ដំណើរទស្សនកិច្ចជាផ្លូវការនៅកម្ពុជារបស់ប្រធានរដ្ឋវៀតណាមលោក Nguyen Xuan Phuc៖ បញ្ជាក់សារជាថ្មីនូវចំណងមិត្តភាពសាមគ្គីភាពរវាងវៀតណាម-កម្ពុជា

ឯកឧត្តមឯកអគ្គរាជទូតអញ្ជើញឆ្លើយបទសម្ភាសន៍ជាមួយអ្នកសារព័ត៌មាននៃវិទ្យុសម្លេងវៀតណាម។ (រូបថត៖ Le Chi - VOV5)

អ្នកសារព័ត៌មាន VOV៖សូមគោរពឯកឧត្តមឯកអគ្គរាជទូត នាពេលកន្លងមកនេះ ទំនាក់ទំនងមិត្តភាពជាប្រពៃណី កិច្ចសហប្រតិបត្តិការលើគ្រប់វិស័យរវាងវៀតណាមនិងកម្ពុជាត្រូវបានពង្រឹងនិងអភិវឌ្ឍន៍យ៉ាងស៊ីជម្រៅលើគ្រប់វិស័យ។ សូមឯកឧត្តមអាចប្រាប់យើងខ្ញុំ អំពីចំណុចលេចធ្លោនៃទំនាក់ទំនងវៀតណាម-កម្ពុជានៅពេលបច្ចុប្បន្ននេះ បាទ!

ឯកឧត្តមឯកអគ្គរាជទូត៖ “ចំណុចលេចធ្លោបំផុតគឺថា នៅពេលដែលពិភពលោកទាំងមូលប្រឈមនឹងកូវីដ-១៩ ប្រទេសយើងទាំងពីរកម្ពុជា-វៀតណាមបានពួតដៃគ្នាប្រកបដោយប្រសិទ្ធភាពក្នុងការទប់ស្កាត់និងលុបបំបាត់ការរីករាលដាលនៃជម្ងឺកូវីដ-១៩។ ប្រទេសយើងទាំងពីរបានជួយគ្នាទៅវិញទៅមក ទាំងលើគ្រប់វិស័យតាមរយៈកាណាល់ទំនាក់ទំនងរដ្ឋាភិបាល បក្ស និងប្រជាជនយើបានជួយគ្នាទៅវិញទៅមក។ យើងមានទាំងរូបភាពគាំទ្រទាំងខាងសម្ភារៈបរិក្ខារពេទ្យ ថវិកានិងកម្លាំងស្មារតី។

ចំណុចទី២ នាពេលថ្មីៗនេះ ប្រទេសយើងទាំងពីរបានសហការបានយ៉ាងល្អក្នុងការរៀបចំឲ្យមានការអភិវឌ្ឍកិច្ចប្រជុំនៅតាមព្រំដែនរវាងប្រទេសទាំងពីរ។ ទោះបីក្នុងស្ថានភាពកូវីដ-១៩ក៏ដោយ យើងនៅតែសម្រេចបានក្នុងកិច្ចប្រជុំជាច្រើន សំដៅស្វែងរកវិធីដើម្បីអភិវឌ្ឍបណ្ដាខេត្តនៅតាមព្រំដែនឲ្យសមស្របទៅតាមអ្វីៗដែលជាទិសដៅប្រកបដោយប្រសិទ្ធភាពនិងខ្ពង់ខ្ពស់បំផុតរបស់ថ្នាក់ដឹកនាំនៃប្រទេសទាំងពីរ ធ្វើយ៉ាងណាអភិវឌ្ឍតំបន់ព្រំដែនរបស់យើងទាំងពីរជាតំបន់ព្រំដែនសន្តិភាព ស្ថិរភាព សហប្រតិបត្តិការនិងអភិវឌ្ឍ។ យើងបានឈានដល់ការបោះបង្គោលព្រំដែនគោករវាងប្រទេសយើងទាំងពីរបានរហូតដល់៨៤%ហើយយើងកំពុងតែឈានទៅការបង្ហើយការងារនៅសេសសល់។

ចំណុចទី៣ ប្រទេសយើងទាំងពីរមានការអភិវឌ្ឍខ្លាំងក្លាទោះបីក្នុងស្ថានភាពកូវីដ-១៩ក៏ដោយ គឺគ្រប់វិស័យរបស់យើងបានសហការគ្នាយ៉ាងរឹងមាំថែមទាំងបាន ជួយគ្នាទៅវិញទៅមក។ ពាក់ព័ន្ធដល់ការងារសេដ្ឋកិច្ច សម្ដេចតេជោនាយករដ្ឋមន្រ្តីនិងឯកឧត្តមអគ្គលេខាធិការបក្ស Nguyen Phu Trong បានឯកភាពគ្នាក្នុងកិច្ចស្ទនាតាមទូរស័ព្ទថា ធ្វើយ៉ាងណាលើកកំពស់ទំហំពាណិជ្ជកម្មដល់កម្រិតមួយដែលពីមុនមិនធ្លាប់មានទាល់តែសោះ។

