຄົວເອື້ອຍ ເຈິ່ນທິນູ້ຍ, ຢູ່ເທດສະບານເມືອງກາງຟອງ ແມ່ນໜຶ່ງໃນບັນດາຄອບຄົວທີ່ເປັນແບບຢ່າງໃນການປູກຕົ້ນໝາກກ້ຽງ. ດ້ວຍເນື້ອທີ່ 1 ເຮັກຕາ, ລະດູການເກັບກູ້ຜ່ານມາ, ຄອບຄົວເອື້ອຍ ນູ້ຍ ເກັບກູ້ໝາກກ້ຽງໄດ້ 30 ໂຕນ, ສ້າງລາຍຮັບກວ່າ 400 ລ້ານດົ່ງ. ກໍ່ເຊັ່ນດຽວກັບຫຼາຍຄອບຄົວທີ່ປູກຕົ້ນໝາກກ້ຽງຢູ່ທີ່ນີ້, ເລື່ອງສ້າງເຄື່ອງໝາຍໃຫ້ຕົ້ນໝາກກ້ຽງ ເພື່ອຮັກສາລາຄາໝາກກ້ຽງໃຫ້ເປັນປົກກະຕິ, ຍາມໃດກໍ່ແມ່ນຄວາມເອົາໃຈໃສ່ຂອງເຂົາເຈົ້າ. ເອື້ອຍ ເຈິ່ນທິນູ້ຍ, ເວົ້າຄວາມໃນໃຈສູ່ຟັງວ່າ:
”ເຖິງວ່າຄຸນນະພາບໝາກກ້ຽງຢູ່ທີ່ນີ້ແມ່ນທຽບເທົ່າກັບຢູ່ບ່ອນອື່ນ, ແຕ່ລາຄາພັດຕຳ່ກວ່າ, ເພາະວ່າບໍ່ທັນມີເຄື່ອງໝາຍການຄ້າໃນຕະຫຼາດ. ດັ່ງນັ້ນກາວຟອງ ຄວນພັດທະນາເຄື່ອງໝາຍການຄ້າຈຶ່ງສາມາດເຮັດໃຫ້ໝາກກ້ຽງຂອງຕົນມີລາຄາສູງກວ່າຢູ່ຕະຫຼາດໄດ້”.
ຕົ້ນໝາກກ້ຽງກາວຟອງ (ພາບ: google.com.vn)
|
ເລື່ອງກໍ່ສ້າງເຄື່ອງໝາຍການຄ້າ ແລະ ພັດທະນາຕະຫຼາດໃຫ້ແກ່ຕົ້ນໝາກກ້ຽງກາວຟອງ ກໍ່ແມ່ນໜ້າທີ່ຈຸດສຸມ ເຊິ່ງອຳນາດການປົກຄອງເມືອງກາວຟອງ ໄດ້ວາງອອກໃນໄລຍະຈະມາເຖິງ. ທ່ານ ຫວູດິ່ງຫວຽດ, ຮອງປະທານເມືອງກາວຟອງ, ໃຫ້ຮູ້ວ່າ:
“ເພື່ອກໍ່ສ້າງເຄື່ອງໝາຍການຄ້າໃຫ້ຕົ້ນໝາກກ້ຽງກາວຟອງ, ທີໜຶ່ງແມ່ນຕ້ອງຮັບປະກັນຮູບແບບຜະລິດຕະພັນ, ທີສອງແມ່ນບໍ່ຄວນນຳໃຊ້ທາດເຄມີ, ພິເສດເມື່ອສົ່ງໝາກກ້ຽງໄປຂາຍຢູ່ຕ່າງປະເທດແມ່ນຕ້ອງປະຕິບັດຢ່າງເຂັ້ມງວດ, ດ້ານອື່ນອີກແມ່ນຕ້ອງຮັບປະກັນຄຸນນະພາບແນວພັນ ແລະ ຂັ້ນຕອນດ້ານເຕັກນິກກໍ່ຕ້ອງບັນລຸມາດຕະຖານ. “
ພາຍຫຼັງຫັນປ່ຽນຜົນລະປູກມາເປັນເວລາຫຼາຍປີ, ມາຮອດປະຈຸບັນກາວຟອງ ໄດ້ມີເນື້ອທີ່ປູກຕົ້ນໝາກກ້ຽງກວ່າ 700 ເຮັກຕາ, ດ້ວຍປະລິມານການຜະລິດໃນປີ 2011 ບັນລຸເກືອບ 10.000 ໂຕນ, ລາຍຮັບບັນລຸເກືອບ 90 ຕຶ້ດົ່ງ. ໃນຫຼາຍປີມານີ້, ປະຊາຊົນກາວຟອງ ໄດ້ສ້າງຄວາມຮັ່ງມີຈາກການປູກຕົ້ນໝາກກ້ຽງ. ຕົ້ນໝາກກ້ຽງໄດ້ປະກອບສ່ວນຍົກລາຍຮັບສະເລ່ຍຂອງປະຊາຊົນໃນເທດສະບານເມືອງຂຶ້ນ 22 ລ້ານດົ່ງ/ຄົນ/ປີ.
ສິ່ງທີ່ສ້າງຄວາມປະທັບໃຈນັ້ນແມ່ນ, ເມື່ອມາແຫ່ງນີ້ນັກທ່ອງທ່ຽວຈະມີໂອກາດຢ້ຽມຊົມສວນຕົ້ນໝາກກ້ຽງທີ່ສຸກເຫຼືອງ, ແລະ ຖ່າຍຮູບເປັນທີ່ລະນຶກ, ພິເສດແມ່ນໄດ້ກິນໝາກກ້ຽງທີ່ແຊບຫວານຢູ່ທີ່ນີ້. ຫວ່າງແລ້ວນີ້, ເມືອງກາວຟອງ ໄດ້ຄົ້ນພົບບັນດາຖ້ຳທຳມະຊາດທີ່ຮົກເຮື້ອວ່າງເປົ່າ ແລະ ມະຫັດສະຈັນຄື: ແທ້ງດົ້ງ, ຮວາເຊີນ, ຟອງເຊີນດົ້ງ, ດົ້ງຖູຍຟອງ, ລືວຖູຍຟອງ… ການຄົ້ນພົບດັ່ງກ່າວຈະປະກອບສ່ວນເປີດທິດທາງໃໝ່ໃຫ້ແກ່ເມືອງກາວຟອງ ໃນການພັດທະນາການບໍລິການທ່ອງທ່ຽວ. ໃນອະນາຄົດ, ກາວຟອງບໍ່ພຽງແຕ່ແມ່ນເຂດບ້ານນາທີ່ມີຊື່ສຽງດ້ວຍຕົ້ນໝາກກ້ຽງທີ່ແຊບຫວານເທົ່ານັ້ນ, ຫາກຍັງແມ່ນສະຖານທີ່ທ່ອງທ່ຽວຊີວະພາບທີ່ດຶງດູດນັກທ່ອງທ່ຽວຂອງແຂວງຮ່ວາບິ່ງ ອີກດ້ວຍ