(VOVWORLD) -ຮ່ານາມ ແມ່ນທ້ອງຖິ່ນມີປູຊະນີຍາສະຖານ, ທັດສະນີຍະພາບທີ່ສວຍງາມລືຊື່ຫລາຍແຫ່ງ ພ້ອມກັບບັນດາຜະລິດຕະພັນທ່ອງທ່ຽວທີ່ອຸດົມສົມບູນ, ຍ້ອນເຫດນັ້ນ ໄດ້ດຶງດູດນັກທ່ອງທ່ຽວພາຍໃນ ແລະ ຕ່າງປະເທດມາຢ້ຽມຊົມ, ທັດສະນະສຶກສາເປັນຈຳນວນຫລວງຫລາຍ. ຊຸມປີມໍ່ໆມານີ້, ຂະແຫນງທ່ອງທ່ຽວ ແຂວງໄດ້ຕັ້ງຫນ້າໝູນໃຊ້ການຫັນເປັນດິຈີຕອນ, ມຸ່ງໄປເຖິງການພັດທະນາການທ່ອງທ່ຽວອັດສະລິຍະ ເພື່ອຍົກສູງຄຸນນະພາບຜະລິດຕະພັນ, ການບໍລິການທ່ອງທ່ຽວ. ຜ່ານນັ້ນ ກໍ່ໂຄສະນາພາບພົດຂອງ ຮ່ານາມ ໄປເຖິງນັກທ່ອງທ່ຽວ, ກໍ່ສ້າງ ຮ່ານາມ ແມ່ນຈຸດນັດພົບທ່ອງທ່ຽວທີ່ປອດໄພ, ເປັນມິດ - ມີຄຸນນະພາບ - ດູດດຶ່ມ.
 ທ່ານ ຫງວຽນເລຟຸກ, ຮອງຫົວຫນ້າກົມທ່ອງທ່ຽວແຫ່ງຊາດ ຫວຽດນາມ. (ພາບ: Báo Hà Nam) |
ເວັບໄຊ dulichhanam.vn ໄດ້ນຳເຂົ້າເຄື່ອນໄຫວແຕ່ປີ 2009 ມາຮອດປະຈຸບັນ ແມ່ນຫນຶ່ງໃນບັນດາຜົນສຳເລັດຂອງ ຮ່ານາມ ໃນການໝູນໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການໂຄສະນາ, ສົ່ງເສີມການທ່ອງທ່ຽວ. ຕໍ່ຈາກນັ້ນ ຮອດປີ 2018 ແຂວງ ຮ່ານາມ ໄດ້ນຳປະຕູຖານຂໍ້ມູນການທ່ອງທ່ຽວອັດສະລິຍະ ແຂວງ ຮ່ານາມ ເຂົ້າໃຊ້ການຢູ່ ຫນ້າເວັບ: visithanam.vn ໂດຍນຳໃຊ້ເຕັກໂນໂລຊີຂໍ້ມູນຂ່າວສານ ແລະ ສື່ສານ ເພື່ອສ້າງເປັນລະບົບນິເວດການທ່ອງທ່ຽວຂອງແຂວງ.
