(ພາບ : Baodatmui)
ໝູ່ບ້ານ ດ້າຍບ໋າຍ ຂຶ້ນກັບເມືອງ ຢາບິ່ງ, ແຂວງ ບັກນິງ ມີອາຊີບ ຫຼໍ່ທອງຫັດຖະກຳທີ່ເປັນມູນເຊື້ອ ເຊິ່ງມີມາກ່ອນນີ້ນັບຮ້ອຍປີ. ບັນດາຜະລິດຕະພັນທີ່ລະອຽດລະອໍຂອງໝູ່ບ້ານ, ໂດຍສະເພາະແມ່ນເຄື່ອງບູຊາດ້ວຍທອງໄດ້ມີຊື່ສຽງໃນທົ່ວປະເທດ. ແຕ່ໃນຊຸມປີມໍ່ໆມານີ້, ຍ້ອນຜົນກະ ທົບຈາກການຊຸດໂຊມທາງດ້ານເສດຖະກິດຂອງໂລກ, ລາຄາວັດຖຸອຸປະ ກອນສົ້ນເຂົ້າເພີ່ມຂຶ້ນສູງ, ການຈຳໜ່າຍຖືກຫຼຸດລົງຢ່າງແຮງນັ້ນ. ໄດ້ສົ່ງຜົນສະທ້ອນເຖິງໝູ່ບ້ານອາຊີບ, ເຮັດໃຫ້ຮາກຖານຫຼໍ່ທອງຫຼາຍແຫ່ງຖືກ ຢຸດສະຫງັກ. ໃນຂະນະທີ່ເສດຖະກິດໝູ່ບ້ານພວມຕົກຢູ່ໃນສະພາບຖືກສູນ ຫາຍໄປນັ້ນ, ມີນັກສິລະປະກຳອາຍຸສູງ, ແລະນາຍຊ່າງໜຸ່ມແໜ້ນຈຳນວນໜຶ່ງທີ່ມີຄວາມສຸດຈິດສຸດໃຈໃນໝູ່ບ້ານ ໄດ້ມານະພະຍາຍາມໄປຊອກຫາວິທີທາງໃໝ່ໃຫ້ແກ່ໝູ່ບ້ານ, ນັ້ນແມ່ນຫຼໍ່ຮູບເຄິ່ງຕົວ, ປະກອບສ່ວນຟື້ນຕົວ ໝູ່ບ້ານອາຊີບທີ່ເປັນມູນເຊື້ອຄືນໃໝ່.
ໝູ່ບ້ານ ດ້າຍບ໋າຍ ກ່ອນນີ້ມີຊື່ວ່າໝູ່ບ້ານ ວັງລ້າງ, ຕັ້ງຢູ່ເຂດພື້ນທີ່ສູງແຄມຝັ່ງແມ່ນ້ຳ ບ້າຍຢາງ ຫ່າງຈາກໃຈກາງນະຄອນ ຮ່າໂນ້ຍ ໄປທາງທິດເໜືອ 30 ກ.ມ. ໃນປະຫວັດສາດ, ໝູ່ບ້ານ ດ້ານບ໋າຍ ມີຊື່ສຽງດ້ວຍອາຊີບຫຼໍ່ທອງທີ່ເປັນມູນເຊື້ອ, ເຊິ່ງເຄີຍຜະລິດເຄື່ອງໃຊ້ໄມ້ສອຍດ້ວຍທອງ ແລະ ຮອດຕົ້ນສະຕະວັດທີ 11 ຈຶ່ງໄດ້ຮັບການພັດທະນາຢ່າງແຮງ. ຜ່ານແຕ່ລະໄລຍະແຫ່ງການພັດທະນາ ໝູ່ບ້ານອາຊີບໄດ້ສ້າງເປັນບັນດາຮາກຖານຜະລິດສິນຄ້າແຕ່ລະປະເພດ. ມີບາງຮາກຖານຜະລິດໝໍ້ທອງ, ບາງຮາກຖານຜະລິດພາເຂົ້າ, ຜະລິດການ້ຳ, ຜະລິດຊາມດ້ວຍທອງ… ແລະກໍ່ມີບາງຮາກຖານສະໜອງວັດຖຸອຸປະກອນ ແລະ ຈຳໜ່າຍສິນຄ້າ. ໃນຫຼາຍປີຜ່ານມາ, ໝູ່ບ້ານຫຼໍ່ທອງ ດ້ານບ໋າຍ ໄດ້ມີຊື່ສຽງດ້ວຍບັນດາຜະລິດຕະພັນເຄື່ອງບູຊາຄື: ຮູບຫຼໍ່, ໂຖດອກໄມ້, ແຜ່ນຄຳກອນດ້ວຍທອງ…ຜະລິດຕະພັນຂອງໝູ່ບ້ານເຄີຍມີຊື່ສຽງໃນທົ່ວປະເທດ, ເຊິ່ງ ຖືກນຳມາປະດັບປະດາໃນສາລາ, ວັດວາອາຮາມ, ບັນດາກິດຈະກຳປູຊະນີ ຍະສະຖານທີ່ເປັນສັນຍາລັກ. ໃນຊຸມປີມໍ່ໆມານີ້, ໝູ່ບ້ານ ດ້າຍບ໋າຍ ສືບຕໍ່ໄດ້ຮັບການພັດທະນາ ແລະຮັກສາອາຊີບທີ່ເປັນມູນເຊື້ອໄວ້ ດ້ວຍບັນດາສະຫະກອນ, ວິສາຫະກິດເອກະຊົນທີ່ເຕີບໃຫຍ່ເຂັ້ມແຂງ… ເຖິງຢ່າງໃດກໍ່ຕາມ, ຮອດໄລຍະທ້າຍປີ 2008 ເຖິງຕົ້ນປີ 2010 ໝູ່ບ້ານອາຊີບຖືກຊຸດໂຊມຢ່າງຮ້າຍແຮງ, ຍ້ອນຜົນສະທ້ອນຈາກວິກິດການເສດ ຖະກິດໂລກ. ລາຄາທອງສົ້ນເຂົ້າເພີ່ມຂຶ້ນສູງ, ຕະຫຼາດຈຳໜ່າຍຖືກຫຼຸດລົງຢ່າງແຮງ, ມີຫຼາຍຮາກຖານຫຼໍ່ທອງຖືກຢຸດສະຫງັກ, ເຮັດໃຫ້ຫຼາຍຄົນຕ້ອງປະອາຊີບຫຼໍ່ທອງທີ່ເປັນມູນເຊື້ອ. ໃນສະພາບການດັ່ງກ່າວ, ບາງຄອບຄົວ ທີ່ມີລູກຫຼານໄປຮຽນຢູ່ໂຮງຮຽນວິຈິດສິນຕ່າງໆໄດ້ຊອກຫາວິທີທາງໃໝ່ ດ້ວຍການຫຼໍ່ຮູບເຄິ່ງຄີງດ້ວຍທອງ, ອັນໄດ້ສ້າງໂອກາດຟື້ນຊີບໃຫ້ແກ່ໝູ່ບ້ານ. ທ່ານ ດິງວັນເຕີ໋ຍ, ເຈົ້າຂອງຮາກຖານຫຼໍ່ທອງ ຫາຍດັງ, ໃຫ້ຮູ້ວ່າ:
”ປະຈຸບັນມີຫຼາຍຄົນຢາກຄວັດສະຫຼັກຮູບພໍ່, ແມ່, ພໍ່ເຖົ້າ, ແມ່ເຖົ້າດ້ວຍທອງເພື່ອບູຊາ, ຫຼືຄວັດສະຫຼັກບຸກຄົນທີ່ມີຊື່ສຽງໃນປະຫວັດສາດ, ແລະນຳໃຊ້ຮູບທອງເພື່ອປະດັບປະດາ…”
(ພາບ : Baodatmui)
ຕາມບັນດາເຈົ້າຂອງຮາກຖານຫຼໍ່ທອງໃນໝູ່ບ້ານແລ້ວ, ໃນໄລຍະຫວ່າງມໍ່ໆມານີ້, ມີຫຼາຍຄົນຈ່ອງຊື້ພະພຸດທະຮູບ, ຮູບຫຼໍ່ບັນດາວິລະຊົນຂອງຊາດຫຼາຍທີ່ສຸດ. ຄຽງຂ້າງນັ້ນ, ໂດຍເລີ່ມມາຈາກມູນເຊື້ອຂອງຊາວຫວຽດນາມ, ມີຫຼາຍຄົນໄດ້ຄິດເຖິງເລື່ອງຫຼໍ່ຮູບເຄິ່ງຕົວຂອງຜູ້ທີ່ລ່ວງລັບໄປແລ້ວເພື່ອບູຊາ, ອາໄລຫາເຂົາເຈົ້າ, ຜ່ານນັ້ນເພື່ອສຶກສາລູກຫຼານກ່ຽວກັບມູນເຊື້ອຂອງຄອບຄົວ, ວົງຕະກຸນ. ອ້າຍ ຫງວຽນວັນຈູງ, ຜູ້ທີ່ຈ່ອງເຮັດ ຮູບຫຼໍ່ເຄິ່ງຕົວ ດ້ວຍທອງຢູ່ບ້ານ ດ້າຍບ໋າຍ, ໃຫ້ຮູ້ວ່າ:
”ຮູບຫຼໍ່ເຄິ່ງຄີງດ້ວຍທອງຈະເຮັດໃຫ້ລູກຫຼານສາມາດນຶກເຫັນຮູບຊົງຂອງຜູ້ທີ່ໄດ້ລ່ວງລັບໄປແລ້ວ, ດັ່ງນັ້ນຂ້າພະເຈົ້າກໍ່ມາແຫ່ງນີ້ເພື່ອຈ່ອງເຮັດຮູບຫຼໍ່ພໍ່ແມ່ຂອງຕົນດ້ວຍທອງເພື່ອບູຊາ”.