ចំណុចទី៤គឺការសហការក្នុងការបណ្ដុះបណ្ដាលធនធានមនុស្សនិងការផ្សព្វផ្សាយពីចំណងសាមគ្គីភាពរវាងប្រទេសទាំងពីរ។ ខាងកម្ពុជាបានទទួលបណ្ដុះបណ្ដាលនិស្សិតវៀតណាមដែលទៅសិក្សាវប្បធម៌ក៏ដូចជាភាសានៅកម្ពុជា។ ដោយឡែកខាងវៀតណាមក៏បានផ្ដល់អាហារូបករណ៍សម្រាប់ការបណ្ដុះបណ្ដាលធនធានមនុស្សកម្ពុជាផងដែរ គឺយើងមាននិស្សិតនិងសិក្ខាកាមយោធាមកសិក្សានៅវៀតណាមជាច្រើន ពិសេសគឺធនធានមនុស្សខាងសុខាភិបាល ចូលរួមចំណែកក្នុងការអភិវឌ្ឍប្រទេសកម្ពុជា។

ចំណុចទី៥គឺពាក់ព័ន្ធនឹងការអភិវឌ្ឍ។ ថ្មីៗនេះ ប្រទេសយើងទាំងពីរក៏ដូចជាប្រទេសអាស៊ានបានឈានដល់ចំណុចមួយគឺការកសាងសេដ្ឋកិច្ចឡើងវិញក្រោយវិបត្តិកូវីដនិងអភិវឌ្ឍប្រកបដោយស្ថិរភាព។ ហើយថ្មីៗនេះ អាស៊ាន ក្នុងនោះមានវៀតណាមជាអ្នករៀបចំ យើងបានធ្វើសន្និសីទមួយហើយឯកភាពគ្នាថា ក្រោយពីកូវីដ តើយើងអាចអភិវឌ្ឍប្រទេសជាតិតាមរបៀបណា។

ចំណុចទី៦ យើងឃើញហើយថា ក្នុងស្ថានភាពបច្ចុប្បន្ននេះ តំបន់អាស៊ានកំពុងតែក្លាយទៅជាចំណុចក្ដៅនៃការប្រកួតប្រជែងរវាងមហាអំណាចធំទាំងពីរ។ ប៉ុន្តែទោះយ៉ាងណាក៏ដោយ ថ្នាក់ដឹកនាំរបស់ប្រទេសយើងទាំងពីរនៅតែរួមសាមគ្គីគ្នា ឯកភាពគ្នាក្នុងទិសដៅមួយដើម្បីប្រជាជននិងប្រទេសយើងទាំងពីរ”។

អ្នកសារព័ត៌មាន VOV៖តើឯកឧត្តមឯកអគ្គរាជទូតមានជំនឿជាក់យ៉ាងណាចំពោះការអភិវឌ្ឍរបស់វៀតណាម? ក្នុងឱកាសដែលបុណ្យតេតប្រពៃណីរបស់ប្រជាជនវៀតណាមជិតមកដល់ហើយ តើឯកឧត្តមចង់ជូនពរប្រជាជនវៀតណាមយ៉ាងដូចម្ដ៉េច?

