ເທດສະບານເມືອງ ວ່າມລ໋າງ ຢູ່ແຄມທະເລທີ່ຂຶ້ນກັບເມືອງ ກໍ່ກົງດົງ, ແຂວງ ຕ່ຽນຢາງ, ແມ່ນແຫ່ງທີ່ມີຊາວປະມົງດຳລົງຊີວິດຢູ່ເປັນຈຳນວນຫຼວງຫຼາຍ. ປີນີ້, ຍ້ອນດິນຟ້າອາກາດເອື້ອອຳນວຍຄວາມສະດວກ, ອາຊີບການປະມົງຈຶ່ງໄດ້ຮັບຜົນດີ, ດັ່ງນັ້ນລະດູບານໃໝ່ນີ້, ເທດສະບານ ວ່າມລ໋າງ ຍິ່ງມີຄວາມຟົດຟື້ນມ່ວນຊື່ນ, ຊາວປະມົງພາກພູມໃຈກຽມພ້ອມຈະອອກສູ່ທະເລ ດ້ວຍຄວາມຫວັງຈະຫາປາ, ກຸ້ງໃຫ້ໄດ້ຫຼາຍ.
ປະຊາຊົນຢູ່ເທດສະບານ ວ່າມລ໋າງ ຍັງຈື່ຈຳຮູບພາບຂະບວນກ່ຳປັ່ນ, ເຮືອຫາປາຂອງຊາວປະມົງ 400 ກວ່າຄົນຢູ່ເທດສະບານເຂົ້າທຽບທ່າໃນວັນທ້າຍປີ. ຊາວປະມົງ ຮວີ່ງວັນແຊກ (Huynh Van Sach) ໃຫ້ຮູ້ວ່າ, ປີນີ້, ເມື່ອອອກສູ່ທະເລແຕ່ລະເທື່ອ ກ່ຳປັ່ນ, ເຮືອລຳໃດກໍ່ຫາປາ, ກຸ້ງໄດ້ເປັນຈຳນວນຫຼວງຫຼາຍ. ພິເສດ, ພາຍຫຼັງອອກທະເລ 1 ເດືອນ, ກ່ຳປັ່ນ, ເຮືອແຕ່ລະລຳສາມາດຫາປາມຶກໄດ້ແຕ່ 2,5 - 3 ໂຕນ. ຖ້າລົບຄ່າໃຊ້ຈ່າຍທັງໝົດແລ້ວ, ກ່ຳປັ່ນ, ເຮືອຫາປາແຕ່ລະລຳກໍ່ສ້າງກຳໄລໄດ້ກວ່າ 50 ລ້ານດົ່ງ. ຍ້ອນເຫດນັ້ນ, ບຸນປີໃໝ່ນີ້, ຄອບຄົວທ່ານ ຮວີ່ງວັນແຊກ (Huynh Van Sach) ກໍ່ຄືຄອບຄົວຊາວປະມົງອື່ນໆຢູ່ເທດສະບານ ວ່າມລ໋າງ ຈຶ່ງໄດ້ຕ້ອນຮັບບຸນປີໃໝ່ປະຈຳຊາດຢ່າງສົມບູນພູນສຸກ ແລະ ເຕັມໄປດ້ວຍຄວາມອົບອຸ່ນ.
”ປີນີ້ຫາປາໄດ້ຫຼາຍ. ຄອບຄົວຂ້າພະເຈົ້າພາກພູມໃຈທີ່ສຸດ. ພາຍ ຫຼັງໄປຫາປາຖ້ຽວສຸດທ້າຍກັບມາ ຂ້າພະເຈົ້າໄດ້ຈັດງານລ້ຽງໝູ່ເພືອນ ແນໃສ່ສ້າງກຳລັງໃຈເພື່ອສືບຕໍ່ໄປຫາປາໃນຄັ້ງຕໍ່ໄປ”
ແບ່ງປະເພດສິນໃນນ້ຳຢູ່ທ່າຫາປາ ວ່າມລ໋າງ
(ພາບ: tiengiang.gov)
ສ່ວນທ່ານ ເຈິ່ນວັນທູ ຢູ່ເທດສະບານ ວ່າລ໋າງ, ໃຫ້ຮູ້ວ່າ, ບຸນປີໃໝ່ປີມະໂຮງນີ້, ຄອບຄົວທ່ານມີຄວາມເບິກບານມ່ວນຊື່ນກວ່າຊຸມປີກ່ອນ ຍ້ອນການທຳມາຫາກິນສະດວກສະບາຍທີ່ສຸດ.
”ປີນີ້ການຫາປາສະດວກສະບາຍຫຼາຍ, ດັ່ງນັ້ນຊາວປະມົງຢູ່ເທດສະບານ ວ່າມລ໋າງ ເວົ້າລວມຈຶ່ງໄດ້ຕ້ອນຮັບບຸນປີໃໝ່ດ້ວຍຄວາມພາກພູມໃຈທີ່ສຸດ.”
ວ່າມລ໋າງ ແມ່ນເທດສະບານຢູ່ແຄມທະເລທີ່ມີການພັດທະນາເສດຖະກິດແຮງກວ່າໝູ່ໃນແຂວງ ຕ່ຽນຢາງ. ດ້ວຍ 500 ກວ່າຄອບຄົວ ຫາເງິນລ້ຽງຊີບດ້ວຍອາຊີບການປະມົງ ແລະ ດຳເນີນທຸລະກິດສິນໃນນ້ຳ. ແຕ່ລະປີ, ຊາວປະມົງຢູ່ເທດສະບານ ວ່າລ໋າງ ໄດ້ນຳເອົາສິນໃນນ້ຳປະເພດຕ່າງໆຈາກທະເລເຂົ້າດິນຕໍ່ແຜ່ນກວ່າ 20.000 ໂຕນ.
