“រាត្រីពិសិដ្ឋនៅលើភ្នំ Nghia Linh៖ ដំណើរត្រឡប់ទៅរកឫសគល់”

ដំណើរត្រឡប់ទៅរកឫសគល់វិញ ជាកន្លែងដែលជនជាតិវៀតណាមម្នាក់ៗ អាចរកឃើញការតភ្ជាប់ដ៏ពិសិដ្ឋជាមួយបុព្វបុរស។ ដំណើរកម្សាន្តពេលរាត្រីនៅវិហារស្ដេច Hung ដ៏ពិសិដ្ឋ មិនត្រឹមតែជាផលិតផលទេសចរណ៍ថ្មីមួយប៉ុណ្ណោះទេ ថែមទាំងក៏ជាបទពិសោធន៍នៃអារម្មណ៍ទៀតផង ដែលប្រវត្តិសាស្ត្រ ស្មារតី និងបច្ចុប្បន្នកាល ប្រសព្វគ្នានៅក្នុងបរិយាកាសដ៏ពិសិដ្ឋនៃទឹកដីព្រះបិតាជាតិ Phu Tho។

ក្រោមពន្លឺព្រឹមៗ ភ្ញៀវទេសចរមួយក្រុមៗដែលកាន់ចង្កៀងគោម ដើរយឺតៗឡើងភ្នំ Nghia Linh ឆ្លងកាត់តាមវិហារក្រោម វិហារកណ្តាល វិហារខាងលើ ហើយបញ្ចប់នៅវិហារ Gieng ក្នុងដំណើរពិសិដ្ឋដែលភ្ជាប់ទៅនឹងជំនឿគោរពបូជាស្តេច Hung។ អ្នកស្រី Nguyen Thi Thuy Lan ជាអ្នកទេសចរម្នាក់មកពីទីក្រុងហាណូយ បានចែករំលែកថា៖

“ខ្ញុំធ្លាប់បានទៅទស្សនាវិហារស្ដេច Hung ច្រើនដងហើយ ប៉ុន្តែនេះជាលើកដំបូងដែលខ្ញុំបានចូលរួមដំណើរកម្សាន្តពេលរាត្រីនៅទីនេះ។ ដោយបានឆ្លងកាត់បទពិសោធន៍ដោយផ្ទាល់ ខ្ញុំមានអារម្មណ៍ថា ដំណើរកម្សាន្តនេះមានភាពច្នៃប្រឌិតជាច្រើន ហើយនាំមកនូវអារម្មណ៍ជាច្រើនដល់ខ្ញុំផងដែរ។ ខ្ញុំគិតថាខេត្ត Phu Tho បាននាំមកនូវប្រការដ៏ថ្មីថ្មោងជាច្រើនជាមួយនឹងដំណើរកម្សាន្តពេលរាត្រីនេះ”។

មិនត្រឹមតែជាការទស្សនាធម្មជាតិប៉ុណ្ណោះទេ ដំណើរកម្សាន្តពេលរាត្រីនៅវិហារស្ដេច Hung ត្រូវបានរចនាឡើង ជាដំណើរកម្សាន្តខាងវិញ្ញាណដ៏ពេញលេញមួយ។ អ្នកទស្សនា មិនត្រឹមតែបានស្ដាប់រឿងរ៉ាវប្រវត្តិសាស្ត្រអំពីការស្ថាបនាប្រទេសជាតិប៉ុណ្ណោះទេ ថែមទាំងចូលរួមដោយផ្ទាល់ក្នុងពិធីអុជធូបក្នុងបរិយាកាសរាត្រីដ៏ស្ងប់ស្ងាត់ទៀតផង។

ពន្លឺភ្លើងត្រូវបានរៀបចំយ៉ាងប្រណិត គ្រប់ល្មមដើម្បីបំភ្លឺផ្លូវ ប៉ុន្តែនៅតែរក្សាបាននូវបរិយាកាសដ៏ឧឡារិកនិងពិសិដ្ឋនៃកេរ្តិ៍ដំណែល។

នៅលើកំពូលវិហារខាងលើ នៅពេលសម្លឹងមើលទេសភាពព្រៃភ្នំខាងក្រោម មនុស្សជាច្រើនមិនអាចលាក់អារម្មណ៍រំជួលចិត្តរបស់ខ្លួនបានទេ។ ពីព្រោះ វាមិនមែនគ្រាន់តែជាទេសភាពដ៏ស្រស់ស្អាតប៉ុណ្ណោះទេ ថែមទាំងជាអារម្មណ៍នៃការតភ្ជាប់ជាមួយឫសគល់ទៀតផង។ អ្នកស្រី Nguyen Thi Thanh Hoa ជាអ្នកទេសចរមកពីទីក្រុងហាណូយ បានចែករំលែកអារម្មណ៍ថា៖