ឯកឧត្តមឯកអគ្គរាជទូត៖ “ខ្ញុំពិតជាកិត្តិយសខ្លាំងណាស់ហើយក៏ពិតជាមានឱកាសច្រើនណាស់ ព្រោះខ្ញុំបានមកស្នាក់នៅនិងធ្វើការនៅវៀតណាមនេះចំពេលដែលប្រទេសវៀតណាមកំពុងតែរីកចម្រើន។ ប្រជាជនវៀតណាមគ្រប់ស្រទាប់វណ្ណៈរួមដៃគ្នាខ្លាំងណាស់ ហើយមិនដែលមានពេលណាដែលវៀតណាមរីកចម្រើនដូចពេលនេះទេ។ នៅពេលខ្ញុំមកវៀតណាមលើកដំបូង ប្រការដែលងាយមើលឃើញនោះគឺផ្លូវបានចាក់កៅស៊ូឡើងស្អាត។ ថ្មីៗនេះ វៀតណាមបានសម្រេចនឹងធ្វើផ្លូវរថភ្លើងល្បឿនលឿនពីជើងទៅត្បូង។ ខ្ញុំស្ងើចសរសើរ មិនអាចរកពាក្យណាមកបរិយាយឲ្យត្រូវនឹងអ្វីដែលចិត្តខ្ញុំស្ងើចសរសើរទេ។ ហើយវៀតណាមក៏កំពុងតែកសងហេដ្ឋារចនាសម្ព័ន្ធរូបវ័ន្តមួយចំនួននៅភាគខាងត្បូង ជាពិសេសគឺតំបន់ Cuu Long ដូចជាព្រលានយន្តហោះ Long Thanh បណ្ដាផ្លូវហាយវៃនៅខាងនោះ ក៏កំពុងតែធ្វើ ហើយនឹងប្រែក្លាយទីក្រុង Can Tho ទៅជាទីក្រុងពាណិជ្ជកម្មមួយផ្សេងទៀត ធ្វើម៉េចឲ្យមានកំពង់ផែ ផ្លូវល្បឿនលឿន។ ចំពោះការអភិវឌ្ឍសេដ្ឋកិច្ច ខ្ញុំឃើញថា ជីវភាពរបស់ប្រជាជនវៀតណាមក៏កើនខ្ពស់។ ការកើតឡើងនៃស្រទាប់អ្នកមាននិងមធ្យមក៏កើនឡើងដែរ។ ក្រៅពីនោះ ទីផ្សារភាគហ៊ុនរបស់វៀត ណាមកំពុងតែរីកចម្រើនមែនទែនហើយកំពុងតែពេញនិយម។ នៅលើឆាកអន្តរជាតិ កេរ្តិ៍ឈ្មោះរបស់វៀតណាមត្រូវបានទទួលស្គាល់ល្បីខ្ចខ្ចាយ ហើយគេកោតសរសើរ ទទួលស្គាល់វៀតណាមគ្រប់គ្នា គឺវៀតណាមបានក្លាយជាសមាជិកមិនអចិន្រ្តៃយ៍ក្រុមប្រឹក្សាសន្តិសុខអង្គការសហប្រជាជាតិ ហើយបានចូលរួមក្នុងការអភិវឌ្ឍ ការរក្សាសន្តិភាព ក្នុងតំបន់និងលើពិភពលោក។

មហាសន្និបាតបក្សកុម្មុយនិស្តវៀតណាមលើកទី១៣ បានរៀបចំថ្នាក់ដឹកនាំ មានថ្មីមានចាស់ ប៉ុន្តែពួកគាត់ប្រកបដោយថាមពលខ្ពស់ មានចំណេះដឹងខ្ពស់ៗនិងការប្ដេជ្ញាចិត្តខ្ពស់ៗ។ មហាសន្និបាតបក្សលើកទី១៣ក៏បានដាក់ចេញទិសដៅអភិវឌ្ឍវៀតណាមក្លាយទៅជាប្រទេសអភិវឌ្ឍកម្រិតខ្ពស់ ហើយជនបរទេសមួយចំនួនប្រាប់ខ្ញុំថា វៀតណាមដាក់ចេញគោលខ្ពស់ណាស់ តើគាត់អាចសម្រេចបានអត់? ខ្ញុំថា ប្រាកដជាបាន។ ខ្ញុំជឿជាក់ណាស់លើបក្សកុម្មុយនិស្តវៀតណាម រដ្ឋាភិបាលវៀតណាម ថ្នាក់ដឹកនាំវៀតណាមទាំងឡាយ អនាគតរបស់វៀតណាមគឺភ្លឺស្វាងណាស់។

អញ្ចឹងក្នុងឱកាសដែលថ្ងៃមុខនេះនឹងចូលដល់បុណ្យតេតប្រពៃណីជាតិវៀតណាម ខ្ញុំសូមជូនពរដល់ប្រជាជនវៀតណាមទាំងអស់ បក្សកុម្មុយនិស្តវៀតណាម រដ្ឋាភិបាលវៀតណាម ថ្នាក់ដឹកនាំវៀតណាមទាំងអស់ សូមឲ្យឆ្នាំថ្មីនាំនូវលាភសំណាងថ្មី ជោគជ័យថ្មី ត្រចះត្រចង់ដល់ប្រទេសវៀតណាម ប្រជាជនវៀតណាមគ្រប់ស្រទាប់វណ្ណៈទាំងអស់។ ខ្ញុំជឿជាក់ថា នៅពេលដែលវៀតណាមរីកចម្រើន នឹងនាំឲ្យកម្ពុជារីកចម្រើនដូចគ្នា ព្រោះប្រទេសយើងជាប្រទេសភូមិផងរបងជាមួយ ជាប្រទេសបងប្អូន ដូច្នេះប្រទេសយើងនឹងសហការជាមួយគ្នា លូតលាស់ជាមួយគ្នា ដើម្បីផលប្រយោជន៍របស់ប្រជាជនយើងទាំងពីរ ប្រទេសយើងទាំងពីរ”។

អ្នកសារព័ត៌មាន VOV៖សូមអរគុណឯកឧត្តមឯកអគ្គរាជទូត៕