ອາຊີບການປະມົງຈະໄດ້ຮັບຜົນຫຼືບໍ ແມ່ນຂຶ້ນກັບດິນຟ້າອາກາດ. ໃນຊຸມປີຜ່ານມາ, ຍ້ອນດິນຟ້າອາກາດເອື້ອອຳນວຍຄວາມສະດວກ, ການອອກທະເລແຕ່ລະຄັ້ງຂອງຊາວປະມົງຢູ່ ວ່າມລ໋າງ ຈຶ່ງໄດ້ຮັບຜົນດີ ດ້ວຍປາກຸ້ງເປັນຈຳນວນຫຼວງຫຼາຍ. ປະຈຸບັນ, ຈຳນວນຄອບຄົວຮັ່ງມີໃນເທດສະບານນັບມື້ນັບເພີ່ມຂຶ້ນ. ໃນນັ້ນຄອບຄົວຮັ່ງມີກວມ 30%, ຈຳນວນຄອບຄົວທຸກຍາກກວມ 8,6%, ລາຍຮັບສະເລ່ຍໃສ່ຫົວຄົນໃນປີບັນລຸເກືອບ 20 ລ້ານດົ່ງ. ປະຈຸບັນ, ວ່າມລ໋າງ ນັບມື້ນັບພັດທະນາ ດ້ວຍຖະໜົນຫົນທາງລຽນກັນຫຼາຍສາຍ, ບັນດາຮາກຖານດຳເນີນທຸລະກິດຊື້ຂາຍ, ປຸງແຕ່ງສິນທະເລ, ຮ້ານກິນດື່ມທີ່ໄດ້ຮັບການກໍ່ສ້າງໃໝ່ ນັບມື້ນັບຫຼາຍ. ທ່ານ ເລກວາງວິງ, ປະທານຄະນະກຳມະການປະຊາຊົນ ເທດສະບານ ວ່າງລ໋າງ, ໃຫ້ຮູ້ດ້ວຍຄວາມພາກພູມໃຈວ່າ:
”ກ່ຽວກັບທາງດ້ານເສດຖະກິດຢູ່ ວ່າມລ໋າງ ໃນປີນີ້ ແມ່ນມີຄວາມຈະ ເລີນ ເຕີບໂຕກວ່າປີກ່ອນ. ຊາວປະມົງຫາປາມຶກໄດ້ຫຼາຍ. ດັ່ງນັ້ນຊີວິດການເປັນຢູ່ຂອງເຂົາເຈົ້າຈຶ່ງໄດ້ຮັບການປັບປຸງໃຫ້ດີກວ່າເກົ່າ. ຊາວປະມົງດີໃຈຫຼາຍ”
ມາຢ້ຽມຢາມເທດສະບານ ວ່າມລ໋າງ ໃນຊຸມມື້ຕົ້ນລະດູບານໃໝ່ນີ້, ຢູ່ບ່ອນໃດພວກຂ້າພະເຈົ້າກໍ່ພົບເຫັນໜ້າຕາທີ່ຍີ້ມແຍ້ມແຈ່ມໃສຂອງປະຊາຊົນທຸກຄົນ. ຢູ່ຕາມຫົນທາງສາຍຕ່າງໆເຕັມໄປດ້ວຍທຸງຊາດ, ປ້າຍຄຳຂວັນ: ”ຊົມເຊີຍພັກ - ອວຍພອນລະດູບານໃໝ່”. ຢູ່ເຂດຕະຫຼາດຍາມບຸນປີໃໝ່, ສຽງຂັບຮ້ອງ, ປະສານກັບສຽງກອງດັງກ້ອງກັງວານໄປທົ່ວໄດ້ເຮັດໃຫ້ທັງເຂດບ້ານນາຢູ່ແຄມທະເລຟົດຟື້ນຍິ່ງຂຶ້ນ. ບຸນປີໃໝ່ປະຈຳຊາດປີນີ້, ຍ້ອນມີໂຄງການ ”ນຳສິນຄ້າໄປຂາຍຢູ່ເຂດຊົນນະບົດ” ປະຊາຊົນທ້ອງຖີ່ນຈຶ່ງໄດ້ຊື້ສິນຄ້າຕາມລຳພັງໃຈດ້ວຍລາຄາທີ່ເໝາະສົມ.
ບັນຍາກາດບຸນປີໃໝ່ຍັງຄົງປະກົດຢູ່ຕາມຖະໜົນຫົນທາງສາຍຕ່າງໆ ຂອງເທດສະບານ ວ່າມລ໋າງ. ປະຊາຊົນໄດ້ຍາດເວລາໄປວັດວາອາຮາມໃນຍາມຕົ້ນລະດູບານໃໝ່, ເພື່ອພາວະນາຂໍໃຫ້ການປະມົງໄດ້ຮັບຜົນດີ. ທ່າກ່ຳປັ່ນຢູ່ເທດສະບານມີຄວາມຄຶກໂຄມໜາແໜ້ນ, ວຽກງານກະກຽມກ່ຳປັ່ນ, ທັນຍາຫານ, ຢຸກຢາຂອງຊາວປະມົງກໍ່ສຳເລັດແລ້ວ. ບັນດາກ່ຳປັ່ນ, ເຮືອຫາປາ ດ້ວຍຮູບຮ່າງ, ຂະໜາດ, ສີສັນທີ່ແຕກຕ່າງກັນໄດ້ອອກສັນຍານຖອດສະໝໍອອກທະເລຫາປາ ເພື່ອພັດທະນາເສດຖະກິດ ແລະ ປະກອບສ່ວນປົກປັກຮັກສາອະທິປະໄຕທີ່ສັກກະລະບູຊາຂອງປະເທດຊາດ.