ໄລຍະຜ່ານມາ, ເລື່ອງສົມທົບລະຫວ່າງການສື່ສານກັບບັນຫນ້າຫນ້າເວັບຂໍ້ມູນຂ່າວສານເອເລັກໂຕນິກ ແລະ ບັນດາ ດິຈິຕອນ Platform, ສື່ສັງຄົມອອນລາຍ ນັບມື້ນັບເສີມຂະຫຍາຍປະສິດທິຜົນໃນການແນະນຳພາບພົດຂອງເຂດດິນແດນ ຮ່ານາມ ໃຫ້ເຂົ້າໃກ້ກັບນັກທ່ອງທ່ຽວຢູ່ພາຍໃນ ແລະ ຕ່າງປະເທດ. ເລື່ອງໝູນໃຊ້ເຕັກໂນໂລຊີຂໍ້ມູນຂ່າວສານ, ການຫັນເປັນດິຈິຕອນເພື່ອພັດທະນາການທ່ອງທ່ຽວ ແມ່ນຫນຶ່ງໃນບັນດາເນື້ອໃນຂອງຍຸດທະສາດໂຄສະນາພາບພົດ, ຄວາມສາມາດບົ່ມຊ້ອນການທ່ອງທ່ຽວແຂວງ ຮ່ານາມ. ໂດຍຕີລາຄາສູງການກຳນົດທິດຂອງທ້ອງຖິ່ນ, ທ່ານ ຫງວຽນເລຟຸກ, ຮອງຫົວຫນ້າກົມທ່ອງທ່ຽວແຫ່ງຊາດ ຫວຽດນາມ ໃຫ້ຮູ້ວ່າ:
“ຮ່ານາມ ແມ່ນຈຸດນັດພົບຫາກໍ່ພົ້ນເດັ່ນ ແລະ ໄດ້ມີວິວັດການພັດທະນາການທ່ອງທ່ຽວເປັນຢ່າງດີ. ໄລຍະຈະມາເຖິງ, ແຂວງ ຄວນເພີ່ມທະວີວຽກງານສົ່ງເສີມການໂຄສະນາ ເພື່ອນຳແຂວງ ຮ່ານາມ ໄປຍັງບັນດາຕະຫລາດ ເປັນຕົ້ນແມ່ນຕະຫລາດສາກົນ. ວຽກງານສົ່ງເສີມການໂຄສະນາ ຄວນໄດ້ນຳໃຊ້ບັນດາເຕັກໂນໂລຊີໃຫມ່ເປັນພິເສດ, ສົມທົບກັບໂທລະພາບ, ຟິມຮູບເງົາ, ອຸດສາຫະກຳວັດທະນະທຳ ເພື່ອນຳພາບພົດແຂວງ ຮ່ານາມ ໄປເຖິງແຂກທ່ອງທ່ຽວ”.
 ຜູ້ແທນເຂົ້າຮ່ວມຮ້ານວາງສະແດງ,ແນະນຳ ມາດຕະການເຕັກໂນໂລຊີຫນູນຊ່ວຍການພັດທະນາການທ່ອງທ່ຽວ. (ພາບ:Truyền hình Hà Nam) |
ໄລຍະຜ່ານມາ, ແຂວງ ຮ່ານາມ ໄດ້ເພີ່ມທະວີການຜັນຂະຫຍາຍບັນດາການເຄື່ອນໄຫວຮ່ວມສຳພັນເຂດ, ໂຄສະນາ
ພາບພົດການທ່ອງທ່ຽວຜ່ານບັນດາຊ່ອງສື່ສານສັງຄົມ (Facebook, Youtube, Tiktok…), ກໍ່ຄືບັນດາ Platform 3D, ທາງອອນລາຍອື່ນໆ. ສ້າງລະບົບຖານຂໍ້ມູນດິຈິຕອນຂະແຫນງທ່ອງທ່ຽວ. ປະຈຸບັນ ມີປູຊະນິຍະສະຖານຫລາຍແຫ່ງ, ເຂດ, ສະຖານທີ່ທ່ອງທ່ຽວຢູ່ບໍລິເວນແຂວງ ຮ່ານາມ ໄດ້ຮັບການຜັນຂະຫຍາຍຕິດລະຫັດ QR. ທ່ານ ມາຍກວັກດາດ, ຜູ້ອຳນວຍການຝ່າຍບໍລິຫານເຂດທ່ອງທ່ຽວແຫ່ງຊາດ ຕາມຈຸກ ໃຫ້ຮູ້ວ່າ:
“ນີ້ແມ່ນວິທີການຮັບປະກັນຄວາມໝັ້ນຄົງ, ປອດໄພຢູ່ເຂດທ່ອງທ່ຽວ ຕາມຈຸກ ໃຫ້ດີກວ່າເກົ່າ. ພາຍຫລັງການປະມວນເຕັກໂນໂລຊີ ຈະມີຄວາມສະດວກກວ່າ, ຫລຸດຜ່ອນຂັ້້ນຕອນລະບຽບການໃຫ້ແກ່ແຂກທ່ອງທ່ຽວເມື່ອມາຢ້ຽມຊົມ, ຫລຸດຜ່ອນເວລາລຽນແຖວເພື່ອຊື້ປີ້”.
ພ້ອມກັບບັນດາຈຸດທ່ອງທ່ຽວແຫ່ງຈິດວິນຍານ, ການທ່ອງທ່ຽວປະຫວັດສາດທີ່ລືຊື່, ບັນດາໝູ່ບ້ານອາຊີບທີ່ເປັນມູນເຊື້ອອັນພົ້້ນເດັ່ນຄື: ໝູ່ບ້ານຕ່ຳແຜ່ນຕັດຫຍິບ ຍາຊາ, ໝູ່ບ້ານປາຕຸນ ເຍີນເຫົ້້າ, ກອງ ດອຍຕາມ, ເຂົາ ໂດຮາຍ ກໍ່ແມ່ນຫນຶ່ງໃນບັນດາຈຸດນັດພົບຊື່ງໄດ້ຮັບການນິຍົມຈາກນັກທ່ອງທ່ຽວພາຍໃນ ແລະ ຕ່າງປະເທດເປັນຈຳນວນຫລວງຫລາຍທີ່ເລືອກເຟັ້ນໃນລາຍການທ່ອງທ່ຽວຄົ້ນຫາ ຮ່ານາມ. ທ່ານ ຫງວຽນວັນຈ້ອງ, ຮອງຫົວຫນ້າພະແນກວັດທະນະທຳ, ກິລາ ແລະ ທ່ອງທ່ຽວ ແຂວງ ຮ່ານາມ ໃຫ້ຮູ້ວ່າ:
“ພະແນກໄດ້ຊີ້ນຳບັນດາຫ້ອງການວິຊາສະເພາະເພື່ອລົງທ້ອງຖິ່ນ ພິເສດແມ່ນບັນດາໝູ່ບ້ານຫັດຖະກຳ ເພື່ອກຳນົດທິດ, ແນະນຳ, ອັບເດດ, ສ້າງຖານຂໍ້ມູນກໍ່ຄືພາບພົດກ່ຽວກັບບັນດາໝູ່ບ້ານຫັດຖະກຳ ເພື່ອສ້າງ, ໂຄສະນາໝູ່ບ້ານຜ່ານຊ່ອງເຄືອຂ່າຍອິນເຕີເນັດ. ຜ່ານນັ້ນ ບັນດາໝູ່ບ້ານ ແລະ ຜະລິດຕະພັນຂອງໝູ່ບ້ານຫັດຖະກຳ ກໍ່ຈະໄດ້ຮັບການໂຄສະນາໄປເຖິງແຂກຢູ່ທົ່ວທຸກສາລະທິດ”.
ດ້ວຍບັນດາທ່າແຮງທີ່ມີຢູ່ແລ້ວ, ພ້ອມກັບການມີຫົວຄິດປະດິດສ້າງ, ການປ່ຽນແປງໃຫມ່ໃນຈິນຕະນາການເຮັດການທ່ອງທ່ຽວ, ແຂວງ ຮ່ານາມ ຫວັງວ່າ ຈະບັນລຸໄດ້ບັນດາຄາດໝາຍຫັນເປັນດິຈິຕອນໃນການທ່ອງທ່ຽວ, ມຸ່ງໄປເຖິງການພັດທະນາການທ່ອງທ່ຽວອັດສະລິຍະ, ກາຍເປັນຈຸດເດັ່ນໃນແຜນທີ່ການທ່ອງທ່ຽວ ຫວຽດນາມ ໃນອະນາຄົດອັນໃກ້ໆນີ້້.