ປະຈຸບັນ, ເພື່ອມີຮູບຫຼໍ່ດ້ວຍທອງກໍ່ບໍ່ແມ່ນເລື່ອງຍາກ. ຖ້າຫາກວ່າຢາກມີຮູບເຄິ່ງຕົວ, ລູກຄ້າພຽງແຕ່ສົ່ງຮູບຖ່າຍແຜ່ນໜຶ່ງໃຫ້ແກ່ນາຍຊ່າງຫຼໍ່ທອງເທົ່ານັ້ນ. ສຳຫຼັບຮູບເຄິ່ງຕົວທີ່ສູງ 70 cm. ພາຍຫຼັງຈ່ອງເຮັດຮູບຫຼໍ່ແຕ່ 25 - 30 ວັນ ລູກຄ້າກໍ່ໄດ້ຮັບຮູບຫຼໍ່ດ້ວຍທອງດ້ວຍລາຄາແຕ່ 12 - 15 ລ້ານດົ່ງ, ໂດຍອີງໃສ່ຂະໜາດ ແລະນ້ຳໜັກຂອງຮູບຫຼໍ່. ສ່ວນພະ ພຸດທະຮູບແມ່ນມີລາຄາສູງກວ່າ, ເພາະມັນຕ້ອງເຮັດຢ່າງລະອຽດລະອໍກວ່າ. ກ່ຽວກັບທ່າອ່ຽງພັດທະນາຂອງໝູ່ບ້ານອາຊີບ ດ້າຍບ໋າຍ ໃນຊຸມປີຈະມາເຖິງ, ທ່ານ ດິງຊວນຈ໋ຽນ, ຮອງອຳນວຍການບໍລິສັດມໍລະດົກວັດ ທະນະທຳ, ໃຫ້ຮູ້ວ່າ:
”ການຫຼໍ່ຮູບເຄິ່ງຕົວແມ່ນພັດທະນາໄວທີ່ສຸດ. ການຫຼໍ່ພະພຸດທະຮູບກໍ່ພັດທະນາເຊັ່ນກັນ, ແຕ່ຂ້າພະເຈົ້າຄິດວ່າການຫຼໍ່ຮູບເຄິ່ງຕົວຈະພັດທະນາກວ່າ ເພາະວ່າຄວາມຕ້ອງການນັບມື້ນັບຫຼາຍ”
ໃນຊຸມມື້ນີ້, ມີຫຼາຍຮາກຖານຫຼໍ່ທອງຢູ່ໝູ່ບ້ານ ດ້າຍບ໋າຍ ໄດ້ຟື້ນຕົວທຳການຜະລິດຄືນໃໝ່, ແລະນັບມື້ນັບມີຫຼາຍຄົນສັ່ງຈອງເຮັດຮູບຫຼໍ່. ຮາກຖານຫຼໍ່ທອງເກືອບທັງໝົດໃນໝູ່ບ້ານໄດ້ຜະລິດຄືນໃໝ່. ຮູບຫຼໍ່ ບັນດານັກວັດທະນະທຳ, ນັກປະຫວັດສາດທີ່ມີຊື່ສຽງ, ແລະພະພຸດທະຮູບທີ່ໄດ້ຮັບການຜະລິດໃນໝູ່ບ້ານອາຊີບ ດ້າຍບ໋າຍ ນັ້ນ ບໍ່ພຽງແຕ່ແມ່ນບັນດາຜະ ລິດຕະພັນທີ່ມີຄູນຄ່າດ້ານວັດທະນະທຳຂອງຊາວຫວຽດນາມ, ເພື່ອສຶກສາມູນເຊື້ອຮັກຊາດ, ຄວາມເອກອ້າງທະນົງໃຈຕໍ່ປະເທດຊາດເທົ່ານັ້ນ, ຫາກມັນຍັງປະກອບສ່ວນຟື້ນຟູບັນດາໝູ່ບ້ານທີ່ເປັນມູນເຊື້ອຄືໝູ່ບ້ານ ດ້ານບ໋າຍ ອີກດ້ວຍ.
ໂຕຕ໋ວນ