"នេះជាលើកដំបូងដែលខ្ញុំចូលរួមដំណើរកម្សាន្តពេលរាត្រី ទោះបីជាខ្ញុំបានទៅទស្សនាពេលថ្ងៃច្រើនដងក៏ដោយ។ ដោយបានឆ្លងកាត់បទពិសោធន៍នៃដំណើរកម្សាន្តពេលរាត្រីនេះ ខ្ញុំបានសួរខ្លួនឯងថា ហេតុអ្វីបានជាខ្ញុំមិនធ្វើរឿងនេះពីមុន ព្រោះពេលរាត្រីមានអារម្មណ៍ដ៏ស្ងប់សុខ ហាក់ដូចជាក្ដីកង្វល់ទាំងអស់ និងភាពអ៊ូអរនៃជីវិតត្រូវបានទុកចោលនៅពីក្រោយ។ ការធ្វើដំណើរកម្សាន្តពេលរាត្រីបែបនេះធ្វើឱ្យខ្ញុំមានអារម្មណ៍កាន់តែជិតស្និទ្ធនឹងទឹកដីបិតាជាតិ និងនាំមកនូវអារម្មណ៍លំហែកាយណាស់”។

ដំណើរកម្សាន្តពេលរាត្រីត្រឡប់ទៅរកឫសគល់នៅវិហារស្ដេច Hung ត្រូវបានខេត្ត Phu Tho ស្តារនិងអភិវឌ្ឍន៍ឡើងវិញក្នុងឆ្នាំ២០២៦ ហើយនឹងក្លាយជាចំណុចលេចធ្លោមួយនៅក្នុងព្រឹត្តិការណ៍សែនខួបស្ដេច Hung។

ផលិតផលនេះមិនត្រឹមតែបង្កើតបទពិសោធន៍ថ្មីៗប៉ុណ្ណោះទេ ថែមទាំងរួមចំណែកដល់ការបង្កើតនិន្នាការទេសចរណ៍ពេលរាត្រី ដោយជួយពង្រីករយៈពេលស្នាក់នៅ និងចែកចាយលំហូរភ្ញៀវទេសចរដោយសមហេតុផលជាងមុន។ លោក Bui Xuan Truong នាយករងមន្ទីរវប្បធម៌ កីឡា និងទេសចរណ៍ខេត្ត Phu Tho បានសង្កត់ធ្ងន់ថា៖

“ដំណើរកម្សាន្តពេលរាត្រីត្រូវបានរៀបចំឡើងដើម្បីអភិវឌ្ឍន៍សេដ្ឋកិច្ចពេលរាត្រី បង្កើតលក្ខខណ្ឌសម្រាប់ភ្ញៀវទេសចរមកទស្សនាបេតិកភណ្ឌនៅក្នុងបរិយាកាសថ្មី ព្រមទាំងរួមចំណែកផ្សព្វផ្សាយតម្លៃវប្បធម៌នៃទឹកដីបិតាជាតិផងដែរ”។

ការឆ្លងកាត់បទពិសោធន៍នៃដំណើរកម្សាន្តពេលរាត្រីនៅវិហារស្ដេច Hung គឺជាដំណើរមួយដែលគ្មានភាពអ៊ូអរ គ្មានការអួតអាង ប៉ុន្តែបន្សល់ទុកនូវចំណាប់អារម្មណ៍យូរអង្វែងសម្រាប់មនុស្សម្នាក់ៗ។

ក្នុងជីវភាពសម័យទំនើប នៅពេលដែលមនុស្សកាន់តែប្រញាប់ប្រញាល់នោះ គឺដំណើរកម្សាន្តពេលរាត្រីដ៏ស្ងប់ស្ងាត់នៅលើភ្នំ Nghia Linh ប្រហែលជាពេលវេលាដ៏កម្រសម្រាប់មនុស្សម្នាក់ៗ ដើម្បីឈប់សម្រាក ផ្ទៀងស្តាប់ និងយល់បន្ថែមអំពីឫសគល់របស់ខ្លួន។

ដំណើរកម្សាន្តពេលរាត្រីនៅវិហារស្ដេច Hung មិនគ្រាន់តែជាផលិតផលទេសចរណ៍ប៉ុណ្ណោះទេ ថែមទាំងជាដំណើរត្រឡប់ទៅរកឫសគល់ ការចងចាំ និងខ្លួនផ្ទាល់ផងដែរ៕